1 Siswi hwàikwa tsare ni K'irisito kwa hwenderere kukala tsare. Ndo mwimwi imani kudina muts'iuye kahiri kufungwa ni ugulwa uhumiki. 2 Gahegereni masikiro gaga maneno gangu! Mimi P'aulo ninamwambira kukala, mwimwi muchikubali kubit'wats'i kwa muphokerwe ni Mulungu dza enye haki, bee go ga kuhendwa ni ye K'irisito k'agandamunufaisha kamare. 3 Ninamwambira kahiri chila mut'u mino kukala, mut'u yendekubali kubit'wats'i, h'aya ni seti atuwe malagizo gosi ga Shariya. 4 Yeyosi kati yenu ahenzaye kuphokerwa ni Mulungu dza mwenye haki kwa kutuwa Shariya, naamanye kukala, wàtosa uhusiyanowe na K'irisito, na k'aonerwa mbazi kahiri ni Mulungu. 5 Mimi ninaamba vivi kwakukala, Roho wa Mulungu unahuhenda hulolere na kanuni kukala, hundaphokerwa ni Mulungu dza enye haki kwa kumukuluphira K'irisito. 6 Maana, at'u achikala anamukuluphira K'irisito Jeso, k'akuna tafauti ya yebit'wats'i na ye ariye k'abit'irwets'i. Ra halahala ni kumukuluphira yiye, na malairiroge ni menzwa. 7 Mwimwi mwàkala munaenderera kukula chiroho t'ot'ot'o. Ndo ni ani yemulemba ta muchiricha kutuwa ujeri? 8 Bee, mafunzo ga ao a kumulemba k'agalaa kwa Mulungu amwihaye mukale anae. 9 Ndo dzimanyirireni mwimwi, maana, gago ganagot'a dza hamira ch'ach'e yikoleavyo unga wosi yitsanganywapho na unga wa nganu. 10 Ela ta vivyo, ninakuluphira Bwana kukala, mwimwi mundakala na ono dza ro rangu, na yiye amwangaishaye akili undatiywa akili ni Mulungu ta akakala ni ani! 11 Enehu a chijeso, mimi nami kala nicheri kufunza at'u kukala, ni seti abit'wets'i ndipho aphokerwe ni Mulungu dza enye haki, bee ningari ts'ihenderwa mauku ni o Ayahudi. Kala mimi nami nicheri kufunza gago, ta ts'isumurira dzulu ya musalaba, bee ningari kukala ts'iakosa o Ayahudi. 12 At'u ao amuyugao na maneno ga kubit'wats'i, ninaaza kala anahendadzitosa tsetsetse! 13 Enehu a chijeso, mwimwi mwàihiwa mukale tsare, ela ts'ikuhwaleni ko kukala kwenu tsare mukakuhenda chisingwa cha kuchimizira t'amaa zenu za chimwiri, its'iphokala, hikirananihikiranani kwa kuhenzana. 14 Maana, ta yo Shariya yosi yigwiririra lagizo mwenga rambaro, "Muhenze munzio dza vyo udzihenzavyo uwe mwenye." 15 Ela muchikala mundahakanana, na kutsunana ukati wosi, bee dzimanyirireni muts'idze mukahangamizana. 16 Ndo ninamwambira mino, mwimwi mazagazi genu gosi nagalongozwe ni Roho wa Mulungu, na phapho ndipho mwimwi k'amundatuwa t'amaa za chimwiri. 17 Maana, gahenzwago ni t'amaa za chimwiri ndigo gots'ohenzwa ni Roho wa Mulungu. Na gahenzwago ni Roho wa Mulungu, ndigo gots'ohenzwa ni t'amaa za chimwiri. Ndo ye Roho wa Mulungu, na t'amaa za chimwiri, vinapingana kwa ta muts'iidime kuhenda go mugahenzago. 18 Na kwahivira munalongozwa ni Roho wa Mulungu, k'amu ts'ini ya Shariya. 19 Mahendo ga t'amaa za chimwiri k'agatangwatangwa. Gago ni uzinzi, mahendo makolo, udiya, 20 kuvoya milungu ya vinyago, utsai, kumenana, kugomberana, kulaiwa ni matso kwa vya at'u, kutsukirwa kwenda, moyo wa kudziunula, mutsamukano, kusikizana na o akubalio go gako tu bahi, 21 chidzitso, unwadzi, mahendo makolo gosi gahendwago shuhulini za ataifa, na manjine dza gaga. Bee, ninamukanya mino dza vyomukanya kare phokala hu hosini kukala, at'u ao endererao kuhenda maneno gaga, k'aandaphenya Ufalumeni kwa Mulungu. 22 Ela galaviwago ni Roho wa Mulungu ni kuhenzana, raha, reri, kuvumirira, mbazi, kuhenda madzo, kukuluphirika, 23 up'ore na kudzidinisa kwa ta uts'ihende dambi, na maneno gago hakika k'aga chinyume cha shariya. 24 At'u amukuluphirao K'irisito Jeso àgaulaga kwa kugakot'a misumari musalabani go ga chimwiri na t'amaaze mbii. 25 Kwahivira siswi hwàhewani uzima uphya wa kare na kare ni Roho wa Mulungu, nahumutuweni yiye mwehu mazagazini. 26 Na nahuts'idziunuleni, huts'inyet'eraneni, hebu konerana chidzitso.
