1 Enehu a chijeso, mwimwi Mulungu wàmuhenda mukale na uzima uphya wa kare na kare dza arivyomufufula Jeso K'irisito kulaa kuzimu. Ndo tamanini kusagala vyo at'u a dzulu mulunguni ahenzwavyo kusagala, kuriko Jeso K'irisito usegere upande wa kulume wa Mulungu unatawala. 2 Maazo genu nagakale dzulu ya mazagazi ga ko mulunguni, ela ts'i higa mazagazi mai ga phapha duniani. 3 Maana, go mazagazi genu ga p'indi gàfa na vivi kwa Mulungu, munasagala mazagazi maphya na Jeso, ela at'u k'aaidima kugaona. 4 Ela Jeso K'irisito ndiye amup'aye uzima uphya wa kare na kare, na ukati achiuya phapha duniani, mwimwi namwi mundakala phamwenga naye, na mundametameta chinguvu za chimulungu dza yiye mbere za at'u osi. 5 Enehu a chijeso, richani kamare mai gosi gahendwago phapha duniani, dza uzembe, kuhendana ache chinyume cha vyopangwa ni Mulungu, t'amaa za kuhenda mai, na kulavira matso vya at'u, kuriko ku sawa-sawa na kuvoya milungu ya vinyago. 6 Mai gago ndigo gamutsukizago Mulungu, na kwa vivyo, undaatiya akili o agahendao. 7 Mwimwi namwi p'indi phokala mucheri kutawalwa ni zizi t'amaa mbii, mwàgahenda gago. 8 Ela vivi garicheni kamare madambi gosi. Mwimwi muts'itsukirwe, muts'imene at'u, muts'imuhadze mut'u na mai, muts'ihakane kamare, 9 na muts'ilembane, kwakukala, vyokala p'indi, na gokala muchigahenda mwàgaricha. 10 Mwimwi vivi mu vyumbe viphya, na Mulungu ariye ndiye Muumbi, unakaza kumuhenda mukale dza yiye kwa mwidime kumumanya jeri. 11 Ndo kwakukala, mwimwi mu vyumbe viphya vya Mulungu, k'akuna kahiri ga yuno ni mut'u wa kabila rinjine, hebu ni Muyahudi, yuno wàbit'wats'i, hebu k'abit'irwets'i, yuno ni mujeni, hebu yuno k'adzangwe kwenderera, yuno ni mugulwa muhumiki, hebu u tsare. Jeso K'irisito u ndani mwa chila amukuluphiraye, na ndiye chila chit'u. 12 Ajeso asena, mwimwi namwi mu at'u a Mulungu, na yiye unamuhenza, na wàmutsagula kwa mukale at'ue. Ndo sambi kalani na myoyo ya mbazi, at'u adzo, arumwengu, ap'ore, na avumiriri. 13 Na mut'u akoswapho ni munziwe, naamuvumirire na amusamehe. Mwimwi mwàsamehewa ni Bwana, na kwa vivyo sameheanani namwi. 14 Gago gosi gahendeni, na dzuluye muhenzane. Kuhenzana ndiko kugwizanyako at'u ta akakala amwenga jeri. 15 Jeso K'irisito ndiye amuhendaye musagale phamwenga na reri, na reri yiyo nayimwidimise kwamula kuhenda muhenzwago muhende, kwakukala, Mulungu wàmwiha phamwenga kwa mukale at'u amwenga asagalao chireri. Chisha, kalani na mumvera kwa Mulungu. 16 Neno ra K'irisito narikale mwenu myoyoni ukati wosi. Funzanani na mwambirane maneno garigo k'amuhenzwa mugahende na hekima yosi. Imbani mira ga Maandiko ga Mulungu, p'ambiyo na mira ya kumulika Mulungu na myoyo yenu yosi, chisha mukale na mumvera, na phapho mundaumanya jeri o udzumbe. 17 Genu gosi gondohenda na gondogomba, nagakale ga chikumukuluphira Bwana Jeso vyo mwendereravyo kumulavira mumvera Baba Mulungu kuchirira Jeso. 18 Mwi ache, dziikeni ts'ini za alume enu, kwakukala, vivyo ndivyo ahenzavyo Bwana. 19 Mwi alume namwi, mwimwi ahenzeni ache enu, na muts'iasuruphire. 20 Mwi ana, mwimwi aogopheni avyazi enu kwa chila neno, kwakukala, vivyo vinamuhamira Bwana. 21 Mwi avyazi namwi, mwimwi ts'iagombereni-gombereni ana enu akosapho kakosa kokosi, kwakukala, gago ganaidima gakaahenda afe moyo. 22 Mwi agulwa ahumiki, mwimwi aogopheni ao ario chimwiri ni aguli enu ukati wosi, na muhende kazi na moyo umwenga, ts'i ukati munalolerwa ni o aguli enu tu, kwa kuhenza kulikwa. Ela aogopheni na moyo umwenga kwakukala, munamogopha Bwana. 23 Muchikala munahenda kazi yoyosi, yihendeni vyenu vyosi mwidimavyo dza kwamba munamuhikirahikira Bwana, ela ts'i adamu. 24 Mwimwi nimumanye kukala, Bwana Jeso K'irisito ndiye yendemuripha phondomup'a chirat'u choalaga kwaikira at'ue, kwakukala, yiye ndiye mumuhikirayehikiraye. 25 Ela ahendaye mai, undatiywa akili kutuwirizana na maige gogahenda, kwakukala, Mulungu k'alola cheo cha mut'u.
