1 T'imoti, uwe uts'imuchemere mutumia yeyosi, ela mwambire t'ot'ot'o dza abayo. Atana anzio aambiret'o dza nduguzo, 2 achet'u dza amezo, na asichana nao dza nduguzo a chiche phots'o phyuphyu kamare. 3 T'imoti, hakikisha magungu ots'o aroromi, anaroromwat'o na kwishimiwa. 4 Ela gungu mwenye ana, hebu adzukulu, ao anae hebu o adzukulue ndio ahenzwao akale a mwanzo konyesa kukala, anamuhikirahikira Mulungu kwa kwaroroma t'ot'ot'o avyazi ao, dza ao arivyororomwa. Maana, neno riro rinamuhamira Mulungu. 5 Muchet'u gungu yets'e muroromi, na ariye k'arichirirwe mbeko yoyosi, bee ulola Mulungu jeri amurorome, na yiye bee unaenderera na mavoyo usiku na mutsana. 6 Ela muchet'u gungu yets'ezuliya t'amaaze, bee chiroho wàfa kare ta aripho chimwiri u moyo. 7 A-aambire akuluphiri osi kuko kukala, aaroromet'o at'u ao ats'idze akatsekwa na akalaumiwa. 8 Mut'u yeyosi ariye k'aaroromat'o at'ue, na kamwe arat'u a kwavyala mwenye, bee wàlaa Jeso, na ni mui muno kuchira mut'u ariye k'akuluphira. 9 T'imoti, gungu ariye unaidima kwandikishwa aroromwe ni kanisa, bee niakale uhenda myaka mirongo mihandahu (60) na kwenderera. Chisha, unahenzwa akale ariphohwalwa, wàmanya ye mulumewe tu bahi, 10 na ngumaye yikale ni mbidzo. Nichigomba vivyo ni ninaamba, akale ni muchet'u yerera anae t'ot'ot'o, yekala una karibu, yeahikirahikira ajeso anzie chirumwengu, yeaviza at'u enye ndai, na ariye wàkala udzidzilavira tsetsetse kuhenda maneno madzo gosi. 11 Ela magungu atsanga-atsanga naats'iroromwe ni kanisa. Maana, ta akadzilavira tsetsetse kwa Jeso, chidzako o anashindwa vivyo ni t'amaa zao za mwiri ta aaze kuhwalwa. 12 Ahendapho vivyo, bee ni kukala anadzihenda enye alamulwe ni alongo kwa àkala avunza chilagane chao chondokala àlaga. 13 Na chisha achandikishwa, nikudzibaza kukala akaha, akatuwa wa zungulu-zungulu tu. Na dzulu ya gago, o nikwanza kutsuna at'u, na kuphenyerera maneno ga at'u anjine kuno achigomba maneno gots'owirya kugombwa. 14 Ndo ninaahenza magungu atsanga-atsanga ahwalwe avyale ana, na atsunze madzumba gao t'ot'ot'o, kwa ta adawa a Bwana wehu Jeso ats'ipate chisingwa cha kuhuhadzira. 15 Ndo naahwalwe magungu atsanga-atsanga kwakukala, ta anjine àgaluka kare anatuwa ga Shetani. 16 Kuchikala kuna muchet'u yeyosi wa chijeso ariye kwakwe mudzini kuna magungu, yiye naarorome mwenye. Muzigo uo naats'iurichire kanisa, kwa ta kanisa riarorome magungu ots'o aroromi kamare, na ots'o mbeko. 17 Vilongozi alongozao kanisa t'ot'ot'o, anawirya kuriphwat'o na kwishimiwa muno. Kamwe arat'u ahendao kazi ya kusumurira na kufunza neno na chadi, ndio ahenzwao ahenderwe gaga. 18 Maana, ta Maandiko ga Mulungu ganaamba, "Urimapho kw'ekw'e na ng'ombe, uts'izifunge milomo." Na chisha manjine ganaamba, "Muhendikazi unawirya kuriphwa mushaharawe." 19 Achikala mut'u una chiriro na chilongozi wa kanisa, muphokerere tu achikala ukudza na mashaidi airi, hebu ahahu. 20 At'u aendererao kuhenda dambi achemere mbere za kanisa, na riro rindaakanya ta ajeso anjine osi aogophe. 21 Vivi nikwandikiravyo malagizo gaga, Mulungu, Jeso K'irisito, na malaika atakatifu ni mashaidi gangu. Ndo ninakulagiza ugatuwe malagizo gaga phots'o ubaguzi, na uts'ilamule at'u phots'omanya ujeri. 22 Mut'u uchikala unahenza umutsagule akale chilongozi wa kanisa, anza kumuuzira-uzira kwa chiwango mwanzo, ndipho udze umubandikire mikono. Na uts'idzitiye kwenye dambi za anjine, its'iphokala, dziike mutakatifu. 23 T'imoti, uwe ndaniyo yinakuyuga, na una makongo manjine gakubit'ago chisichisi. Ndo uts'inwe madzi hicheye, ela kala uchinwa divai ch'ach'e-ch'ach'e nayo, na ndipho gago k'agandakubit'a chisichisi. 24 Dambi za at'u anjine zi matsoni, na zinaonyesa kukala, ao ni seti alamulwe, ela anjine dambi zao zimanyikana nyumaze. 25 Ndo mahendo madzo ga at'u anjine nago, gago ga matsoni, na ta gots'ooneka vivi, chisha k'agandaenderera kufitsika.
