1 Ela mimi nàkala ts'iidima kugomba namwi dza nigombavyo na at'u ario a chiroho, mwimwi enehu a chijeso. Mimi yànibidi nigombe namwi dza at'u ario ni atsanga Jesoni, na acherio kusagala chimwiri. 2 Ndo mimi yànibidi nimurise muswa ela ts'i kumurisa wari kwakukala, ukati uo mwàkala k'amwidima kurya wari, na ta vivi chisha, k'amwidima kurya wari vivyo, 3 maana, mucheri kusagala chimwiri. Mwimwi munashindana na munapigana. Ndo, vyo bee ts'iko konyesa kukala mu chimwiri jeri, na munahenda go ga chidunia? 4 Maana, anjine kati yenu anaamba, "Sino hu anafunzi a P'aulo," na anjine o anaamba, "Sino hwa Apolo," ndo, vyo bee ts'iko konyesa mu chimwiri jeri? 5 Na kwani, mino P'aulo na ye Apolo hunani sana? Siswi hu ahendikazi a Mulungu tu hurio Mulungu wàhuhumira kumuhenda mwimwi mumukuluphire Jeso K'irisito, na chila mumwenga wehu, unahenda kazi yohewa ni Bwana. 6 Mimi ndimi yephanda, Apolo ye achimwagira madzi yo mimera; ela Mulungu ndiye yeyikuza mimera yiyo. 7 Ndo mimi muphandi na ye mumwagiri wa madzi, bee ts'iswi a halahala. Wa halahala ni Mulungu tu kwakukala, ndiye ayikuzaye yo mimera. 8 Mimi muphandi na ye mumwagiri, bee lengo rehu ni mwenga, its'iphokala tu chila mumwenga wehu undanoswa kutuwirizana na kaziye yoyihenda. 9 Ndo mimi na yiye hu ahendikazi a Mulungu, na mwi namwi munga dza munda wa Mulungu na nyumba yijengwayo ni ye Mulungu vivyo. 10 Ndo mimi nàhumira o widimi ohewa ni Mulungu, na dza fundi wa nyumba jeri, nàtsimba musinzi, na vivi at'u anjine anaunuriza kujenga pho musinzini, ela chila mut'u naadzimanyirire na vyo ajengavyo. 11 Maana, Mulungu wàkala udzimwika kare Jeso K'irisito hicheye tu kukala o musinzi. Ndo k'akuna mut'u aidimaye kutsimba musinzi unjine. 12 At'u anaunuriza kujenga pho musinzini na dahabu, feda hebu mawe ga gali muno. Anjine o anahumira mihi, nyasi hebu mikangaga. 13 Ela kazi ya chila mut'u yindaonewa lwazu-lwazu yo ts'iku yiriyo Jeso K'irisito undauya kudzalamula. Maana, ts'iku yiyo kundakala na moho ondochirira kazi ya chila mut'u ta yimanywe udzowe. 14 Ndo yendekala udziunuriza kujenga pho musinzini na miyo yiriyo k'ayiphya, undanoswa ni Mulungu. 15 Ela ye ariye kaziye yindaphya, h'aya bee ye undakala wàtsoka bule, na ta aripho ye mwenye undativywa, ela undakala dza mut'u yedzezeruka. 16 Vino bee mukale k'amumanya mwimwi kukala munga dza hekalu ra Mulungu, na Rohowe unasagala mwenu ndani? 17 Ndo mut'u abanangaye hekalu ra Mulungu, Mulungu naye undamuhangamiza mut'u yiye kwakukala, hekalu ra Mulungu ni takatifu, na mwimwi ndimwi murio mu hekalure. 18 Na mut'u naats'idzilembe. Chikala phana mut'u kati yenu adzonaye una hekima phapha duniani, bee ni baha myazo yiyo yimulae mut'u yiye, na adziike dza muzuzu, na ndipho undakala na hekima jeri. 19 Maana, chirat'u chonewacho ni at'u a chidunia kukala ni hekima, kwa Mulungu ni uzuzu. Na chisha, Maandiko ga Mulungu ganaamba, "Bwana wagwira at'u adzonao ana hekima mo mwao ulachuni." 20 Na chisha, Maandikoge manjine ganaamba, "Bwana unamanya kukala, myazo ya at'u adzonao ana hekima, k'ayina tende." 21 Ndo mut'u naats'ihende ngulu kwa kukala mwanafunzi wa mut'u fulani. Maana, chila mut'u ni wenu. Kala mimi P'aulo, Apolo hebu P'etero, na chila chit'u nacho ni chenu vivyo, kala urumwengu uu, mazagazi na chifo, maneno ga vivi na gadzago, gosi ni genu. 23 Na mwimwi enye mu at'u a Jeso K'irisito, na Jeso K'irisito naye ni wa Mulungu.
