1 Enehu a chijeso, vivi ninahenza nimukumbikize yiyat'u Nguma Mbidzo niriyomusumurira, namwi muchiyiphokera, na munaenderera kuyikuluphira jeri-jeri. 2 Na muchenderera kuyikuluphira jeri-jeri vivyo yiyo Nguma Mbidzo niriyomusumurira, bee yindamutivya. Ela muchituwa manjine, mundakala mwàkuluphira bule. 3 Uo udzumbe omusumurira mwimwi, mimi nami nàhendauphokera, na una tende muno. Udzumbe wenye ni kukala, Jeso K'irisito wàfa kwa dzulu ya madambi gehu, dza Maandiko gaambavyo. 4 Achizikwa, na ts'iku ya hahu achifufulwa kulaa kuzimu dza Maandiko gaambavyo. 5 Na udzumbe unaenderera kwamba, yiye wàmulairira P'etero, na achidzaalairira anafunzie kumi na airi. 6 Ndo chisha, achidzaalairira anafunzie okala achira magana matsano (500) ukati umwenga, na anji ao acheri azima, ela anjine achache àfa. 7 Malai ga phapho, wàmulairira Jakobo, na chisha achidzaalairira ahumwae osi a widimi. 8 Musindikizowe, Jeso K'irisito wànilairira mimi. Na mimi ninga dza mut'u yehendaryomorywa 9 kwakukala, kati ya ahumwa a Jeso osi a widimi, mimi ndimi wa ts'ini kamare. Na chisha, ta ts'iwirya kwihiwa muhumwa wa widimi wa Jeso, kwakukala, nàahendera mauku at'u a Mulungu. 10 Ela Mulungu wànonera mbazi vivyo, na ta ts'iwirya, na gago ndigo ganihendago nikale vivi nirivyo. Na gago k'agakalire ga bule, kwakukala, nidzihenda kazi bomu muno kuchira ao ahumwa a Jeso a widimi anjine osi. Ela ta vivyo, yo kazi nàyihenda, kwakukala, Mulungu u phamwenga nami, ela ts'iyihendere kwa widimi wangu mwenye tu. 11 Ndo k'avijalisha ukale udzumbe uo nàusumurira mimi, hebu o ahumwa a widimi a Jeso anjine, maana, hosini husumurira uo udzumbe umwenga, nao ndio muukuluphirao mwimwi. 12 Bee k'amona enehu a chijeso, udzumbe huusumurirao siswi ni kwamba, Mulungu wàmufufula Jeso K'irisito kulaa kuzimu. Ndo anjine kati yenu aambadze kukala, at'u achifa k'aafufuka? 13 Ichikala vyo aambavyo ao ni jeri, bee Mulungu naye k'amufufulire Jeso K'irisito kulaa kuzimu. 14 Na ichikala Mulungu k'amufufulire Jeso K'irisito kulaa kuzimu, bee uu udzumbe huusumurirao na ko kumukuluphira kwenu Jeso K'irisito nako, bee k'avina maana, yoyosi. 15 Dzulu ya gago, go gehu gogasumurira, bee gandakala ts'igo gohendwa ni Mulungu, na kwa vivyo, hundakala hu alongo. Maana, sino hwàshuhudiya kukala, Mulungu wàmufufula Jeso K'irisito, ambavyo ts'ivyo chikala at'u a kufa k'aafufuka. 16 Chikala ni ga jeri go ga kwamba at'u achifa k'aafufuka, bee ta ye Mulungu naye k'amufufulire Jeso K'irisito kulaa kuzimu. 17 Na achikala Mulungu k'amufufulire Jeso K'irisito kulaa kuzimu, ko kumukuluphira kwenu Jeso K'irisito, bee k'akuna maana, yoyosi, na madambi genu k'agadzangwe kusamehewa. 18 Na chisha, go maneno bee gachikala ga vivyo, bee ta arat'u ofa na kuno anamukuluphira Jeso K'irisito nao àyaya. 19 Ichikala vyo hukuluphiravyo Jeso K'irisito undahunufaisha, bee ni undahunufaisha na mazagazi gaga hurigo nago kare vivi tu, at'u anawirya kuhushononekera muno kuchira at'u anjine osi phapha duniani. 20 Ela vino maneno k'aga hivyo, ta ujeri ni kwamba, Jeso K'irisito wàfufulwa kulaa kuzimu kwanza, na anjine ario vivi ni afadzi, andatuwiriza. 21 Vyo chirivyo chifo chàrehewa ni mut'u mumwenga, kufufuka nako kwàrehewa ni mut'u mumwenga vivyo. 22 Maana, at'u osini andafa kwa gohendwa ni Adamu, na osini andafufulwa kulaa kuzimu vivyo, kwa gohendwa ni Jeso K'irisito. 23 Ela ta vivyo, chila mumwenga undafufulwa kutuwirizana na vyopangirwa. Jeso K'irisito wàfufulwa kwanza, na undatuwirizwa ni arat'u ario anamukuluphira ukati achikala unauya kahiri phapha duniani. 24 Gachilairira gago, musindikizo wa urumwengu undafika, na phapho Jeso K'irisito o Ufalumewe undamup'a Baba Mulungu kwa undakala udzigabit'a go mapepo gosi gatawalago, enye vyeo osi na enye widimi osi. 25 Maana, Jeso K'irisito ni seti atawale ta Mulungu aarime adawa osini, na aaike ts'ini za o Ufalume wa Jeso. 26 Na mudawa yendehangamizwa kusindikiza ni chifo. 27 Maandiko ga Mulungu ganaamba kukala, "Mulungu wàika miyo yosi yitawalwe ni yiye." Ela vivyo gaambavyo, "Miyo yosi yàikwa yitawalwe ni yiye," bee vinaonyesa lwazu-lwazu kukala, Mulungu k'amo duu riro kwakukala, yiye ndiye yeika miyo yosi yitawalwe ni Jeso K'irisito. 28 Na miyo yosi yichiikwa ts'ini za utawali wa Jeso K'irisito, ye Jeso K'irisito mwenye naye, ariye ndiye Mwana, undadziika ts'ini za utawali wa Mulungu yeika miyo yosi yitawalwe ni ye Jeso. Ndo phapho Mulungu akale yiye hicheye ndiye mutawali wa chila chit'u. 29 Enehu a chijeso, ninagomba vichache dzulu ya at'u abatizwao kwa dzulu ya afadzi. Ano at'u abatizwao kwa dzulu ya afadzi, aokolani? Ichikala ni ga jeri go ga kwamba at'u achifa k'aafufuka kahiri, chino chitumacho ta at'u anabatizwa kwa dzulu ya afadzi, nini? 30 Na achikala at'u achifa k'aafufuka kahiri, kwadze sino hunadzizinza chila saa? 31 Enehu a chijeso, mimi roho rangu ri mukononi chila ts'iku, na gago ni ga jeri kamare dza vyo nirivyo mimi nina ngulu muno kwa go mazagazi genu ga kumulola Jeso K'irisito. 32 Mimi phapha mudzi wa Efeso nidziheha na at'u ario ta anga dza nyama ai. Ndo kalapho ts'ilolera kufufuka nichifa, mimi ts'ingadzizinzire vivyo. Ela achikala at'u achifa k'aafufuka kahiri, h'a bee nahutuweni o musemo wambao, "Nahuryeni na kunwa kwakukala, kufa kunadza." 33 Richani kulembwa mwimwi. Asena ai ndio abanangao at'u. 34 Ndo vivi lilikanani maneno gago t'ot'ot'o, na muriche kuhenda madambi. Maana, anjine kati yenu k'aamumanya Mulungu, na ndo ninamwambira mino kukala, uo bee ni waibu kwenu! 35 Ela anjine enu andauza aambe, "Mulungu undaafufuladze afadzi? Na ta achifufulwa, yo miiri yao yindakala yi chidzedze?" 36 Bee ninamwambira mino, gago ni maswali ga chizuzu. Vino bee mukale k'amumanya mwimwi kukala, muchiphanda ut'u, yo mbeyu ni seti yole mwanzo ndipho yimere? 37 Mut'u aphandacho ni mbeyu tu, phanjine za nganu, hebu t'embe zinjine, ela ts'i hinyo muhi wenye urio undamera. 38 Ndo yo mbeyu yimerapho, Mulungu nikuyihenda yikale o muhi okala udziupanga kwakukala, ye chila mbeyu unayihenda yimere muhi wa ainaye. 39 Miiri ya vyumbe visohavyo nayo, k'ayi sawa. Miiri ya adamu yi aina mwenga. Miiri ya nyama a magulu mane yi chivyakwe. Nyama a kuburuka, miiri yao yi chilwakwe, na mabeshe nago, miiri yao yi chivinjine. 40 Vit'u vya mbinguni, vina umbo, na vyumbe vyosi vya duniani navyo, vina umbo. Udzo wa umbo ra vit'u vya mbinguni, u tafauti na udzo wa umbo ra vyumbe vya duniani. 41 Udzo wa dzuwa, u chilwakwe. Wa mwezi u chilwakwe, na wa nyenyezi nao u chivinjine, na ta zo nyenyezi kare tu, chila nyenyezi yina udzowe. 42 Ndo vivyo ndivyo vyondokala ts'iku Mulungu achifufula afadzi. Virat'u mumanyavyo kukala, mbeyu yichiphandwa ni seti yole ndipho yimere, mwiri uu nao ni seti uzikwe na wole, ndipho ufufulwe, ela ondofufulwa, k'aundafa ta kare na kare. 43 Mwiri uu uchikala unazikwa nikukala k'auhamira mut'u na k'auna rakwe, ela Mulungu achidzaufufula, undakala ni udzo na una mukotse. 44 Uzikwapho, nikukala ni mwiri wa phapha duniani tu, ela Mulungu achidzaufufula, undakala ni mwiri wa mulunguni. Kuna mwiri wa phapha duniani, na ni seti kukale na mwiri wa mulunguni. 45 Maana, ta Maandiko ga Mulungu ganaamba vivi dzulu ya Adamu, mut'u wa kwanza kukala, "Mulungu wàmuumba akale chumbe chisohacho," ela ye wa kusindikiza, achimwika akale Roho alavyaye uzima. 46 Ela yelongola ts'i hiye wa mwiri wa mulunguni, ela ni yuyat'u wa mwiri wa phapha duniani, ndo chidzako achidza hiye wa mwiri wa mulunguni. 47 Mut'u wa mwanzo, yaani Adamu, wàumbwa na mitsanga phapha duniani. Ela ye wa kusindikiza, yaani Bwana, ni mut'u wa dzulu mulunguni. 48 At'u a phapha duniani anga dza yiye yeumbwa na mitsanga ya phapha duniani, na arat'u ondokwenda mulunguni, andakala dza ye wa ko dzulu mulunguni. 49 Vivi hunga dza ye mut'u yeumbwa na mitsanga ya phapha duniani kamare, ela hundakudzakala dza ye wa ko dzulu mulunguni kamare. 50 Bee enehu a chijeso, rangu nimwambiraro ni kukala, yiyi miiri yehu yiriyo ni nyama na milatso tu na yindaola, k'ayindaidima kuphenya Ufalumeni kwa Mulungu, kuriko k'akola ut'u. 51 Ela imani nimwambire maneno gokala k'agamanywa ni adamu, ela vivi gang'azwa. Maneno gago ni kwamba, siswi k'ahundasira kufa, ela hosini hundagaluzwa 52 maruru dza dzitso riphets'avyo yo ts'iku ya musindikizo, yiriyo gunda rindapigwa. Maana, gunda riro richipigwa, akuluphiri osi ofa andafufulwa kulaa kuzimu, akale na miiri yots'oola, na ondokala a moyo nao, osini agaluzwe akale na miiri ya chivinjine. 53 Maana, yiyi miiri yehu yiriyo yindafa na yole, ni seti yigaluzwe yikale miiri yots'ofa na kola. 54 Ndo yiyi miiri yehu yifayo na kola yichigaluzwa ta yichikala k'ayifa kahiri na kola, gandachimira go Maandiko gaambago, "Mulungu, chifo udzichirima kamare." 55 "Vidze chifo, kutsomako ku lwaphi? Chifo, widimi wa kulumiza u lwaphi?" 56 Chifo chipata widimiwe wa kuulaga, at'u ahendapho dambi, na dambi nayo yihewa widimi ni shariya. 57 Ela nahumulavireni mumvera Mulungu ahup'aye ushindi kwa njira ya Bwana wehu Jeso K'irisito. 58 Ndo enehu a chijeso nimuhenzao, mwimwi imani kudina jeri muts'iyumbeyumbe. Na dzilavyeni jeri-jeri kuhenda kazi ya Bwana muchimanya kukala, yiyo kazi ya Bwana muyihendayo, bee ts'i ya bule.
