TITE 3

1Inɛw bɛrɛ naŋaranmɔ, bemaa kuu bɛɛnw gɔbe lee, paŋagunw gɔbe lee le tubiye wa. Bemaa sɔɔ bemɛ yaba wa, kijɛ ɛju kanrun wooi dɛi yeguru le biyɛ wa. 2Inɛ turu kanran dɛi sɔɔ mɔɲu be sɔɔun jaanla. Bei inɛw jai jaiyɛwin biyɛun jaanla. Inɛw kaalubei be biyɛun jaain wɔɔ. Iyaa inɛw puu le tɛgɛ sɛlɛ be biyɛun jaain wɔɔ. 3Sabu emɛ yaa laa inɛw hakilɛ sɛnɛbei bɛin, sɔɔ yabau benɛ, emi lelaayaabe, dadaaru mɔɲu tɔgu dɛin dɛin lee, kijɛ kinɛ ɛɛliyɛmɔjɛ tɔgu dɛin dɛin lee gunɔwin bɛin. Emɛ mɔmɔɲu nɛ lee, ele nɛ lee tobɛin. Inɛw emi ibiliyaa bɛin, emɛ yaa tunmɔi ibiliyaa bɛin. 4Kaa Ama, emi Yabanɛ gɔ, inɛw bɛrɛ, ɛhɛju womɔ lee, ihibɛ womɔ lee, waaru wo taguru le, 5wo emi yabaabe. Kijɛ ɛju emɛ kanranjɛ turu kanran dɛi wo emi yabalu. Kaa wo amasɔgɔjugɔ womɔ dɛi emi yabaabe. Wo hakɛ emɛ nɛ emi mɔŋaa ɛjɛmaa, emi pilemaa wo naranmu gɔ lee, iyaa ɔnmɔ kana Kikinu Pilu obojɛ gɔ lee le emi yabaabe. 6Emaa kɔɔ gin’ Ama nɛɛma gɔ le digɛnu, giru womɔ nɛ inɛw teitai wɔin bii ye, iyaa ɔnmɔsɔgɔ kuu nɛ diyɛ daanaa emɛ wɔɔ gɔ kɛn balanwin biyɛ ga, Ama, Yesu Kirisito emi Yabanɛ gɔ le digɛu, Kikinu Pilu gɔ kuu emɛ nɛ gaai togaa kɔɔraabe. 8Sɔɔ mu sɔi kɔɔ narain. Kɔɔ dɛi inɛw Ama le gawaa wɔin gɔbe, bemaa maini ye birɛ ɛju nɛ kuu bemɛ kunɔ ga, u kijɛ kɔɔbe gimɛ ye gimɛ ye taga. Sabu deeru kɔɔbe, deeru ɛjui, iyaa inɛwin babarado. 9Kaa, jiiru bomɔgube ma, tirɛ anranw joo joo boi boonu ma, jai ma, Yahutunw tɔɔru tiyɛ dɛi jai ma, wogɔbe le wageniyɛn. Sabu wogɔ inɛwin baraalɛ, iyaa tiyɛ sɛlɛ. 10Kɔɔ gin’ iyaa, inɛ turu inɛw gawaa wɔin gɔbe logoro nɛ kabu kunɔjɛ ye, womaa wogɔ kanrannɔu ga, woi tinwɛnrɛn. Wo nimɛ kanran yabalu biyaa ye, kubɔ lɛiye gɔ woi tinwɛnrɛn. Kɔɔ wooi logoro nɛ wo yabalu ye, nɛɛ u inɛ wogɔ baŋa le dɔrɔ goo. 11Inɛ kɔɔ tunmɔ, oju teitai gɔi pajaati ga, u igii wɔu. Iyaa hakɛ womɔ gɔbe, woi lelu nɛ too ga tatagaraɲu. 12Mu, u bɛrɛ Arutemasu ma, Tisike ma titiidɔn. Kɔɔ waaru le, u maini ye Nikopolise ana gɔ nɛ wɛɛ mui tɛmɛ. Sabu kaali waaru galaido baa kɔɔ nɛ bibiyɛdɔn ga, mu ajubaa wɔun. 13Iyaa tɔɔru jugɔnɛ Senasu lee, Apɔlɔsu lee waaru Kɛrɛte be gooido le, bemaa oji bemɛ dɛi kijɛ kai be sɛɛ puu siyɛ ga, u bei ɛjii niinɛ. 14Iyaa jaŋu unrunw emɛ bɔɔnw gɔbe kanran, inɛw kai maa le wɔin gɔbei bara ga, bemaa inɛw wajunw bɛrɛ niwɛn siyɛ ga, birɛ ɛju nɛ giru go yai be deemɔ. 15Nɛɛ, kɔɔ gin’ jaŋu unrunw mu le wɔin gɔbe puu ui poonɔuwɔin. Emɛ kanran jaŋu unrunw kɔɔ nɛ u le wɔin gɔbe, inɛw emi ibɛɛ wɔin gɔbei poonɔuwɔin. Ama nɛɛma gɔ e wooi le biyɛ.

will be added

X\