TITE 1

1Mu Pɔlu, Ama birɛbirɛnɛ gɔ, Yesu Kirisito jaŋu ii tiyaaɲu gɔ, lɛtɛrɛ ɔn, mu tiiuwɔ. Inɛw Ama yɛmaabe gɔbe, maa bei gagawu nɛ dimɛrɛn jɛɛlɛ ga, gagawu emɛ sɔɔ gɔ le kɛukɛu, bei naran gɔi jugɔmɔ ga, 2kɔɔ le digɛnu bemaa ɔnmɔsɔgɔ bɛi diyɛdɔn le biyɛ ga, sagu wogɔ mu bɛrɛ duuraaɲu. Ama kakalu maŋaalɛ gɔ, aduna maŋamɔ nɛ, wo ɔnmɔsɔgɔ wogɔ emɛ bɛrɛ ohobodo ga pui kunaabe. 3Waaru jaan gɔ wo dɔwaa, waaju mu bɛrɛ wo gawaraabe gɔ le digɛu, Ama, ɔnmɔsɔgɔ wogɔ, sɔɔ womɔ le jugɔmaabe. Ama emi Yabanɛ gɔ mu bɛrɛ tɔɔraabe dɛi, mu ɔnmɔsɔgɔ diyɛdɔn wogɔ tagauwɔn. 4Tite, u, gagawu emɛ lɛi turu wɔɔ nɛ ii maa tɔitɔi gɔ, mu lɛtɛrɛ ɔn u bɛrɛ tiiuwɔn. Ba Ama lee, Kirisito Yesu emi Yabanɛ gɔ lee, nɛɛma lee, jamu lee ui obo. 5Uwaa sɔɔ yegeraa kilɛlu gɔbei kilɛmɔ ga, iyaa uwaa ana tuturu nɛ Ama inɛw mɔɔnu nɛ inɛw naw yɛmɛ daana ga, mu wogɔ dɛi Kɛrɛte gana nɛ ui pajaabɔn. Sɔɔ u bɛrɛ mu sɔi gɔbe naŋanɔu. 6Inɛ na, inɛ nɛ jarugu turu kanran tɛmɛmɔidoloi biyɛun jaain wɔɔ. Woi yaanran turu igɛi biyɛun jaan. Unrunw womɔ Yesu jaŋu unrunwin biyɛun jaain wɔɔ. Unrunw gɔbe ajubu sɛlɛ bemɛ dɛi lee, sɔɔ yabala bemɛ dɛi lee, boi mɔɲu bemɛ gowaa wɔɔ inɛwin biyɛun jaanla. 7Ama inɛw mɔɔnu kajubanɛ gɔ, Ama birɛ gɔ wo sagi dɛi, wo le jarugu turu kanran tɛmɛmɔu jaanla. Woi, inɛ diŋɛ unrunmɔ kanrannɛi ma, kinɛ ɔgu ingelemɔnɛi ma, kɔɲɔnɔɔnɛi ma, inɛ koloi ma, inɛ nabara le kijɛ dɛnɛnɛi ma, wo biyɛun jaanla. 8Kaa inɛ Ama inɛw mɔɔnu kajubanɛ gɔ, ginrun sugo obonɛi biyɛ, ɛju dɛnɛnɛi biyɛ, inɛ kuu kajubu le wɔɔi, woi inɛ teitai, inɛ kuu unrunmɔ Ama nɛ sɛɛu obaa wɔɔ, inɛ dimɛ le wɔɔi biyɛun jaain wɔɔ. 9Deeru nanaa gɔ le ba unrunw gagawu nɛ wo bɔɔnw gɔbei mainiyɛnmɔ bɛɛ ga, iyaa inɛw sɔɔ nanaa gɔ le jiiru kunɔw gɔbe aŋa pinɛ bɛɛ ga, wo sɔɔ nanaa gɔ, bana deerin le kɛukɛu, ɛjii ai wo gɛliyɛun jaain wɔɔ. 10Inɛw kɔkɔlɔmaagunw gɔbe lee, inɛw sɔɔ koolo koolo joo sɔɔnw gɔbe lee, iyaa inɛw lelemɔw gɔbe, sigɛ le Yahutunw tubu kanraanɲu gɔbe logoro nɛ jooi wɔin. 11U deeru teitai laa deereu be wɔɔ gɔ nɛ bei tɛŋɛ. Sabu be nabara le kɛɛlɛ bɛɛɲu giye deeru deereun jaanla be deerejɛ gɔ dɛi, be inɛw ginrun duu gamuu nɛ toin gɔbe puu lelemɔuwɔin. 12Be bainɛ turu, inɛ titiyainɛ bemɛ turu, ɔn gin’ sɔi: “Kɛrɛte bɛɛnw, jaa kakalumaŋawin, be olunawan mɔɲube gin’ wɔin. Bei walagunw kɔrujagunwin.” 13Ainɛ kɔɔ sɔɔ gi gɔ narain. Kɔɔ dɛi u inɛw deeru teitai laa deerenw gɔbei, bemaa gagawu tɔitɔi gɔ bɛɛ ga, ɛjii ganwan, 14bemaa Yahutunw elumɛ gɔbe lee, inɛw naran gɔ pajaatiyaa wɔin tɔɔru gɔbe lee keŋiyɛnnɔu ga, bei ganwan. 15Inɛw kikinu sibɛ go ɛjaa wɔin gɔbe bɛrɛ, kijɛ lɔgɔjiyaa wɔɔ turu kanran wɔlɔ. Kaa inɛw hakɛ le lɔgɔjiyaa, naran gɔ le gawanɛ gɔbe bɛrɛ, kijɛ ɛjaa wɔɔ turu kanran wɔlɔ. Sabu hakilɛ bemɛ lee, kinɛjugɔ bemɛ lee hakɛ le lɔgɔjiyaa yanwaan wɔɔ. 16Be Amai igii wɔin gɛɛɲu, kaa birɛ bemɛ gɔ le be Amai naran go inin ga tagarauwɔin. Bei inɛw jɛbi. Be Ama sɔɔ yabaanɛ, sɔɔ ɛju turu kanran kanrun bɛɛnɛ.

will be added

X\