RƆMƐ 9

1Mu Kirisito nɛ narain sɔɔjɔn. Mu kakalui maŋaalɔn. Kinɛ jugɔ ma, Kikinu Pilu wijɛmɔjɛ gɔ, mu narain sɔɔjɔn ga mui daii tagauwɔ. 2Mu tɔgu ma inɛw Yahutunw dɛi kinɛ ma gaai sɔmiyɛunwɔ, mu waaru wooi kinɛ jiun diyɛ le wɔun. Mu ba unrunw tɔgu ma bɛɛnw gɔbe bɛrɛ niwɛn sisiyɛbe ye, Ama jebu kuu ma nɛ biyɛ ga, iyaa Kirisito le mui kabugu goonɔ ga mu yayababɔn. 4Bei Isɛrɛlu tɔgui. Ama bei unrunw womɔi bojaabe, iyaa dooro womɔ be bɛrɛ tagaraabe, aaru gɔbe be le aaraabe, iyaa Tɔɔru gɔ be bɛrɛ obu. Ama babu naran gɔ, be igu. Be Ama pui gɔbe biyaabɛin. 5Tirɛ anranw diyɛnw unrunw gɔbe bei. Gojunawan sibɛ go Kirisito yaa tɔgu bemɛ nɛ goi. Wo, Ama kijɛ wooi kuu nɛ daan gɔ, asuu boi womɔ sɔmi biyɛmɔ. Amina. 6Kaa mu Ama pui kunu gɔ yegiyelu gɛɛu wɔlɔn. Sabu Isɛrɛlu tirɛ unrunw gɔbe puu naran go Isɛrɛlu unrunwin laain. 7Abarahamu tirɛ unrunw gɔbe kanran puu naran go unrunw womɔi laain. Sabu Ama, Abarahamu le kijɛ gi: “U Isaka le tirɛ unrunw u bɛrɛ obodɔn ga pui mu kunu gɔbei bɛɛdou.” 8Tiyɛ gɔ gojunawan unrunw gɔbe, Ama unrunwin laain. Kaa unrunw Ama pui kunu gɔbe le kɛukɛu naraanɲu gɔbe sai, tirɛ unrunw tɔitɔi gɔbe bei ga lulugodɛin. 9Sabu Ama, Abarahamu bɛrɛ pui kunɔu, sɔɔ wo sɔi gɔ unwɔ: “Yogo naŋurun, waaru ɔn le tee mu u bɛrɛ wɛwɛɛdɔn, Sara, kɔɔ waaru le aini bɛbɛɛdo.” 10Iyaa kɔɔ sai laa. Rebeka anranw unrunw lɛi gɔbe, be ba turu sɛbɛin, emɛ tirɛ ainɛ Isaka gɔ woi. 11Kaa aini turu yɛmu sɔɔ gɔ, Ama kuu womɔ le kijɛ kɛjaa, kakanrando ga wo beei biyɛ ga, Ama Rebeka le kijɛ gi: “Diyɛnɛ gɔ, dagunɛ gunɔnɛi biyɛdo.” Unrunw gɔbe naranmɔ nɛ, kijɛ ɛju ma, mɔɲu ma turu kanran kanrannɛ be wɔu, Ama sɔɔ kɔɔ sɔwaabe. Kunrin Ama yɛmu gɔ birɛ be biru le digɛla, kaa boonu womɔ gɔ le digɛ. 13Bana Ama Dɔn nɛ tɔŋaaɲu gin’: “Mu Jakɔbui yɛmaa, Esaui pajaabɔn.” 14Emɛ nɛɛ inge gɛɛdɛin? Teitai laa Ama le yɔɔ ma? Asuu. 15Sabu Mɔise le kijɛ wo gi: “Mu, inɛ amasɔgɔ jugɔ mu ibɛ gɔ, amasɔgɔ womɔ jujugɔdɔn. Inɛ bɛrɛ ɛju kanran mu ibɛ gɔ, wo bɛrɛ ɛju kakanrandɔn.” 16Nɛɛ kɔɔ gin’, Ama yɛmu gɔ, wogɔ inɛ kijɛ ibɛ le ma, inɛ birɛ le ma kijɛ digɛi laa. Kaa Ama amasɔgɔjugɔ gɔ le digɛ. 17Ama Dɔn nɛ Ama, Ejipute ɔgɔnɛ le kijɛ gi: “Mu u le gɔnrɔn ma tagara ga, iyaa boi ma aduna yalu wooi nɛ dɔɔ ga, ui ɔgɔ daanaabɔn.” 18Kɔɔ gin’ Ama, inɛ amasɔgɔ jugɔ wo ibɛ gɔ amasɔgɔ jugɔjɛ, iyaa inɛ kɔkɔlɔ maai bojo wo ibɛ gɔ kɔkɔlɔ maai bojojɛ. 19Inɛ turu mu le ɔn gin’ gɛɛdo bibiyɛ: «Kɔɔ gin’ wɔɔ biyaai ye, Ama inge dɛi inɛi pɛbɛjɛ? Sabu inɛ aa Ama diŋɛ le yabalu kanrun bɛɛdo ma?» 20Kaa u inɛ Ama le jiirenɛ gɔ ui aai? Nage toroi, woi maanɛ le womaa inge dɛi unruin ɔn gin’ kanrun ma gɛɛidolo. 21Toroimaanɛ nage gɔ le kijɛ wo ibɛ kanran bɛbɛɛjɛ. Nage tutunmɔ gɔ le wo gelu dɔnrun gaa yeguru bɛbɛɛdo, wo iyaa gelu birɛ biru kanran yeguru bɛbɛɛdo. 22Ama yaa kijɛ kanrun wo ibɛ gɔ kanrun bɛbɛɛdo. Wo kinɛ banrun womɔ jugɔmu ibɛɛ bee, iyaa gɔnrɔn womɔ taguru ibɛɛ bee. Kokanran inɛw kuu nɛ kinɛbanrun womɔ sugoun jaanbe gɔbe, suiyi be le jaan gɔbe, be sibɛ go, Ama, muyɔn diyɛ unrunmɔ tagaraabe. 23Emɛ inɛw amasɔgɔ emɛ wo jugaajɛ gɔbe, emɛ inɛw giru nɛ baa, emaa dooro womɔ bɛɛ ga wo boonu gɔbe bɛrɛ dooro diyɛ womɔ tagara ga, wo wogɔ gin’ kanraanbe. 24Sabu Yahutunw logoro nɛ sai laa, kaa tɔgu wajunw logoro nɛ inɛw wo boonu gɔbe emi. 25Ose dɔn nɛ Ama sɔwaa gi: “Tɔgu, tɔgu mai laa gɔ, mu woi tɔgu mai gɛgɛɛdɔn. Gana ibɛla mu bee gɔ, gana ibɛɛ mu wɔi gɛgɛɛdɔn.” 26Iyaa, “Yalu nɛ be bɛrɛ ‘ei tɔgu mai laa’ gin gɔ nɛ, wogɔ nɛ tee bei ‘Ama ɔnmɔ anranw unrunwin’ gɛgɛɛdɛin.” 27Esayi kanran, Yahutunw tɔgu dɛi kɔnwaan kijɛ wo gi: “Halu Isɛrɛlu tɔgu lugo gɔ nɛudii sɔsɔun gin’ biyaai kanran, logoro bemɛ nɛ inɛw gaila wajaain gɔbe sai yayabadɛin. 28Sabu Inɛw Baŋa Ama, ɔgu ɔgu kubɔ turu sai aduna saliyɛ kikiredo.” 29Iyaa pɔɔlɔ bana Esayi sɔwaabe gin’: “Inɛw Baŋa Ama kijɛ wooi kuu nɛ daan gɔ emi tiruwɛnw obolu bee ye, emi Sodomɛ gin’ bibiyɛbe, emi Gomɔre le murin bibiyɛbe.” 30Emɛ nɛɛ inge gɛɛdɛin ma? Wogɔ unwɔ: Inɛw Yahutunwin laain gɔbe, inɛw Ama giru nɛ teitai biyɛ ga mainiyɛun benɛ gɔbe, gagawu dɛi bei teitai wɔɔ ga lugaaɲu. 31Kaa Isɛrɛlu tɔgu inɛw gɔbe kai, tɔɔru Ama giru nɛ bei teitai bojo bɛɛido gɔ bɛɛ dɛi mainiyɛun wɔu, be Tɔɔru gɔ kijɛ gɛɛjɛ kanraan bɛɛnɛ. 32Inge sabu dɛi? Sabu kijɛ dɛi mainiyɛun be bee gɔ, gagawu le digɛla bee, kaa wogɔ birɛ bemɛ le digɛbe. Be “tibu inɛi tomɔmaa ye numɔmɔjɛ” gɔ nɛ kubɔ bemɛ tomaai, 33bana Ama Dɔn nɛ tɔŋaa Ama gi gin’: “Yɛnɛ, tibu inɛw kubɔ tomɔmɔjɛ gɔ, mu Siɔn nɛ duunaajɔn. Wogɔ, dumɔ bei numɔmɔjɛ gɔi. Kaa inɛ wo le gawaajɛ gɔ, wo dɔgɔ iyeidolo.

will be added

X\