RƆMƐ 8

1Kanɛ kai, inɛw Kirisito Yesu nɛ toin gɔbe, jarugu kuu bemɛ nɛ wɔlɔ. 2Sabu Kikinu tɔɔru, Kirisito Yesu le digɛnu emi naran go ɔnmɔi bojojɛ gɔ, mui hakɛ lee, yiun lee tɔɔru numɔ nɛ goonaati. 3Gojunawan hakɛgu emɛ yɛbɛlɛ sabu dɛi, Tɔɔru kijɛ kanrun bɛɛidolo wo bee gɔ, Ama kanraanbe. Aini womɔ tɔitɔi, inɛw hakɛ sadagai biyɛ ga, gojunawan hakɛgu murin wɔɔ le tiyaabe. Wo kole digɛu hakɛ, gojunawan nɛ birɛjɛ gɔi jarugu duuraabe. 4Emɛ inɛw gojunawan hakɛgu diŋɛ le laa, kaa Ama Kikinu diŋɛ le yoi yaanw gɔbe, Tɔɔru kijɛ teitai kanraun jaan gɔbe sɛɛu emɛ nɛ kibemu bɛɛ ga, Ama, Aini womɔ tiyaa, hakɛi jarugu duuraabe. 5Inɛw gojunawan hakɛgu diŋɛ le yoi yaanw gɔbe, ajubu bemɛ gojunawan bemɛ kijɛ ibin gɔ le wɔɔ. Kaa inɛw Ama Kikinu diŋɛ le yoi yaanw gɔbe, ajubu bemɛ Ama Kikinu kijɛ ibɛ gɔ le wɔɔ. 6Gojunawan hakɛgu kijɛ ibɛ gɔ ajubu le bii gɔ, wogɔ inɛi yiyinwɛnmɔjɛ. Kaa Ama Kikinu kijɛ ibɛ gɔ ajubu le bii gɔ, inɛi ɔnmɔ lee, jamu lee obojɛ. 7Inɛw gojunawan hakɛgu kijɛ ibɛ ajubu le wɔin gɔbe, bei Ama jaŋuwin. Be Ama tɔɔru le tubiyeenɛ, iyaa wogɔ le tubi kanran bɛɛnɛ. 8Inɛw gojunawan hakɛgu bemɛ diŋɛ kanranw gɔbe, be Ama kinɛ aamɔidenɛ. 9Kaa e kai, Ama Kikinu gɔ naran go e nɛ yato digɛu, e gojunawan hakɛgu ebe diŋɛ le yoi yaauwɔnɛ. Kaa e Ama Kikinu diŋɛ le yoi yaauwɔi. Kirisito Kikinu inɛ nɛ tolo gɔ, woi Kirisito mɔi laa. 10Kaa Kirisito e nɛ yato ye, halu hakɛ dɛi goju ebe yiyinwɛndo kanran, ei Ama giru nɛ teitai bojaaɲu dɛi, kikinu ebe ɔnmɔi wɔɔ. 11Kaa Ama, Yesui yiun logoro nɛ bulomɔnɛ gɔ, Kikinu womɔ e nɛ yato ye, kɔɔ waaru le Ama Kirisito yiun nɛ bulomɔnɛ gɔ, wo iyaa goju ebe yinwɛnjɛ gɔ, Kikinu womɔ e nɛ too gɔ gɔnrɔn le digɛnu ɔnmɔi bobojodo. 12Kɔɔ biyaai ye, ba unrunw mabe, kijɛ waajibi emɛ kanraun jaan gɔbe yɔɔin, kaa kijɛ kanraun emɛ jaan gɔbe goju nawan hakɛgu emɛ sibɛ goi laa. Gojunawan hakɛgu emɛ diŋɛ le yoi emɛ yaaun jaanla. 13Sabu e gojunawan hakɛgu diŋɛ le kɛukɛu yoi yaauwɔi ye, ei yiyinwɛndo. Kaa e Ama Kikinu gɔnrɔn le digɛnu hakɛ birɛ ebe gɔi dadaajɛi ye, ei ɔnmɔi bibiyɛdo. 14Inɛw Ama Kikinu bei teeremɔjɛ gɔbe puu, bei Ama unrunwin. 15Sabu Kikinu ei obin gɔ, Kikinu ei gunɔwin bojo ye, liliyɛ nɛ ei pilemɛ kunɔjɛi laa. Kaa wogɔ Ama Kikinu, ei Ama unrunwin biyɛmɔjɛ gɔ woi. Kikinu Ama womaa «Aba» tiyɛ gɔ “De” ei kinɛ ɛɛli le gɛɛmɔjɛ gɔ woi. 16Emi Ama unrunwin ga, Ama Kikinu gɔ kikinu emɛ le mɔrinyaan ye sɛɛrɛ gogoojɛ. 17Emi unrunw womɔi. Kɔɔ dɛi, Ama, inɛw womɔ gɔbe dɛi kijɛ ɛju keenaa wo sɛɛ gɔ emɛ wogɔ bɛbɛɛdɛin, emɛ Kirisito le bari ye kɛn wogɔ bɛbɛɛdɛin. Sabu emɛ wo le bariyaa, tunmɔ go ɔɲaai ye, emɛ kanran wo bana dooro le wɔɔ gin’ dooro le biyɛdɛin. 18Kanɛ ɔɲɛ emɛ iyejɛ ɔn lee, dooro Ama emɛ bɛrɛ jugɔmɔido lee tunwɔn bɛɛmɔidolo ga, mu gawaa wɔun. 19Ama kijɛ maŋu puu Ama, bai unrunw unrunmɔ wo jugɔmɔido gɔ kinɛ ɔgu le dɔmiyaan wɔin. 20Kijɛ maŋaaɲu gɔ puu, kijɛ tiyɛ sɛlɛ numɔ nɛ yowaai. Wogɔ kijɛ maŋaaɲu diŋɛi laa, kaa wogɔ woi numɔ nɛ kunɔnɛ gɔ diŋɛ le biyaabe. Kaa kɔɔ wooi nɛ, diyɛdɔn turu yɔɔ: 21Bai turu, kijɛ maŋaaɲu gɔ wooi yiun aŋa nɛ ɛli ye gogoodo. Iyaa, Ama unrunw hɔɔlɔi bii gɔ lee, dooro gɔ lee nɛ gamulu bɛbɛɛdo. 22Iye bai dɔɔ, kijɛ maŋaaɲu wooi duru durou, yaanran nɔrun daan gin’ ɔɲaa wɔɔ ga, emɛ igii wɔin. 23Kɔɔ sai laa, emɛ kanran, emɛ inɛw kanɛ baa Ama Kikinu gɔ Ama sin obu gamulu pɔlɔ gin’ biyaaɲu gɔbe, Ama emi unrunw womɔi bojo ye, gojunawan emɛ kuu wo goonɔido waaru emɛ dɔmɔ gɔ le, emɛ kuu emɛ le kɔlɔ emɛ nɛ duru durouwɔin. 24Sabu diyɛdɔn wogɔ nɛ toiyaa wɔu emi yabaaɲu. Nɛɛ kijɛ iyemɔjɛ diyɛdɔn gɔ, wogɔ diyɛdɔn tɔitɔii laa. Inɛ aa kijɛ wo iyejɛ bɛbɛɛdo diyɛdɔn le biyɛdo ma? 25Kijɛ iyeenɛ emɛ wɔɔ gɔ bɛbɛɛdɛin diyɛdɔn gɔ le wɔin ye, emɛ wogɔ muyɔn le dɔdɔmiyɛndɛin. 26Kɔɔ gin’ Ama Kikinu, yɛbɛlɛ emɛ nɛ emi babarajɛ. Sabu emɛ bana Ama bɛrɛ emɛ gɛɛun jaan gɔ inin. Kaa Kikinu, kuu womɔ le emɛ dɛi Ama bɛrɛ duru le bana wo gɛɛnjɛ gɔ, wogɔ aŋa le sɔɔ bɛɛmɔɔlɛ. 27Ama, kinɛ ajubu jugɔnɛ gɔ, Kikinu womɔ ajubu gɔ igii wɔɔ. Sabu Kikinu, Ama diŋɛ le kɛukɛu Ama inɛw gɔbe dɛi Ama bɛrɛ gɛɛnjɛ. 28Emɛ igii wɔin, Ama, inɛw woi ibɛɛ wɔin gɔbe, inɛw bana wo kɛju le kɛukɛu wo boonu gɔbe, kijɛ be bɛrɛ dɔɔjɛ wooi, be bɛrɛ sɔɔ ɛjui biyɛ ga kanranjɛ. 29Sabu Aini womɔ, ba unrunw joo logoro nɛ aini pɔlɔi biyɛ ga, Ama, giru nɛ baa inɛw wo yɛmu gɔbe, wo iyaa giru nɛ baa bemaa Aini unrunmɔ le murin biyɛ ga kɛjaatiyaabe. 30Kunrin Ama, inɛw dɛi giru nɛ baa, sɔɔ kɛjaatiyaa wo bee gɔbe, bei boonaabe. Inɛw wo boonu gɔbe, wo iyaa bei teitai bojaabe. Iyaa inɛw teitai wo boju gɔbe, wo iyaa dooro unrunmɔ bei gamalaa obaabe. 31Emɛ kijɛ kɔɔbe wooi dɛi yani gɛɛdɛin ma? Ama emɛ le wɔɔ ye, inɛ aa jaŋunɛ emɛi biyɛdo ma? 32Wo Aini womɔ ɔɲɛ nɛ paabalu, kaa emɛ wooi dɛi woi inɛw numɔ nɛ kunaabe. Wo Aini womɔ emɛ bɛrɛ obaabe. Kɔɔ gin’ yani wo iyaa lee, dɔnrun wɔlɔ go kijɛ puu emi obolu kanrando ma? 33Inɛ aa Ama inɛw yɛmu gɔbei jarugado ma? Inɛ turu kanran. Sabu bei teitai wɔɔ ga lugonɛ gɔ Amai. 34Inɛ aa kuu bemɛ nɛ jarugu duurɔdo ma? Inɛ turu kanran. Sabu yinwɛnnɛ gɔ Kirisito Yesui, kɔɔ dɛi sigɛ wo bulaai, wo Ama numɔ iin sibɛ nɛ yadaan, iyaa wo emɛ dɛi Ama bɛrɛ gɛɛunwɔ. 35Kijɛ inge emi Kirisito ihibɛ le kabugu goonu bɛɛdo ma? Ɔɲɛ diyɛi ma, kinɛ ɔɲɛi ma, tɔɔɲɔi ma, giyɛi ma, dɛgui ma, parujui ma, yinwin ma? 36Ama Dɔn nɛ bana tɔŋaaɲu gin’: “U sabu dɛi dɛnrun wooi nɛ emi yiun paruju nɛ too, inɛw, emi peju sɛnwɛin yaaɲu gin’ emi ɔɲɔmɔuwɔin.” 37Kaa kijɛ kɔɔbe wooi kuu nɛ, emi ibɛɛ wɔɔ baŋa dɛi, emɛ gɔnrɔn diyɛ naa diyɛ biyaaɲu. 38Sabu naran go, kijɛ turu kanran ihibɛ womɔ le emi kabugu goonu bɛɛidolo ga mu gawaa wɔun. Yiun ma, ɔnmɔ ma, mɛlɛnkɛbe ma, kuu bɛɛnw lee, paŋagunw lee ma, kanɛ kijɛ wɔɔ ma, kijɛ wɛɛido ma, 39daa go paŋa ma, doɲu go paŋa ma, kijɛ maŋaaɲu waja turu kanran, Kirisito Yesu, Inɛw Baŋa emɛ le digɛu Ama ihibɛ tagaraajɛ gɔ nɛ emi asuu kabugu goonu bɛɛidolo.

will be added

X\