RƆMƐ 7

1Ba unrunw, e tɔɔru sɔɔ igii wɔi dɛi, kanɛ baa sɔɔ e bɛrɛ mu sɔɔido gɔ e jugi wɔi. Inɛ, waaru ɔnmɔi wo wɔɔ gɔ le sai, tɔɔru kuu womɔ nɛ gɔnrɔn sɛɛ. 2Kɔɔ gin’ yaanran puru pagaa wɔɔ, wo igɛ gɔ waaru ɔnmɔi wɔɔ gɔ le, tɔɔru, yaanran gɔi wo igɛ le pagu gɛliyɛdo. Kaa igɛnɛ gɔi yinwaain ye, tɔɔru wo igɛ le woi mɔɔnaa gɛlɛbe gɔ, waja kuu womɔ nɛ daanla. 3Kɔɔ dɛi, waaru wo igɛ ɔnmɔi wɔɔ gɔ le, wo ainɛ waja le yaa biyaajɛ ye, woi yaanran dimudimiyɛnnɛi gɛɛdɛin. Kaa wo igɛ gɔ yinwaain ye, wo tɔɔru sibɛ go hɔɔlɔi biyaai, kɔɔ gin’ woi yaanran dimudimiyɛnnɛi biyɛlu go, wo ainɛ waja yaanrain bii bɛbɛɛdo. 4Ba unrunw, e sibɛ go yaa kunrin wɔɔ. Kirisito yiun le digɛu, ei yaa Tɔɔru sibɛ go yinwaain. Iyaa emaa birɛ ɛju, Ama dɛi birɛ ga, nɛɛ kanɛ ei inɛ waja, inɛ yiun logoro nɛ bulaa goonɛ gɔ mɔi. 5Waaru kuu emɛ diŋɛ le emɛ bee le, Tɔɔru gɔ, hakɛ kanrun dadaaru emɛ nɛ too gɔ suuraa ye, emɛ dadaaru wogɔbe kijɛ kanran gɛɛɲu gɔbe kanraunbɛin. Kɔɔ gin’ emɛ birɛ yiun nɛ emi jɛyaajɛ birɛubɛin. 6Kaa kanɛ emi Tɔɔru numɔ nɛ goonaatin, sabu kijɛ emi kaju kunaa sɛbe sibɛ go emi yinwaain. Emɛ waja Ama birɛ gɔ bana pɛi tɔɔru nɛ tɔŋaa tobe gɔ le birɛɛnɛ, kaa bana kana Ama Kikinu emi tagarajɛ gɔ le birɛuwɔin. 7Emɛ inge gɛɛdɛin ma? Tɔɔru gɔ hakɛi ma? Ai asuu. Kaa Tɔɔru gɔ, hakɛ ingei ma mui wo jugɔmu. Tɔɔru maa “U inɛ kijɛ daariyɛnɔu” gɛɛlu bee ye, mu kijɛ daari ingei ma igi biyɛbelɔn. 8Hakɛ, kijɛ kanran gɛɛɲu gɔ digɛu oju biyaa, mu bɛrɛ dadaaru tɔgu dɛin dɛin daariyɛmaabe. Sabu tɔɔru wɔlɔ biyaai ye, hakɛ gɔnrɔn turu kanran sɛlɛ. 9Pɔɔlɔ waaru tɔɔru jugɔlu mu bee le, mui ɔnmɔi bee. Kaa kijɛ kanran gɛɛɲu gɔ wo wiyaa, hakɛ ɔnmɔi biyaai, 10kɔɔ gin’ mui yinwaain. Kijɛ kanran gɛɛɲu mui ɔnmɔi biyɛmɔu jaanbe gɔ, mui yinwɛnmaabe. 11Sabu hakɛ, kijɛ kanran gɛɛɲu gɔ dɛi oju biyaa, mui jamaa, wogɔ le digɛu mui daabe. 12Kɔɔ gin’ Tɔɔru gɔ kai ɛjaa wɔɔ, iyaa kijɛ kanran gɛɛɲu gɔ ɛjaa wɔɔ, teitai wɔɔ, ɛjii wɔɔ. 13Kijɛ ɛju gɔ, nɛɛ mu bɛrɛ kijɛ yiun jɛɛlɛjɛi biyaai ma? Asuu. Kaa wogɔ hakɛ birɛi. Hakɛ kɔɔ gin’ bana unrunmɔ tɔitɔi gɔ jugɔmɔ ga, wo kijɛ ɛju gɔ jeɲaa, mu bɛrɛ yiun jɛɛlaabe. Kɔɔ gin’ hakɛ, kijɛ kanran gɛɛɲu gɔ le digɛu, bana mɔɲuniyɛn mɔɲuniyɛn wo yai gɔ kɔɔ woi. 14Tɔɔru, kikinu le sɔɔ digɛi ga emɛ igii wɔin. Kaa mui Adama ii peerei, hakɛ bɛrɛ mui gunɔnɛ gin’ dɔnraanɲu. 15Kijɛ mu kanranjɛ gɔ mu paamu kanraanlɔn. Sabu kijɛ kanrun mu ibɛ gɔ, mu wogɔi kanraanlɔn, kaa kijɛ ibiliyaa mu wɔɔ gɔi kanranjɔn. 16Kijɛ mu kanranjɛ gɔ, mu wogɔ ibɛlaun ye, mu kunrin Tɔɔru gɔ kijɛ ɛjui ga jugaa wɔun. 17Nɛɛ kijɛ kɔɔbe mu kanraunwɔlɔ, kaa hakɛ kinɛ ma nɛ too gɔ kanranjɛ. 18Sabu kijɛ ɛju kinɛ ma nɛ tolo, tiyɛ gɔ gojunawan hakɛgu ma nɛ tolo ga mu igii wɔun. Kunrin, halu ɛju kanrun dadaaru kinɛ ma nɛ yato kanran, mu wogɔ kanrun gɔnrɔn sɛlɔn. 19Kijɛ ɛju kanrun mu ibɛ gɔ, mu wogɔi kanraanlɔn, kaa kijɛ mɔɲu kanrun ibɛla mu wɔɔ gɔi kanranjɔn. 20Mu kijɛ ibɛla mu wɔɔ gɔ wogɔi kanranjɔn ye, kɔɔ waaru le wogɔ mui kɔɔ gin’ kanraanlɛ, kaa hakɛ kinɛ ma nɛ too gɔ kanranjɛ. 21Nɛɛ mu kijɛ ɔn jugaajɔn: Waaru kijɛ ɛju kanrun mu ibɛ le, kijɛ mɔɲu gɔ sai kanrun bɛɛjɔn. 22Kinɛ ma kɔlɔ nɛ, Ama tɔɔru gɔ mu bɛrɛ ɛɛli wɔɔ. 23Kaa mu nɛ mu tɔɔru waja iyeuwɔn, wogɔ hakilɛ ma kijɛ le yabaa wɔɔ gɔ le jaiyɛuwɔ. Tɔɔru wogɔ, hakɛ tɔɔru mu nɛ too gɔ kajuginɛi mui bojojɛ. 24Mui naran go amasɔgɔi. Inɛ aa, yiun nɛ goju mui biɲaa yaajɛ ɔn numɔ nɛ mui ɛlɛ ye goonɔdo? 25Yesu Kirisito, Inɛw Baŋa emɛ le digɛu, Ama mui yayabado. Wo birɛpoo. Kɔɔ gin’ mu hakilɛ ma le digɛnu, Ama tɔɔru birɛ nɛ toun, kaa gojunawan hakɛgu ma le digɛnu, mu hakɛ tɔɔru birɛ nɛ toun.

will be added

X\