RƆMƐ 6

1Emɛ yani gɛɛdɛin? Ama nɛɛma sigɛ le narinyɛn ga emɛ hakɛ kanrannu biyɛdɛin ma? 2Asuu. Emi hakɛ sibɛ go yinwaain, emɛ yani iyaa lee hakɛ kanrannu biyɛdɛin ma? 3Emɛ puu emi batise kanranmaabɛin. Kɔɔ gin’ emɛ Kirisito Yesu le tunmɔi biyaain. Iyaa waaru emi batise kanrin gɔ le, bana wo yinwun gin’, emɛ kanran kunrin yinwin ga e inin ma? 4Kɔɔ gin’ bana Kirisito, Ba Ama gɔnrɔn diyɛ gɔ le digɛu wo bulu gin’, emaa kanran ɔnmɔ kana gɔ siyɛ ga, waaru emi batise kanrin le, emi wo le mɔrinyaan yinwaain, iyaa emi wo le baraa bojaabɛin. 5Sabu emɛ wo le tunmɔ go yinwaain ye, iyaa lee emɛ wo le tunmɔ go bubulodɛin. 6Emɛ sɔɔ ɔn jugi biyɛmɔi: Jige pɛi hakɛ kanranjɛ gɔ suyo ga, iyaa emi waja hakɛ gunɔwin biyɛnɔu ga, jige pɛi emɛ gɔ Kirisito le mɔɔnaa baga jai nɛ pɛgaaɲu. 7Sabu inɛ yinwaain gɔ, hakɛ gunɔ nɛ gowaai. 8Emɛ lee, Kirisito lee tunmɔ go yinwaain ye, emɛ lee, wo lee iyaa tunmɔ go ɔnmɔi biyɛdɛin ga, emɛ gawaa wɔin. 9Kirisito, yiun nɛ bulaa wo goi onu nɛ, woi waja yinwɛindolo ga emɛ igii wɔin. Yiun, waja kuu womɔ nɛ gɔnrɔn turu kanran sɛlɛ. 10Waaru wo yinwun le, wo hakɛ yiun kubɔ turu sai yinwaan kilaai, kaa kanɛ ɔnmɔi wo wɔɔ gɔ, wo Ama dɛi ɔnmɔi wɔɔ. 11E kanran, kɔɔ gin’ hakɛ dɛi ei yinwaain gin’ lugoi, iyaa Kirisito Yesu nɛ Ama dɛi ei ɔnmɔi wɔɔ lugoi. 12Ebaa goju ebe yinwɛnjɛ dadaaru mɔɲu gɔ le yabanɔu ga, nɛɛ waja hakɛ bɛrɛ kuu womɔ nɛ gɔnrɔn bɛɛmɔnɔugi. 13Goju ebe digɛ dɛin dɛin gɔbe, gelu mɔɲu kanrun gin’ bojo ye, waja hakɛ gunɔwin biyɛ ga yabanɔugi. Kaa inɛw yiun nɛ bulaa gowaain gin’, e kuu ebe Ama bɛrɛ oboi. Gelu kijɛ teitai wɔɔ kanrun kibemɔw gin’, e kuu ebe sɛɛu Ama birɛ dɛi oboi. 14Sabu hakɛ, kuu ebe nɛ gɔnrɔn siyɛun jaanla. E Tɔɔru diinɛ nɛ tonɛ, kaa Ama nɛɛma diinɛ nɛ toi. 15Yani wɔɔ? Emɛ Tɔɔru diinɛ nɛ tonɛ, kaa Ama nɛɛma diinɛ nɛ toin dɛi, hakɛ kakanrandɛin ma? Asuu. 16E inɛ turu bɛrɛ kuu ebe obaa, e sɔɔ womɔ yayabadei gi ye, e inɛ sɔɔ yabau e wɔɔ gɔ gunɔwin ga e inin ma? Ei hakɛ gunɔwin biyaai ye, ei yiyinwɛndo, maa e Ama le yabu gunɔwin ye, wogɔ ei Ama giru nɛ teitai bojojɛ. 17Kaa Ama birɛpoo. Sabu e pɔɔlɔ hakɛ gunɔwin bei. Kaa kɔɔ onu nɛ, e deeru ei deerin gɔ nɛ naran too gɔ, e kinɛ ebe wooi le wogɔ le yabaabei. 18E hakɛ gunɔ nɛ gowaa, kijɛ teitai wɔɔ gɔ kanran ga, ei teitai gunɔwin biyaai. 19Sɔɔ paamu kanrun nɛ e yɛbɛlɛ le wɔi dɛi, mu Adama unrunw bana sɔɔɲu gin’ sɔɔ sɔɔuwɔn. Pɔɔlɔ kijɛ lɔgɔgu lee, kijɛ mɔɲu sigɛ sigɛbe lee kanrun gunɔ nɛ bana kuu ebe obaa e bee gin’, e kanɛ ei Ama dɛi inɛw dɛiin bojaaɲui biyɛ ga, ei kijɛ teitai wɔɔ kanrun gunɔwin biyɛ ga, kuu ebe sɛɛu oboi. 20Waaru ei hakɛ gunɔwin bee le, teitai ei laamaubele. 21Kijɛ dɛi kanɛ dɔgɔ ei aajɛ gɔ waaru kanraun e bee le, tinɛ ingei bɛii? Sabu kijɛ wogɔ yiun jɛɛlɛjɛ. 22Kaa kanɛ ei hakɛ gunɔ nɛ gowaai, ei Ama gunɔwin. Tinɛ e bɛɛjɛ gɔ, wogɔ ei Ama dɛi dɛiin bojui, wogɔ ɔnmɔsɔgɔi jɛɛlɛjɛ. 23Sabu hakɛ tujɔ gɔ yinwin. Kaa Ama sin obu gɔ, wogɔ, Kirisito Yesu, Inɛw Baŋa emɛ nɛ ɔnmɔsɔgɔi.

will be added

X\