RƆMƐ 5

1Kɔɔ gin’ gagawu dɛi Ama, emi teitai wɔɔ lugodo. Kɔɔ sabu dɛi Inɛw Baŋa emɛ Yesu Kirisito le digɛu, Ama lee, emɛ lee logoro nɛ jamu yowaai. 2Gagawu emɛ le digɛu, Yesu emi Ama nɛɛma gɔ nɛ yoomaabe. Kanɛ emɛ nɛɛma wogɔ nɛ yoi yaauwɔin. Kunrin, Ama dooro gɔ nɛ gamulu emɛ bɛbɛɛdɛin diyɛdɔn emɛ sɛɛ gɔ dɛi, emɛ kinɛ ɛɛlu le wɔin. 3Iyaa kɔɔ dɛi sigɛ, emɛ ɔɲɛ dɛi kanran kinɛ ɛɛliyɛmɔuwɔin, sabu ɔɲɛ, inɛ bɛrɛ muyɔn obojɛ ga emɛ igii wɔin. 4Muyɔn, inɛ bɛrɛ jige pinɛ yɛnaaɲu obojɛ, jige pinɛ yɛnaaɲu, diyɛdɔn obojɛ. 5Diyɛdɔn kɔɔ emi jamaalɛ, sabu Ama, Kikinu Pilu emɛ bɛrɛ wo obu le digɛu, kinɛ emɛ nɛ ihibɛ womɔ gɔ togaa kunaabe. 6Kirisito kai, yɛbɛlɛgunwin emɛ bee waaru gɔ le, inɛw Amai babaanɛ gɔbe dɛi, Ama waaru kɛju gɔ le tee yinwun. 7Inɛ teitai wɔɔ dɛi yinwɛn ga yabu gɔ halu nawin wɔɔ. Inɛ turu, inɛ ɛju turu dɛi yinwɛn ga anrangaju sisiyɛdo bibiyɛ. 8Kaa Ama wo emi yagɔ baa ibɛ ma emɛ bɛrɛ ɔn gin’ tagaraabe: Kirisito, waaru hakɛ kanranwin emɛ bee le emɛ dɛi yinwun. 9Ili womɔ dɛi, Ama giru unrunmɔ nɛ emi teitai wɔɔ ga lugouwɔ. Kɔɔ gin’ biyaai ye, nɛɛ Yesu Kirisito, kɔɔ dɛi sigɛ, Ama kinɛbanrun gɔ nɛ emi yayabado. 10Emi Ama jaŋuwin bee, kaa Aini womɔ yiun gɔ digɛu, emɛ lee, Ama lee logoro nɛ sɔɔ yegeraatin. Nɛɛ iyaa, Ama lee, emɛ lee logoro nɛ sɔɔ yegeraaɲu onu nɛ, Aini womɔ ɔnmɔi wɔɔ dɛi sigiyaa emi yayabadɛin. 11Wogɔ sai laa, kaa Inɛw Baŋa emɛ Yesu Kirisito kanɛ Ama lee, emɛ lee logoro nɛ sɔɔ yegeraati gɔ digɛu, emɛ Ama nɛ kinɛ ɛɛliyɛmɔuwɔin. 12Inɛ turu sabu dɛi hakɛ aduna nɛ yoi, iyaa hakɛ, yiun gɔ wo jɛɛlu. Kɔɔ gin’, inɛw puu hakɛ kanraanbɛin dɛi, yiun inɛ puu bɛrɛ dɔwaai. 13Ama Mɔise bɛrɛ Tɔɔru gɔ wo obomɔ nɛ, aduna nɛ hakɛ yabe, kaa yalu tɔɔru wɔlɔ gɔ nɛ, hakɛ lugoonɛ. 14Kaa Adama waaru nɛ gowaa, Mɔise waaru nɛ dɔɔ, yiun inɛw puu kuu nɛ gɔnrɔn yasɛbe. Halu, inɛw, hakɛ be kanrun gɔ, Adama, Ama tɔɔru yamalaatiyaa hakɛ kanrun gɔ le dɛin bee kanran, yiun kuu bemɛ nɛ gɔnrɔn yasɛbe. Adama, Inɛ wɛɛido gɔ sɛɛrɛ tagaraaɲui bee. 15Kaa be lɛi dɛin. Sabu Adama hakɛ gɔ, Ama, Yesu Kirisito le digɛnu sin obu obu gɔ le tunwɔn bɛɛmɔɔlɛ. Inɛ kɔɔ turu hakɛ gɔ dɛi, inɛw joo yinwaain ga narain. Kaa Ama nɛɛma gɔ, sigiyaa kɔɔ dɛi gaa. Iyaa Yesu Kirisito turu sai le digɛu, sin obu dɔnrun wɔlɔ go inɛw joo bɛrɛ Ama obu gɔ, ɛjii sigiyaa gaai wɔɔ. 16Ama sin obu bana gɔ lee, inɛ turu bana hakɛ kanrun gɔ lee, tunmɔi laa. Saliyɛ kiru gɔ, inɛ turu hakɛ kanrun turu onu nɛ wiyaabe. Wogɔ jarugu inɛ kuu nɛ duuru sɔɔi biyaabe. Kaa sin obu gɔ, inɛw joo hakɛ joo kanrun onu nɛ wiyaabe. Wogɔ Ama giru nɛ teitai bii sɔɔi bii. 17Narain, inɛ turu hakɛ dɛi yiun inɛw puu kuu nɛ gɔnrɔn biyaabe. Kaa Yesu Kirisito turu sai le digɛnu, emɛ kɔɔ dɛi sigɛ bɛɛɲu: Inɛw, Ama nɛɛma gɔ lee, giru womɔ nɛ teitai bii sin obu gɔ lee kale sɛlɛ go bɛɛɲu gɔbe puu, Kirisito le digɛnu ɔnmɔi biyɛdɛin, laamu kanrandɛin. 18Kɔɔ gin’, bana inɛ turu hakɛ kanrun turu dɛi inɛw puu kuu nɛ jarugu duuraabɛin gin’, Inɛ turu sai birɛ teitai gɔ, inɛw puui Ama giru nɛ teitai bojojɛ, iyaa ɔnmɔ bei obojɛ. 19Inɛ turu sɔɔ yabala le digɛu, inɛw puu bana hakɛ kanranwin bojin gin’, kɔɔ gin’ iyaa Inɛ turu sɔɔ yabu gɔ le digɛu, Ama, inɛw joo, giru unrunmɔ nɛ teitai wɔin ga lugodo. 20Hakɛ narinyɛn ga, Ama, Tɔɔru gɔ daanu. Kaa yalu hakɛ narinyaanbe gɔ nɛ, Ama nɛɛma gɔ sigɛ le narinyaanbe. 21Nɛɛ yiun le digɛu bana hakɛ inɛwin laamu kanranjɛ gin’, iyaa Yesu Kirisito, Inɛw Baŋa emɛ le digɛnu ɔnmɔsɔgɔ gɔ nɛ emi jɛyaa ga, Ama nɛɛma gɔ, inɛwin teitai bojoɲu gɔnrɔn yasɛ.

will be added

X\