RƆMƐ 4

1Nɛɛ, emɛ ba Abarahamu, gojunawan sibɛ go emɛ Yahutunw tirɛ ainɛ gɔ dɛi emɛ inge gɛɛdɛin? Wo kijɛ ingei bɛi? 2Abarahamu, birɛ womɔ sabu dɛi Ama woi teitai wɔɔ ga lugaabe ye, wo kijɛ dɛi kuu unrunmɔ unɔu yasɛ. Kaa wo Ama giru nɛ kuu unrunmɔ unɔ bɛɛlɛ. 3Bana Ama Dɔn nɛ tɔŋaaɲu gin’: “Abarahamu Ama le gawaabe. Gagawu womɔ gɔ digɛu, Ama woi teitai wɔɔ ga lugaabe.” 4Inɛ birɛ biraajɛi tutujɔɲu. Tujɔ womɔ gɔ sin obu gin’ lugoidenɛ, kaa kijɛ wo bɛɛun jaain. 5Kaa inɛ kijɛ wo kanranjɛ gɔ nɛ diyɛ unrunmɔ daanaalɛ, kaa Ama, inɛ mɔɲu kanrannɛ gɔi teitai bojonɛ gɔ le inɛ gawaa wɔɔ gɔ, Ama, gagawu womɔ gɔi lugo ye woi teitai wɔɔ ga lugojɛ. 6Kɔɔ gin’, kanran womɔ le laa go, Ama inɛ waa teitai wɔɔ ga wo lugojɛ gɔ, Dawide, inɛ wogɔ bana kinɛ ɛɛlu sɛɛ sɔɔ sɔwaabe. 7Kijɛ wo gi: “Inɛw, kanran mɔɲu bemɛ gɔ Ama yaabu kanraanjɛ gɔbe, Ama hakɛ bemɛ sujaajɛ gɔbe, Ama be yabu. 8Inɛ Inɛw Baŋa Ama hakɛ womɔ lugolu gɔ, Ama wo yabu.” 9Ama be yabu ga Dawide gi gɔ, wogɔ inɛw araa nɔɔmaaɲu gɔbe turu sai dɛi ma? Inɛw araa nɔɔmɔla gɔbe yaa yatoin. Sabu emɛ igii wɔin: “Ama, Abarahamu gagawu gɔ lugaa, woi teitai wɔɔ ga lugaabe.” 10Sɔɔ wogɔ waaru yagɔ le bii? Abarahamu araa nɔɔlu wo wɔu bii ma, araa nɔwaan wo galaai? Araa nɔɔlu wo wɔu Ama woi teitai wɔɔ ga lugaabe, araa nɔwaan wo galaai laa. 11Ama woi gagawu womɔ dɛi, araa nɔɔlu wo wɔu, woi teitai wɔɔ ga lugaabe. Araa nɔi gɔ woi teitai wɔɔ tagara ga sɛɛrɛi. Kunrin, inɛw araa nɔɔnɛ, Ama le gawaa wɔin ba gɔ Abarahamui. Bemaa kanran, Ama bei teitai wɔɔ lugo ga wo be bai. 12Woi iyaa inɛw araa nɔwaanɲu gɔbe bai, kaa be araa nɔwaanɲu sai dɛi laa. Emɛ ba Abarahamu araa wo nɔɔmɔ nɛ gagawu le wo bee gɔ, be gagawu wogɔ oju dimiyaan yaau wɔin dɛi Abarahamu be bai. 13Abarahamu lee, tirɛ unrunw womɔ lee, aduna gɔ bemɛi biyɛdo ga Ama pui kunaabe. Abarahamu, Tɔɔru kijɛ kanran gɛɛjɛ gɔ kanraanbe dɛi pui kɔɔ kunɔnɛ, kaa gagawu womɔ dɛi Ama woi teitai wɔɔ ga lugaabe dɛii. 14Ama pui kunu gɔbe inɛw Tɔɔru kijɛ kanran gɛɛjɛ gɔbe kanranw gɔbe sai mɔi bee ye, kɔɔ waaru le gagawu gɔ tiyɛ siyɛidolo, iyaa Ama pui yaa niwɛn tolo biyɛdo. 15Sabu Tɔɔru gɔ, Ama kinɛbanrun wo jɛɛlɛjɛ. Kaa yalu tɔɔru wɔlɔ gɔ nɛ, tɔɔru yamulu sɔɔ kanran wɔlɔ. 16Kɔɔ sabu dɛi, pui Ama kunu gɔ, gagawu le digɛ. Kunrin, pui wogɔ, Ama nɛɛma digɛnu jiiru wɔlɔ go Abarahamu tirɛ unrunw puu mɔi biyɛdo. Inɛw Tɔɔru gɔ sɛin gɔbe, be sai mɔi laa, kaa iyaa inɛw Abarahamu bana Ama le gawaabe gin’ gawanw gɔbe yaa mɔi. Abarahamu emɛ puu ba gɔ woi, 17Ama Dɔn nɛ bana tɔŋaaɲu gin’: “Mu ui tɔgu joo tirɛ ainɛi bojaatun.” Ama le wo gawu gɔ giru nɛ woi emɛ bai. Ama wogɔ, yiunbe bulogonɛ gɔ woi, iyaa kijɛ biyɛlu gɔ biyɛmɔnɛ gɔ woi. 18Abarahamu anranguju lugo suŋu le bɛrii bee, kaa waaru goju womɔ yinwaain gin’ bee ga wo ajubaabe le, iyaa yaanran womɔ Sara, yaanran ii naraanlɛi bee ga wo ajubaabe le, gagawu womɔ yanwanlu. Yalu diyɛ daanaɲu wɔlɔ gɔ nɛ, Abarahamu gawaabe, diyɛdɔn le bee. Kɔɔ gin’ wo “tɔgu joo tirɛ ainɛi biyaabe”, Ama bana wo le sɔwaabe gin’: “Tiruwɛnw uwɔbe lugo gɔ kɔɔ gin’ biyɛdo.” 20Abarahamu, Ama pui kunu gɔ dɛi gagawu sɛlɛ le, kinɛ lɛilɛi biyɛlu. Gagawu womɔ bariyaabe, iyaa wo Ama boi sɔmaabe. 21Ama, pui wo kunu gɔ kibemɔ bɛbɛɛdo ga wo naran go gawaabe. 22Kijɛ dɛi Ama, Abarahamu gagawu lugaa, “woi teitai wɔɔ ga lugu” gɔ kɔɔ woi. 23“Woi teitai wɔɔ ga lugaabɛin” gɔ, sɔɔ kɔɔ wo turu sai dɛi tɔŋɔnɛ. 24Kaa iyaa, inɛw teitai wɔin ga Ama lugoido, sɔɔ kɔɔ emɛ dɛi yaa tɔŋi. Sabu emɛ, Ama, Yesu Inɛw Baŋa emɛ yiun nɛ bulomɔnɛ gɔ le gawaa wɔin. 25Yesui, hakɛ emɛ dɛi inɛw numɔ nɛ kunaa, daabɛin. Iyaa Ama giru nɛ emi teitai biyɛmɔdo ga, Ama woi yiun nɛ bulomaabe.

will be added

X\