RƆMƐ 3

1Yahutunɛi bii nɛ kijɛ sigɛ inɛ kuu nɛ bariyɛjɛ yɔɔ ma? Iyaa, araa nɔɔmu gɔ yaa niwɛn yasɛ ma? 2Sibɛ wooi nɛ niwɛn diyɛ yasɛ. Laa gɔ, Ama, sɔɔ womɔ Yahutunw bɛrɛ gawaraabe. 3Yani wɔɔ ma? Inɛw gamuu sɔɔ turu bɛɛnwin laain ye, sɔɔ turu bɛɛnwin biyɛla bemɛ gɔ Ama sɔɔ turu baŋai bii gɔ yayamalado ma? 4Asuu. Inɛw puu kakalu maŋawin kanran, Ama kai waaru puu naran sɔɔnɛi, bana Ama Dɔn nɛ Ama dɛi tɔŋaaɲu gin’: “U waaru sɔɔ u sɔɔjɛ le, inɛw wooi sɔɔ uwɔbe narain ga jujugɔdɛin. Inɛw waaru ui be jaaraajɛ, u kuu bemɛ nɛ waaru wooi gɔnrɔn bɛbɛɛdou.” 5Kaa teitai laa emɛ gɔ, Ama teitai gɔ inɛw bɛrɛ jugɔmɔjɛ ye, emɛ sɔɔ inge saa bɛɛdɛin? Ama waaru emi wo lagajɛ le, wo teitai laa kanraunwɔ ma? Mu Adama unrunw aŋai sɔɔɲu gin’ sɔɔuwɔn. 6Asuu. Ama teitai laa bee biyaai ye, wo yani aduna saliyɛ kire bɛɛdo? 7Kakalu ma gɔ le digɛnu, Ama bɛrɛ naran goojɛ gɔ sigɛ le gaai jugɔmɔjɛ biyaai ye, iyaa wogɔ dɛi baba womɔ babariyɛjɛ biyaai ye, nɛɛ inge dɛi mui hakɛ kanrannɛi gin’ lugo ye, jarugu kuu ma nɛ duurɔdɛin ma? 8Kɔɔ gin’ inɛw gamuu gɛgɛɛɲu: «Ɛju gɔ wɛɛmɔ ga, emɛ mɔɲu kanranmɔi.» Inɛw gamuu kuu ma nɛ kakalu maŋaa, maa kunrin gɛɛuwɔ gin. Inɛw kɔɔbe, saliyɛ jarugu, kuu bemɛ nɛ susugodo. Wogɔ be le dagaa. 9Yani wɔɔ? Emɛ Yahutunw gɔbe, emɛ inɛw wajunw dɛi irein ma? Ai, turu kanran irelain. Yahutunw lee, tɔgu wajunw lee, be puu hakɛ bei laamauwɔ ga, mu giru nɛ baa sɔwaabɔn. 10Ama Dɔn nɛ bana tɔŋaaɲu gin’: “Inɛ teitai wɔɔ wɔlɔ, halu koturu kanran. 11Inɛ teitai paamu kanraanjɛ turu kanran wɔlɔ. Inɛ Amai dɛnɛnɛ turu kanran wɔlɔ. 12Be wooi oju ɛju gɔ nɛ gɛŋiyaan gowaain, be wooi manaai. Ɛju kanrannɛ wɔlɔ, halu koturu kanran. 13Aŋa bemɛ, ɔnsain pinɛlaaɲu gin’ wɔɔ, ninɛ bemɛ nabara kanrin. Aŋa bemɛ nɛ yuguru dugui goojɛ. 14Aŋa bemɛ nɛ jebu gaaru jowaa wɔɔ. 15Inɛ dai nɛ be ɔgi wɔin. 16Yalu be galajɛ wooi nɛ, be yanwan lee, amasɔgɔ sɔɔ lee papajaɲu. 17Be jamu oju gɔi inin. 18Be Ama giri liyɛ turu kanran sɛnɛ.” 19Temu tamu turu kanran inɛw aŋa nɛ goonɔu ga, iyaa aduna wooi saliyɛ gɔ Ama womaa kire ga, Tɔɔru nɛ sɔɔ too puu, inɛw Tɔɔru bei laamau wɔɔ dɛi tɔŋɔ ga, nɛɛ emɛ igii wɔin. 20Sabu inɛ turu kanran, Tɔɔru kijɛ gɛɛjɛ gɔ gɛliyaabe dɛi Ama giru nɛ woi teitai wɔɔ ga lugoidenɛ. Kaa Tɔɔru, inɛw bemaa hakɛ kanraantin ga bei wo jugɔmɔjɛ. 21Kaa kanɛ tɔɔru gɔbe ni tolo go Ama, bana emi teitai wɔɔ ga wo lugojɛ emi tagaraajɛ. Kaa kɔɔ wooi nɛ Mɔise tɔɔru dɔn gɔ lee, inɛw Ama titiyaanw dɔn gɔbe lee, wogɔ dɛi sɛɛrɛ gowaabɛin. 22Ama, inɛw, Yesu Kirisito nɛ gagawu be sɛɛ gɔ digɛu, bei teitai wɔin ga lugojɛ. Inɛw Kirisito le gawaa wɔin puui kɔɔ gin’ lugojɛ, sabu be wooi logoro nɛ kabu turu kanran tolo: 23Inɛw puu hakɛ kanraantin, be wooi Ama dooro baŋa le wagee wɔin. 24Kaa kuu goonu Kirisito Yesu nɛ bɛɛmɔjɛ gɔ digɛu, Ama, nɛɛma unrunmɔ le, sin obu gin’, bei teitai bojojɛ. 25Kirisito ili gɔ le digɛnu, inɛw hakɛ mɛɛnɛ bɛɛ ga, Ama, Kirisitoi, sadaga gin’ obaabe. Inɛw, Kirisito nɛ gagawu be sɛɛ gɔ digɛu, hakɛ mɛɛnu gɔ bɛɛdɛin. Ama, teitai unrunmɔ tagara ga kɔɔ kanraanbe. Waaru galaai gɔ le, Ama, muyɔn unrunmɔ nɛ inɛw hakɛ lugo ga yabalu. 26Kaa kanɛ iye bai ɔn le, Ama teitai unrunmɔ tagara ga, kɔɔ kanrun. Wo bana kɔɔ le unruin teitai wɔɔ ga tagarauwɔ. Iyaa inɛw Yesu le gawaa wɔin gɔbei teitai bojonɛ gɔ unruin ga tagarauwɔ. 27Nɛɛ inɛw, kijɛ inge dɛi kuu ulo ulo bɛɛdɛin? Kijɛ turu dɛi kanran be kuu bemɛ unu bɛɛidenɛ. Inge dɛi kuu bemɛ unu bɛɛidenɛ wɔin? Be Tɔɔru kijɛ kanran gɛɛjɛ gɔbe kanraan teitai biyaain dɛi kuu bemɛ unɔdɛin ma? Ai, be wogɔ dɛi kuu bemɛ unu bɛɛidenɛ. Kaa be gawaa wɔin dɛi, Ama, giru unrunmɔ nɛ bei teitai wɔɔ ga lugodo. 28Sabu Ama, inɛi gagawu womɔ dɛi giru unrunmɔ nɛ teitai bojojɛ. Kaa Tɔɔru kijɛ kanran gɛɛjɛ gɔ wo kanranjɛ dɛi laa ga, emɛ iyeuwɔin. 29Maa Ama, Yahutunw turu sai Amai ma? Maa woi tɔgu wajunw gɔbe yaa Amai laa ma? Ɔnhɔn, tɔgu wajunw gɔbe Ama yaa woi, 30sabu Ama turu sai yɔɔ. Wo Yahutunw gɔbe, gagawu bemɛ digɛnu bei teitai wɔɔ ga lugodo, iyaa inɛw Yahutunw tɔgui laain gɔbe kanran, gagawu bemɛ digɛnu bei teitai wɔɔ ga lugodo. 31Kaa sɔɔ kɔɔ tiyɛ gɔ, emɛ gagawu dɛi Tɔɔrui niwɛn sɛlɛ bojaatin ma? Ai, kɔɔ gin’ laa. Kaa emɛ Tɔɔru bɛrɛ niwɛn womɔ tɔitɔi gɔ obouwɔin.

will be added

X\