1 U, inɛ inɛw wajunw saliyɛkirenɛ gɔ, ui inɛ yagɔ tɔgui kanran, u temu yalu tamau turu kanran sɛlɛu. Sabu waaru inɛw saliyɛ kiraa, kuu bemɛ nɛ jarugu u duurɔjɛ le, u iyaa kijɛ mɔɲu kɔɔbe tunmɔ kanranjɛu digɛu, u kuu uwɔ nɛ jarugu duurɔuwɔu. 2 Ama, inɛw kijɛ kɔɔbe tunmɔ kanranw gɔbe saliyɛ wo kirejɛ gɔ, teitai kirejɛ ga emɛ igii wɔin. 3 Kaa u inɛw wajunwin kijɛ dɛi u jarugau wɔɔ gɔbe kanrannɛ gɔ, ui Ama saliyɛ gɔ nɛ ɛli gogoodo ga wɔu ma? 4 Maa, u Ama ɛhɛju diyɛ gɔ lee, diyɛdɛgu diyɛ womɔ gɔ lee, muyɔn diyɛ womɔ gɔ lee yau kanraunwɔu ma? U, Ama ɛhɛju gɔ bana duli nɛ ui jijɛ yaaun jaain wɔɔ ga inɛɛu ma? 5 Kaa u kɔkɔlɔmaaginɛi, u bana uwɔ duliyemu ibɛlau. Kɔɔ sabu dɛi, Ama kinɛbanrun gɔ lee, saliyɛ kiru teitai womɔ gɔ lee bai tagaraidɛin gɔ dɛi, u kuu uwɔ nɛ Ama kinɛbanrun gɔ bariyɛmɔuwɔu. 6 Ama, inɛ tuturui birɛ womɔ le kɛukɛu tutujɔdo. 7 Inɛw birɛ ɛju nɛ jaa toin gɔbe, dooro lee, baba lee, ɔnmɔ dumɔ sɛlɛ gɔ lee dɛnɛw gɔbe, ɔnmɔsɔgɔ gɔ, Ama bei ohobodo. 8 Kaa inɛw kuu bemɛ diŋɛ tee dɛnɛw gɔbe, inɛw naran gɔ pajaatiyaa, teitai laa dimi gɔbe, Ama kinɛbanrun kuu bemɛ nɛ susugodo. 9 Yahutunw nɛ gowaa ye, iyaa inɛw Yahutunw tɔgui laain gɔbe nɛ dɔɔ, ɔɲɛ diyɛ lee, kinɛ ɔɲɛ lee, inɛw mɔɲu kanranw wooi kuu nɛ susugodo. 10 Kaa inɛw ɛju kanranw gɔbe puu, Yahutunw nɛ gowaa ye, inɛw Yahutunw tɔgui laain gɔbe nɛ yaa dɔɔ, Ama bei dooro lee, baba lee, jamu lee ohobodo. 11 Sabu, Ama, inɛwin kabu kunɔɔlɛ. 12 Inɛw Mɔise tɔɔru inɛɛ wɔu hakɛ kanranɲu gɔbe, bei susuiyodo. Kaa Tɔɔru ni tolo go bei susuiyodo. Kaa Yahutunw, be inɛw Tɔɔru gɔ igii wɔu hakɛ kanranɲu gɔbe, Ama, saliyɛ bemɛ, Tɔɔru gɔ le digɛnu kiredo. 13 Sabu Tɔɔru sɔɔ suguru le keŋi sai le inɛwin Ama giru nɛ teitai biyɛidolo, kaa tɔɔru gɔbe kijɛ kanran gɛɛɲu gɔ kanrun le Ama giru nɛ inɛwin teitai biyɛdo. 14 Inɛw Yahutunw tɔgui laain gɔbe, Tɔɔru gɔ inɛw bɛrɛ obin gɔ bei laa. Kaa be Tɔɔru gɔ kijɛ kanran gɛɛjɛ gɔ kuu bemɛ le kanraunwɔin ye, halu Tɔɔru gɔ be bɛrɛ obonɛ kanran, be kuu bemɛ le kijɛ kanraun jaan gɔ lee, jaanla gɔ lee igii wɔin ga tagarauwɔin. 15 Be bana yoi yaau be wɔɔ gɔ le, Tɔɔru kijɛ kanran gɛɛjɛ gɔ kinɛ bemɛ nɛ yato ga tatagaraɲu. Kinɛjugɔ bemɛ yaa wogɔ narain ga tatagarajɛ. Sabu waaru gamuu kinɛ bemɛ bei jajarugajɛ, iyaa waaru gamuu kijɛ be kanrun gɔ teitai wɔɔ ga bei tatagajɛ. 16 Bai Ama, Kirisito Yesu le digɛnu ajubu boŋurun gɔbe wooi saliyɛ wo kirɛido gɔ, bana mu gɛɛbe gin’ biyɛdo. Kibɛru Ɛju waaju mu tagajɛ gɔ wogɔ sɔɔi sɔɔjɛ. 17 Kaa u kai, u ui Yahutunɛi ga gɛɛuwɔu, u Mɔise tɔɔru gɔ nɛ diyɛ uwɔ daanaa wɔu, iyaa u Ama tɔitɔi gɔ Ama uwɔi dɛi kuu uwɔ unɔuwɔu. 18 U Ama diŋɛ gɔi igii wɔu, iyaa u Tɔɔru gɔ nɛ, uwaa kijɛ ɛju gɔ yɛmɛ ga ui deeraaɲu. 19 U ui girumuw teeremɔnɛi ga, inɛw ɔlɔ nɛ toin gɔbe wijɛi ga, 20 ui inɛw jugɔ sɛnɛ deerenɛi ga, iyaa jugɔ sibɛ go unrunwin wɔin jaŋudeerenɛi ga wɔu, sabu u jugɔ tɔitɔi gɔ lee, naran tɔitɔi gɔ lee, Mɔise tɔɔru gɔ nɛ yasɛu. 21 Nɛɛ, u inɛw wajunw deerenɛ gɔ, u kuu uwɔ le inge dɛi ui deereelɛu wɔu ma? U gunyɔn gunyɔun jaanla ga waaju taganɛ gɔ, u yani kuu uwɔ le gunyɔn gunyɔunwɔu ma? 22 U inɛ dimu dimiyɛnnɔu gɛɛnɛ gɔ, u yani dimu dimiyɛunwɔu ma? U inɛ ɔmɔlɔbe ibiliyaa wɔɔ gɔ, u ɔmɔlɔbe ginrun nɛ kijɛ toin gɔbe yani gunyɔunwɔu ma? 23 U Tɔɔru dɛi inɛ kuu uwɔ unɔnɛ gɔ, u Tɔɔru sɔɔ yamulu uwɔ le Amai yani gailiyɛmɔuwɔu ma? 24 Ama Dɔn nɛ tɔŋaa gi: “E dɛi tɔgu wajunw gɔbe Ama boi yamalauwɔin.” 25 U Tɔɔru gɔ yagɛlɛu ye, araa nɔi uwɔ gɔ tiyɛ yasɛ, kaa u tɔɔru gɔbe yamalauwɔu ye, araa nɔi uwɔ gɔ tiyɛ sɛlɛ. 26 Inɛ araa nɔɔmɔla gɔ Tɔɔru gɔ yabauwɔ ye, araa nɔɔmɔla womɔ gɔ araa nɔɔmu gin’ Ama lugoidolo ma? 27 E Yahutunw gɔbe, e Tɔɔru tɔŋaaɲu gɔ yasɛi, iyaa ei araa nɔɔmaabɛin, kaa e Tɔɔru gɔ yamalaati. Tɔgu wajunw gɔbe, bei araa nɔɔmɔla, kaa be Tɔɔru gɔ yadimi. Kɔɔ sabu dɛi be kuu ebe nɛ jarugu duduurɔdɛin. 28 Nɛɛ Yahutunɛ tɔitɔi gɔ, inɛw inɛ Yahutunɛi gɛɛɲu gɔi laa. Iyaa, araa nɔi tɔitɔi gɔ gojunawan nɛ iyemɔjɛ gɔi laa. 29 Kaa Yahutunɛ tɔitɔi gɔ, inɛ kinɛ unrunmɔ nɛ Yahutunɛi wɔɔ gɔi, tiyɛ gɔ inɛ kinɛ womɔ araa nɔɔmaaɲu gɔi. Wogɔ Tɔɔru tɔŋaaɲu birɛi laa, kaa Ama Kikinu birɛi. Inɛ wogɔ tunmɔ gɔ, Ama woi sɔmɔjɛ, inɛwin laa.
