RƆMƐ 16

1Mu emɛ saa Pebe inɛ ɛjui ga e bɛrɛ jugɔmu ibɛɛ wɔun. Wo Sankere Ama inɛw mɔɔnu nɛ birɛ birɛuwɔ. 2Woi Inɛw Baŋa mɔi dɛi, bana Ama inɛw tunmɔi be sɛgɛrɛun jaan gin’ woi sɛgɛrɛi. E le kai wo sɛɛ wooi nɛ woi barai. Wo inɛw jooi ɛjii baraabe, mui kanran ɛjii baraabe. 3Kirisito Yesu birɛ nɛ mu bɔɔnw Pirisilu lee, Akilasu leei poonɔi. 4Be mui yaba ga kinrun bemɛ pajaa nɛwɛnnɛ. Mu bei birɛ poo tagauwɔn. Mu sai laa, kaa Ama inɛw mɔɔnu Yahutunw tɔgui laain gɔbe yaa bei birɛpoo ɛjii tagauwɔin. 5Ama inɛw mɔɔnu, ginrun bemɛ nɛ wɔɔ gɔi poonɔi. Mu anrunge Epayinɛte, Rɔmɛ laamu Asi numɔ nɛ, ainɛ laa tubu yoi gɔi poonɔi. 6Marii poonɔi, wo e dɛi birɛ ɛjii biraabe. 7Andoronikusu lee, Juniasu leei ɛjii poonɔi. Be kanran mu ba unrunwin, be lee, mu lee tunmɔ go kaju nɛ tobɛin. Yesu jaŋu unrunw tiyaaɲu gɔbe logoro nɛ boi bemɛ ɛjii gowaa wɔɔ. Mu dɛi be laa Kirisito jaŋu unrunwin biin. 8Anpiliatusu, Inɛw Baŋa nɛ bainɛ ibɛ ma gɔi poonɔi. 9Urubɛn, Kirisito birɛ nɛ emɛ bɔɔnɛ gɔ lee, bainɛ ibɛ ma Sutakise leei poonɔi. 10Apɛlɛsui poonɔi, wo Kirisito le bana gawaa wo wɔɔ gɔ daii jugɔmaabe. Arisutobule ginrun gonɔ inɛw gɔbei poonɔi. 11Mu bainɛ Herɔdiɔin poonɔi. Narisise ginrun gonɔ nɛ jaŋu unrunw toin gɔbei poonɔi. 12Tiripɛnɛ lee, Tiripose lee, Inɛw Baŋa birɛ birɛuwɔin gɔbei poonɔi. Bainɛ ibɛ ma Pɛrusidei poonɔi, wo Inɛw Baŋa dɛi saii birɛ biraabe. 13Rupusu, Inɛw Baŋa birɛbirɛnɛ ɛju kɔɔi poonɔi. Wo nai poonɔi, wo mui aini womɔ gin’ lugoube. 14Asinkirite lee, Pelegɔn lee, Hɛrumɛsu lee, Patorobasu lee, Hɛrumasu lee, iyaa ba unrunw wajunw be le wɔin gɔbe leei poonɔi. 15Pilolɔge lee, Juli lee, Nɛrɛ lee, wo saa lee, Olinpasu lee, Ama inɛw be le wɔin gɔbe leei poonɔi. 16Ama inɛw gin’ ihibɛ le tunmɔi poonɔi. Kirisito Ama inɛw mɔɔnu gɔbe puu ei poonɔuwɔin. 17Inɛw mii kabu kunɔw gɔbe, deeru e dei gɔ le inɛw jiiru ye jaŋu unrunwin lelemɔw gɔbe, mu e bɛrɛ gɛɛunwɔn, ba unrunw, e be dɛi kuu ebe kajubai, genɛ bemɛ nɛ dɔrɔ gooi. 18Sabu, inɛw kɔɔbe tunmɔ, Inɛw Baŋa emɛ Kirisito birɛi birɛɛnɛ, kaa kijɛ be kayaun jaan lee, jaanla leei sai ajubauwɔin. Be sɔɔ ɛɛlu sɔi bemɛ lee, inɛwin sɔmu bemɛ lee le, inɛw jugɔ sɛnɛ gɔbe hakilɛ koi lelemɔɲu. 19Inɛw puu bana Inɛw Baŋa sɔɔ le yabaa e wɔɔ gɔi igii wɔin. Kɔɔ dɛi mu e le kinɛ ɛɛlu le wɔun. Kaa, mu ebaa kijɛ ɛju kanrun nɛ inɛw hakilɛgunwin biyɛ ga, mɔɲu kanrun nɛ inɛw sɔɔ inɛɛbei biyɛ ga ibɛɛ wɔun. 20Ama, jamu obonɛ gɔ, bɛrii Setanui kubɔ ebe doɲu nɛ pɔpɔjugɔdo. Inɛw Baŋa emɛ Yesu nɛɛma gɔ e le biyɛ. 21Timɔte, birɛbirɛnɛ mu bɔɔnɛ gɔ ei poonɔuwɔ. Mu ba unrunw Lusiusu lee, Jasɔn lee, Sosipatɛru lee kanran ei poonɔuwɔin. 22Iyaa mu Tɛrutiusu, lɛtɛrɛ ɔn Pɔlu mu bɛrɛ tɔɔraa tɔŋɔnɛ gɔ, mu Inɛw Baŋa nɛ ei poonɔuwɔn. 23Ginrun sugo ma baŋa Gayisu, inɛ ginrun nɛ Ama inɛw mɔɔnu gɔ puu mɔrinyɛnjɛ gɔ, wo ei poonɔuwɔ. Erasute, ana gɔ kɛɛlɛ gɛliyɛnɛ gɔ lee, emɛ bainɛ Karutusu lee ei poonɔuwɔin. [ 24Inɛw Baŋa emɛ Yesu Kirisito nɛɛma gɔ e wooi le biyɛ. Amina.] 25Emɛ Amai sɔmɔmɔi. Kibɛru Ɛju mu tagajɛ gɔ, Yesu Kirisito sɔɔ waaju gɔ lee, iyaa, sɔɔ boŋurun pɔɔlɔ baa baŋabe gɔ emi kanɛ jugɔmaaɲu gɔ lee sɔɔ le kɛukɛu, Ama gagawu nɛ ei ɛɛn go iŋiyɛnmɔu gɔnrɔn yasɛ. 26Kaa, inɛw Ama titiyaanw sɔɔ Ama Dɔn nɛ tɔŋaa too gɔ le digɛu kanɛ sɔɔ boŋurun wogɔ tagaraaɲu. Inɛw wooi Ama le gawa ga, iyaa sɔɔ womɔ yaba ga, Ama asuu ɔnmɔi wɔɔ gɔ kijɛ tɔɔru gɔ le digɛu, tɔgu wooi bɛrɛ sɔɔ boŋurun gɔ jugɔmaaɲu. 27Ama wo turu sai hakilɛ baŋai gɔ, Yesu Kirisito le digɛnu boi sɔmu gɔ womɔi biyɛmɔ, asuu nasuu. Amina.

will be added

X\