RƆMƐ 15

1Emɛ inɛw gagawu nɛ paŋa sɛin gɔbe, inɛw gagawu nɛ paŋa sɛnɛ gɔbe yɛbɛlɛ, emɛ duiyɔun jaain wɔɔ, iyaa kijɛ kinɛ emɛ aajɛ emɛ kanraun jaanla. 2Kaa, emɛ bɔɔnɛ gagawu bariyɛmɔ ga, emɛ tuturu wooi, ɛju womɔ dɛi, kijɛ kinɛ womɔ aajɛ emɛ dɛnɛu jaain wɔɔ. 3Sabu Kirisito kijɛ kinɛ unrunmɔ aajɛ kanranlu. Kaa Ama Dɔn nɛ bana tɔŋaaɲu gin’: “Ui duyɔnw duyɔ gɔ kuu ma nɛ sugu.” 4Emaa muyɔn lee, kinɛ kaalu lee Ama Dɔn emi obojɛ gɔ le digɛnu, diyɛdɔn bɛɛ ga, kijɛ Ama Dɔn nɛ tɔŋaaɲu gɔ emi deere ga tɔŋi. 5Ebaa, Inɛw Baŋa emɛ Yesu Kirisito Ama gɔ, iyaa wo Ba gɔi tunmɔ le mii turu le sɔmɔ ga, Ama, muyɔn lee, kinɛ kaalu lee obonɛ gɔ, e wooi tunmɔ le, Kirisito Yesu bana kanrun gɔ digi ye, ajubu turu le e biyɛmɔ. 7Bana Kirisito ei sɛguru gin’, e kanran, Ama boi sɔmɔ ga tunmɔi sɛgɛrɛi. 8Nɛɛ, kijɛ mu gi: Yahutunw tirɛ anranw gɔbe le pui kuni gɔ kibemu gɔ le digɛnu, Amai sɔɔ turu baŋai tagara ga, Kirisito, Yahutunw birɛbirɛnɛi biyaabe. 9Iyaa Ama amasɔgɔjugɔ gɔ dɛi inɛw Yahutunw tɔgui laain gɔbe Ama boi sɔmɔ ga, Kirisito, Yahutunw birɛbirɛnɛi biyaabe, bana Ama Dɔn nɛ tɔŋaaɲu gin’: “Kɔɔ dɛi tɔgube logoro nɛ mu boi uwɔ sɔsɔmɔdɔn, boi uwɔ sɔmu nii niniidɔn.” 10Ama Dɔn nɛ bana iyaa lee tɔŋaaɲu gin’: “E tɔgu gɔbe, Ama tɔgu inɛw gɔ le bari ye kinɛ ɛɛliyɛmɔi.” 11Iyaa lee tɔŋaaɲu: “E tɔgu gɔbe puu, Inɛw Baŋa Ama boi sɔmɔi. E tɔgu wooi, boi womɔ sɔmɔi.” 12Iyaa Esayi dɔn nɛ tɔŋaa: “Jɛse tiruwɛnɛ wɛwɛɛdo. Wo tɔgu gɔbei laamu kanran ga ihiŋɛrɛndo. Be diyɛ bemɛ wo le dadaanadɛin.” 13Kikinu Pilu gɔnrɔn le diyɛdɔn ebe gɔ bariyɛnu biyɛ ga, Ama diyɛdɔn obonɛ gɔ, kinɛ ɛɛlu diyɛ lee, jamu diyɛ lee, gagawu wo nɛ bojaa e sɛɛ gɔ le digɛu, e nɛ joonɔ. 14Ba unrunw mabe, ebaa ɛhɛju le jowaa wɔi ga, ebaa jugɔ le jowaa wɔi ga, iyaa ebaa tunmɔ tinwinrun bɛbɛɛjɛi ga, mu kai e dɛi diyɛ daanu le wɔun. 15Kaa lɛtɛrɛ ma nɛ sɔɔ gamuu, liyɛ sɛlɛ le, kijɛ gamuu e igu ei naŋaranmɔ ga, daii sɔwaabɔn. Maa inɛw Yahutunw tɔgui laain gɔbe dɛi Kirisito Yesu birɛbirɛnɛi biyɛ ga, Ama mu bɛrɛ nɛɛma obu gɔ dɛi, mu liyɛ sɛlɛ le daii sɔwaabɔn. Inɛw Yahutunw tɔgui laain gɔbe sadaga Ama kinɛ aajɛ gin’ ɛjui biyɛ ga, bei Kikinu Pilu Ama dɛi inɛw dɛiin bojaajɛi biyɛ ga, mu, Ama bɛrɛ sadagadɔɔnɔnɛ gin’, Kibɛru Ɛju Ama bɛrɛ goojɛ gɔ waaju tagauwɔn. 17Kɔɔ dɛi, Kirisito Yesu nɛ tonu, Ama birɛ mu birɛjɛ gɔ nɛ mu kuu ulo le wɔun. 18Inɛw Yahutunw tɔgui laain gɔbe bemaa Ama le yaba ga, Kirisito mu le digɛu birɛ biru gɔi laa ye, mu kijɛ waja sɔɔ sɔɔun kara sɛlɔn. Sɔɔ mu sɔɔjɛ gɔbe lee, birɛ mu birɛjɛ gɔbe lee digɛu, 19sɛɛrɛ taanrinyɛnbe lee, yarabirɛ lee gɔnrɔn le digɛu, iyaa Ama Kikinu gɔnrɔn le digɛu Kirisito wogɔ kanraanbe. Kɔɔ gin’ Jerusalɛmu ana nɛ gowaa, ana mu yoi gɔbe puu le digɛu, Iliri gana nɛ yai dɔɔ, mu Kirisito Kibɛru Ɛju waaju gɔ yalu wooi nɛ tagaabɔn. 20Mu Kibɛru Ɛju waaju gɔ, yalu Kirisito sɔɔ be sɔɔu ɛgɛnɛ gɔbe nɛ sai taga ga kijɛ mu dɛnɛbe gɔ kɔɔ woi bee. Kɔɔ gin’ inɛ waja ginrun bɔlɔtei kuu nɛ mu ginrun ujɔu wɔlɔn. 21Ama Dɔn nɛ bana tɔŋaaɲu gin’: “Inɛw bɛrɛ kibɛru womɔ taganɛ gɔbe, woi ihiyedɛin. Iyaa inɛw sɔɔ womɔ be sɔɔu ɛgɛnɛ gɔbe, paamu kakanrandɛin.” 22E bɛrɛ yaa ga waaru joo kijɛ mui tɛŋɛbe gɔ kɔɔ woi. 23Kaa kanɛ yalu mu wɔɔ ɔnbe nɛ, birɛ mu birɛun jaan gɔbe biraa kilaaun. Iyaa, ei yɛnɛi yaa ga anranguju joo daariyaabɔn dɛi, 24mu kanɛ e bɛrɛ yai bɛbɛɛgɔn ga ajubaa wɔun. Mu Ɛsupaɲu yaa ga waaru oju mu too le, ei yɛnɛnu galu ibɛɛ wɔun. Waaru daaru ebe mu gowaajɛ, ebaa mui niinɛ ga ibɛɛ wɔun. 25Kaa kanɛ Ama inɛwin bara ga Jerusalɛmu yaajɔn. 26Sabu, Maseduanɛ gana lee, Akayi gana lee jaŋu unrunw gɔbe, Ama inɛw Jerusalɛmu nɛ dɛgu le wɔin gɔbe dɛi kɛɛlɛ mɔɔnɔ ga kinɛ bemɛ aabe. 27Wogɔ kanran ga kuu bemɛ diŋɛ le be aaru. Kaa, naran go dɛgugunw kɔɔbei be baraun jaain bee. Sabu Yahutunw jaŋu unrunw gɔbe, kikinu sibɛ go kijɛ ɛju Ama be bɛrɛ obu gɔbe, inɛw Yahutunw tɔgui laain gɔbe le gamalaabɛin. Kɔɔ gin’, inɛw Yahutunw tɔgui laain gɔbe kanran, goju kai sibɛ go kijɛ ɛju Ama be bɛrɛ obu gɔbe Yahutunw jaŋu unrunw gɔbe bɛrɛ be oboun jaain wɔɔ. 28Waaru sɔɔ kɔɔ kilɛmaa mu biyaajɛ, iyaa waaru kɛɛlɛ mɔɔni gɔ be bɛrɛ obaa mu biyaajɛ, Ɛsupaɲu yaagu ma le e bɛrɛ wawaŋadɔn. 29Waaru e bɛrɛ mu wɛɛido, mu e le Kirisito duba diyɛ gɔ gagamaladɔn. 30Ba unrunw, Inɛw Baŋa emɛ Yesu Kirisito le digɛu, iyaa Ama Kikinu ihibɛ emɛ bɛrɛ obu gɔ digɛu, e mu le bari ye mu dɛi ɛjii maini Ama bɛrɛ gɛɛin. 31Judea gana nɛ inɛw gawanɛ gɔbe numɔ nɛ maa ɛli goo ga, iyaa Jerusalɛmu nɛ Ama inɛw wɔin gɔbe, baru be bɛrɛ mu jɛɛlɛjɛ gɔ kinɛ ɛɛlu le yaba ga, mu dɛi Ama gɛɛin. 32Kɔɔ gin’, Ama yabaajɛ ye, mu kinɛ ɛɛlu le e bɛrɛ dɔdɔɔdɔn, e le wɔnu deeliye bɛbɛɛdɔn. 33Ama jamu obonɛ gɔ, e wooi le biyɛ. Amina.

will be added

X\