RƆMƐ 14

1Inɛ gagawu nɛ paŋa sɛlɛ gɔ sɛgɛrɛi. Kaa kijɛ wo kanraun jaan ma, kijɛ wo kanraun jaanla ma bana wo ajubajɛ sibɛ go wo le jiirenɔugi. 2Kɔɔ gin’, inɛ turu, gagawu womɔ wo bɛrɛ kijɛ puu kayamu bɛbɛɛmɔjɛ. Kaa inɛ gagawu nɛ paŋa sɛlɛ gɔ, minɛ nɛ kijɛ tɛiyɛjɛ sai kayajɛ. 3Inɛ kijɛ puu kayi bɛɛjɛ gɔ, inɛ kakayɔn gamuu kayi bɛɛlɛ gɔi gailiyɛmɔu jaanla, iyaa inɛ kakayɔn gamuu kayaalɛ gɔ, inɛ kijɛ puu kayajɛ gɔi jarugaun jaanla, sabu Ama woi sɛgɛraabe. 4Ui aai ma, u inɛ waja birɛbirɛnɛi jaruganɛ gɔ? Wo kijɛ wo kanranjɛ nɛ ɛɛn go iŋɛ ma, ɛɛn go iŋɛla ma, wo baŋa turu sai tagu yato. Kaa wo ɛɛn go iŋiyɛndo, sabu Inɛw Baŋa woi ɛɛn go iŋiyɛnmɔɲu gɔnrɔn yasɛ. 5Inɛ turu, bai turu bai waja dɛi sigɛ ga lugojɛ, inɛ waja yaa bai wooi kɛukɛu ga lugojɛ. Inɛ tuturu kinɛ womɔ nɛ bana wo ajubajɛ daii jugi biyɛ. 6Inɛ bai turu bai wajunw dɛi sigɛ ga wɔɔ gɔ, wo Inɛw Baŋa baba ga kanranjɛ. Inɛ kakayɔn puu kayajɛ gɔ, wo Inɛw Baŋa baba ga kanranjɛ, sabu wo jaa womɔ dɛi Amai birɛpoo tatagajɛ. Inɛ kijɛ gamuu kayaalɛ gɔ, wo Inɛw Baŋa boi sɔmɔ ga kanranjɛ, wo yaa Amai birɛpoo tatagajɛ. 7Sabu emɛ inɛ turu kanran, inɛ kuu unrunmɔ dɛi ɔnmɔi wɔɔ wɔlɔ, iyaa inɛ turu kanran, inɛ kuu unrunmɔ dɛi yinwɛnjɛ wɔlɔ. 8Emi ɔnmɔi wɔɔ ye, Inɛw Baŋa dɛi emi ɔnmɔi wɔɔ, emi yinwaain ye, Inɛw Baŋa dɛi emi yinwɛnjɛ. Kɔɔ gin’, emi ɔnmɔi wɔɔ ma, emi yinwaan wɔɔ ma, emi Inɛw Baŋa mɔi. 9Sabu Kirisito, inɛw yinwaain gɔbe lee, inɛw ɔnmɔi wɔin gɔbe lee, Inɛw Baŋai biyɛ ga yinwaan, bulaabe. 10Nɛɛ u, inge dɛi u bainɛi jarugau wɔu ma? U kanran, inge dɛi u bainɛi gailiyɛmɔu wɔu ma? Sabu saliyɛ emɛ kiru dɛi emɛ puu Ama giru nɛ bai turu ihiŋiyɛndɛin. 11Sabu Ama Dɔn nɛ bana tɔŋaaɲu gin’: “Mu Inɛw Baŋa ɔnmɔi wɔɔ gɔ, daii sɔwaa kijɛ mu gi: Inɛw puu giru ma nɛ tutuŋiyɛndɛin, inɛw wooi mui Amai ga daii gɛgɛɛdɛin.” 12Kɔɔ gin’, emɛ tuturu wooi kijɛ emɛ kanrun tiyɛ gɔ Ama bɛrɛ tatagadɛin. 13Waja emɛ tunmɔi jarugu pajamɔi. Kaa kijɛ e bainɛ kubɔ tomɔmɔjɛ ma, hakɛ nɛ woi yoomɔjɛ ma kanraindelei ga kinɛ ebe nɛ kunɔi. 14Inɛw Baŋa Yesu nɛ, mu igii wɔun, kijɛ kuu unrunmɔ le danwain ga wɔɔ wɔlɔ ga mu naran go gawaa wɔun. Kaa inɛ turu, kijɛ turu unruin danwan ga wɔɔ ye, kɔɔbaŋa bɛrɛ danwan. 15Kaa kakayɔn uwɔ dɛi u bainɛ kinɛ jinwɛnmɔu wɔu ye, yoiyaara uwɔ ihibɛ le sɛgɛrɛɛlɛ. Kirisito, inɛ dɛi yinwun gɔ, u inɛ wogɔi kakayɔn uwɔ dɛi suyonɔu. 16Kijɛ ɛjii wɔɔ ga u lugojɛ gɔ, inɛw wajunw bɛrɛ wogɔ kijɛ mɔɲui gɛɛɲu oju obonɔu. 17Sabu Ama diinɛ gɔ kakayɔn lee, kijɛ nɔɔɲu lee sɔɔ le digɛla, kaa teitai lee, jamu lee, kinɛ ɛɛlu lee Kikinu Pilu obojɛ gɔ le digɛ. 18Inɛ Kirisito birɛ kɔɔ gin’ birɛjɛ gɔ, Ama kinɛ ahaamɔjɛ, inɛw kanran woi bababadɛin. 19Kɔɔ dɛi, emɛ maini ye kijɛ jamu jɛɛlɛjɛ gɔ lee, tunmɔi kijɛ bariyɛmɔjɛ gɔ lee dɛnɛmɔi. 20Kakayɔn sɔɔ dɛi Ama birɛ birɛjɛ gɔ yamalanɔu. Narain, kakayɔn puu kayi bɛbɛɛmɔjɛ, kaa inɛ wajai kakayɔn hakɛ nɛ kunɔjɛ gɔi kaya ga mɔɲii wɔɔ. 21Kijɛ ɛjui wɔɔ gɔ unwɔ: Nawan tɛnwɛnnɔu, kɔɲɔ nɔɔnɔu, maa kijɛ u bainɛ hakɛ nɛ kunɔjɛ turu kanran kanrannɔu. 22Kijɛ kɔɔbe dɛi bana gawaa u wɔɔ gɔ, wogɔ u lee, Ama lee sɔɔi. Inɛ kijɛ ɛjui ga wo wɔɔ gɔ waaru wo kanranjɛ le kuu unrunmɔ jarugaalɛ gɔ, naran go, Ama wo yabu. 23Kaa, inɛ kijɛ unrun kayajɛ dɛi kinɛ lɛilɛi le wɔɔ gɔ, kijɛ wo kanranjɛ gɔ gagawu le kanraanlɛ dɛi, Ama kuu womɔ nɛ jarugu duduurɔdo. Kijɛ gagawu le digɛnu kanraannɛ gɔ puu hakɛi.

will be added

X\