RƆMƐ 13

1Inɛw wooi paŋagunw le be tubiyeun jaain wɔɔ. Sabu paŋa Ama bɛrɛ goolu turu kanran wɔlɔ, paŋa wɔin gɔbe Ama sagu le dɛinyaan wɔin. 2Kɔɔ gin’, paŋa daanaaɲu gɔ le inɛ jaiyɛjɛ gɔ, Ama kijɛ daanu gɔ le jaiyɛuwɔ. Inɛ wogɔ gin’ kanranjɛ gɔ, wo tujɔ mɔɲu kuu womɔ nɛ susunugodo. 3Sabu inɛw mɔɲu kanranw gɔbei laa ye, ɛju kanranw gɔbe paŋagunwin liyɛun jaanla. U paŋaginɛi liyɛ ibɛlau ma? Kɔɔ biyaai ye, u ɛju kanran, wo ui sɔsɔmɔdo. 4Sabu wo u bɛrɛ niwɛn siyɛ dɛi, Ama birɛbirɛnɛi biyaa wɔɔ. Kaa u mɔɲu kanranjɛu ye, woi liyɛ, sabu wo bamai gɔnrɔn kɔɔ sɛlɛ. Wo Ama birɛbirɛnɛi. Wo Ama kinɛbanrun goonɔ ga, inɛ mɔɲu kanrannɛ gɔi lalagajɛ. 5Kɔɔ dɛi paŋagunw le u tubiyeun jaain wɔɔ. Kinɛbanrun liliyɛ gɔ sai dɛi laa, kaa kinɛjugɔ uwɔ kuu uwɔ nɛ jarugu duduurɔjɛ dɛi be le u tubiyeun jaain wɔɔ. 6Kɔɔ dɛi e sɛgu sɛgɛuwɔi, sabu paŋagunw gɔbe kijɛ be kanraun jaan gɔbe sɛɛu kanraunwɔin ye, be Ama birɛi birɛuwɔin. 7Kijɛ be bɛrɛ tujɔun e jaan gɔbe puu tujɔi: Sɛgu gɔ sɛgu baŋa bɛrɛ oboi, tɛɛbɛ gɔ tɛɛbɛ baŋa bɛrɛ oboi. Inɛ u liyɛun jaan gɔi liyɛ, inɛ u babaun jaan gɔi baba. 8Inɛ turu yoru kanran e le biyɛmɔnɔugi. Kaa kijɛ turu e kanraun jaan yɔɔ, wogɔ tunmɔi ibɛɛ bii. Inɛ wo bɔɔnɛi ibɛɛ wɔɔ gɔ, Tɔɔru kijɛ kanran gɛɛjɛ gɔ puu kanraan kibemaati. 9Kijɛ kanran gɛɛɲu ɔnbe: “Dimu dimiyɛnnɔu, inɛ daanɔu, gunyɔn gunyɔnnɔu, inɛ kijɛ daariyɛnɔu”, kɔɔbe puu lee, wajunw gɔbe puu lee tiyɛ mɔɔnaa, kijɛ kanran gɛɛɲu turu ɔn sai nɛ tɛtɛmɛmɔjɛ: “Aŋai kuu uwɔ u ibɛɛ gin’, u bɔɔnɛi yaa kɔɔ gin’ ibɛi biyɛ.” 10Inɛ ihibɛ sɛɛ wo bɔɔnɛ le mɔɲu kanraanlɛ. Inɛ wo bɔɔnw ibɛ gɔ, baŋa Tɔɔru gɔ puu kibemaati. 11E sɔɔ kɔɔ e kanraun jaain wɔɔ, sabu emɛ waaru yagɔ nɛ wɔin ma e igii wɔi. Giri e yemɛu waaru gɔ dɔwaai. Sabu kanɛ, yayabu gɔ laa waaru Yesu Kirisito le emɛ gawu gɔ dɛi sigɛ emɛ le bɛruniyaan wɔɔ. 12Digɛ waaru yagalajɛ, ba yaara bɛruniyaain. Kɔɔ dɛi, emɛ, ɔlɔ nɛ birɛ birɛɲu gɔbei pajamɔi, wijɛ nɛ kɔmɔgelu le kɔmɔ tai bɛɛmɔjɛ gɔi pagiyɛmɔi. 13Yoiyaara emɛ, bana aga wijɛ nɛ biyɛun jaan gin’ bojomɔi. Emɛ yɔgɔrɔ mɔɲu nɛ lee, kɔɲɔ nɔi bimili nɛ lee, sala nɛ lee, kuu sɛlɛ birɛ nɛ lee, jai nɛ lee, ele nɛ lee, kuu emɛ kajubamɔi. 14Kaa, Inɛw Baŋa Yesu Kirisito bana gɔ jeɲɛi. Waja dadaaru mɔɲu kinɛ nɛ goojɛ gɔ diŋɛ kanrun ajubanɔugi.

will be added

X\