RƆMƐ 12

1Nɛɛ, ba unrunw, Ama, amasɔgɔjugɔ emɛ bɛrɛ wo taguru gɔ dɛi, mu e bɛrɛ gɛɛunwɔ kuu ebe sadaga ɔnmɔ, dɛiin bojaaɲu, Ama kinɛ aajɛ gin’, Ama bɛrɛ oboi. Amai babu tɔitɔi babu e bɛɛido gɔ kɔɔ woi. 2Bana ebe, aduna ɔn bana le murin biyɛmɔnɔugi. Kaa Ama bɛrɛ ajubu kana ei obomɔ ye, wo bɛrɛ ei wo dulomɔmɔi. Kɔɔ waaru le Ama diŋɛ gɔ e igii bibiyɛdei: Wogɔ kijɛ ɛjii wɔɔ gɔ lee, kijɛ kinɛ womɔ aajɛ gɔ lee, kijɛ kibaai gɔ leei. 3Ama, nɛɛma mu bɛrɛ obu gɔ dɛi, mu e puu bɛrɛ sɔɔuwɔn: Bana e wɔɔ gɔ nɛ gaanu ye kuu ebe unɔnɔugi. Kaa inɛ tuturu puu, Ama, gagawu gamulu wo bɛrɛ obu gɔ le kɛukɛu, hakilɛ daanu le, kuu unrunmɔ dɛi wo ajubamɔ. 4Goju emɛ turu gɔ nɛ digɛ dɛin dɛin yɔɔin, be puu birɛ bemɛ dɛin dɛin wɔɔ. 5Kɔɔ gin’, emɛ yaa jooi wɔin. Kaa Kirisito nɛ emi goju turu. Iyaa, bana goju digɛ dɛin dɛin gɔbe tunmɔ le mɔrinyaan wɔin gin’, emɛ yaa tunmɔ le kɔɔ gin’ mɔrinyaan wɔin. 6Ama, inɛ tuturu bɛrɛ nɛɛma obu gɔ le kɛukɛu, sin obu dɛin dɛin emɛ sɛɛ gɔbe le birɛ emɛ birɛun jaain wɔɔ. Logoro emɛ nɛ, inɛ turu, Ama bɛrɛ sɔɔ goi sɔi sin obui sɛɛ ye, wo wogɔ gagawu womɔ bana wɔɔ gin’ wo kanraun jaain wɔɔ. 7Inɛ waja, jaŋu unrunw baru sin obui sɛɛ biyaai ye, jaŋu unrunwin wo baraun jaain wɔɔ. Inɛ deeru deeru sin obu sɛɛ gɔ, deeru wo deereun jaain wɔɔ. 8Inɛ, inɛw wajunw gɔbei anrangaju obu sin obu sɛɛ gɔ, bei anrangaju wo oboun jaain wɔɔ. Inɛ kijɛ wo sɛɛ inɛw wajunw le gamalanɛ gɔ, wo wogɔ numɔ maa sɛlɛ le kanran. Inɛ giru teeremɔnɛi wɔɔ gɔ, wo birɛ gɔ nɛ mainiyɛn. Inɛ dɔgɔpaganw baranɛ gɔ, wo kinɛ ɛɛlu le wogɔ kanran. 9Kinɛpilu le inɛwin ibɛɛ biyɛi. Mɔɲu ibiliyɛi, ɛju kanrun gɔ nɛ pagiyɛi. 10E, ba unrunw gin’ tunmɔi ɛjii ibɛɛ biyɛi, e tunmɔ babu nɛ ɛjii mainiyɛin. 11E wala le biyɛnɔugi, kaa kinɛ ɔgu le birɛ ɛjii birɛi. Kinɛ ebe wooi le Inɛw Baŋa dɛi birɛ birɛi. 12Diyɛdɔn ebe gɔ dɛi kinɛ ɛɛlu le biyɛi, ɔɲɛ dɛi muyɔn le biyɛi, waaru wooi Ama gɛɛin. 13Ama inɛw gɔbe kai kilɛi. Yerunw bɛrɛ ginrunsugo oboi. 14Inɛw ei tɔɔɲɔw gɔbe dɛi Ama boi booi. Ɔnhɔn! Be dɛi Ama boi booi. Kaa bei jɛbɛnɔugi. 15Inɛw kinɛ ɛɛlu le wɔin gɔbe le kinɛ ɛɛliyɛmɔi. Inɛw sɔmiyɛn sɔmiyɛnw gɔbe le sɔmiyɛn sɔmiyɛin. 16E tunmɔ le mii turu le biyɛi. Kuu ulo le biyɛnɔugi, kaa birɛ dagi inɛw lugaa sɛnɛ gɔbei birɛ ga yabai. Ei inɛw hakilɛgunwin bojonɔugi. 17Inɛ turu kanran bɛrɛ mɔɲu, mɔɲu le tujɔnɔugi. Inɛw puu giru nɛ ɛju kanran ga dɛnɛi. 18Kanran bɛbɛɛmɔ ye, kijɛ gɔnrɔn ebei wɔɔ gɔ puu kanrun ye, inɛw puu le jamu le biyɛi. 19Ba unrunw ibɛ mabe, e tunmi duguru ebe goonɔugi, kaa Ama kinɛbanrun bɛrɛ duguru ebe wo goomɔi. Sabu Ama Dɔn nɛ Inɛw Baŋa Ama ɔn gin’ gi ga tɔŋaaɲu: “Duguru gɔ mu goodo, pilemɛ ye mu tujɔdo.” 20Iyaa Ama Dɔn nɛ tɔŋaaɲu gin’: “Jaŋunɛ uwɔ giyɛ le wɔɔ ye, pana kayaɲu wo bɛrɛ obo, diinɔɔrin le wɔɔ ye, dii nɔɔɲu wo bɛrɛ obo. Sabu u kɔɔ gin’ kanraanjɛu ye, yaun bɔnrɔin kuu womɔ nɛ duunɔjɛu.” 21U mɔɲu bɛrɛ kuu uwɔ nɛ gɔnrɔn bɛɛmɔnɔu, kaa ɛju kanrun le mɔɲu kuu nɛ gɔnrɔn bɛɛ.

will be added

X\