RƆMƐ 11

1Nɛɛ kijɛ mu gi: Ama, tɔgu womɔ inɛwin kamaa dagaati ma? Asuu. Sabu mu kuu ma le Abarahamu tiruwɛnɛi, Isɛrɛlu tɔgui, Bɛnjamɛ tɔgui. 2Ama, tɔgu womɔ giru nɛ baa wo yɛmu gɔ kamaa dagalu. E Eli dɛi Ama Dɔn nɛ sɔɔ tɔŋaaɲu gɔ igii wɔi laa? Wo Isɛrɛlu tɔgu inɛw dɛi kinɛ unrunmɔ aalu ga Ama bɛrɛ waaru wo sɔɔube le kijɛ wo gi: 3“Inɛw Baŋa Ama, be inɛw titiyaanw uwɔ gɔbei daatin, sadagadumu uwɔ gɔbei wolugaatin. Mu turu sai wajaai, iyaa be mui daa ga dɛnɛuwɔin.” 4Kaa, Ama yani aŋa womɔ sai? Wo Eli le kijɛ gi: “Mu inɛw muɲu sɔi mu dɛi bojaa yasɔn, be ɔmɔlɔ Baalu gɔ giru nɛ tuŋiyɛnnɛ.” 5Kɔɔ gin’, kanɛ yaa, Ama, nɛɛma womɔ dɛi inɛw lugo dagi yɛmaa wo sɛɛ gɔbe wajaa yɔɔin. 6Ama, nɛɛma womɔ dɛi bei yɛmu digɛu, birɛ bemɛ sɔɔ wɔlɔ. Kɔɔi laa ye, Ama nɛɛma gɔ nɛɛma tɔitɔii biyɛbele. 7Emɛ nɛɛ inge gɛɛdɛin ma? Isɛrɛlu tɔgu inɛw gɔbe kijɛ be dɛnɛbe gɔi bɛɛnɛ. Kaa Ama inɛw yɛmu gɔbe wogɔ biyaabɛin. Inɛw wajunw gɔbe kai hakilɛ bemɛ pinaatin, 8bana Ama Dɔn nɛ tɔŋaaɲu gin’: “Ama giri yeiyi kikinu bei obaajɛ. Be giri iye bɛɛidenɛ, be suguru ɛgɛ bɛɛidenɛ. Iye bai dɔɔ kunrin wɔɔ.” 9Dawide yaa sɔwaa gi: “Jaa diyɛ bemɛ gɔ be bɛrɛ pɛnrɛn lee, atii lee gin’ biyɛmɔ. Wogɔ be bɛrɛ kijɛ kinɛ yanwanmu sɔɔ lee, tujɔ mɔɲu bɛi sɔɔ leei biyɛmɔ. 10Bemaa giri iyenɔu giye, giri bemɛ purugiyɛmɔ. Waaru wooi ɔɲɛ dɛi bei yɔnɔ ye biyɛmɔ.” 11Nɛɛ kijɛ mu gi: Yahutunw waaru be tomu le, be jaa numɔ ye bibiyɛdɛin ga numi ma? Asuu! Kaa be hakɛ kanraanbɛin dɛi, yayabu gɔ inɛw Yahutunw tɔgui laain gɔbe bɛrɛ dɔwaai. Sɔɔ wogɔ, Yahutunw bemaa ele le biyɛ ga biyaabe. 12Yahutunw hakɛ gɔ dɛi aduna duba diyɛ biyaabe, Yahutunw numu gɔ le digɛu tɔgu wajunw gɔbe duba diyɛ biyaabɛin. Waaru Yahutunw gɔbe lugo kɛu yayabu gɔ nɛ be wiyaajɛ, sigɛ le duba gɔ gaai biyɛdo. 13Nɛɛ, e inɛw Yahutunw tɔgui laain gɔbe, kanɛ mu e le sɔɔuwɔn: Mui, inɛw Yahutunw tɔgui laain gɔbe dɛi Yesu jaŋu ii tiyaaɲui. Kɔɔ sabu dɛi, mu birɛ mu birɛun jaan gɔ dɛi kuu ulo le biyɛdɔn. 14Kɔɔ gin’, Ama womaa tɔgu ma inɛw logoro nɛ gamuui yaba ga, mu kinɛ bemɛ nɛ ele kunɔ ibɛɛ wɔun. 15Sabu waaru bei kamaa dagin le, aduna lee, Ama lee logoro nɛ sɔɔ yegiyaai. Nɛɛ, waaru Ama bei sɛgɛrɛi wo do yani biyɛdo? Wogɔ inɛw yinwaan gɔbe bɛrɛ ɔnmɔi bii biyɛdo. 16Buru kawara pɔlɔ gɔ Ama dɛi dɛiin bojaatin ye, buru gunu gɔ puu Ama dɛi dɛiin bojaaɲu. Iyaa, tiun duu gɔ Ama dɛi dɛiin bojaatin ye, tiun numɔ ii gɔbe yaa Ama dɛi dɛiin bojaaɲu. 17Tiun oliwe walaaɲu numɔ ii gamuu gɔbe kɛjaa goonaatiyaa, oliwe tɛbɛ numɔ ii gɔbe wogɔ nɛ jɛɛlaa taraa taŋamaabɛin. Yahutunw gɔbe oliwe walaaɲu wogɔ gin’ wɔin. E inɛw Yahutunw tɔgui laain gɔbe, e oliwe tɛbɛ tiun gin’ wɔi, iyaa ei kanɛ oliwe walaaɲu nɛ jɛɛlaa taraa taŋamaaɲu. Iyaa oliwe walaaɲu duu bɛrɛ kijɛ ɛju gowaa wɛɛ gɔ tinɛi kayauwɔi. 18Nɛɛ, numɔ ii kɛjaa gooni gɔbei e gailamɔu jaanla. E kuu ulo le e biyɛun jaanla. Ei numɔ ii sai. Tiun duu gɔ bɛrɛ paŋa e oboolɛ, kaa tiun duu gɔi paŋa ei obojɛ. 19Kaa kijɛ e gɛɛido: «Ee, kaa emi dilɛ bemɛ nɛ jɛɛlaa taraa taŋamɔ ga numɔ ii ɔnbe wogɔ dɛi kɛjaa gooni.» 20Wogɔ narain. Be gagawu sɛlɛ bemɛ dɛi bei kɛjaa gooni. Kaa e gagawu ebe dɛi yalu ɔn nɛ biyaa wɔi. Kɔɔi biyaa ye, e kuu ulo le biyɛnɔugi, kaa liyɛi. 21Sabu Ama, Yahutunw, numɔ ii tɔitɔi gin’ wɔin gɔbei kamu dagu nɛ paabalu ye, ei kanran paabaidolo. 22Ama bana ɛhɛju wo sɛɛ lee, bana saliyɛ kiru nɛ ɛɛn go wo wɔɔ gɔ lee yɛnɛi. Wo inɛw numaai gɔbe saliyɛ ɛɛn go kiraabe. Kaa e sibɛ nɛ ɛhɛju wogɔ tagaraabe. Kaa e ɛhɛju womɔ gɔ nɛ yabiyɛun jaain wɔɔ, kɔɔi laa ye, ei kanran kɛjɛ ye gogoonɔdɛin. 23Yahutunw gɔbe gagawu sɛlɛ bemɛ pajaatin biyaai ye, pɔɔlɔ yalu be bee gɔ nɛ bei jɛɛlu taru ye tataŋamɔdɛin. Sabu Ama bei pilemɛ jɛɛlu ye taru ye, taŋamɔu gɔnrɔn yasɛ. 24Halu e lee, be lee dɛin kanran, ei oliwe tɛbɛ nɛ kɛjaa goonaa, oliwe walaaɲu gɔ nɛ jɛɛlaa, taraa taŋamaabɛin. Yahutunw gɔbe, bei oliwe tiun tɔitɔi kɔɔ numɔ ii gɔ bei. Bei pilemɛ ye tiun bemɛi wɔɔ gɔ nɛ jɛɛlu ye, taru taŋamɔ ga, Ama bɛrɛ halu bɛrii wɔɔ. 25Ba unrunw, ebaa kuu ebe le ei hakilɛ sɛwin gɛɛnɔu ga sɔɔ boŋurun turu ɔn mu ebaa jugɔ ga ibɛɛ wɔun. Wogɔ unwɔ: Isɛrɛlu inɛw gamuu gɔbe waaru wooi hakilɛ bemɛ pinɛ ye biyɛɛnɛ. Kaa tɔgu wajunw Ama bɛrɛ wɛɛidɛin lugo kibeido baa yai dɔɔ sai hakilɛ bemɛ pinɛ ye biyɛdo. 26Bana Ama Dɔn nɛ tɔŋaaɲu gin’, Isɛrɛlu tɔgu inɛw gɔbe puu aŋai yabaidɛin unwɔ: “Yabanɛ gɔ Siɔn nɛ gogoodo, wo Jakɔbu tirɛ unrunw Ama giri liyɛla gɔ dodonugodo. 27Waaru hakɛ bemɛ yaabu mu kanraindo, be le aaru mu aaraido gɔ kɔɔ woi.” 28Kibɛru Ɛju gɔ le yabanɛ be kanrun sɔɔ sibɛ go, be ɛju ebe dɛi Ama jaŋuwin biyaa wɔin. Kaa Ama bei yɛmu sɔɔ sibɛ go, Ama be tirɛ anranw le pui wo kunu gɔbe dɛi, Ama inɛw ibɛ gɔ bei. 29Sabu Ama inɛw wo yɛmu gɔbe lee, duba wo obojɛ gɔbe lee sibɛ go ajubu womɔ duluyomɔidolo. 30E kanran inɛw Yahutunw tɔgui laain gɔbe, waaru galaai gɔ le e Ama sɔɔ yabalu kanraanbei. Kaa kanɛ, Yahutunw sɔɔ yabala gɔ digɛu, Ama, amasɔgɔ ebe jugaabe. 31Bemɛ yaa kɔɔ gin’ biyɛdo. Ama, amasɔgɔ ebe jugu gɔ le digɛnu, bemaa kanran kanɛ Ama, amasɔgɔ bemɛ jugɔ ga, be kanɛ Ama sɔɔ yabalu kanraanbɛin. 32Sabu Ama, inɛw wooi bɛrɛ amasɔgɔjugɔ unrunmɔ tagara ga, wo inɛw wooi, sɔɔ yabala kajugunwin bojaabe. 33Ama arusɛgɛ gɔ halu gaai wɔɔ. Hakilɛ womɔ lee, jugɔ womɔ lee, halu tooi wɔin. Inɛ aa Ama kijɛ kanran ga wo kɛju gɔ jugɔ bɛɛdo? Inɛ aa bana birɛ wo birɛjɛ paamu kanrun bɛɛdo? 34Bana Ama Dɔn nɛ tɔŋaaɲu gin’: “Inɛ aa Inɛw Baŋa Ama ajubu gɔbe igii wɔɔ ma? Inɛ aa tinwinrun obonɛ womɔi bii bɛɛdo ma? 35Baŋai pilemɛ ye tujɔ ga, inɛ aa laa wo bɛrɛ kijɛ obaabe ma?” 36Sabu kijɛ puu wo nɛ goo, kijɛ puu wo maŋu, kijɛ puu wo dɛi wɔin. Boi sɔmu gɔ asuu Ama mɔi biyɛmɔ. Amina.

will be added

X\