RƆMƐ 10

1Ba unrunw, kijɛ kinɛ ma nɛ saii mu ibɛ gɔ, kijɛ Isɛrɛlu tɔgu inɛw dɛi Ama bɛrɛ mu gɛɛnjɛ gɔ, wogɔ bemaa yayabu gɔ bɛɛi. 2Sabu mu bemaa Ama sibɛ go maini diyɛ le wɔin sɛɛrɛ goo bɛbɛɛdɔn, kaa maini diyɛ bemɛ jugɔ sɔɔ le digɛla. 3Kunrin, be bana Ama inɛwin teitai wɔin ga wo lugojɛ gɔ inin dɛi, be kuu bemɛ le bana teitai biyɛɲu dɛnaabɛin. Kɔɔ gin’, be Ama bana inɛwin teitai wɔin ga wo lugojɛ gɔ le yabanɛ. 4Sabu Kirisito, Tɔɔru gɔ donugaabe, kɔɔ gin’ inɛw gawaaɲu gɔbe wooi, Ama giru nɛ teitai wɔin lugoɲu. 5Tɔɔru sɔɔ yabu gɔ le digɛnu, teitai bii dɛi waaru Mɔise tɔŋu le, kijɛ wo gi: “Inɛ Tɔɔru kijɛ kanran gɛɛjɛ kanranjɛ gɔ, Tɔɔru gɔ digɛnu woi ɔnmɔi bibiyɛdo.” 6Gagawu le digɛnu Ama giru nɛ teitai bii gɔ dɛi sɔɔ sɔin gɔ ɔn woi: U kinɛ uwɔ nɛ Kirisitoi sunugoun jaain wɔɔ ga gɛɛnɔu, bana tɔŋaaɲu gin’: “Inɛ aa alagala uhulodo ma.” 7Kirisitoi yiunbe logoro nɛ bulugu goonɔu jaain wɔɔ kanran gɛɛnɔu, bana tɔŋaaɲu gin’: “Inɛ aa aduna minɛ doɲu nɛ too gɔ nɛ sugodo?” 8Nɛɛ sɔɔ ingei sɔin? Wogɔ unwɔ: “Ama sɔɔ gɔ u le bɛrii wɔɔ, aŋa uwɔ lee, kinɛ uwɔ lee nɛ yato.” Wogɔ gagawu sɔɔ waaju emɛ tagajɛ gɔ woi. 9U aŋa uwɔ le, Yesu, Inɛw Baŋa gɔ woi ga inɛw giru nɛ sɔwaajɛu ye, iyaa u kinɛ uwɔ nɛ Ama, Yesui yiun nɛ bulomaabe ga gawaa wɔu ye, ui yayabadɛin. 10Sabu kinɛ uwɔ nɛ u gawaa wɔu digɛu, Ama, ui teitai wɔɔ ga lugojɛ, iyaa aŋa uwɔ le sɛɛrɛ u goojɛ gɔ digɛu ui yayabadɛin. 11Ama Dɔn nɛ sɔwaa gi: “Inɛ aai kanran, wo le gawaajɛ ye, dɔgɔ iyeidolo.” 12Kɔɔ gin’ Yahutunw lee, inɛw Yahutunwin laain gɔbe lee logoro nɛ kabu tolo. Inɛw puu dɛi Inɛw Baŋa turu sai yɔɔ. Inɛw boi womɔ boonɔw gɔbe puu bɛrɛ wo kijɛ ɛju gaai obojɛ. 13Bana Ama Dɔn nɛ tɔŋaaɲu gin’: “Inɛ aai kanran, Inɛw Baŋa boi boonaajɛ gɔ, woi yayabadɛin.” 14Be inɛ le gawanɛ be wɔɔ go boi, yani boonu bɛɛdɛin? Be inɛ dɛi sɔɔ turu kanran ɛgɛnɛ be wɔɔ gɔ le, yani gawu bɛɛdɛin? Inɛ turu kanran, wo dɛi waaju tagalu ye, be yani ɛgɛdɛin? 15Inɛw waaju taganw gɔbe tiinɛ ye, yani waaju gɔ tagadɛin? Bana Ama Dɔn nɛ tɔŋaaɲu gin’: “Inɛw Kibɛru Ɛju taganw wɛɛgu gɔ saii ɛjii wɔɔ.” 16Kaa inɛw puu Kibɛru Ɛju gɔ le yabanɛ. Kunrin Esayi sɔwaa kijɛ gi: “Inɛw Baŋa, inɛ aa sɔɔ emɛ gɔ le gawaabe ma?” 17Kɔɔ gin’ gagawu gɔ sɔɔ keŋi le digɛnu bɛɛmɔjɛ, sɔɔ keŋi gɔ Kirisito sɔɔ waaju tagu gɔ le digɛnu bɛɛmɔjɛ. 18Kaa kijɛ mu gi: Be Kibɛru Ɛju gɔ ɛgɛnɛbɛin gɔ narain ma? Ai, ɛgaabɛin. Bana Ama Dɔn nɛ tɔŋaaɲu gin’: “Mii bemɛ minɛ yalu wooi nɛ ɛgɛmaabe, sɔɔ bemɛ aduna kale wooi nɛ dɔwaai.” 19Iyaa kijɛ mu gi: Isɛrɛlu tɔgu inɛw wogɔ paamanɛ ma? Paamaabɛin. Mɔise laa Ama ɔn gin’ gi ga tɔŋu: “Mu tɔgu tɔitɔi laa inɛw gɔbe le ei ele nɛ kukunɔdɔn, tɔgu bomɔgunw le kinɛ ebe babanranmɔdɔn.” 20Esayi halu kara siyaa Ama ɔn gin’ gi ga tɔŋu: “Inɛw mui dɛnɛbenɛ gɔbe mui iyaabɛin, inɛw mui selumɛubenɛ gɔbe bɛrɛ mui tagaraabɔn.” 21Kaa Isɛrɛlu tɔgu inɛw dɛi, Ama womaa ɔn gin’ gi gi: “Dɛnrun gɔ wooi nɛ mu tɔgu sɔɔ yabaalɛ, tɔgu kɔkɔlɔmaaginɛ bɛrɛ numɔ ma dɛɛraabɔn.”

will be added

X\