RƆMƐ 1

1Mu Pɔlu, Kirisito Yesu birɛbirɛnɛ gɔ, lɛtɛrɛ ɔn mu tiiuwɔ. Maa Yesu jaŋu ii tiyaaɲui biyɛ ga Ama mui boonaa, iyaa inɛw bɛrɛ maa yai ye Kibɛru Ɛju wo bɛrɛ goojɛ gɔ taga ga, mui wo yɛmu. 2Ama pɔɔlɔ baa inɛw Ama titiyaanw le digɛu, Kibɛru Ɛju ɔn pui kunaa, Dɔn ɛjaai womɔbe nɛ tɔŋɔmaabe. 3Kibɛru Ɛju wogɔ, Ama Aini Yesu Kirisito, Inɛw Baŋa emɛ sɔɔi sɔɔjɛ. Wo gojunawan sibɛ nɛ Dawide tiruwɛnɛi bee. Kaa kikinu ɛjaai wo nɛ tobe sibɛ go, yiunbe logoro nɛ bulaa wo goi le digɛu, Ama woi Aini unrunmɔi ga gɔnrɔn diyɛ le tagaraabe. 5Wo le digɛu, iyaa boi womɔ sɔmɔ ga, tɔgu wooi inɛw jɛɛlu ye wo le gawa ga, iyaa bemaa sɔɔ womɔ gɛliyɛ ga, Ama maa Yesu jaŋu ii tiyaaɲui biyɛ ga, mu bɛrɛ nɛɛma obaabe. 6Rɔmɛ bɛɛnw, e kanran inɛw wogɔbe nɛ yatoi. Ama, ei kanran Yesu Kirisito mɔi biyɛ ga boonaabe. 7Mu e inɛw Rɔmɛ nɛ wɔin gɔbe puu bɛrɛ tɔŋaa tiiuwɔn. Ama ei ibɛɛ wɔɔ, iyaa ebaa inɛw unrunmɔi biyɛ ga ei boonaabe. Ama emɛ Ba lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. 8Mu laa gɔ, Yesu Kirisito le digɛnu e wooi dɛi Ama mai birɛpoo tagauwɔn, sabu aduna yalu wooi nɛ bana Yesu Kirisito le gawaa e wɔɔ gɔ sɔɔ sɔɔuwɔin. 9Aini womɔ Kibɛru Ɛju gɔ tagau, Ama dɛi kinɛ ma wooi le birɛ mu birɛjɛ gɔ, Ama wogɔ sɛɛrɛ mai. Waaru Ama mu gɛɛnjɛ wooi, mu waaru wooi deeliye sɛlɛ go e dɛi Ama bɛrɛ gɛgɛɛnjɔn. Nɛɛ kai, Ama womaa diŋɛ womɔi biyaai ye, e bɛrɛ mui wɛɛmɔ ga, wo bɛrɛ gɛɛunwɔn. 11Sabu mu e le Ama Kikinu sin obu gamala ye, ei tibemɔ ga kinɛ ɔgu le ei iye ibɛɛ wɔun. 12Tiyɛ gɔ gagawu nɛ emɛ tunmɔi mamainiyɛnmɔdɛin. Gagawu ma ei mamainiyɛnmɔdo, iyaa gagawu ebe mui mamainiyɛnmɔdo. 13Ba unrunw mabe, e ɔn jugi biyɛi, mu waaru joo e bɛrɛ wɛɛ ga ajubaabɔn, kaa iye wɛɛ dɔɔ, mu bana bɛɛlun. Bana tɔgu wajunw gɔbe logoro nɛ mu bɛi gin’, mu logoro ebe nɛ birɛ tinɛ sɛɛ wɛi birɛ ibɛɛ wɔun. 14Sabu inɛw puu bɛrɛ mu yaaun jaain wɔɔ, Gɛrɛku tɔgu lee, tɔgu wajunw lee, inɛw jaŋaa wɔin lee, inɛw jaŋanɛ lee bɛrɛ mu yaaun jaain wɔɔ. 15Kɔɔ dɛi e inɛw Rɔmɛ nɛ wɔin gɔbe, mu kinɛ ɔgu le, Kibɛru Ɛju gɔ e bɛrɛ kanran wɛɛ tagu ibɛɛ wɔun. 16Kibɛru Ɛju tagu gɔ dɛi dɔgɔ turu kanran mui sɛlɛ. Kibɛru Ɛju gɔ, inɛw gawaa wɔin gɔbe puu yaba ga Ama gɔnrɔn wo nɛ yato. Laa gɔ Yahutunw gɔbei, kɔɔ onu nɛ Yahutunw tɔgu laain gɔbei. 17Kɔɔ gin’ Kibɛru Ɛju gɔ, Ama yani inɛwin teitai bojojɛ ma jugɔmɔjɛ: Tɔlɔgu nɛ goi ye dumɔ gɔ nɛ dɔɔ, gagawui laa ye, sɔɔ waja digɛla. Bana Ama Dɔn nɛ tɔŋaaɲu gin’: “Inɛ gagawu le digɛu teitai wɔɔ gɔ, woi ɔnmɔi bibiyɛdo.” 18Inɛw teitai laa bemɛ le naran gɔi tɛŋaa sɛin gɔbe, Ama giri liyɛla bemɛ puu lee, teitai laa bemɛ gɔbe puu lee dɛi Ama, kinɛbanrun unrunmɔ alagala nɛ wɔnu tatagarajɛ. 19Ama bei lalagajɛ, sabu Ama sibɛ go kijɛ be jugɔun jaan gɔ daii wɔɔ. Ama wo kuu womɔ le wogɔ bei jugɔmaabe. 20Aduna maŋi nɛ baa, inɛw, Ama gɔnrɔn asuu wɔɔ ga, naran go woi Amai ga, daii jugɔ bɛbɛɛɲu. Ama bana kɔɔbei giri le iye bɛɛmɔɔlɛ, kaa kijɛ Ama maŋu gɔbe le digɛnu, inɛw jugɔ bɛbɛɛdɛin. Kɔɔ dɛi kijɛ be kanrun sibɛ go be temu turu kanran siyɛɛnɛ. 21Be Ama yɔɔ ga igii wɔin, kaa baba wo le jaan gɔ lee, birɛpoo tagu gɔ lee, wo bɛrɛ kanrannɛ. Kaa kɔɔ kanran dɛi, ajubu bemɛ ajubu ijei biyaai, kinɛ bomɔgu bemɛ gɔ ɔlɔ le jowaai. 22Be unrunbei inɛw jugɔ jugɔwin gɛɛuwɔin, kaa bei wejegunwin. 23Be Ama asuu ɔnmɔi wɔɔ gɔi baba dɛi, Adama ii yinwɛnjɛ lee, sasaabe lee, arusɛgɛ kubɔ naibe lee, arusɛgɛ minɛ nɛ bumɔɲube lee le murin dege yegeraaɲu gɔbei babaabɛin. 24Kɔɔ sabu dɛi, kinɛ bemɛ dadaaru le kɛukɛu, Ama kijɛ lɔgɔgu be kanrun nɛ bei pajaabe. Kunrin be tunmɔ le kijɛ dɔgɔgu dɔgɔgu koi kanranɲu. 25Be naran Ama le digɛ gɔ kakalu le tilaatin. Be Maŋanɛ gɔi babaa ye, wo dɛi birɛ birɛ dɛi, be Ama kijɛ maŋu gɔbei babaɲu, be dɛi birɛ birɛɲu. Inɛw, Amai asuu sɔmɔu jaain wɔɔ. Amina. 26Kɔɔ sabu dɛi Ama bei goju dadaaru dɔgɔgu gɔbe nɛ pajaati. Yaanw gɔbe, anranw le diin pajaatiyaa, be tunmɔ le kijɛ kanraun jaanla kanranɲu. 27Kɔɔ gin’ anranw gɔbe yaa yaanw le diin pajaatiyaa, be tunmɔi daariyɛuwɔin. Anranw gɔbe tunmɔ le kijɛ dɔgɔgu dɔgɔgu kanranɲu. Be kɔɔ gin’ kuu bemɛ le tujɔ bana mɔɲu bemɛ le sɛgɛrɛjɛ bɛɛɲu. 28Be Amai jugu gɔ doori ga lugin dɛi, Ama bemaa kijɛ be kanraun jaanla gɔbe kanran ga, hakilɛ mɔɲu bemɛ le bei pajaabe. 29Be teitai laa lee, kanran mɔɲu lee, kijɛ baala dadaaru lee, mɔmɔɲu lee, be wooi le jowaa wɔin. Be ele lee, inɛ dai lee, jai lee, nabara lee, sasai lee le jowaa wɔin. Be gɛɛru gɛgɛɛrɛɲu, 30iyaa tunmɔ mɔɲu sɔsɔɔɲu. Bei Ama jaŋuwin, inɛw gaarubei. Kuu ulo ulowin, saba sabawin. Be mɔɲu kanran dɛi bana kana dɛdɛnɛɲu, iyaa bei naranw gɔbe le tubiyeenɛ. 31Be hakilɛ sɛnɛ. Be pui bemɛ kibemɔɔnɛ. Bei inɛw ihibɛ sɛnɛbei, inɛw wajunw amasɔgɔjugɔ be le wɔlɔ. 32Ama saliyɛ sibɛ go inɛw kɔɔ gin’ yoi yaanw gɔbe, yiun be le jaain wɔɔ ga be igii wɔin. Kaa kɔɔ wooi logoro nɛ, be sɔɔ kɔɔbe koi kanranɲu. Sigiyaa, inɛw kijɛ mɔɲu kɔɔ tunmɔ kanranw gɔbe le kinɛ bemɛ aa wɔɔ.

will be added

X\