PILEMƆ 1

1Mu Pɔlu, inɛ Kirisito Yesu dɛi kajuginɛi wɔɔ gɔ lee, iyaa emɛ bainɛ Timɔte lee, emɛ lɛtɛrɛ ɔn, bainɛ ibɛ emɛ, birɛbirɛnɛ emɛ bɔɔnɛ Pilemɔ lee, 2Ama inɛw mɔɔnu, ginrun uwɔ nɛ mɔrinyɛun wɔɔ lee, emɛ sainɛ Apia lee, iyaa birɛ dɛi inɛ mainiyaan kuu womɔ obaa wɔɔ gɔ emɛ bɔɔnɛ Arusipe lee bɛrɛ tiiuwɔin. 3Ama emɛ Ba lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. 4Waaru Ama mu gɛɛnjɛ puu, mu ui ajubauwɔn, iyaa, Ama mai birɛpoo tagauwɔn, 5sabu mu, Ama inɛw gɔbe puu sibɛ go ihibɛ u sɛɛ gɔ lee, iyaa Inɛw Baŋa Yesu nɛ gagawu uwɔ bana wɔɔ lee sɔɔ be sɔɔu ɛgɛuwɔn. 6Gagawu nɛ, emɛ lee, u lee bɔɔ kunaa emɛ sɛɛ gɔ, Kirisito nɛ kijɛ ɛju emɛ sɛɛ gɔbe puu nɛ jugɔ kibaai gɔ u bɛrɛ obu bɛɛ ga, mu Ama bɛrɛ gɛɛunwɔn. 7Mu bainɛ, ihibɛ le u wɔɔ gɔ dɛi, mu kinɛ ɛɛlu diyɛ lee, anrangaju diyɛ lee biyaabɔn, sabu u Ama inɛw gɔbe kinɛ kaaliyɛmaabeu. 8Kɔɔ sabu dɛi, halu mu Kirisito nɛ u bɛrɛ tɔɔru tɔɔrɔ ga, kara yasɔn kanran, 9ihibɛ boi le u bɛrɛ gɛɛn gɛɛn mu bɛrɛ ire. Kɔɔ gin’, mu Pɔlu ainɛ na pɛi gɔ, iyaa sigiyaa Kirisito Yesu dɛi kaju nɛ kunaa sɛin gɔ, 10mu Onɛsimɛ dɛi u bɛrɛ gɛɛn gɛɛunwɔn. Wo, waaru kaju nɛ mu too gɔ le, Kirisito nɛ ii mai biyaai. 11Pɔɔlɔ wo u bɛrɛ inɛ niwɛn toloi bee, kaa kanɛ, u lee, mu lee bɛrɛ niwɛn yasɛ. 12Wo, inɛ mu bɛrɛ saii maai wɔɔ gɔ, mu woi u bɛrɛ pilemaa tiiuwɔn. 13Waaru Kibɛru Ɛju tagu gɔ dɛi kaju nɛ mu too gɔ le, dilɛ uwɔ nɛ womaa mui bara ga, woi mu le bojo ga mu bɛrɛ gaai ɛjii bibiyɛbe. 14Kaa, kinɛ uwɔ aalu wo wɔnu, mu kijɛ turu kanran kanran ga ibɛlaun. Mu uwaa mu bɛrɛ ɛju kanrun kaara ga wɔlɔn. Diŋɛ uwɔ le u kanranjɛ mu bɛrɛ ire. 15Uwaa Onɛsimɛi asuu pilemu siyɛ ga, waaru gaila le u le kabi bibiyɛ. 16Sabu, kanɛ woi gunɔnɛ peerei laa, kaa wo gunɔnɛ dɛi ire: Woi bainɛ ibɛ mai. Woi mu bɛrɛ saii maai wɔɔ. Kaa gunɔnɛ gin’ lee, Inɛw Baŋa nɛ bainɛ gin’ lee, woi sigɛ le u bɛrɛ gaara maai biyɛun jaan. 17Nɛɛ, u mui birɛbirɛnɛ u bɔɔnɛ gin’ lugaa sɛu ye, bana mui u sɛgɛrɛido gin’, woi kunrin tee sɛgɛrɛ. 18Wo u bɛrɛ sɔɔ jaanla kanraanbe ye, maa, u bɛrɛ kijɛ wo tujɔun jaan yɔɔ ye, wogɔ kuu ma nɛ duurɔ. 19Mu numɔ ma le sɔɔ ɔn u bɛrɛ tɔŋɔuwɔn: Mu Pɔlu, yoru uwɔ gɔ puu u bɛrɛ tutujɔdɔn. Nɛɛ, u kinrun uwɔ mu dɛi u oboun jaain wɔɔ sɔɔ gɔ kai sɔɔnu doori. 20Aiwa, mu bainɛ, mu u bɛrɛ gɛɛunwɔn, Inɛw Baŋa dɛi u sin ɔn mu bɛrɛ kanran: Kirisito nɛ bainɛ too gin’, u kinɛ ma kaaliyɛmɔ. 21Lɛtɛrɛ ɔn waaru u bɛrɛ mu tɔŋɔjɛ le, kijɛ u bɛrɛ mu gɛɛnjɛ gɔ, u wogɔ kakanrandou ga mu gawaa wɔun. U wogɔ kuu nɛ baraa ye kanrandou ga mu igii wɔun. 22Iyaa kɔɔ gin’, u mu dɛi ginrun diinyɛnɲu kanran yegere. Sabu Ama, gɛɛn ebe saa ye, mui kaju nɛ goonu ye e bɛrɛ pilemɛ ye titiido diyɛdɔn le wɔun. 23Epaparase, Kirisito Yesu dɛi mu le kaju nɛ too gɔ, wo ui poonɔuwɔ. 24Iyaa, Maruka lee, Arisutaruke lee, Demasu lee, Luka lee, birɛbirɛnw mu bɔɔnw gɔbe ui poonɔuwɔin. 25Inɛw Baŋa Yesu Kirisito nɛɛma gɔ e le biyɛ.

will be added

X\