PILIPI 4

1Kɔɔ gin’ ba unrunw ibɛ mabe, inɛw dadaaru le saii mu wɔɔ gɔbe, inɛw dɛi kinɛ ma ɛɛliyaa wɔɔ gɔbe, e inɛw dɛi kuu ma unɔu mu wɔɔ gɔbe, Inɛw Baŋa nɛ ɛɛn go bana iŋiyɛun e jaan kɔɔ woi. 2Ewodi lee, Sintise lee, mu e bɛrɛ gɛɛunwɔ e Inɛw Baŋa nɛ tunmɔ le jamu le biyɛi. 3U kanran, u birɛbirɛnɛ mu bɔɔnɛ sɔɔ turu baŋa gɔ, uwaa yaanw kɔɔbei bara ga ibɛɛ wɔun, sabu, inɛw bɛrɛ Kibɛru Ɛju waaju gɔ taga ga, be mu le bariyaa jai jaiyaabɛin. Iyaa be birɛ kɔɔ dɛi Kilema lee, inɛw birɛbirɛnw mu bɔɔnw wajabe lee le kanran bariyaabɛin. Inɛw kɔɔbe puu ɔnmɔ dɔn gɔ nɛ boi bemɛ tɔŋi wɔɔ. 4Ei Inɛw Baŋa mɔi dɛi waaru wooi kinɛ ɛɛliyɛmɔi. Mu gimaa sɔɔuwɔn, kinɛ ɛɛliyɛmɔi. 5E inɛw wooi bɛrɛ kinɛ kaalu ebe gɔi jugɔmɔi. Inɛw Baŋa wɛɛgu gɔ bɛrii wɔɔ. 6Kijɛ turu kanran dɛi diyɛdai le biyɛnɔugi. Kaa, kijɛ wooi dɛi, kai e sɛɛ gɔ, gɛɛn nɛ Ama bɛrɛ tagai. Waaru wo bɛrɛ kijɛ e gɛɛnjɛ wooi, woi birɛpoo tagai. 7Kunrin, Ama jamu obojɛ gɔ, inɛw paamukanrun dɛi sigɛ wɔɔ gɔ, kinɛ ebe lee, hakilɛ ebe lee, Kirisito Yesu nɛ sɛɛu gɛgɛliyɛdo. 8Nɛɛ, ba unrunw, sɔɔ dumɔrɔn ma gɔ unwɔ: Kijɛ boi ɛju sɛɛ wooi lee, kijɛ sɔmu wo le dagaa wɔɔ wooi lee, tiyɛ gɔ kijɛ narain wɔɔ baba sɛɛ, teitai wɔɔ, ɛjaa wɔɔ, ɛjii wɔɔ, inɛw wooi kinɛ aajɛ gɔ, e kijɛ kɔɔbe puu ajubu le biyɛi. 9Kijɛ e bɛrɛ mu deeru gɔ lee, mu le e bɛi gɔ lee, kijɛ sɔɔu mu wɔu e ɛgu gɔ lee, kijɛ kanraun mu wɔu e iye gɔ lee kanrain. Kunrin, Ama, jamu obonɛ gɔ e le bibiyɛdo. 10Mui Inɛw Baŋa mɔi dɛi kinɛ gaai ɛɛliyɛmɔuwɔn. Sabu waaru joo onu nɛ, e iyaa lee pilemaa mai ma yasin ga kanraan tagaraabei. Ebaa mai ma sii gɔi pajaatiyaabei gɛɛlun, kaa e bana wogɔ tagaraun bɛɛli beei. 11Kai le wɔun dɛi mu wogɔ gɛɛu wɔlɔn. Sabu kijɛ mu bɛrɛ dɔɔjɛ puu nɛ kinɛ ma aai biyɛ ga mu wogɔ le wɛɛjiyaa wɔun. 12Mu dɛgu le bana biyɛɲu igii wɔun, kijɛ joo le bana biyɛɲu igii wɔun. Kijɛ kayaɲu yasɔn ma, giyɛ le wɔun ma, kijɛ joo yasɔn wee, mui baalu wee, yalu wooi nɛ, waaru wooi, mu bana sɛɛu biyɛun jaan deyaa wɔun. 13Kirisito mui paŋa obojɛ gɔ digɛu, mu kijɛ wooi kanrun bɛbɛɛdɔn. 14Yinkanran, ɔɲɛ nɛ waaru mu tobe le mui e baru gɔ, wogɔ sɔɔ ɛjui. 15Pilipi bɛɛnw, e kuu ebe le bana e igu gin’: Waaru Kibɛru Ɛju gɔ logoro ebe nɛ tagu tɔlin le, Maseduanɛ nɛ gowaa waaru mu yai le, ei laa ye Ama inɛw mɔɔnu mui baru turu kanran wɔlɔ. Ei laa ye, Ama inɛw mɔɔnu turu kanran kɛɛlɛ sin obu mu bɛrɛ obu wɔlɔ. 16Kunrin waaru Tesalonike nɛ mu bee le, e kubɔ turu dɛi sigɛ kijɛ kai ma kilɛido mu bɛrɛ tiyaabei. 17Mu sin obu ebe tee dɛnɛɛlɔn, kaa kijɛ mu dɛnɛjɛ gɔ, wogɔ Ama, sin obu ebe dɛi ei sigɛ le duba wo kanraindo gɔi. 18Kijɛ mu bɛrɛ e tii gɔ puu mu bɛrɛ dɔwaai, wogɔ kai ma dɛi gaa. Epaporodite numɔ nɛ kijɛ kunaa e tii gɔ waaru mu bɛrɛ dɔi le, kijɛ sɛbele mu bee turu kanran bele. Sin obu wogɔbe kijɛ jiɲu ɛjui, sadaga Ama yabaajɛi, wogɔ le kinɛ womɔ aa wɔɔ. 19Kirisito Yesu nɛ arusɛgɛ dooro sɛɛ womɔ le kɛukɛu, Ama ma kai ebe wooi kikilɛdo. 20Boi sɔmu gɔ asuu nasuu Ama emɛ Ba mɔi biyɛmɔ. Amina. 21Ama inɛw, Kirisito Yesu mɔi wɔin gɔbe puu bemaa poo poo wa. Ba unrunw ɔn nɛ mu le wɔin gɔbe ei poonɔuwɔin. 22Ama inɛw, ɔn nɛ wɔin gɔbe puu ei poonɔuwɔin. Sigiyaa, Rɔmɛ ɔgɔnɛ diyɛ ginrun gonɔ inɛw ei poonɔuwɔin. 23Inɛw Baŋa Yesu Kirisito nɛɛma gɔ e le biyɛ.

will be added

X\