PILIPI 3

1Ba unrunw mabe, kɔɔ wooi onu nɛ, ei Inɛw Baŋa mɔi dɛi kinɛ ɛɛliyɛmɔi. Kijɛ e bɛrɛ tɔŋaatiyaa mu galu gɔ, wogɔ pilemu taga ga mu bɛrɛ doori laa. Iyaa e bɛrɛ wogɔ ire. 2Inɛw birɛ mɔɲu birɛnw gɔbe, inɛw iju kɔɔbe, inɛw araa nɔɔmɔw tɔitɔi laain kɔɔbe dɛi kuu ebe kajubai. 3Sabu inɛw araa nɔɔmɔw tɔitɔi gɔbe, inɛw Amai Kikinu womɔ le babanw gɔbe, inɛw Kirisito Yesu dɛi kuu emɛ unɔw gɔbe, iyaa atɛmu sɔɔ nɛ inɛw diyɛ emɛ daanaa sɛnɛ gɔbe emi. 4Kaa mu kanran atɛmu sɔɔ nɛ diyɛ ma daanu bɛbɛɛbɔn. Inɛ turu atɛmu sɔɔ nɛ diyɛ unrunmɔ daanu bɛbɛɛgɔn ga ajubaa yɔɔ ye, mu gaara wogɔ baŋa dɛi sigɛ ajubaun jaan. 5Mui narin bai gagaraye gɔ le mui araa nɔɔmi. Mu ba lee, mu na lee Yahutunwin, mui Bɛnjamɛ tɔgui, mui Heburu tɔgu tɔitɔii. Yahutunw tɔɔru sibɛ go mui Parisiɛin bee. 6Ama dɛi maini sibɛ go mui inɛw Yesu le gawaa wɔiin tɔɔɲɔnɛi bee. Tɔɔru yabu le teitai dɛnu sibɛ go, inɛw, jarugu turu kanran mu nɛ tɛmɛnɛ. 7Kaa pɔɔlɔ kijɛ tinɛ sɛin gin’ mu lugoube gɔbe, kanɛ Kirisito dɛi, kijɛ tinɛ sɛnɛ gin’ lugouwɔn. 8Kijɛ sigɛ le maa gɔ, tiyɛ gɔ Kirisito Yesu, Inɛw Baŋa ma jugɔ gɔ le tunwaan yɛnaajɔn ye, mu kijɛ puu kijɛ tinɛ sɛnɛ gin’ lugouwɔn. Kirisito dɛi, kijɛ kuu ma tee tinɛjɛ gɔ puu pajaatun. Kirisitoi tinɛi gin’ bɛɛ ga, wo le pagu turui biyɛ ga, mu kijɛ puu lɔgɔ gin’ lugouwɔn. Mu waja Tɔɔru yabu ma dɛi mui teitai wɔɔ ajubu siyɛidolɔn. Kaa Kirisito nɛ gagawu mu sɛɛ gɔ dɛi mui teitai wɔɔ. Teitai bii Ama bɛrɛ goojɛ gɔ dɛi, iyaa inɛ gawaa wɔɔ baŋa bɛrɛ teitai bii Ama obojɛ gɔ dɛi mui teitai wɔɔ. 10Mu kijɛ turu sai ibɛɛ wɔun. Wogɔ Kirisito lee, bulogu womɔ gɔnrɔn gɔ lee jugu gɔi. Kɔɔ gin’, bana biyaai puu mui kanran yiun nɛ bulo ye goo bɛɛ ga, yiun womɔ nɛ yaa wo le murin bii ye, bana ɔɲɛ wo iye gin’, ɔɲɛ iye ibɛɛ wɔun. 12Mu kijɛ dɛi mu goi kanɛ baa biyaajɔn ga wɔlɔn, maa kanɛ baa mui kibaai ga wɔlɔn. Kaa maini ye maa jobu tujɔ gɔ bɛɛ ga, mu jɔbɔuwɔn, sabu Kirisito Yesu wogɔ dɛi mui aa galaai. 13Ai, ba unrunw, mu wogɔ biyaajɔn ga kanɛ baa kole wɔlɔn. Kaa, kijɛ mu kanranjɛ turu yɔɔ: Kijɛ onu ma nɛ wɔɔ naŋaatiyaa ye, mu giru ma nɛ kijɛ wɔɔ gɔi bɛɛdɔn giye mainiyɛnjɔn. 14Kɔɔ gin’, Kirisito Yesu le digɛnu, Ama, tujɔ daa go maa bɛɛ ga mui wo boonu gɔi bɛɛ ga, wogɔ onu nɛ jɔbɔuwɔn. 15Emɛ, inɛw kikinu sibɛ go inɛw nawin taŋaai gɔbe, emɛ puu ajubu tutunmɔ wogɔ siyɛmɔi. Kaa kɔɔ wooi nɛ, inɛw gamuu logoro ebe nɛ ajubu wajai sɛin biyaai ye, Ama wogɔ ei daii tatagarado. 16Bana biyaai wooi puu, emɛ iye bai dɔɔ oju nɛ emɛ too gɔ, wogɔi dimi yaamɔi. 17Ba unrunw, e mui deewin biyɛi. Emɛ giretagurui biyaabɛin. Aiwa, giru taguru kɔɔbe bana le kɛukɛu yoi yaanw gɔbe, e bei yɛnɛi. 18Sabu mu kubɔ joo e bɛrɛ tagaaginaabɔn, iyaa kanɛ giridii le e bɛrɛ pilemaa sɔɔuwɔn: Inɛw joo yɔɔin, be Kirisito baga jai jaŋuw gin’ yoi yaauwɔin. 19Be suiyi oju nɛ toin. Bɛrɛ bemɛ gɔ ama bemɛi biyaai. Be kijɛ dɛi dɔgɔ le be biyɛun jaan gɔ dɛi kuu ulo le wɔin. Iyaa, be aduna ɔn kijɛ ajubu sai le wɔin. 20Emɛ kai, emi alagala diinɛ unrunwin. Yabanɛ alagala goo ye wɛɛido gɔi emɛ kinɛ ɔgu le dɔmiyaan wɔin. Wogɔ Inɛw Baŋa Yesu Kirisitoi. 21Gɔnrɔn kijɛ wooi unrun le wo tubiyemɔjɛ gɔ le, wo goju peere emɛ gɔ dulomu ye goju doorojɛ womɔ gɔ gin’ bobojodo.

will be added

X\