PILIPI 2

1Kirisito nɛ pagu turu e wɔɔ gɔ, anrangaju ei ohobojɛ ma? Ihibɛ womɔ kinɛ kaalu ei ohobojɛ ma? E Ama Kikinu le bɔɔi biyaa wɔi ma? E tunmɔ dɛi ihibɛ lee, amasɔgɔjugɔ lee yasin ma? 2Kɔɔ biyaai ye, mu e bɛrɛ gɛɛunwɔ e tunmɔ le ajubu turu le bii ye, ihibɛ turu nɛ bii ye, kinɛ ebe lee, ajubu ebe lee koturu bojo ye, kinɛ ɛɛlu ma kibemɔi. 3E, kuu ebe kai dɛi ma, kuu ulo tiyɛ sɛlɛ dɛi ma giye, kijɛ turu kanran kanrannɔugi. Kaa e tunmɔ le kuu sunugu le bii ye, inɛ tuturu puu, inɛw wajunw gɔbe wo dɛi ire gin’ lugo. 4Inɛ turu kanran kuu womɔ too tee toonɔu. Kaa inɛw wajunw kijɛ tinɛjɛ kanrain. 5Kirisito Yesu jige sɛbe gɔ, e wogɔ tunmɔ siyɛi. 6Halu wo lee, Ama lee bana koturu bee kanran, wo lee, Ama lee kɛukɛu bee kanran, wo wogɔ kijɛ paju bɛɛmɔɔlɛi ga lugolu. 7Kaa wo kijɛ wo sɛbe puu pajaatiyaa, birɛbirɛnɛ bana jeɲaabe. Wo Adama unrunw gin’ biyaa, inɛ peere le murin unruin tagaraabe. 8Wo kuu unrunmɔ sunugaa, iyaa yiun gɔ baa, baga jai kuu nɛ yai wo yinwɛindo baa, sɔɔ yabanɛi biyaabe. 9Kɔɔ sabu dɛi Ama, alagala nɛ yalu baba wo sigɛ gɔ wo bɛrɛ obaabe. Iyaa boi puu dɛi boi wo sigɛ gɔ wo nɛ kunaabe. 10Kɔɔ gin’ alagala nɛ lee, minɛ nɛ lee, minɛ doɲu nɛ lee kijɛ ɔnmɔi wɔin gɔbe puu, Yesu boi sɔmɔ dɛi tutuŋiyɛndɛin. 11Iyaa Ba Ama boi sɔmi biyɛ dɛi, inɛw wooi Yesu Kirisitoi Inɛw Baŋai ga daii gɛgɛɛdɛin. 12Kɔɔ gin’, ba unrunw ibɛ mabe, waaru e le mu bee le e waaru puu sɔɔ ma yabaabei. Nɛɛ, kanɛ e le wagee waaru mu wɔɔ gɔ le sɔɔ ma yabaabei ye sigɛ le wogɔ gaara maa. Yayabu ebe sɛɛu kibaai biyɛ ga, liliyɛ le, goju kinwun le birɛ birɛi. 13Sabu, kijɛ diŋɛ womɔi wɔɔ gɔ ebaa ibɛɛ biyɛ ga, wogɔ kanrun kibemɔɲu gɔnrɔn ei obo ga, Ama, woi kinɛ ebe nɛ birɛ birɛuwɔ. 14Aduna ɔn inɛw kakalugunw, inɛw mɔɲu gɔbe logoro nɛ ebaa inɛw jarugu sɛnɛ, inɛw tɛgɛ sɛnɛ, Ama unrunw nɛ lelu tolobei biyɛ ga, kijɛ puu guguun lee, jiiru lee wɔlɔ go kanrain. Be bɛrɛ sɔɔ ɔnmɔ obojɛ gɔ taganu wɔnu, logoro bemɛ nɛ alagala tolobe gin’ e dooroun jaain wɔɔ. E kɔɔ gin’ kanraanjɛi ye, Kirisito bai wɛɛido gɔ le mu e dɛi kuu ma unɔ bɛbɛɛgɔn. Sabu wogɔ birɛ mu biru gɔ lee, ɔɲɛ mu iye gɔbe lee bamai biyɛlu tagarado. 17Mui daaɲu kanran, bamai laa biyɛdo. Sabu gagawu ebe gɔ, sadaga Ama bɛrɛ e obojɛ gin’ wɔɔ dɛi, kinrun ma sadaga gɔ sadaga ebe gɔ nɛ bariyɛidoi biyɛdo. Kunrin biyaai ye, kinɛ ma ahaado, mu e puu le bari ye kinɛ ɛhɛɛliyɛmɔdɔn. 18E kanran kinɛ ebe aaun jaain wɔɔ, iyaa mu le bari ye kinɛ ɛɛliyɛmɔu jaain wɔɔ. 19Kibɛru e bɛrɛ goo ye mu ɛgɛido gɔ le maa kuu ma le anrangaju siyɛ ga, Inɛw Baŋa Yesu diŋɛi biyaai ye, bɛrii Timɔte e bɛrɛ tii bɛbɛɛdɔn diyɛdɔn le wɔun. 20Woi laa ye inɛ mu gin’ mai ebe sɛɛ wɔlɔ. 21Inɛw wajunw gɔbe puu, kuu unrunbemɛ mai laa ye, Yesu Kirisito le sɔɔ digɛ mai sɛnɛ. 22Timɔte kai, e jige ɛju womɔ igii wɔi. Sabu wo lee, mu lee, emɛ tunmɔ go Kibɛru Ɛju gɔ waaju tagaabɛin. Aini bana wo bai barajɛ gin’, wo birɛ gɔ nɛ kunrin mui barauwɔ. 23Nɛɛ bana mu bɛrɛ biyɛido waaru mu jugaajɛ kɛu, mu woi e bɛrɛ titiidɔn diyɛdɔn le wɔun. 24Mu iyaa, Inɛw Baŋa nɛ diyɛ ma daanaa, mu kuu ma le bɛrii ei yɛnɛi wɛwɛɛdɔn ga igii wɔun. 25Emɛ bainɛ Epaporodite, kai ma kilɛ ga inɛ mu bɛrɛ e tii gɔ, birɛbirɛnɛ mu bɔɔnɛi, Kirisito dɛi kɔmɔ tai nɛ mui baranɛi. Kaa nɛɛ, woi e bɛrɛ pilemu ye mu tiiun jaain wɔɔ ga ajubaabɔn. 26Sabu wo e puui iyi dadaaru le wɔɔ. Iyaa woi jinwaanbe ga e ɛgaabei dɛi, wo ɛjii ajubu le wɔɔ. 27Narain, woi jinwaanbe, iyaa wo yiun le bɛrii bee. Kaa Ama amasɔgɔ womɔ jugaabe. Amasɔgɔ womɔ sai laa, kaa kinɛ jiun ma kuu nɛ kinɛjiun bariyɛnɔu ga, Ama, amasɔgɔ ma yaa jugaabe. 28Kɔɔ sabu dɛi mu sigɛ le kinɛ ɔgu le woi e bɛrɛ tii ibɛɛ wɔun. Kɔɔ gin’ waaru woi e iyaajɛ kinɛ ebe ɛhɛɛliyɛdo, kunrin kinɛjiun ma gɔ yaa gagamiyɛndo. 29E kinɛ ɛɛlu diyɛ le, Inɛw Baŋa nɛ e bainɛ gin’ woi sɛgɛrɛi. E inɛw wo gin’ wɔin gɔbei babai. 30Sabu Kirisito birɛ gɔ dɛi woi yinwɛndo ga bee. E kuu ebe le mu dɛi kijɛ nɛ mui baru bɛɛidelei e wɔɔ gɔ, wo wogɔ nɛ mui bara ga, kinrun unrunmɔ kunaa nɛwɛnlu.

will be added

X\