PILIPI 1

1Lɛtɛrɛ ɔn, mu Pɔlu lee, Timɔte lee, emɛ, Kirisito Yesu birɛbirɛnw gɔbe, emɛ tiiuwɔ. Pilipi ana nɛ Ama inɛw mɔɔnu kajubanw gɔbe lee, bei baranw gɔbe lee, inɛw Ama inɛwin wɔin puu, Kirisito Yesu nɛ toin gɔbe lee bɛrɛ emɛ lɛtɛrɛ ɔn tiiuwɔin. 2Ama emɛ Ba lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. 3Waaru ei mu ajubaajɛ puu, mu Ama mai birɛpoo tagajɔn. 4E wooi puu dɛi, waaru Ama mu gɛɛnjɛ wooi, mu kinɛ ɛɛlu le gɛɛnjɔn. 5Kibɛru Ɛju gɔ taga ga, bai pɔlɔ gɔ nɛ gowaa iye wɛɛ dɔɔ, e mu le bɔɔi biyaabei gɔ dɛi mu Amai birɛpoo tagauwɔn. 6Kɔɔ gin’ mu kijɛ ɔn le tilai gawaa wɔun: Ama kinɛ ebe nɛ birɛ ɛju ɔn tɔlɔnɛ gɔ, Kirisito Yesu bai wɛɛido le, birɛ gɔ kibeido baa, wo birɛ wogɔ birɛnu biyɛdo. 7Kibɛru Ɛju gɔ narain ga jugɔmɔ ga, woi bɔlɔtei ɛju nɛ daana ga pɔɔlɔ mui hɔɔlɔnɛi bee. Nɛɛ kanɛ mui kaju nɛ too. Kaa kaju nɛ mu too gɔ le ma, hɔɔlɔnɛi mu wɔɔ gɔ le ma, e puu, Ama nɛɛma mu bɛrɛ obu gɔ nɛ gamulu ebe biyaabei. Kɔɔ sabu dɛi, e puu sibɛ go ajubu kɔɔ tunmɔ mu siyɛun jaain wɔɔ. Ei kinɛ ma nɛ saii paa wɔun. 8Mu Kirisito Yesu bana ei ibɛ gin’, ihibɛ diyɛ wogɔ le ei ibɛɛ wɔun giyaajɔn ye, mu narain sɔɔjɔn ga Ama igii wɔɔ. 9E dɛi Ama bɛrɛ gɛɛn mu gɛɛnjɛ gɔ unwɔ: Ebaa kijɛ ɛju gɔ yɛmu bɛɛ ga, ihibɛ ebe bariyɛ bariyɛ yaamɔ. Iyaa ihibɛ wogɔ kuu nɛ jugɔ tɔitɔi gɔ lee, paamukanrun kibaai gɔ lee bariyɛmɔ. Kɔɔ gin’ Kirisito bai wɛɛido gɔ le ei ɛjaai biyɛdo, iyaa kijɛ turu nɛ kanran ei jarugu bɛɛmɔidolo. 11Amai baba dɛi, Ama boi sɔmi biyɛ dɛi, Yesu Kirisito turu sai ɛhɛju tɔitɔi obojɛ gɔ le ei jooi biyɛdo. 12Ba unrunw, kijɛ mu bɛrɛ dɔi gɔ, Kibɛru Ɛju gɔi tɛŋɛlu. Kaa woi giru go yaamaabe ga jugi e bii ye ibɛɛ wɔun. 13Kɔɔ gin’, Rɔmɛ ɔgɔnɛ diyɛ ginrun diyɛ dɔmiyɛnw gɔbe puu lee, inɛw wajunw ɔn nɛ wɔin gɔbe puu lee, maa Kirisito birɛbirɛnɛi dɛi kaju nɛ too ga igii wɔin. 14Kaju nɛ mu too gɔ dɛi, ba unrunw joo gamuu Inɛw Baŋa nɛ diyɛ daanu bemɛ bariyaa, kɔɔ sabu dɛi be anrangaju bɛɛu, liliyɛ sɛlɛ le Ama sɔɔ tagauwɔin. 15Inɛw gamuu kai, ele lee, jai lee mu sibɛ go be sɛɛ dɛi, Kirisito waaju gɔ tagauwɔin. Kaa, inɛw gamuu gɔbe kinɛ ɛju le tagauwɔin. 16Be mui ibɛɛ wɔin dɛi kɔɔ gin’ kanraunwɔin. Sabu be, maa sɔɔ sɔɔ dɛi, maa inɛw bɛrɛ Kibɛru Ɛju gɔ narain ga jugɔmɔ dɛi, Ama ɔn nɛ mui tii ga be igii wɔin. 17Kaa inɛw gamuu Kirisito waaju gɔ kuu unrunbemɛ kai dɛi tagauwɔin, be kinɛpilu le tagauwɔnɛ. Kɔɔ gin’, ajubu bemɛ nɛ, waaru kaju mu too gɔ le, ɔɲɛ ma bariyɛmu bɛbɛɛdɛin ga wɔin. 18Wogɔ gaju turu kanran wɔlɔ. Be kinɛgɛun le birɛɲu ma, kinɛpilu le birɛɲu ma, bana biyaai wooi puu, Kirisito waaju gɔ tagi wɔɔ. Wogɔ dɛi kinɛ ma ɛɛli wɔɔ. Iyaa kinɛ ma kanran ɛɛliyɛmɔnu biyɛdɔn. 19Sabu amagɛɛn ebe lee, Yesu Kirisito Kikinu baru gɔ lee digɛu, kijɛ mu bɛrɛ dɔi kɔɔbe wooi yayabu ma sɔɔ le kijɛ digɛi biyɛdo mu igii wɔun. 20Dɔgɔ mui turu kanran aaidolo ga mu saii diyɛdɔn le dɔmiyaan wɔun. Kaa mu anrangaju gaai sii ye, ɔnmɔ ma le ma, yiun ma le ma, kanɛ goo ye, bai wooi mu dɛi Kirisito boi sɔmi biyɛdo. 21Sabu, mu bɛrɛ kai ɔnmɔ gɔ Kirisitoi, iyaa yiun gɔ tinɛi. 22Kaa iyaa, mu ɔnmɔi wɔnu birɛ niwɛn sɛɛ birɛ bɛbɛɛdɔn ye, nɛɛ mu kijɛ yɛmɛɲu inɔn. 23Mui sibɛ lɛi nɛ biɲiyaan wɔɔ. Yinwaaun ye, Kirisito le biyɛ ga, wogɔ saii daariyaa wɔun, sigɛ le wogɔ ire. 24Kaa e sabu dɛi, sɔɔ sigɛ le maa gɔ, wogɔ ɔnmɔi bii ma gɔ woi. 25Mu kɔɔ daii jugaa wɔun dɛi, mu e wooi logoro nɛ bibiyɛdɔn ga igii wɔun. Ebaa Ama oju nɛ giru go yaa ga, ebaa iyaa kinɛ ɛɛlu le biyɛ ga mu bibiyɛdɔn. 26Kɔɔ gin’, waaru logoro ebe nɛ pilemaa mu wiyaajɛ, e sigɛ le Kirisito Yesu nɛ mu dɛi kuu ebe unɔ bɛbɛɛdei. 27Sigɛ le, Kirisito Kibɛru Ɛju gɔ le bana sɛgɛrɛjɛ gin’ yoi yaai. Kɔɔ gin’ mu ei yɛnɛi wɛwɛiun ma, logoro ebe nɛ toloun ma biyaai kanran, ebaa sɛɛu ajubu turu nɛ ɛɛn go iŋiyaan, gagawu Kibɛru Ɛju bɛrɛ goojɛ gɔ dɛi tunmɔ le mɔrinyaan jai jaiyɛuwɔi ga mu ɛhɛgɛdɔn. 28Jaŋuw ebe bɛrɛ ei kijɛ turu nɛ kanran liirɛmɔnɔugi. Wogɔ bei suiyi sɛɛrɛi biyɛdo, kaa iyaa ei yabu sɛɛrɛi biyɛdo. Yayabu wogɔ Ama bɛrɛ goo ye wɛɛdo. 29Sabu Ama, Kirisito le gawu kuu ɛɛlu sai e bɛrɛ obolu, kaa iyaa wo dɛi ɔɲu kuu ɛɛlu gɔ e bɛrɛ obaabe. 30Kanɛ jai diyɛ gɔ nɛ e mu le bari bɛbɛɛdei. Wogɔ jai diyɛ pɔɔlɔ baa jaiyɛu mu bee gɔ woi, iyaa bana e igu gin’, iye bai dɔɔ jai jaiyɛu mu gɛlɛ gɔ woi.

will be added

X\