MATIU 9

1Yesu pilemaa diikoro nɛ yowaa, dibe gɔ kɛjaa taŋaa, ana wo daanbe gɔ nɛ yai. 2Kɔɔ nɛ wo dɔwaa, inɛw, ainɛ goju sanaai turu pɛnrɛnpanran le duiyaa, wo bɛrɛ jɛɛlin. Yesu, inɛw gɔbe aŋai wo le gawaa be wɔɔ gɔ iyaa, jiunginɛ gɔ le ɔn gin’ sɔi: «Aini ma, anrangaju kunɔ. Hakɛ uwɔ yaabu kanraantin.» 3Yesu kɔɔ gin’ wo sɔwaa, Ama tɔɔru deerenw, yalu gɔ nɛ wɔu, kinɛ bemɛ nɛ ɔn gin’ gɛɛbɛin: «Inɛ ɔn, Ama boi yamalauwɔ.» 4Yesu, kinɛ bemɛ ajubu jugɔube gɔ digɛu, be le ɔn gin’ sɔi: «E inge dɛi, kinɛ ebe nɛ ajubu mɔɲu kɔɔ ajubauwɔi? 5Yɛnɛi! Ainɛ ɔn womaa, hakɛ womɔ yaabu kanraantin aŋa le gɛɛ lee, womaa ingele ye yoi yaa gɛɛ lee, kolɛi logoro nɛ yagɔ naaran? 6Kaa Inɛ Aini gɔ, aduna nɛ inɛw bɛrɛ hakɛ bemɛ yaabu kanranɲu gɔnrɔn yasɛ e bɛrɛ jugɔmɔdɔn.» Kunrin, ainɛ goju sanaai gɔ le kijɛ wo gi: «Ingele, pɛnrɛnpanran uwɔ jeɲɛ, ginrun uwɔ nɛ yaa.» 7Ainɛ gɔ ingelaa ginrun womɔ nɛ yai. 8Inɛw, sɔɔ kɔɔ waaru be iye le, liliyɛ le jowaabɛin. Ama, inɛw bɛrɛ gɔnrɔn kɔɔ tunmɔ wo obu gɔ dɛi, be boi womɔ sɔmɔubɛin. 9Yesu yalu kɔɔ nɛ gowaa, oju womɔ digiyaa yaau, sɛgu yabu yalu nɛ ainɛ turu Matiu gɛɛu wo daaun iyi. Wo wo le sɔwaa gi: «Wɛɛ mui dimiyɛn.» Matiu ingelaa woi dimiyaanbe. 10Kɔɔ onu nɛ, Yesu, Matiu ginrun nɛ jaa kayau daanbe. Jaa kayau wo wɔu, sɛgu yabanw joo lee, inɛw boi mɔɲu bemɛ gowaa wɔin wajabe joo lee wiyaa, Yesu lee, jaŋu unrunw womɔ lee, be wooi mɔrinyaan jaa kayaubɛin. 11Parisiɛnbe wogɔ iyaa, jaŋu unrunw gɔbe le ɔn gin’ sɔin: «Jaŋudeerenɛ ebe gɔ, sɛgu yabanw lee, inɛw boi mɔɲu bemɛ gowaa wɔin lee, inge dɛi be le mɔrinyaan jaa kayauwɔ?» 12Yesu wogɔ ɛgaa, be le sɔwaa gi: «Inɛw sɛɛu wɔin gɔbe, jɔŋujɔŋɔnɛ kai sɛnɛ. Inɛw jiungunw, jɔŋujɔŋɔnɛ kai be sɛɛ.» 13Yesu iyaa gimaa be le ɔn gin’ sɔi: «Yai ye, sɔɔ ɔn tiyɛ womɔ ɛjii lubo yɛnɛi: “Kijɛ mu dɛnɛjɛ gɔ, inɛw, bɛlu sadaga, be tɛgɛrɛjɛ gɔi laa. Kaa amasɔgɔjugɔ aŋai be sɛɛ gɔ, mu wogɔi lugojɔn.” Iyaa, mu, inɛw teitai wɔin dɛi wɛɛlun. Kaa inɛw hakɛ kanranw dɛi wɛiun.» 14Jan Batise jaŋu unrunw gɔbe Yesu genɛ nɛ dɔwaa ɔn gin’ wo bɛrɛ selumi: «Parisiɛnbe lee, emɛ lee, emɛ wooi aŋa papagaɲu. Inge dɛi jaŋu unrunw uwɔ gɔbe aŋa pagaanɛ wɔin?» 15Yesu saa: «Purupagu bai gɔ, akana anrunge gɔbe, akana le wɔnu, yiundɔin daain gin’ kanran bɛbɛɛdɛin ma? Asuu. Kaa, bai yawɛɛjɛ, akana gɔ be le kabugutiidɛin. Kɔɔ waaru le be aŋa papagadɛin.» 16Yesu sɔɔ kɔɔ kuu nɛ gimaa ɔn gin’ taanrinyɛn dain: «Inɛ turu kanran, sɔi kana pɛlɛ ye, sɔi pɛi kuu nɛ daŋaalɛ. Wogɔ gin’ kanraan ye, sɔi gɔ biɲiyaain ye, kaaru gɔ babariyɛjɛ. 17Iyaa inɛ turu kanran kɔɲɔ ilɛ, umulu pɛibe nɛ kunɔɔlɛ. Wogɔ gin’ kanraan ye, kɔɲɔ gɔ waaru ilɛnu wo yaajɛ, umulu gɔbe popojodɛin. Kɔɲɔ gɔ totogiyedo. Iyaa umulu gɔbe yaa yayanwandɛin. Kɔɔ dɛi kɔɲɔ ilɛ gɔ, umulu kanabe nɛ kunɔɲu. Kɔɔ gin’ yanwan biyɛidolo.» 18Yesu kɔɔ gin’ sɔɔ sɔɔu wo gɛlɛu, Yahutunw inɛ giru tobe turu wiyaa, giru womɔ nɛ tuŋiyaan, ɔn gin’ wo le sɔi: «Iyaa ma, kanɛ sai sai kinrun gowaai. Kaa, kuu womɔ nɛ wɛɛ numɔ yaŋaraan ye, Ama gɛɛn. Wo ɔnmɔi bibiyɛdo.» 19Yesu ingelaa, jaŋu unrunw womɔ be wooi, ainɛ gɔi dimiyaan yaai tɔlin. 20Kɔɔ gin’ yaau be wɔu, yaanran turu Yesu onu nɛ dɔwaa sɔi womɔ kinrun tabu. Wo kinɛ womɔ nɛ, unrun Yesu sɔi sai biyaa tabaa ye, unruin babajado gɛɛube. Yaanran gɔ anranguju pɛli lɛisigɛ baa bain goi jiun le bee. 22Yesu onu kigelemaa, woi iyaa, wo le ɔn gin’ gi: «Iyaa ma, anrangaju kunɔ. Gagawu uwɔ ui bajamaati.» Waaru kɔɔ le tee yaanran gɔi bajaai. 23Kɔɔ onu nɛ, Yesu, Yahutunw inɛ giru tobe gɔ ginrun nɛ dɔwaa, keresujɔnw lee, pii piinw lee, ginrun gɔ siɲɛ le joonaa be sɛu tɛmaa, 24ɔn gin’ be le sɔi: «Ebe goojɛɛi: Iyaa gɔ yinwɛnlu. Wo giri yeiyeuwɔ.» Kaa, inɛw gɔbe woi mɔmɔubɛin. 25Nɛɛ, inɛw gɔbe puu waaru bain be goomu le, Yesu deun gɔ nɛ yowaa, iyaa gɔ numɔ aabe. Iyaa gɔ sɛɛu ingelaai. 26Gana gɔ wooi nɛ sɔɔ kɔɔ kibɛru ginaabe. 27Yesu, kɔɔ nɛ gowaa yaau wo wɔu, oju nɛ girumuw lɛi onu womɔ nɛ dimiyaan, mii ɛɛn le ɔn gin’ gɛɛbɛin: «Dawide tiruwɛnɛ gɔ, amasɔgɔ emɛ jugɔ.» 28Nɛɛ, waaru Yesu ginrun dɔi le, girumuw gɔbe genɛ womɔ nɛ be wiyaa, Yesu ɔn gin’ be bɛrɛ selumu: «Mu ei bajugaɲu gɔnrɔn yasɔn ga e gawaa wɔi ma?» Be saa: «Ee, emɛ Baŋa, emɛ gawaa wɔin.» 29Kɔɔ waaru le, Yesu giri bemɛ tabaa, be le ɔn gin’ sɔi: «Gagawu ebe le kɛukɛu, e bɛrɛ yinbiyɛmɔ.» 30Yesu kɔɔ gin’ wo giyaa, giri bemɛ pinɛlaai. Kɔɔ waaru le, Yesu be le ɛjii sɔwaa, bemaa sɔɔ bii gɔ inɛ turu bɛrɛ kanran jugɔmɔnɔu gi. 31Kaa, be goou digɛu, gana wogɔ yalu puu nɛ yaa, Yesu dɛi sɛɛrɛ gowaabɛin. 32Inɛw kɔɔbe Yesu genɛ nɛ gowaa yaau be wɔu, inɛw, Yesu bɛrɛ ainɛ waja jɛɛlaabɛin. Ainɛ gɔ, jinrun, kuu womɔ nɛ dɛinyaan, wo bɛrɛ sɔɔ sɔɔmɔbele. 33Kaa Yesu, ainɛ gɔ kuu nɛ jinrun gɔ nanaa goonɔu wo digɛu, ainɛ gɔ sɔɔ sɔɔi tɔlaabe. Inɛw, wogɔ iyaa, be bɛrɛ ɛjii maunɛ kanraanbe. Kɔɔ dɛi be gɛɛubɛin: «Emɛ Isɛrɛlu gana nɛ sɔɔ ɔn tɔgu iyetɛnɛ.» 34Kaa, Parisiɛn gɔbe, be ɔn gin’ gɛɛbɛin: «Inɛw kuu nɛ jinrun nana ga, jinrunbe kuu baŋa gɔ, gɔnrɔn gɔ, Yesu bɛrɛ wo obojɛ.» 35Yesu kɔɔ gin’ ana diyɛ lee, ana dagi lee nɛ yaaube. Wo ana kɔɔbe Ama gɛɛn ginrun gɔbe nɛ, deeru deereube. Ama diinɛ Kibɛru Ɛju waaju gɔ tagaube. Jiun tɔgu dɛin dɛin puu lee, goju yɛbɛlɛ wooi lee bajamɔube. 36Inɛw wo bɛrɛ wɛɛbɛin gɔbe ɛjii ɔɲaa, kinɛ bemɛ yanwaan bee. Be peju, girɛnɛ sɛnɛ gin’ bɛin. Wogɔ digɛu, Yesu, inɛw gɔbe amasɔgɔ, ɛjii woi aabe. 37Kɔɔ dɛi, wo ɔn gin’ jaŋu unrunw womɔbe le gi: «Dɛnrɛn ilaa, gaai wɔɔ. Kaa, birɛbirɛnw joolain. 38Kɔɔ dɛi, minɛ baŋa bɛrɛ gɛɛin, womaa dɛnrɛn gɔ ginrun jɛɛlɛ giye, birɛbirɛnw minɛ gɔ nɛ tii wa.»

will be added

X\