MATIU 8

1Yesu tetemɛ gɔ nɛ gowaa wo sugaa, inɛw joo woi dimiyaanbɛin. 2Kɔɔ gin’ nɛwɛnginɛ turu, giru womɔ nɛ wiyaa tuŋiyaan ɔn gin’ wo bɛrɛ gi: «Mu Baŋa, u ibɛɛ wɔu ye, nɛwɛn ma gɔ ɛjɛmu bɛbɛɛdou.» 3Yesu numɔ wajaraa, ainɛ gɔi tabaa, kijɛ gi: «Mu ibɛɛ wɔun. Ui ɛjaai biyɛ.» Yesu kɔɔ gin’ gɛɛu wo digɛu, nɛwɛn gɔ ainɛ gɔ nɛ gowaai. 4Kɔɔ onu nɛ Yesu wo le ɔn gin’ gi: «Ɛjii keŋiyɛn! Ui bajaai ga inɛ kanma bɛrɛ sɔɔnɔu. Kaa Ama bɛrɛ sadagadɔɔnɔnɛ gɔ bɛrɛ yaa. Ui bajaai ga, wo bɛrɛ tagara. Kɔɔ onu nɛ, ui naran go bajaai ga inɛw puu bɛrɛ sɛɛrɛi biyɛ ga Mɔise, nɛwɛnginɛ bajaai ye, sadaga jɛɛlɛ wo gi gɔ, wogɔ jɛɛlɛ.» 5Yesu, waaru Kapɛrunaumu ana nɛ wo yoi le, sɔludasu suŋu kuu baŋa turu genɛ womɔ nɛ wiyaa, 6ɔn gin’ wo bɛrɛ gɛɛn gɛin: «Mu Baŋa, birɛbirɛnɛ ma, goju gɔ yinwaan, ginrun go ɛjii ɔɲɔu yadiin.» 7Yesu aŋa womɔ saa gi: «Mu woi bajugai yayaadɔn.» 8Sɔludasu kuu baŋa gɔ saa: «Mu Baŋa, ginrun ma nɛ u yooun, mu le dagalu. Kaa sɔɔ turu sai gɛɛ. Birɛbirɛnɛ ma gɔ babajado. 9Mu, kuu ma bɛɛnw diŋɛ nɛ wɔun. Iyaa, mu yaa sɔludasu unrunw gamuu bɛrɛ tɔɔru obo bɛbɛɛjɔn. Koturu baŋa womaa yaa gun ye, wo yayaajɛ. Lee womaa wɛɛ gun ye, wɛwɛɛjɛ. Iyaa, gunɔnɛ ma womaa ɔn kanran gun ye, kakanranjɛ.» 10Yesu waaru sɔɔ kɔɔ wo ɛgu le, wo bɛrɛ maunɛ kanraanbe. Inɛw woi dimɛbɛin gɔbe le ɔn gin’ sɔi: «Mu naran go e bɛrɛ tagauwɔn, halu, Isɛrɛlu tɔgu nɛ kanran mu gagawu ɔn tunmɔ iyetɛlun. 11Ɛjii keŋiyɛin, inɛw joo duu sibɛ nɛ lee, dudaga sibɛ nɛ lee goi wɛi ye, Abarahamu lee, Isaka lee, Jakɔbu lee, be wooi mɔrin ye, alagala diinɛ nɛ jaa kakayadɛin. 12Kaa, diinɛ gɔ nɛ inɛw yooun jaan gɔbei bain go, ɔlɔ yalu nɛ kamatiidɛin. Be wogɔ nɛ, pii piinu, tɔnrɔn tɛnwɛnnu biyɛdɛin.» 13Kɔɔ onu nɛ, Yesu, sɔludasu kuu baŋa gɔ le kijɛ gi: «Ginrun uwɔ nɛ yaa. Kijɛ bibiyɛdo ga u gawu gɔ, u bɛrɛ kakanrandɛin.» Waaru Yesu kɔɔ gin’ wo sɔi gɔ le tee, birɛbirɛnɛ gɔ bajaai. 14Yesu kɔɔ nɛ gowaa, Piɛru ginrun nɛ yai. Wo Piɛru yaanran na teenu nɛ kɛbaamu le wo diiun yaa tɛmu. 15Yesu, yaanran gɔ numɔ aa wo kanran kɛbaamu gɔ woi pajaati. Wo ingelaa, Yesu bɛrɛ pana oboi yintɔlu. 16Bai wogɔ tee, digɛnai wo sugaa, inɛw jinrun kuu bemɛ nɛ daain joo, Yesu bɛrɛ jɛɛlaabɛin. Yesu sɔɔ womɔ le jinrun gɔbe inɛw kuu nɛ nana goonɔube. Wo iyaa, jiungunw wajunw gɔbe puu bajamaabe. 17Inɛ Ama titiyainɛ Esayi sɔɔ kibe ga, Yesu sɔɔ kɔɔbe kanraanbe: “Wo kuu womɔ le, yɛbɛlɛ emɛ jeɲaabe. Jiun emɛ gɔbe goonaa emɛ le wagee bojaabe.” 18Inɛw kulɔ woi gɔŋaa gɛlin ga iyaa, Yesu, jaŋu unrunw womɔ bɛrɛ tɔɔraa, bemaa dibe diŋirun waja go galamɔ gi. 19Kɔɔ waaru le, Ama tɔɔru deerenɛ turu Yesu genɛ nɛ dɔwaa, wo le ɔn gin’ sɔi: «Jaŋudeerenɛ, yalu u yaaido wooi nɛ mu ui didimiyɛndɔn.» 20Kaa Yesu aŋa womɔ saa gi: «Yurugube bonɔ yasin. Sasaabe kuru yasin. Kaa, Inɛ Aini gɔ, yalu kuu tuŋɔrɔnɲu kanran sɛlɛ.» 21Inɛ waja iyaa Yesu le ɔn gin’ sɔi: «Mu Baŋa, u mu bɛrɛ mu ba yiun laa yai mu bojomɔ.» Inɛ wogɔ Yesu jaŋu ii bee. 22Yesu aŋa womɔ saa gi: «Mui wɛɛ dimiyɛn. Inɛw yiun gɔbe pajaa ye, yiun bemɛ be bojomɔ.» 23Kɔɔ onu nɛ, Yesu diikoro nɛ yowaa, jaŋu unrunw womɔ be wooi gowaa yinyain. 24Dibe gɔ nɛ yaau be wɔu, kubɔ turu ooɲɔ diyɛ ingelaai. Diigunu ɛjii ingelaa ye, diikoro gɔi kimɛube. Kaa, kɔɔ waaru le Yesu giri yeiyeube. 25Jaŋu unrunw gɔbe yaa, woi yemɛlaa, ɔn gin’ wo le gin: «Inɛw Baŋa, emi suiyoido. Emi yaba.» 26Yesu be le saa gi: «Inge sabu dɛi e ɔn baa liyaa wɔi? Gagawu ebe gaila!» Kɔɔ gin’ giyaatiyaa, wo ingelaa ooɲɔ gɔ lee, dibe dii gɔ lee ganwaanbe. Kunrin, yalu gɔ kelemu biyaai. 27Inɛw puu bɛrɛ sɔɔ gɔ maunɛ kanraanbe. Kɔɔ dɛi, be ɔn gin’ gɛɛbɛin: «Aa! Inɛ ɔn inɛ inge tɔgui? Halu ooɲɔ lee, dibe dii lee, sɔɔ womɔ yabauwɔin.» 28Yesu, dibe gɔ kɛjaa taŋaa, waaru Gadara gana nɛ wo dɔi le, anranw lɛi, ɔnsain yalu nɛ gowaa wo bɛrɛ wɛin. Inɛw gɔbe jinrun bei ɛjii ɔɲɔmɔube. Iyaa, weje bemɛ saii mɔɲi bee gɔ digɛu, inɛw taŋa be bee gɔ le, oju galabenɛ. 29Anranw kɔɔbe, Yesu bɛrɛ wiyaa, mii ɛɛn le ɔn gin’ gɛɛbɛin: «Ama Aini, uwɔ ingei? Emi ɔɲɔmɔu waaru dɔɔlu wo wɔnu, u emi ɔɲɔmɔdou ma?» 30Yalu kɔɔ le gaila wagee, tolu kulɔ belu tɛnwɛun yabɛin. 31Jinrun gɔbe, Yesu bɛrɛ gɛnyaan, gin: «U emi nananadou ye, tolu gɔbe nɛ emi tii.» 32Yesu bemaa yaa gi. Be anranw lɛi gɔbe nɛ gowaa, yaa tolu gɔbe nɛ yoin. Tolu gɔbe nɛ yoou be digɛu, tolu kulɔ gɔ puu kokoo daa gɔ nɛ gowaa, ɔgu jɔbaa, dibe gɔ nɛ wiyaa yowaa suiyaain. 33Kɔɔ gin’ wo biyaa, inɛw tolu gɔbe girɛubɛin gɔbe jɔbaa, ginrun wiyaa, sɔɔ gɔ puu inɛw bɛrɛ tagaabɛin. Sigɛ le, anranw lɛi kuu nɛ jinrun daanbe gɔ bɛrɛ sɔɔ bii gɔ tagaabɛin. 34Kɔɔ gin’ be tagaa, ana gɔ puu jɔbaa, Yesu bɛrɛ wɛin. Waaru woi be iye le, be wo bɛrɛ gɛnyaan, womaa gana unrunbemɛ nɛ goojɛ gin.

will be added

X\