MATIU 6

1«Kuu ebe kajubai. Ama digi ebe nɛ, Ama dɛi birɛ e birɛjɛ gɔ, inɛw giru nɛ birɛ ye, bemaa ei iye giye kanrannɔugi. E kɔɔ gin’ kanraanjɛi ye, e Ba alagala go wɔɔ gɔ numɔ nɛ tujɔ bɛɛidelei. 2«Nauginɛ bɛrɛ sin waaru u kanranjɛ le, inɛw kuu ulogunw aŋai Ama gɛɛn ginrun nɛ ma, pɔŋɔrɔn nɛ ma, be kanranjɛ gin’ kanrannɔu. Be boonu kunu ye, inɛw bemaa bei sɔmɔ giye sin bemɛ kanranɲu. Mu naran go e bɛrɛ tagauwɔn, be kanɛ baa, tujɔ bemɛ biyaaɲu. 3Kaa u, nauginɛ bɛrɛ sin waaru u kanranjɛ, numɔ nana uwɔ bɛrɛ numɔ iin uwɔ kijɛ kanranjɛ jugɔmɔnɔu. 4U kɔɔ gin’ kanraanjɛu ye, sin u kanrun gɔ babaŋa. Ama u Ba gɔ, sɔɔ babaŋa ihiyejɛ digɛnu, wo ui tutujɔdo.» 5«Iyaa, waaru Ama e gɛɛnjɛ, inɛw aŋa lɛilɛigunw aŋai kanranjɛ gin’ kanrannɔugi. Be inɛw bemaa bei iye giye, Ama gɛɛn ginrun nɛ ma, ana pɔŋɔrɔn nɛ ma iŋi ye, Ama gɛɛn ga be bɛrɛ ɛjii wɔɔ. Mu naran go e bɛrɛ tagauwɔn, be kanɛ baa tujɔ bemɛ biyaaɲu. 6Kaa u kai, u Ama gɛɛn ibɛɛ wɔu ye, ginrun uwɔ nɛ, deun giru go yayoi ye, kuu uwɔ nɛ taan pinɛ ye, Ama uwɔ gɛɛn. Ama u Ba gɔ, wo yalu babaŋa kɔɔ nɛ u le yɔɔ. Wo yalu babaŋa kɔɔ nɛ kijɛ u kanranjɛ iyeuwɔ digɛu, ui tutujɔdo. 7«Waaru Ama e gɛɛnjɛ le, inɛw Ama inin gɔbe aŋai gɛɛnjɛ gin’, sɔɔ buu sɔɔnɔugi. Ajubu bemɛ nɛ sɔɔ joo bemɛ dɛi Ama gɛɛn bemɛ sasaado ga be yinsɛin. 8Be gin’ kanrannɔugi. Ama e Ba gɔ, wo bɛrɛ e gɛɛnmɔ nɛ, wo kijɛ kai e sɛɛ gɔ igii wɔɔ. 9Ama gɛɛnnu ɔn gin’ gɛɛi: ‘Ama emɛ Ba, alagala go daan gɔ, boi uwɔ gaai biyɛmɔ. 10Diinɛ uwɔ wɛɛmɔ. Bana diŋɛ uwɔ alagala nɛ kanranɲu gin’, aduna nɛ kunrin kanranmɔ. 11Iye pana emɛi baaido, emi obo. 12Inɛw emɛ bɛrɛ hakɛ kanranɲu gɔbe, aŋai yaabu emɛ kanranjɛ gin’, hakɛ emɛ gɔ yaabu kanran. 13Emi subɔrɔmɔnɔu. Kaa, Mɔɲu kuu baŋa numɔ nɛ emi yaba. [Sabu diinɛ lee, gɔnrɔn lee, dooro lee uwɔi. Asuu nasuu. Amina.]’ 14«Naran go, inɛw e bɛrɛ hakɛ kanranɲu gɔbe, e bei yaabu kakanranjɛi ye, e Ba alagala nɛ daan gɔ kanran hakɛ ebe e bɛrɛ yaabu kakanrando. 15Kaa, inɛw e bɛrɛ hakɛ kanranɲu gɔbe, e bei yaabu kanraanlɛi ye, e Ba Ama yaa hakɛ ebe e bɛrɛ yaabu kanraindolo.» 16«Nɛɛ, waaru aŋa e pagajɛ le, inɛw aŋa lɛilɛigunw gin’, girupala ebe yaŋujiyɛmɔnɔugi. Inɛw puu bemaa aŋapagu le wɔin ga iye giye, be girupala yaŋujiyɛmɔ ye gɛliyɛɲu. Mu naran go e bɛrɛ tagauwɔn, be kanɛ baa tujɔ bemɛ biyaaɲu. 17Kaa, u aŋa pagaa wɔu ye, girupala uwɔ mɔŋɔ ye, kukuli uwɔ ɛjii yegere. 18Kɔɔ gin’ uwaa aŋapagu le wɔɔ ga, inɛw jugɔidenɛ. Kaa, u Ba, yalu babaŋa nɛ wɔɔ gɔ, wo turu sai bɛrɛ jugɔmɔ. Wo sɔɔ babaŋa ihiyejɛ digɛu, ui tutujɔdo.» 19«Aduna ɔn nɛ kijɛ mɔɔnɔnɔugi. Aduna nɛ peru lee, kɔjɔ lee, kijɛ gɔbe yamulutiiɲu. Gugunyɔnw kanran taan wɔlugu ye, kijɛ mɔɔni gɔ balajɛɛɲu. 20Kaa, kijɛ ebe alagala nɛ mɔɔnɔi. Alagala nɛ peru ma kɔjɔ ma wɔlɔ. Gugunyɔnw kanran taan wɔlugɔ ma, kijɛ bala ma wɔlɔ. 21Sabu kijɛ uwɔ yalu wɔɔ gɔ nɛ, kinɛ uwɔ kanran yalu wogɔ nɛ biyɛjɛ.» 22«Giri, goju nɛ lanpa gin’ wɔɔ. Giri uwɔ sɛɛu wɔɔ biyaai ye, goju uwɔ puu wijɛ nɛ too. 23Kaa, giri uwɔ sɛɛu laa biyaa ye, goju uwɔ puu ɔlɔ nɛ too. Nɛɛ wijɛ u nɛ too gɔ ɔlɔi biyaai ye, u ɔlɔ diyɛ naa diyɛ nɛ tou.» 24«Nɛɛ, inɛ turu kanran kuu bɛɛnw lɛi dɛi birɛ birɛ bɛɛidolo. Wo koturu baŋai ibɛi biyaa, waja gɔi ibɛi biyɛlu kanrun ye koi. Koturu baŋa birɛ nɛ kuu womɔ obaa ye, waja gɔ birɛ nɛ kuu kunɔlu kanrun ye koi. Ama dɛnɛ lee, kɛɛlɛ dɛnɛ lee, e sɔɔ kɔɔbe lɛi kubɔ tunmɔ kanrun bɛɛidelei.» 25«Nɛɛ, e bɛrɛ kijɛ mu gɛɛjɛ gɔ unwɔ: Pana ebe dɛi, diyɛdai le biyɛnɔugi. Kijɛ e kayaido dɛi ma, kijɛ e nɔɔido dɛi ma diyɛdai le biyɛnɔugi. Kinrun, kayɛrɛ dɛi irela ma? Iyaa, sɔi goju ebe nɛ e kunɔido dɛi, diyɛdai le biyɛnɔugi. Goju, sɔi dɛi irela ma? 26Sasaabe bana yɛnɛi. Be toi tɔɔnɛ, gɛlu gɛlɛɛnɛ. Guyɔ nɛ, dɛnrɛn mɔɔnɔidenɛ. Kaa, Ama e Ba alagala nɛ daan gɔ, pana bemɛ tɔtɔɔjɛ. Ei sigɛ le sasaabe dɛi irela ma? 27Logoro ebe nɛ inɛ aa kuu womɔ dɛi jiire wo jiirejɛ dɛi, kinruntaun womɔ, halu gaila kanran baru bɛɛjɛ? 28«Iyaa, inge dɛi sɔi e yooido dɛi jiire le biyɛdei? Minɛ nɛ kinrunbɔmɔbe aŋai puyo be puyojɛ ajubu yɛnɛi. Be birɛ birɛɛnɛ. Sɔi kanran tiyɛɛnɛ. 29Kaa naran go, halu, Ɔgɔnɛ Salomɔ, ɔgɔ womɔ wooi nɛ, puyo kɔɔbe baa saŋa saŋiyɛnlu. 30Puyobe, iye kowɔnu, yogo yaun nɛ kunɔɲu gɔ, Ama kɔɔ gin’ bei sasaŋaranjɛ biyaai ye, wo wogɔ dɛi sigɛ duŋu ebe gooidolo ma? Gagawu ebe gaila de! 31Nɛɛ, diyɛdai le bii ye, e inge kayadɛin ma, inge nɔɔdɛin ma, inge goriyedɛin ma gɛɛnɔugi. 32Inɛw Ama inin gɔbe, kijɛ kɔɔbe puu dɛi diyɛdai le be biyɛjɛ. Kaa, Ama e Ba alagala go daan gɔ, e kijɛ kɔɔbe puu kai yasɛi ga igii wɔɔ. 33Kɔɔ sabu dɛi, kijɛ puu dɛi sigɛ Ama diinɛ lee, teitai womɔ lee dɛnɛi. Kɔɔ biyaai ye, kijɛ wajunw gɔbe puu kuu ebe nɛ boru babaradɛin. 34Kɔɔ digɛnu, yogo kai dɛi diyɛdai le biyɛnɔugi. Yogo, kai womɔ sagu wo duiyɔdo. Bai puu ɔɲɛ womɔi. Iyaa, bai tuturu ɔɲɛ duiyɔun baa wɔɔ.»

will be added

X\