MATIU 4

1Sɔɔ kɔɔbe onu nɛ, Ama Kikinu Yesui dimɛraan olusolo nɛ, jinrun puu kuu baŋa bɛrɛ woi subɔrɔmɔi yai. 2Aga pɛnai, digɛ pɛnai baa, Yesu aŋa pagaa bee dɛi, giyɛ woi aai. 3Kɔɔ waaru le jinrun puu kuu baŋa, genɛ womɔ nɛ dɔwaa, ɔn gin’ wo le gi: «Ui Ama Ainii ye, tibu ɔnbe bemaa buru taŋa giye tɔɔrɔ.» 4Yesu ɔn gin’ aŋa womɔ sai: «Ama Dɔn nɛ tɔŋaaɲu: “Inɛ jaa le sai kɔiyɔɔlɛ. Kaa, sɔɔ Ama aŋa nɛ goojɛ le kɔiyɔjɛ.”» 5Kɔɔ onu nɛ jinrun puu kuu baŋa woi dimɛraan, Ama dɛi ana dɛiin wɔɔ, Jerusalɛmu nɛ, Ama Ginrun Diyɛ daa gɔ nɛ, yalu pala naa pala gɔ nɛ unaa, 6ɔn gin’ wo le gi: «Ui Ama Ainii ye, doɲu gɔ nɛ kili sugo. Sabu Ama Dɔn nɛ tɔŋaaɲu: “Ama, mɛlɛnkɛ womɔbe bemaa ui kajuba giye tɔtɔɔrɔdo. Tibu nɛ kubɔ uwɔ tomɔnɔu giye, be numɔ bemɛ le ui dɔɔn gɛgɛliyɛdɛin.”» 7Yesu ɔn gin’ sai: «Ama Dɔn nɛ sɔɔ ɔn kanran tɔŋaaɲu: “U Inɛw Baŋa Ama uwɔ gɔi subɔrɔnɔu.”» 8Jinrun puu kuu baŋa iyaa, Yesui dimɛraan, kokoo gabu turu nɛ unaa, wo bɛrɛ aduna laamu gɔbe puu lee, ɔgɔ bemɛ lee tagaraa, 9ɔn gin’ wo le gi: «Giru ma nɛ tuŋiyaan mui demɛniyɛnmaajɛu ye, mu kijɛ ɔnbe puu u bɛrɛ ohobodɔn.» 10Kɔɔ waaru le, Yesu ɔn gin’ sai: «Setanu! Genɛ ma nɛ goo. Ama Dɔn nɛ tɔŋaaɲu: “U Inɛw Baŋa Ama uwɔ gɔ, wo turu sai demɛniyɛnmɔ, wo turu sai baba.”» 11Yesu kɔɔ gin’ wo saa, jinrun puu kuu baŋa woi yinpaju. Mɛlɛnkɛbe genɛ womɔ nɛ wiyaa, kai womɔ kilaabɛin. 12Yesu, Jan Batisei kaju kunaatin ga waaru wo ɛgu le, wo Galile gana nɛ yai. 13Kaa, wo Nasarɛtu ana gɔ pajaatiyaa, Kapɛrunaumu ana nɛ yaa dɛinyin. Ana wogɔ, Sabulɔn lee, Nɛputali lee tɔgu nɛ, Galile dibe diŋirun nɛ daan. 14Inɛ Ama titiyainɛ Esayi sɔɔ tɔŋu gɔ kibe ga kunrin bii. Esayi sɔɔ ɔn gin’ tɔŋu: 15“Sabulɔn gana lee, Nɛputali gana lee, gana dibe le bɛrii wɔin inɛw gɔbe, gana Jurudɛn dibe onu go wɔin inɛw gɔbe, Galile gana, Yahutunw tɔgui laain sibɛ wɔin inɛw gɔbe, sɔɔ ɔn keŋiyɛin: 16Ɔlɔ nɛ inɛw tobɛin gɔbe, be wijɛ diyɛ iyaaɲu. Yiun kini gana nɛ inɛw wɔin gɔbe, be dɛi wijɛ gowaai.” 17Yesu kɔɔ gin’ Kapɛrunaumu ana nɛ dɛinyɛun digɛu, waaju tagai tɔlu. Wo waaju womɔ nɛ ɔn gin’ gɛɛube: «Alagala diinɛ gɔ bɛruniyaain. Bana ebe dulomɔi.» 18Bai turu, Yesu Galile dibe genɛ nɛ galau, ba unrunw iiju aanw lɛi dii gɔ nɛ jɔɔ kamau be wɔu iyaabe. Iiju aanw gɔbe Simɔ, boi waja womɔ Piɛru gɛɛɲu lee, wo bainɛ Andere lee bee. 19Yesu be le ɔn gin’ sɔi: «Mui wɛɛ dimiyɛin. Mu ei inɛw aawin bojodɔn.» 20Ɔgu kɛu, Simɔ lee, Andere lee, jɔɔ bemɛ pajaatiyaa woi dimiin. 21Kɔɔ nɛ gowaa, giru go yaa, Yesu, ba unrunw lɛi waja Sebede unrunw Jake lee, Jan leei iyaabe. Be diikoro gɔ nɛ be ba be wooi jɔɔ bemɛ yegereubɛin. Yesu bei boonaabe. 22Be ginsɛsai be ba lee, diikoro gɔ lee pajaatiyaa, woi dimiin. 23Kɔɔ onu nɛ, Yesu Galile gana yalu puu nɛ yaaube. Wo Ama gɛɛn ginrun bemɛ gɔbe nɛ inɛwin deereu, alagala diinɛ Kibɛru Ɛju waaju gɔ tagaube. Wo inɛw jiun puu lee nurun puu lee bajamɔube. 24Boi goo womɔ, Siri gana nɛ, yalu wooi dɔwaabe. Kɔɔ dɛi, inɛw, wo bɛrɛ jiungunw tɔgu dɛin dɛin lee, ɔɲɛ tɔgu dɛin dɛin lee, gana nɛ goi ye jɛɛlɛubɛin. Gamuu kuu nɛ jinruin daan, gamuu tibu sugowin, gamuu inɛw goju yinwaan wɔinbei. Yesu jiungunw kɔɔbe puu bajamaabe. 25Kɔɔ gin’ inɛw joo, Galile gana nɛ lee, Ana Pɛlu gana nɛ lee, Jerusalɛmu ana nɛ lee, Judea gana nɛ lee, Jurudɛn onu nɛ gana wɔin gɔbe nɛ lee gowaa wiyaa, Yesui dimiyaanbɛin.

will be added

X\