MATIU 3

1Bai kɔɔbe nɛ, Jan Batise, Judea gana olusolo nɛ gowaa wiyaa, waaju tagai tɔlu. 2Waaju womɔ nɛ ɔn gin’ inɛw le gɛɛbe: «Alagala diinɛ gɔ bɛruniyaain. Kɔɔ dɛi bana ebe dulomɔi.» 3Inɛ Ama titiyainɛ Esayi, pɔɔlɔ baa Jan wogɔ dɛi sɔɔ ɔn gin’ tɔŋu: “Olusolo nɛ, inɛ turu mii goonaabe. Kijɛ wo gɛɛbe: ‘E Inɛw Baŋa oju gɔ yegerei. Oju na womɔbe demu demu bojoi.’” 4Jan, sɔi wo tobe gɔ, ɔgɔyɔn kukuli le yegeraabɛin. Wo guju kɛyaa narun womɔ nɛ pagaa sɛbe. Wo kakaa lee, olu yɛin lee le pana unrunmɔ kunɔube. 5Jerusalɛmu nɛ lee, Judea gana nɛ lee, Jurudɛn dibe le ana bɛrii wɔin gɔbe lee nɛ gowaai ye, inɛw Jan bɛrɛ wɛɛubɛin. 6Inɛw kɔɔbe, hakɛ bemɛ sɔwaa be jɛ ye, Jan kɔɔ gin’ bei Jurudɛn dibe nɛ batise kanraunbe. 7Parisiɛn joo lee, Saduseyɛn joo lee, unrunbei batise kanranmɔi wɛɛubɛin. Jan, wogɔ iyaa, be le ɔn gin’ gɛɛbe: «E yuguru kɔkɔju tɔgu gɔbe, Ama kinɛbanrun wɛɛido gɔ nɛ ebaa ɛli goo ga aa ei tinwinrun? 8Bana ebe duliyaai ga birɛ ebe le tagarai. 9Iyaa kinɛ ebe kɔlɔ nɛ Abarahamu e bai ga gɛɛnu biyɛnɔugi. Sabu mu e bɛrɛ tagauwɔn, Ama, tibu e iyejɛ ɔnbei dulomu ye Abarahamu unrunwin bojo bɛbɛɛjɛ. 10Kanɛ baa, gulɔ tiun duu gɔ dɛŋɛido gɔ yɛgaa wɔɔ. Tiun, ii ɛju naraannɛ gɔbe puu kɛjɛ ye yaun nɛ kunɔdɛin. 11«Bana ebe dulomaati tagara ga, mu ei dii nɛ batise kanraunwɔn. Kaa, inɛ turu onu ma nɛ yawɛɛjɛ. Inɛ wogɔ wiyaai ye, wo Kikinu Pilu nɛ lee, yaun nɛ lee ei batise kanrando. Kɔɔ dɛi inɛ wogɔ mu dɛi sigɛ gɔnrɔn sɛɛ. Halu taga womɔ kɔmɔlɔ ga mu le jaanla. 12Wo kijɛ dɛnrɛn wɛyi womɔ numɔ le gɛli ye wɛɛdo. Wo tɛɛliyɛ womɔ gɔ ɛjii sasagarado. Wo dɛnrɛn ii gɔ guyɔ womɔ nɛ mɔmɔɔnɔdo. Kaa kɔkɔjɔun gɔ yaun asuu yinwɛɛnlɛ gɔ nɛ tɛtɛgɛrɛdo.» 13Yesu Galile gana nɛ gowaa, Jurudɛn dibe nɛ Jan bɛrɛ unruin batise kanranmɔi wɛi. 14Kaa, Jan woi batise kanran ga yabalu kanrun ibɛɛ bee. Kɔɔ dɛi, ɔn gin’ wo le gi: «Mui batise u kanraun jaan. Yani u mu bɛrɛ wɛɛuwɔu?» 15Yesu ɔn gin’ wo le sai: «Kanɛ kɔɔ gin’ kanran ga yaba. Kunrin emɛ Ama diŋɛ kikibemɔdɛin.» Yesu kɔɔ gin’ wo saa, Jan yabaabe. 16Woi batise kunaa kilaa, dibe gɔ nɛ goou wo digɛu, alagala pinɛlaa, Ama Kikinu pelegele gin’ sugaa Yesu kuu nɛ dɛinyɛun wo wɔu iyaabe. 17Alagala gowaa mii ɛgɛmaabe. Mii gɔ ɔn gin’ sɔi: «Ɔn Aini ibɛ ma gɔ woi. Wo le kinɛ ma ɛjii aa wɔɔ.»

will be added

X\