MATIU 28

1Deeliye bai gɔ galaa wo yaa, jugu bai pɔlɔ gɔ baayaara waaru le, Mari Magudala bɛɛnnɛ gɔ lee, Mari waja gɔ lee, ɔnsain gɔ yɛnɛi yaabɛin. 2Ginsɛsai minɛ ɛjii jigaabe. Inɛw Baŋa mɛlɛnkɛ turu sugaa, tibu diyɛ ɔnsain aŋa nɛ pinɛbe gɔ dunɔrɔnmaa goonaatiyaa, wogɔ kuu nɛ dɛinyin. 3Mɛlɛnkɛ wogɔ, bana womɔ anrangiriyenu gin’ bee. Sɔi womɔ yaa pilu pala pala bee. 4Sɔludasu unrunw gɔbe wogɔ iyaa, liyaa, kinwɛun yiun gin’ diinbɛin. 5Kaa, mɛlɛnkɛ gɔ yaanw gɔ le sɔwaa: «E kai, liyɛnɔugi. E Yesu baga jai nɛ pɛgaa dain gɔi dɛnɛjɛi ga mu igii wɔun. 6Wo ɔn nɛ tolo. Bana e bɛrɛ wo tagu gin’, wo bulaai. Yalu wo diinbe gɔ wɛɛ yoi yɛnɛi. 7Nɛɛ, jaŋu unrunw womɔ bɛrɛ wo bulaai ga ɔgiri yai tagai. Wo Galile gana nɛ giru ebe nɛ yaai. E kɔɔ nɛ woi iyedei. Mu wogɔ e bɛrɛ tagai wɛiun.» 8Yaanw gɔbe ɔgu ɔnsain gɔ nɛ gowaa, liliyɛ le, kinɛ ɛɛli le jɔbɔu, jaŋu unrunw gɔbei kibɛru gɔ tagai yain. 9Ginsɛsai, Yesu, giru bemɛ nɛ wiyaa, bemaa poo gi. Yaanw gɔbe genɛ womɔ nɛ dɔwaa, tuŋiyaan, woi demɛniyɛnmaabɛin. 10Yesu be le sɔwaa: «Liliyɛ le biyɛnɔugi. Mu ba unrunw bɛrɛ yai tagai. Bemaa Galile nɛ yaa wa. Be kɔɔ nɛ mui iyedɛin.» 11Yaanw gɔbe, oju nɛ be tou, sɔludasu unrunw gamuu ana kɔlɔ nɛ yaa, sɔɔ bii gɔ puu, Ama bɛrɛ sadagadɔɔnɔw kuu bɛɛnw bɛrɛ tagaabɛin. 12Sadagadɔɔnɔw kuu bɛɛnw gɔbe, Yahutunw inɛw naw gɔbe le mɔrinyaan, be wooi puu waja tunmɔ le aaraa, sɔludasu unrunw gɔbe bɛrɛ kɛɛlɛ diyɛ obaa, 13be le ɔn gin’ gin: «Digɛ, giri e yeiyeu, jaŋu unrunw womɔbe wiyaa, yiun gɔ gunyaanɲu ga inɛw bɛrɛ yingɛɛi. 14Sɔɔ wogɔ sɛmɛginɛ bɛrɛ dɔwaai kanran, emɛ, kinɛ womɔ kaaliyɛmɔ ye, kuu ebe bana gaanaidɛin bɛbɛɛdɛin.» 15Kunrin, sɔludasu unrunw gɔbe buudu gɔ yabaa, be bɛrɛ aŋai tagin gin’ yinkanrin. Kɔɔ gin’ Yahutunw logoro nɛ iye bai dɔɔ, sɔludasu unrunw gɔ sɔɔ gi gɔ, woi ginaa wɔɔ. 16Yesu jaŋu unrunw pɛli turusigɛ gɔbe ingelaa, Galile gana nɛ tetemɛ nɛ Yesu bemaa yaa gi gɔ nɛ yain. 17Be yalu wogɔ nɛ dɔwaa, Yesui iyaa woi demɛniyɛnmaabɛin. Kaa, logoro bemɛ nɛ gamuu, Yesui ma kinɛ bemɛ lɛilɛi bɛin. 18Yesu, genɛ bemɛ nɛ dɔwaa, kijɛ gi: «Alagala nɛ lee, aduna nɛ lee, Ama, gɔnrɔn gɔ wooi mu bɛrɛ obaajɛ. 19Kɔɔ dɛi, yaai, tɔgu wooi nɛ jaŋu unrunw ma bojoi. Ba gɔ lee, Aini gɔ lee, Kikinu Pilu gɔ lee boi le, bei batise kanrain. 20Iyaa lee, sɔɔ e bɛrɛ mu tɔɔru gɔ puu bemaa sɔɔ wogɔbe yaba giye bei deerei. Nɛɛ, yɛnɛi, mu aduna dogoido baa, bai wooi e le wɔun.»

will be added

X\