MATIU 27

1Agapaali waaru le, Ama bɛrɛ sadagadɔɔnɔw kuu bɛɛnw gɔbe lee, Yahutunw inɛw naw gɔbe lee mɔrinyaan, Yesui daaidɛin bana aaraabɛin. 2Be Yesui aa pagaa, Sɛmɛginɛ Pilate bɛrɛ jɛyaabɛin. 3Nɛɛ, Judasu, inɛ Yesui numɔ nɛ kunɔnɛ gɔ, Yesui dadaadɛin ga waaru wo jugu le, kinɛ womɔ woi ɛjii jarugai tɔlaabe. Yesui numɔ nɛ kunaa, sarudu buudu pɛtaanu wo bɛi gɔ, Ama bɛrɛ sadagadɔɔnɔw kuu bɛɛnw gɔbe lee, Yahutunw inɛw naw gɔbe lee bɛrɛ jɛɛlaabe. 4Be le ɔn gin’ gi: «Inɛ jarugu wo le wɔlɔ gɔi numɔ ebe nɛ mu kunu dɛi hakɛ kanraantun.» Kaa, be aŋa womɔ saa: «Tagu emɛ tolo. Kɔɔ sɔɔ uwɔi.» 5Judasu, kɛɛlɛ gɔ, Ama Ginrun Diyɛ gɔ nɛ maɲaatiyaa, gowaa yaa suŋu le unruin pɔraa dai. 6Ama bɛrɛ sadagadɔɔnɔw kuu bɛɛnw gɔbe kɛɛlɛ gɔ jeɲaa, tunmɔ le ɔn gin’ gin: «Kɛɛlɛ ɔn, inɛ kinrun dɔnruin. Tɔɔru emɛ le kɛukɛu, emɛ kɛɛlɛ ɔn Ama Ginrun Diyɛ kɛɛlɛ le mɔɔnɔu jaanla.» 7Kɔɔ dɛi, be tunmɔ le aaraa, toroimaanɛ minɛ gɔi ɛbaa, yerunw ɔnsain bojaabɛin. 8Kunrin iye wɛɛ dɔɔ, minɛ kɔɔ boi ili minɛ gɛɛɲu. 9Inɛ Ama titiyainɛ Jeremi sɔɔ sɔi ɔn kunrin kibaai: “Bana Inɛw Baŋa Ama mu bɛrɛ sɔwaabe gin’, be sarudu buudu pɛtaanu gɔ jeɲaa, toroimaanɛ minɛ gɔi ɛbaabɛin. Kɛɛlɛ wogɔ, Isɛrɛlu tɔgu aŋai kinrun womɔ dɔnrun aaru gɔ, kɔɔ woi.” 11Yesui Sɛmɛginɛ Pilate giru nɛ jɛyaabɛin. Wo woi ɔn gin’ selumu: «Ui Yahutunw ɔgɔnɛi ma?» Yesu aŋa womɔ saa: «Wogɔ u gi.» 12Ama bɛrɛ sadagadɔɔnɔw kuu bɛɛnw gɔbe lee, Yahutunw inɛw naw gɔbe lee Pilate bɛrɛ Yesui jaarau be wɔu, Yesu be le sɔɔ kanma saalu. 13Pilate pilemaa Yesu le ɔn gin’ sɔi: «Inɛw ɔnbe kuu uwɔ nɛ sɔɔ sɔɔu wɔin gɔ, u ɛgɛɛlɛu ma?» 14Yesu aŋa womɔ saalu. Wogɔ sɛmɛginɛi ɛjii maunɛ kanrun. 15Taŋagalu janwan wɛɛjɛ puu, sɛmɛginɛ gɔ, kajuginɛ turu pajaube. Inɛw, kajuginɛ paja giyaaɲu gɔ, Pilate, kajuginɛ wogɔi pajabe. 16Waaru kɔɔ le, kajuginɛ turu Barabasu gɛɛɲu gɔ yabe. Inɛw puu woi igii bɛin. 17Kɔɔ gin’ Pilate, mɔɔnu gɔ bɛrɛ selumaa, bemaa aai unrun paju ye dɛnɛɲu ma gi. Barabasui ma, Yesu, Kirisito gɛɛɲu gɔi ma gi. 18Inɛw gɔbe, ele dɛi Yesui numɔ nɛ kuni ga, Pilate igii bee. 19Pilate kɔɔ gin’ saliyɛ kireu wo daaun, yaanran womɔ, wo bɛrɛ inɛ tiyaa, unrun, digɛ Yesu dɛi yaŋawelu welaa, ɛjii ɔɲaabe gi. Kɔɔ dɛi, wo Pilate womaa Yesu inɛ teitai kɔɔ sɔɔ nɛ aŋa womɔ goonɔ gi. 20Ama bɛrɛ sadagadɔɔnɔw kuu bɛɛnw gɔbe lee, Yahutunw inɛw naw gɔbe lee, be mɔɔnu gɔi suuraa bemaa Barabasui paja ye Yesui daa ire ga Pilate aŋa kunrin saa gin. 21Kubɔ lɛiye gɔ, Pilate be bɛrɛ inɛ aa paja ire ma wo selumaa, be saa, Barabasui paja gin. 22Wo pilemaa inɛw gɔbe bɛrɛ ɔn gin’ selumu: «Kɔɔi ye, Yesu, Kirisito gɛɛɲu gɔ le maa inge kanran?» Inɛw gɔbe puu ɔn gin’ sain: «Baga jai nɛ woi pɛgɛ ye daa!» 23Pilate, inɛw gɔbe bɛrɛ ɔn gin’ selumu: «Kɔɔi ye inɛ ɔn, mɔɲu ingei kanrun?» Kaa, inɛ kanma puu mii bemɛ ɛɛnnaa ye, ɔn gin’ gɛɛbɛin: «Woi baga jai nɛ pɛgɛ ye daa!» 24Pilate yɛnaa wo kanran, mɔɔnu gɔ sɔɔ womɔ keŋiyɛɛnlɛ. Kaa, mii bemɛ bara bara yaaɲu wo kanraan, wo dii jeɲaa, inɛw puu giru nɛ numɔ womɔ mɔŋaatiyaa, ɔn gin’ be le gi: «Ainɛ ɔn dai sɔɔ gɔ nɛ mui tolo. Woi dai sɔɔ gɔ, kɔɔ sɔɔ ebei.» 25Inɛw gɔbe aŋa womɔ ɔn gin’ sain: «Ili womɔ gɔ kuu emɛ nɛ lee, unrunw emɛ kuu nɛ lee yasugo.» 26Kɔɔ waaru le, Pilate, Barabasui pajaatiyaa, Yesui bɔɔniyɛn le ɛjii lagamaa, baga jai nɛ pɛgɛ ye daa ga sɔludasu womɔbe numɔ nɛ woi kunu. 27Pilate sɔludasu gɔbe Yesui aa woi gɛliyaa, sɛmɛginɛ ginrun nɛ jɛɛlaa be kanran, sɔludasu kɔɔ nɛ tobɛin gɔbe puu wiyaa woi gɔŋi. 28Be sɔi womɔbe kolaa, arugoi diyɛ banrun wo nɛ kunaabɛin. 29Kɔɔ onu nɛ, be jijii le domɔ tiyaa, kuu womɔ nɛ kunaatiyaa, saguba turu numɔ iin womɔ nɛ kuni. Iyaa, giru womɔ nɛ wiyaa tuŋiyaan ye, woi mɔmɔnu, wo le ɔn gin’ gɛɛbɛin: «Yahutunw ɔgɔnɛ, poo!» 30Be kuu womɔ nɛ yuguja tɔitɔi tiiu, saguba gɔ yabaa ye, kuu womɔ kɔɔ le lagaubɛin. 31Waaru woi yamurinyɛnmaa bei bai le, be arugoi diyɛ gɔ wo bɛrɛ goonaatiyaa, arugoi womɔ gɔ pilemaa wo bɛrɛ kunaa, woi gɛliyaa baga jai nɛ pɛgɛ daai yinyain. 32Waaru Jerusalɛmu ana gɔ nɛ be goobe le, be Sirɛnɛ bɛɛnnɛ turu, Simɔ gɛɛbɛin gɔi sɛgɛraa, Yesu baga jai gɔ paŋa le wo bɛrɛ duuraabɛin. 33Yalu Gɔlugota gɛɛɲu, tiyɛ gɔ kuu togolo yalu gɔ nɛ waaru be dɔi le, 34be Yesu bɛrɛ resɛndii ilɛ lee loo gaaru tɔgu turu lee mɔɔnaa, obaabɛin. Yesu wogɔ nɛwaan, nɔɔ ga yabalu. 35Woi baga jai nɛ pɛgaatiyaa, be sɔi womɔbe keri teŋaa, gamalaabɛin. 36Kɔɔ onu nɛ, be baga jai doɲu gɔ nɛ dɛinyaan, Yesui dɔmiyaan gɛlɛbɛin. 37Baga jai kuu gɔ nɛ, Yesui sɔɔ dɛi pɛgin tɔŋaa bojaa yasɛbɛin: “Inɛ ɔn, Yesui. Wo Yahutunw ɔgɔnɛi.” 38Yesu waaru pɛgin le tebutɛbɛnw lɛi kanran pɛgaabɛin. Turu numɔ iin womɔ sibɛ go bee. Lɛiye gɔ numɔ nana womɔ sibɛ go bee. 39Inɛw oju galanw kuu jigemaa ye, Yesui duyɔubɛin. 40Be ɔn gin’ wo le gɛɛbɛin: «U inɛ Ama Ginrun Diyɛ gɔ damati ye, bai taanu logoro nɛ ujɔ bɛbɛɛdou gɛɛube gɔ, kuu uwɔ yaba. Ui Ama Aini biyaai ye, baga jai kuu nɛ wɛɛ sugo.» 41Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee, Yahutunw inɛw naw gɔbe lee, be kanran, Yesui yamurinyɛnmɔu, ɔn gin’ gɛɛbɛin: 42«Yɛnɛi! Wo inɛwin yabaa, kuu womɔ yabu bɛɛlɛ. Wo unruin Isɛrɛlu ɔgɔnɛi gɛɛjɛ. Aiwa! Nɛɛ, kɔɔi ye, baga jai kuu nɛ wɛɛ wo sugomɔ. Kunrin, emɛ wo le gagawadɛin. 43Wo Ama le diyɛ womɔ daanaabe. Iyaa unruin Ama Aini gi. Nɛɛ, koi ye Ama woi ibɛɛ wɔɔ ye, woi wo yabamɔ.» 44Tebutɛbɛnw Yesu genɛ nɛ bɛin gɔbe kanran, inɛw wajunw gin’, Yesu le sɔɔ mɔɲu mɔɲu sɔɔubɛin. 45Nɛɛ naitege gowaa, digɛnai lɛɛrɛ taanu waaru yai dɔɔ baa, gana puu ɔlɔi biyaabe. 46Lɛɛrɛ taanu waaru gɔ le gin’, Yesu ɛɛnnaa ɔn gin’ gi: «Eli, Eli, lɛma sabakutani.» Tiyɛ gɔ Ama ma, Ama ma, inge dɛi ɔn gin’ mui pajaajɛu? 47Yesu kɔɔ gin’ gɛɛu wo wɔu, inɛw kɔɔ nɛ bɛin gamuu ɛgaa, kijɛ be gi: «Inɛ ɔn wo inɛ Ama titiyainɛ Elii boonɔuwɔ koi!» 48Inɛ turu logoro bemɛ nɛ jɔbaa yaa kijɛ turu resɛndii ilɛ aaun nɛ sowaa, wogɔ bagi pala nɛ pagaa, Yesu womaa nɔɔ ga wo bɛrɛ dɛɛraabe. 49Kaa inɛw wajunw gɔbe wogɔ baŋa le ɔn gin’ sɔɔubɛin: «Dɔmiyɛn! Eli woi yabai wɛwɛɛdo ma emɛ dɔmi yɛnɛmɔi.» 50Yesu iyaa, mii ɛɛn le kɔun kɔnwaantiyaa, kinrun goi. 51Kɔɔ waaru le Ama Ginrun Diyɛ gɔ nɛ kɛju sɔi gɔ daa gɔ nɛ tɔlaa, doɲu yai dɔɔ, logoro gɔ nɛ tee kaaraai. Minɛ ɛjii jigaa, dumɔ gɔbe kaabɛin. 52Ɔnsain gɔbe kanran pinɛlaa, inɛw pɔɔlɔ Ama le gawaabɛin gɔbe joo bulaa 53ɔnsain bemɛ nɛ gowaabɛin. Yesu bulaa wo kanran, inɛw wogɔbe ana Ama dɛi dɛiin wɔɔ Jerusalɛmu kɔlɔ nɛ yowaa, inɛw joo be wooi sɛgɛraabe. 54Sɔludasu suŋu kuu baŋa gɔ lee, sɔludasu unrunw baga jai doɲu nɛ bɛin gɔbe lee, minɛjigu gɔ lee, sɔɔ waja bii gɔ lee puu iyaa ɛjii liyaa, kijɛ be gɛɛbe: «Inɛ ɔn naran go Ama Aini bee.» 55Yaanw joo kanran, wagee iŋiyaan sɔɔ bii gɔ yɛnɛubɛin. Yesu, Galile gana nɛ waaru wo goi le baa, yaanw wogɔbe onu womɔ nɛ dimiyaan woi baraubɛin. 56Yaanw wogɔbe logoro nɛ Mari Magudala ana bɛɛnnɛ gɔ lee, Mari, Jake lee Josɛpu lee na gɔ lee, iyaa, Sebede unrunw na gɔ lee yatobɛin. 57Digɛnai, Arimate ainɛ, ɔgɔinɛ turu, boi gɔ Josɛpu gɛɛu, Pilate bɛrɛ wiyaabe. Wo kanran Yesu jaŋu ii turui bee. Wo Yesu yiun gɔ unrun bɛrɛ obu bojomɔ ga Pilate bɛrɛ wo gɛnyaan, Pilate wo bɛrɛ obo ga tɔɔraabe. 59Josɛpu, Yesu yiun gɔ jeɲaa, yegeraa, lɛn sɔi bojo kana nɛ kunaa, 60ɔnsain kana, kuu womɔ dɛi dumɔ turu nɛ wo tɔgurumu nɛ yaa boju. Yesu yiun gɔ bojaatiyaa, dumɔ diyɛ turu dunɔrɔnmaa dɔɔnaa, ɔnsain aŋa gɔ wogɔ le pinaatiyaa kɔɔ gin’ gowaa yai. 61Josɛpu waaru kɔɔbe wo kanranbe le, Mari Magudala bɛɛnnɛ gɔ lee, Mari waja gɔ lee, ɔnsain gɔ giru nɛ yadaanbɛin. 62Aga baa yaa gɔ, tiyɛ gɔ deeliye bai dɛi yeguru kunɔɲu baa yaa gɔ, Ama bɛrɛ sadagadɔɔnɔw kuu bɛɛnw gɔbe lee, Parisiɛn gɔbe lee mɔrinyaan, Pilate bɛrɛ wiyaa, wo le ɔn gin’ gin: 63«Emɛ baŋa, emɛ sɔɔ ɔn kanɛ naŋaranmaa bɛɛɲu. Ainɛ kakalu maŋanɛ kɔɔ, waaru yinwɛnlu wo bee le, unrun yinwaain ye bai taaniye gɔ bubulodo giyaabe. 64Nɛɛ, jaŋu unrunw womɔ gɔbe yai ye, yiun womɔ gunyɔnjɛi ye, inɛw bɛrɛ womaa bulaai gɛgɛɛmɔ ma emɛ liyɛuwɔin. Be kɔɔ gin’ kakalu maŋaa biyaaɲu ye, kakalu wogɔ pɔɔlɔ ainɛ gɔ kakalu maŋu gɔ dɛi mɔɲu biyɛdo. Kɔɔ sabu dɛi, sɔludasu unrunw gamuu tii ye, bai taanu gin’ ɔnsain gɔ dɔmiyɛun jaain wɔɔ.» 65Pilate be le saa: «Aiwa! Sɔludasu unrunw domudɔmiyɛnw kowɔin. Ɔnsain gɔ bana ɛjii dɔmiyɛnmu e ibɛ gin’ be dɔmiyɛnmɔi.» 66Be yaa, ɔnsain aŋa pinugu gɔ yegeraa, sɛɛrɛ kunaa, sɔludasu unrunw gɔbe wogɔ nɛ dɔmɔraan yinpajin.

will be added

X\