MATIU 26

1Yesu sɔɔ kɔɔbe puu sɔwaa kilaa, jaŋu unrunw womɔ le kijɛ wo gi: 2«Taŋagalu janwan gɔ bai lɛi waju ga e igii wɔi. Nɛɛ, Inɛ Aini gɔ, numɔ nɛ kunɔ ye, baga jai nɛ pɛgɛ ye dadaadɛin.» 3Yahutunw inɛw naw gɔbe lee, Ama bɛrɛ sadagadɔɔnɔw kuu bɛɛnw gɔbe lee, be kanran, badu dɛinyaan, baŋi ye, Yesui ai ye daadɛin ga aaraabɛin. Badu gɔ Ama bɛrɛ sadagadɔɔnɔnɛ kuu baŋa gɔ, Kayipe ginrun nɛ bii. 5Kijɛ be gɛɛbe: «Emɛ Yesui ahaadɛin kanran, janwan waaru gɔ le woi aamɔnɔugin. Kɔɔi laa ye, mɔɔnu gɔ emɛ dɛi ihingeledo.» 6Yesu, Betani ana nɛ, Simɔ nɛwɛnginɛ ginrun nɛ tobe. 7Yaanran turu, alubatere tɔɲɔ, lajukɔrɔ dɔnrun gaa le joo gɛliyaa, Yesu genɛ nɛ dɔwaabe. Yesu, jaa kuu nɛ wo daaun, wo lajukɔrɔ kɔɔ kuu womɔ nɛ togaa kɔɔraabe. 8Waaru jaŋu unrunw gɔbe kɔɔ be iyi le, kinɛ banranmaa, ɔn gin’ gɛɛbɛin: «Ɔn gin’ yanwan tɛbu gɔ, ingei? 9Lajukɔrɔ ɔn dɔnraan ye buudu diyɛi. Nɛɛ lajukɔrɔ gɔ dɔnrɔn ye, buudu gɔ naugunw bɛrɛ gamulu bɛɛmɔbele ma?» 10Yesu, be kɔɔ gin’ sɔɔubɛin ga jugaa, be le kijɛ wo gi: «E inge dɛi yaanran gɔ kinɛ jinwɛnmɔuwɔi? Kijɛ wo kanrun gɔ, wo mu sibɛ go birɛ ɛjui biru. 11Naugunw bai puu e le kowɔin, kaa, mu bai puu e le kobiyɛidolɔn. 12Yaanran gɔ, kuu ma nɛ lajukɔrɔ togaa wo kɔɔru gɔ, yiun ma bojoidɛin dɛi kanrun. 13Mu naran go e bɛrɛ tagauwɔn, aduna sibɛ nai nɛ, yalu Kibɛru Ɛju ɔn tagaidɛin wooi nɛ, yaanran ɔn kijɛ kanrun gɔ yaa sɔsɔɔdɛin. Kɔɔ gin’ inɛw woi naŋaidenɛ.» 14Yesu jaŋu unrunw pɛli lɛisigɛ gɔbe nɛ turu Judasu Isukariɔte gɔ, Ama bɛrɛ sadagadɔɔnɔw kuu bɛɛnw gɔbei wiyaa tɛmaa, 15ɔn gin’ be le gi: «Yesui numɔ ebe nɛ mu kunɔ ye, e kijɛ inge mu bɛrɛ obodei?» Be sarudu buudu pɛtaanu lugaa, numɔ womɔ nɛ kuni. 16Buudu gɔ wo bɛi onu nɛ, Judasu Yesui numɔ bemɛ nɛ bana wo kunɔido dɛnɛube. 17Buru kijɛ pidemu tolo janwan bai pɔlɔ gɔ, Yesu jaŋu unrunw gɔbe genɛ womɔ nɛ dɔwaa wo le ɔn gin’ gin: «Taŋagalu pana gɔ u emaa yalu yagɔ nɛ yegere ga ibɛu?» 18Yesu aŋa bemɛ saa: «Ana kɔlɔ nɛ ainɛ kɔɔ mɔ nɛ yaai. Womaa jaŋudeerenɛ waaru unrunmɔ dɔwaai gi wa. Unrun lee, jaŋu unrunw unrunmɔ lee, Taŋagalu pana ginrun womɔ nɛ kayadɛin gi wa.» 19Jaŋu unrunw gɔbe Yesu bana Tɔɔru gin’, yaa, Taŋagalu pana yeguru puu yegeraabɛin. 20Digɛ wo digiyaa, Yesu lee, jaŋu unrunw pɛli lɛisigɛ gɔbe lee, jaa kaya ga dɛinyaanbɛin. 21Pana kayau daaun, Yesu gowaa ɔn gin’ be le sɔi: «Mu naran go e bɛrɛ tagauwɔn, logoro ebe nɛ inɛ turu mui numɔ nɛ kukunɔdo.» 22Yesu kɔɔ gin’ wo giyaa, jaŋu unrunw gɔbe kinɛ bemɛ ɛjii jinwaanbe. Be inɛ tuturu puu ɔn gin’ Yesu le gɛɛubɛin: «Inɛw Baŋa, mui kai laa woi laa?» 23Yesu saa: «Inɛ mui numɔ nɛ kunɔido gɔ, baɲa nɛ kubɔ tunmɔ mu le numɔ kunɔu wɔɔ gɔi. 24Inɛ Aini gɔ, Ama Dɔn nɛ, pɔɔlɔ baa bana wo dɛi tɔŋaaɲu gin’, waajibi wo yiyinwɛndo. Kaa, inɛ, woi numɔ nɛ kunɔido gɔ bɔnrɔn wo le yɔɔ. Wogɔ baŋa woi naranla wo bɛrɛ ire biyɛdo.» 25Judasu, Yesui numɔ nɛ kunɔdo ga yegereube gɔ saa: «Jaŋudeerenɛ, mui kai laa woi laa?» Yesu saa: «Wogɔ u gi.» 26Jaa kayau wɔu, Yesu buru jeɲaa, Amai birɛpoo tagaatiyaa, buru gɔ kabalaa, jaŋu unrunw womɔi obou, ɔn gin’ be le gi: «Ɔn goju mai, yabu ye kayai.» 27Kɔɔ onu nɛ Yesu resɛndii ilɛ gɔ jeɲaa, Amai birɛpoo tagaatiyaa, jaŋu unrunw gɔbei obu. Wo ɔn gin’ be le gi: «Yabu ye e wooi puu nɔɔi. 28Sabu ɔn ili mai, aaru ilii, inɛw joo hakɛ yaabu kanran ga ili togi gɔ woi. 29Mu e bɛrɛ tagauwɔn, iye galaai ye, mu Ba Ama diinɛ gɔ nɛ resɛndii ilɛ kana e le mu nɔɔido bai yai dɔɔ baa, mu waja resɛndii ilɛ ɔn asuu nɔɔidolɔn.» 30Kɔɔ onu nɛ be Ama Sɔmu nii niyaantiyaa, Oliwe tetemɛ go yain. 31Yesu, jaŋu unrunw gɔbe le kijɛ gi: «Iye digɛ, e puu mui pajati ye jɔbɔ yaadei. Sabu Ama Dɔn nɛ tɔŋaaɲu: “Mu pejugirɛnɛ gɔi dadaadɔn, peju kilɛ gɔ giginɛdo.” 32Kaa waaru mu bulaajɛ, mu giru ebe nɛ Galile gana nɛ yayaadɔn.» 33Kaa, Piɛru wo le saa: «Jaŋu unrunw wajunw gɔbe ui pajaatin kanran, mu asuu ui pajaidolɔn.» 34Yesu, aŋa womɔ saa: «Mu naran go u bɛrɛ tagauwɔn, iye digɛ tee, ɛɲɛ kɔnwɔnmɔ nɛ, u kubɔ taanu mui inɛɛu gɛgɛɛdou.» 35Piɛru, Yesu le kijɛ gi: «Halu kinrun mai goodo kanran, mu ui inɔn ga asuu gɛɛidolɔn.» Jaŋu unrunw wajunw gɔbe kanran, kunrin gin. 36Yesu, jaŋu unrunw womɔ le Jɛtisemanɛ yalu gɛɛɲu gɔ nɛ yai. Wo be le ɔn gin’ sɔi: «Ɔn nɛ dɛinyɛin. Mu gaila kɔɔ nɛ goi ye Ama gɛɛndɔn.» 37Kɔɔ gin’, wo Piɛru lee, Sebede unrunw lɛi gɔbe lee dimɛraan yaaube. Kinɛ womɔ saii jinwɛin tɔlaabe. Wo bɛrɛ saii nawin biyɛi tɔlaabe. 38Kɔɔ dɛi, wo jaŋu unrunw taanu gɔbe le ɔn gin’ gi: «Kinɛ ma jinwaan, yinwɛnluin laa ye, mu bɛrɛ kijɛ waju wɔlɔ. Ɔn nɛ biyɛi, mu dɛi mainiyaanjɛi ye, giri yeiyenɔugi.» 39Wo dagaa dɔraa gowaa, numaa sugaa, girupala minɛ nɛ dujaa, ɔn gin’ Ama gɛin: «Mu Ba, kanran bɛbɛɛmɔjɛ biyaa ye, ɔɲɛ ɔn mu le wo wageniyɛnmu. Kaa, diŋɛ uwɔ gɔi laa ye, diŋɛ ma biyɛmɔnɔu.» 40Jaŋu unrunw taanu gɔbe bɛrɛ pilemaa wo wiyaa, giri yeiyaa be wɔu tɛmu. Piɛru le ɔn gin’ gi: «Aiwa, e lɛɛrɛ turu sai kanran giri yeiyelu go mu le bariyaa bɛɛli ma? 41Ebaa subɔrɔ waaru le numɔnɔu ga, giri yeiyelu kanraan ye, Ama gɛɛnnu biyɛi. Adama ii kinɛ womɔ nɛ birɛ ɛju birɛ ibɛɛ wɔɔ. Kaa wogɔ kanran ga wo gɔnrɔn sɛlɛ.» 42Yesu iyaa kubɔ lɛiye gɔ dɔraa gowaa, ɔn gin’ Ama gɛin: «Mu Ba, ɔɲɛ ɔn mu bɛrɛ dɔɔmɔnɔu ga kanran bɛɛmɔɔlɛ ye, diŋɛ uwɔ biyɛmɔ.» 43Pilemaa wiyaa, wo jaŋu unrunw gɔbe giri yeiyaa be wɔu tɛmu. Jaŋu unrunw gɔbe giri bemɛ numɔ le gɛlɛbɛin. 44Yesu bei pajaatiyaa, kubɔ taaniye gɔ dɔraa gowaa, amagɛɛn tunmɔ gɔ gɛnyaanbe. 45Kɔɔ onu nɛ, pilemaa jaŋu unrunw womɔ bɛrɛ wiyaa, be le ɔn gin’ gi: «E nimɛ kanran giri yeiyeu, ei deeliyemɔuwɔi ma? Aiwa! Inɛ Aini gɔi, inɛw mɔɲu numɔ nɛ kunɔidɛin waaru bɛruniyaain. 46Yɛnɛi! Kanɛ baa ainɛ mui numɔ nɛ kunɔido gɔ kowɛɛjɛ. Ingele ye yaamɔi.» 47Yesu sɔɔ sɔɔu wo wɔu, Judasu, jaŋu unrunw pɛli lɛisigɛ gɔbe logoro nɛ koturui bee gɔ, wiyaa dɔwaabe. Wo le digiyaa, mɔɔnu diyɛ, Ama bɛrɛ sadagadɔɔnɔw kuu bɛɛnw lee, Yahutunw inɛw naw lee bei tiyaa be kanran, polukaaba lee, baga lee gɛliyaa wiyaabɛin. 48Yesui numɔ nɛ kunɔido baŋa gɔ, be le aaraa, bemaa inɛ amugi ye unrun poonɔido gɔ, inɛ be aaun jaan gɔ woi ga aa gi. 49Yalu gɔ nɛ dɔɔu digɛu, Judasu, Yesu genɛ nɛ dɔwaa ɔn gin’ wo le gi: «Jaŋudeerenɛ, poo!» Woi poonaatiyaa, wo woi amugiyaabe. 50Yesu wo le ɔn gin’ sɔi: «Mu anrunge, kijɛ kanrain u wɛi gɔ kanran.» Inɛw wajunw gɔbe Yesui yaa yinhain. 51Kɔɔ waaru le, Yesu le inɛ digɛbe turu, polukaaba womɔ bɔwaa, Ama bɛrɛ sadagadɔɔnɔnɛ kuu baŋa birɛbirɛnɛ turu mɔ tɛraa, suguru gɔ jabalaa gowaai. 52Kɔɔ wo biyaa, Yesu, jaŋu ii womɔ gɔ le ɔn gin’ gi: «Polu uwɔ pilemɛ ye kɔgɔ womɔ nɛ kunɔ. Yɛnɛ! Inɛw polukaaba jeɲɛw gɔbe puu, polukaaba le bei daadɛin. 53Mu Ba bɛrɛ gɛnyaanjɔn ye, wo ɔgu kɛu mɛlɛnkɛ muɲu suŋu dɛi joo mui bara giye mu bɛrɛ tii bɛbɛɛdo ga inɛɛu ma? 54Kaa kɔɔ gin’ biyaa ye, kijɛ ɔnbe bibiyɛdɛin ga, Ama Dɔn sɔɔjɛ gɔ, yani kibedo?» 55Kɔɔ onu nɛ, Yesu, inɛw woi aai wɛin gɔbe le ɔn gin’ sɔi: «Mui aa ga, e tebutɛbɛnɛ bana aaɲu gin’ polukaaba lee, baga lee gɛliyaa wɛɛjɛi ma? Mu bai puu Ama Ginrun Diyɛ gɔ nɛ, inɛw deereu kodaanbɔn. Kaa, e mui aali. 56Kaa sɔɔ ɔnbe puu, inɛw Ama titiyaanw sɔɔ Ama Dɔn nɛ tɔŋaa too gɔ kibe dɛi bii.» Kɔɔ waaru le, jaŋu unrunw gɔbe puu Yesui pajaatiyaa, jɔbaa yain. 57Inɛw Yesui ain gɔbe, woi Ama bɛrɛ sadagadɔɔnɔnɛ kuu baŋa Kayipe mɔ nɛ jɛyaabɛin. Kɔɔ nɛ Ama tɔɔru deerenw lee, Yahutunw inɛw naw lee yamɔrɔnbɛin. 58Piɛru wagee, Yesui digiyaa, Ama bɛrɛ sadagadɔɔnɔnɛ kuu baŋa ginrun nɛ baa yai. Sɔɔ gɔ puu aŋai dogoido yɛnɛdo ga wo ginrun gonɔ gɔ nɛ yowaa, garidu gɔbe le dɛinyaanbe. 59Sadagadɔɔnɔw kuu bɛɛnw gɔbe lee, badubadanw diyɛnw gɔbe puu lee Yesui daadɛin ga sɛɛrɛ kakalu dɛnɛubɛin. 60Sɛɛrɛ kakalu goonw joo wiyaa, sɛɛrɛ bemɛ gowaabɛin. Kaa kɔɔ wooi logoro nɛ sɛɛrɛ be dɛnɛjɛ bɛɛnɛ. Dumɔrɔn gɔ, inɛw lɛi wiyaa, 61sɛɛrɛ bemɛ gowaa, inɛ ɔn womaa Ama Ginrun Diyɛ gɔ damati ye bai taanu logoro nɛ uju bɛbɛɛdɔn gi gin. 62Ama bɛrɛ sadagadɔɔnɔnɛ kuu baŋa gɔ ingelaa, Yesu le ɔn gin’ gi: «Inɛw ɔnbe u le sɔɔ gɛɛɲu gɔ u ɛgɛu wɔlɔu ma? Sɔɔ be le saaɲu sɛlɛu ma?» 63Kaa Yesu kijɛ kanma gɛɛlu. Wo Yesu le ɔn gin’ gi: «Ama ɔnmɔ gɔ dɛi emɛ bɛrɛ sɔɔ: Ama Aini gɔ ui ma? Ama Yabanɛ Diyɛ titiido gi gɔ ui ma?» 64Yesu aŋa womɔ ɔn gin’ sai: «Wogɔ u gi. Kaa, ɔn e bɛrɛ mu tagamɔi, sɔɔ ɔnbe galaain onu nɛ, Inɛ Aini gɔ, Ama, gɔnrɔn baŋa numɔ iin sibɛ nɛ wo daannu e ihiyedei. Iyaa lee alagala gowaa wo wɛɛnu, e anrankulumɔ nɛ woi ihiyedei.» 65Yesu kɔɔ gin’ wo saa, Ama bɛrɛ sadagadɔɔnɔnɛ kuu baŋa gɔ arugoi unrunmɔ aa, kaaraatiyaa, wo bɔɔnw gɔbe le ɔn gin’ gi: «Wo Ama boi yamulu sɔɔ sɔɔuwɔ. Nɛɛ kai sɛɛrɛ dɛnɛnu doori. E wooi puu Ama boi yamulu sɔɔ wo sɔi gɔ ɛgaabei. 66Nɛɛ, e wo bɛrɛ inge kanranmɔ gi?» Badubadanw diyɛnw gɔbe saa, woi daaun jaain wɔɔ gin. 67Kɔɔ onu nɛ, be kuu womɔ nɛ yuguja tɔi tiiu, numɔ kumi le woi lagaubɛin. Gamuu iyaa, mamana womɔ pejaatiyaa ye, 68wo le ɔn gin’ gɛɛubɛin: «U Ama Yabanɛ Diyɛ tii gɔ, inɛ aa ui lagu ma jugɔ bɛɛ.» 69Piɛru, Ama bɛrɛ sadagadɔɔnɔnɛ kuu baŋa ginrun gonɔ nɛ daanbe. Ginrun gɔ gunɔ yaanran turu wiyaa, wo le ɔn gin’ sɔi: «Hei! Ainɛ ɔn ui, u kanran Yesu Galile bɛɛnnɛ kɔɔ le yabeu.» 70Kaa inɛw puu giru nɛ, sɔɔ gɔ kɔri ga, Piɛru, yaanran gɔ womaa, unrun sɔɔ wo gɛɛjɛ kɔɔ, paamaalɔn gi. 71Kɔɔ onu nɛ, Piɛru ingelaa, mɔnɔgolo gooɲu sibɛ go yai. Gunɔ yaanran waja wiyaa, inɛw kɔɔ nɛ bɛin gɔbe le ɔn gin’ gi: «Ainɛ ɔn kanran, Yesu Nasarɛtu bɛɛnnɛ gɔ le yabe.» 72Piɛru iyaa pilemaa sɔɔ gɔ kɔri ga, naran go, unrun ainɛ kɔɔi inɔn gi. 73Siin wo kanran, inɛw gonɔ gɔ nɛ bɛin gɔbe genɛ womɔ nɛ dɔwaa gin: «Naran go u kanran be bɔɔnɛ turui. Sɔɔ uwɔ nɛ yalu u goi jugɔmɔuwɔ.» 74Kaa, Piɛru kuu womɔ le jɛbiyaa, naran go unrun ainɛ kɔɔi inɔn gi. Waaru wogɔ le tee ɛɲɛ kɔnwun. 75Kɔɔ waaru le, Yesu wo le sɔɔ gi gɔ wo naŋaraanbe. Yesu, womaa ɛɲɛ kɔnwɔnmɔ nɛ, kubɔ taanu unruin inɛɛ gɛgɛɛdo gi. Piɛru sɔɔ kɔɔ waaru wo naŋurun le bain go gowaa, ɛjii pii piyaabe.

will be added

X\