MATIU 24

1Kɔɔ gin’, Yesu Ama Ginrun Diyɛ gɔ nɛ gowaa yaau wo wɔu, jaŋu unrunw womɔbe genɛ womɔ nɛ dɔwaa, ginrun gɔ bana ujaaɲu wo bɛrɛ tagarai tɔlin. 2Yesu be le saa gi: «E ɔnbe puu iyeuwɔi ma? Mu naran go e bɛrɛ tagauwɔn, bai turu, ɔn nɛ tibu, tibu waja kuu nɛ wo timɛnu iyemɔidolo. Puu damatiidɛin.» 3Sɔɔ kɔɔ onu nɛ Yesu Oliwe tetemɛ nɛ yaa dɛinyin. Jaŋu unrunw gɔbe dɛiin wo bɛrɛ wiyaa ɔn gin’ selumi: «Sɔɔ kanɛ u sɔi gɔ, waaru inge le biyɛdo? Iyaa, wɛɛgu uwɔ dɔwaai ga, aduna dogogu dɔwaai ga, sɛɛrɛ inge le jugɔmɔdo ma, emɛ bɛrɛ taga.» 4Yesu saa: «Kuu ebe kajubai, inɛ turu bɛrɛ kanran ei lelemɔnɔugi. 5Inɛw joo boi ma kunɔ ye, wɛi ye, ɔn gin’ sɔɔdɛin: ‘Ama Yabanɛ Diyɛ tii gɔ mui.’ Be kunrin inɛw jooi lelelemɔdɛin. 6E kɔmɔ siɲɛ ɛhɛgɛdei. Iyaa kɔmɔ wage kibɛru ɛhɛgɛdei. Kaa sɔɔ kɔɔbe dɛi kikinu manu le biyɛnɔugi. Sɔɔ kɔɔbe biyɛ ga waajibi. Kaa aduna dogogu gɔ kɔɔ woi biyɛidolo. 7Tɔgu turu, tɔgu waja le jajaiyɛdo. Laamu, laamu waja le jajaiyɛdo. Aduna sibɛ dɛin dɛin nɛ giyɛ lee, minɛjigu lee bibiyɛdo. 8Aduna kana wɛwɛɛdo gɔ digɛu, ɔɲɛ kɔɔbe puu nɔrun dɛinyin tɔlɔgu gin’ wɔɔ. 9«Kɔɔ waaru le, ei ɔɲɔmɔ giye, numɔ nɛ ei kukunɔdɛin. Ei dadaadɛin. Boi ma le gawaa e wɔɔ gɔ dɛi, tɔgu puu ei ihibiliyɛdɛin. 10Kɔɔ waaru le, inɛw joo gagawu bemɛ papajadɛin. Be tunmɔi jajamadɛin. Tunmɔ ihibiliyɛdɛin. 11Inɛw titiyaanw kakalugunw joo ihiyemɔdo. Be inɛw jooi lelelemɔdɛin. 12Mɔmɔɲu ɛjii nanarinyɛndo gɔ digɛu, inɛw joo ihibɛ kakaaliyɛdo. 13Kaa dumɔ gɔ baa inɛ ɛɛn go iŋiyaanjɛ gɔi, yayabadɛin. 14Iyaa, alagala diinɛ Kibɛru Ɛju sɔɔ ɔn, tɔgu puu ɛgɛ bɛɛ ga, aduna kale wooi nɛ tatagadɛin. Kɔɔ onu nɛ aduna dodogodo. 15«Bai turu, inɛ Ama titiyainɛ Daniɛlu kijɛ dɛi sɔɔube gɔ, kijɛ mɔɲu yanwan diyɛ jɛɛlɛjɛ gɔ, Ama Ginrun Diyɛ gɔ kɔlɔ nɛ, bobojodɛin.» Sɔɔ kɔɔ jaŋanɛ baŋa gɔ ɛjii paamu kanran. 16«Wogɔ iyaajɛi ye, Judea gana nɛ inɛw toin gɔbe, be jɔbɔ ye, kokoobe sibɛ go be yaaun jaain wɔɔ. 17Sɔɔ kɔɔ dala nɛ ui tɛmu ye, sugo ye, ginrun kɔlɔ nɛ kijɛ jeɲɛ ye jɔbɔdɔn gɛɛnɔu. 18Olu nɛ ui tɛmu ye, ginrun pilemɛ wɛɛ ye, arugoi diyɛ jeɲɛ ye, jɔbɔdɔn gɛɛnɔu. 19Bai kɔɔbe le, yabɛrɛgunw lee, yaanw unrunw aramɔw lee bɛrɛ mɔɲi biyɛdo. 20Bai kɔɔbe ɔɲɛ gɔ, aduna mɔii nɛ gowaa iye wɛɛ dɔɔ ɔɲɛ puu dɛi mɔɲu biyɛdo. Kɔɔ tunmɔ yaa asuu biyɛidolo. Kɔɔ dɛi jobu bai gɔ kaali waaru le ma, deeliye bai le ma biyɛnɔu giye, Ama gɛɛin. 22Ama, ɔɲɛ kɔɔbe bai gamalu bee ye, inɛ turu kinrun kanran ɛliyɛbele. Kaa, inɛw wo yɛmu gɔbe sabu dɛi wo bai gɔ gamaati. 23«Nɛɛ inɛ uwaa, Ama Yabanɛ Diyɛ tii gɔ ɔn nɛ yɔɔ ma, kɔɔ nɛ yɔɔ ma giyaajɛ ye, yabanɔu. 24Sabu inɛw yabanw kakalugunw lee, inɛw titiyaanw kakalugunw lee wɛwɛɛdɛin. Inɛwin lelemɔ ga sɛɛrɛ taanrinyɛn lee, yarabirɛ lee joo kanrun ye, tatagaradɛin. Be, kanrun bɛbɛɛbɛin ye, Ama inɛw yɛmaajɛ gɔbei yaa lelelemɔdɛin. 25Keŋiyɛin! Kanɛ baa sɔɔ kɔɔbe e bɛrɛ tagaaginaa wɔun. 26«Kɔɔ sabu dɛi, inɛ turu e bɛrɛ sɔwaa, ‘Yɛnɛi! Wo olusolo go yɔɔ’ giyaajɛ ye, yaanɔugi. ‘Yɛnɛi! Wo deun giru ɔn nɛ yato’ giyaajɛ ye, gawanɔugi. 27Anrangiriyenu duu goi ye, ɔgu kɛu dudaga baa bana wo yaajɛ gin’, Inɛ Aini wɛɛgu gɔ kɔɔ gin’ biyɛdo. 28Yalu inge nɛi kanran, kijɛ yiun yadiin ye, waajibi dubɔbe kɔɔ nɛ mɔmɔrinyɛndɛin.» 29«Bai kɔɔbe ɔɲɛ galanu wo digɛnu, nai dooriyeidolo. Iyepilu wijɛ womɔ oboidolo. Tolo gɔbe alagala goi ye babagadɛin. Alagala kijɛ paŋagunw gɔbe puu jijigedɛin. 30«Kɔɔ waaru le, Inɛ Aini sɛɛrɛ gɔ alagala nɛ ihiyemɔdo. Kɔɔ waaru le, tɔgu puu sɔsɔmiyɛndɛin. Inɛ Aini gɔ, anrankulumɔ nɛ gɔnrɔn lee, dooro diyɛ lee le, wo wɛɛnu, ihiyemɔdo. 31Wo mɛlɛnkɛ womɔbei kaan mii diyɛ le aduna sibɛ nai puu nɛ titiido. Be inɛw wo yɛmaajɛ gɔbei, aduna sibɛ turu nɛ goo ye, sibɛ waja nɛ dɔɔ mɔmɔɔnɔdɛin. 32«Gaa na bana gɔ paamu kanrain: Numɔ ii womɔbe liyɛ dɔgɔi tɔlaain ye, jinrɛn dɔwaai ga e igii wɔi. 33Kɔɔ bana wɔɔ gin’, sɔɔ kɔɔbe puu waaru e iyaajɛ, Inɛ Aini gɔ wɛɛgu womɔ bɛrii wɔɔ, wo mɔnɔgolo nɛ dɔwaai ga jugɔi. 34Mu naran go e bɛrɛ tagauwɔn, iye inɛw gɔbe logoro nɛ, gamuu, be yinwɛnmɔ nɛ, sɔɔ kɔɔbe puu bibiyɛdo. 35Alagala lee, minɛ lee gagaladɛin, kaa sɔɔ mabe asuu galaidenɛ.» 36«Kaa, sɔɔ kɔɔbe bai wɛɛido gɔ ma, lɛɛrɛ gɔ ma, inɛ turu kanran inɛɛ. Mɛlɛnkɛbe kanran inin. Halu Aini gɔ kanran inɛɛ. Ba Ama turu sai igu. 37Nɔwe waaru le bana bii gin’, Inɛ Aini gɔ, wɛɛgu womɔ le kɔɔ gin’ tee biyɛdo. 38Dii diyɛ gɔ wɛɛmɔ nɛ, inɛw jaa kayaubɛin, dii nɔɔubɛin, puru pagaubɛin, unrunw yaanw bemɛ igɛ oboubɛin. Kɔɔ gin’ kanraun be wɔu, Nɔwe, diikoro diyɛ gɔ nɛ wo yoi bai wiyaa dɔi. 39Soo sɛlɛ be wɔu, dii diyɛ wiyaa be wooi suyaati. Inɛ Aini gɔ, waaru wo wɛɛido le yaa kɔɔ gin’ biyɛdo. 40Kɔɔ gin’, anranw lɛi olu nɛ be wɔnu, turu jeɲɛ ye, turu papajadɛin. 41Yaanw lɛi yalu dɛnrɛn nawanɲu nɛ be wɔnu, turu jeɲɛ ye, turu papajadɛin. 42Kɔɔ sabu dɛi giri yeiyenɔugi. Inɛw Baŋa ebe waaru wɛɛido gɔ, e inin. 43Iyaa e igii biyɛi: Ginrun baŋa, gugunyɔnnɛ, ginrun womɔ nɛ digɛ waaru inge le wɛɛdo ma igii bee ye, giri yeiyebele. Wo gugunyɔnnɛ gɔi pajaa ye ginrun unrunmɔ tɔgɔrɔmɔbele. 44Kɔɔ dɛi, e kanran, waaru wooi yeguru le biyɛi. Sabu Inɛ Aini gɔ, lɛɛrɛ ajubaa sɛlɛ e wɔɔ gɔ le wɛɛdo.» 45«Nɛɛ, birɛbirɛnɛ sɔɔ turu baŋa, hakilɛ sɛɛ gɔ aai? Inɛ wogɔ waaru jaan gɔ le birɛbirɛnw wajunw gɔbe pana tɔɔ ga, wo baŋa sagu bemɛ wo bɛrɛ gawarado. 46Birɛbirɛnɛ wogɔ, kɔɔ gin’ birɛ womɔ nɛ sɛɛu wo tonu, wo baŋa wiyaa tɛmaa ye, Ama wo yabu. 47Mu naran go e bɛrɛ tagauwɔn, ginrun baŋa gɔ, kijɛ unrunmɔ puu wo bɛrɛ gagawarado. 48Kaa, birɛbirɛnɛ mɔɲui ye, kinɛ womɔ nɛ unrun baŋa tanwaain ga ajubaa, 49wo birɛbirɛnw wo bɔɔnw gɔbei lagai tɔlaajɛ ye, iyaa kɔɲɔnɔɔw le mɔrin ye jaa kayanu, kɔɲɔ nɔɔnu kanrannu biyɛjɛ ye, 50bai turu soo sɛlɛ womɔ nɛ lɛɛrɛ ajubaa sɛlɛ wo wɔɔ le wo baŋa wɛwɛɛdo. 51Wo bɔnrɔn diyɛ wo bɛrɛ ihiyemɔdo. Iyaa wo inɛw aŋa lɛilɛigunw gɔbe le mɔɔnu ye woi tujɔdo. Pii lee, tɔnrɔn tɛnwun lee, yalu kɔɔ nɛ biyɛdo.»

will be added

X\