MATIU 23

1Kɔɔ puu onu nɛ, Yesu, inɛw mɔrinyaan wɔin gɔbe lee, jaŋu unrunw womɔbe lee bɛrɛ ɔn gin’ sɔi: 2«Ama tɔɔru deerenw gɔbe lee, Parisiɛnbe lee, Mɔise tɔɔru tɔŋu gɔ tiyɛ taga ga be sagi. 3Sɔɔ be gɛɛjɛ puu dimi ye e kanraun jaain wɔɔ. Kaa, e kubɔnami bemɛ turu kanran namanɔugi. Sabu be sɔɔ bemɛ le kɛukɛu yoi yaau wɔnɛ. Be dɔɔ demɛ demɛ pagu ye inɛw kuu nɛ duduurɔɲu. 4Be, tɔɔru kɔɔbe, dɔɔ demɛ gin’ inɛw wajunw kuu nɛ duduurɔɲu. Kaa be inɛwin bara ga, kuu bemɛ le dɔɔ gɔbe halu numɔ ii le kanran tabaanɛ. 5Kijɛ be kanranjɛ wooi nɛ, inɛw bemaa unrunbei iyaa ye, unrunbei sɔmɔ dɛi kanranɲu. Wogɔ digɛu, didimɛ bemɛ lee, numɔ bemɛ lee nɛ, Ama sɔɔ totoo dagi le be pagajɛ gɔ, inɛw wajunw mɔ dɛi poo bojoɲu. Iyaa, Ama tɔɔru naŋaranmɔ dɛi, arugoi kinrun nɛ kijɛ jeleɲu gɔ, Parisiɛnbe kijɛ wogɔ kijɛ pala le jeleɲu. 6Jaa diyɛ yalu nɛ bei boonaa ye, be inɛw diyɛnw yalu nɛ dɛinyin dɛnɛɲu. Iyaa, Ama gɛɛn ginrun nɛ yalu inɛw bei iyeɲu nɛ dɛinyin dɛnɛɲu. 7Iyaa taibe nɛ, inɛw bei poonɔ ga be bɛrɛ saii ɛjii wɔɔ. Unrunbei jaŋudeerenɛ boonɔ ga be bɛrɛ ɛjii wɔɔ. 8E kai, e puu ba unrunwin, iyaa e jaŋudeerenɛ turu sai sɛi digɛu, inɛw ei jaŋudeerenɛ boonɔ ga yabanɔugi. 9E, Ba turu sai sɛi. Wogɔ alagala nɛ daan. Kɔɔ dɛi, inɛ turu kanran e bai gɛɛnɔugi. 10E Kuu Baŋa turu sai sɛi, wogɔ Ama Yabanɛ Diyɛ tii gɔ woi. Kɔɔ digɛu, inɛ ei kuu baŋa boonɔ ga yabanɔugi. 11Logoro ebe nɛ, inɛ diyɛnɛ gɔ wajunw birɛbirɛnɛi wo biyɛun jaan. 12Inɛ kuu unrunmɔ unɔjɛ gɔ, kuu womɔ susunugodɛin. Iyaa, inɛ kuu unrunmɔ sunugojɛ gɔ, kuu womɔ uhunɔdɛin.» 13«Aŋa lɛilɛigunw, Ama tɔɔru deerenw gɔbe lee, Parisiɛn gɔbe lee, bɔnrɔn e le yɔɔ. Alagala diinɛ nɛ yoo ga, e inɛwin tɛŋɛuwɔi. E kuu ebe le yooidelei, iyaa inɛw yoi ibɛɛ wɔin gɔbe bɛrɛ yaa yoomɔɔlɛi. [ 14«Aŋa lɛilɛigunw, Ama tɔɔru deerenw gɔbe lee, Parisiɛn gɔbe lee, bɔnrɔn e le yɔɔ. Yapanuw kijɛ sɛɛ puu ɛlɛjɛɛjɛi. Kaa, ei inɛw ɛjubei tagaradei giye, amagɛɛn pala pala gɛɛnjɛi. Sɔɔ kɔɔ sabu dɛi e tujɔ mɔɲu e le jaan gɔ bɛbɛɛdei.] 15«Aŋa lɛilɛigunw, Ama tɔɔru deerenw gɔbe lee, Parisiɛn gɔbe lee, bɔnrɔn e le yɔɔ. Inɛ turu sai tubiyemɔdei giye, e minɛ lee, nɛudii nɛ lee yaauwɔi. Kaa waaru inɛ gɔi e tubiyemaajɛ, kubɔ lɛi e dɛi sigɛ yaun asuu yinwɛɛnlɛ gɔ panai biyɛmɔjɛi. 16«E inɛw teeremɔw girumuw gɔbe, bɔnrɔn e le yɔɔ. E, inɛ aai kanran, Ama Ginrun Diyɛ gɔ le jɛbiyaa, saba sabaajɛ ye, e wogɔ lugo nɛ tolo gɛɛjɛi. Kaa Ama Ginrun Diyɛ gɔ nɛ kange too gɔ le jɛbiyaa, inɛ saba lagaajɛ, kɔɔbaŋa bɛrɛ kijɛ dɛi saba wo sabu gɔ kanraun jaain wɔɔ gɛɛjɛi. 17E sɔɔ kanma inin, ei girumuwin. Kange gɔ, Ama Ginrun Diyɛ gɔ nɛ too gɔ dɛi, Ama dɛi woi dɛiin wɔɔ woi laa? Kɔɔi ye, kange gɔ lee, Ama Ginrun Diyɛ gɔ lee yagɔ diyɛi? 18Iyaa, kijɛ e gɛɛjɛ: Inɛ aai kanran sadagadumu gɔ le jɛbiyaa, saba lagaajɛ ye, wogɔ lugo nɛ tolo gɛɛjɛi. Kaa dumu gɔ nɛ sadaga jɛɛlaaɲu gɔ le, inɛ jɛbiyaa, saba lagaajɛ, baŋa kijɛ dɛi saba wo sabu gɔ kanraun jaain wɔɔ gɛɛjɛi. 19Ei girumuwin! Sadaga gɔ dumu gɔ nɛ wo diin dɛi, Ama dɛi dɛiin wɔɔ woi laa? Kɔɔi ye, sadaga gɔ lee dumu gɔ lee yagɔ diyɛi? 20Aiwa! Kɔɔ sabu dɛi, inɛ aai kanran sadagadumu gɔ le jɛbiyaa, saba lagaajɛ ye, wo dumu gɔ turu sai le jɛbiyɛlu. Kaa kuu womɔ nɛ kijɛ diin puu le yaa jɛbiyaati. 21Iyaa, inɛ aai kanran Ama Ginrun Diyɛ gɔ le jɛbiyaa saba lagaajɛ ye, wo Ama Ginrun gɔ le sai jɛbiyɛlu. Kaa Ama, Ginrun gɔ nɛ yato gɔ digɛu, baŋa, Ama le yaa jɛbiyaati. 22Iyaa, inɛ aai kanran, alagala le jɛbiyaajɛ ye, baŋa Ama ɔgɔdɔin le jɛbiyaati. Iyaa, ɔgɔdɔin gɔ nɛ daan baŋa gɔ le yaa jɛbiyaati. 23«Aŋa lɛilɛigunw, Ama tɔɔru deerenw gɔbe lee, Parisiɛn gɔbe lee, bɔnrɔn e le yɔɔ. Yɛnɛi! E, halu nanaye lee, sadiŋɛ dɔgɔ uji uji kayɛrɛ nɛ e kunɔjɛ gɔbe lee, e jaka bemɛ gogoonɔjɛi. Kaa, Tɔɔru gɔ nɛ, naran le saliyɛ kire lee, amasɔgɔjugɔ siyɛ lee, sɔɔ turu baŋa bii lee, sɔɔ sigɛ le maa kɔɔbe e pajaati. Kaa jaka goonu gɔ pajalu go, kijɛ sigɛ le kanraun jaain bee gɔbe bei. 24E inɛw teeremɔw girumuwin. Dii nɛ susuu uji uji toin gɔbe, sɛjɛ goonɔtiijɛi. Kaa ɔgɔyɔn koi mirɛnjɛi. 25«Aŋa lɛilɛigunw, Ama tɔɔru deerenw gɔbe lee, Parisiɛn gɔbe lee, bɔnrɔn e le yɔɔ. E diikɔrɔi ebe lee, baɲa ebe lee, bain go mɔŋaa ɛjɛmaa wɔi. Kaa kɔlɔ bemɛ nɛ nabara kijɛ lee, dadaaru mɔɲu ebe dɛi kijɛ e biyaajɛ lee, wogɔbe le jowaa wɔɔ. 26Parisiɛn giruminɛ! Diikɔrɔi kɔlɔ gɔ laa mɔŋɔ. Wogɔ biyaai ye bain gɔ ɛhɛjɛdo. 27«Aŋa lɛilɛigunw, Ama tɔɔru deerenw gɔbe lee, Parisiɛn gɔbe lee, bɔnrɔn e le yɔɔ. Bana ebe lee, ɔnsain pilu paraaɲu lee, murin wɔɔ. Bain go ɛjii wɔɔ. Kaa, kɔlɔ go, inɛ yiun kii lee, kijɛ lɔgɔgu dɛin dɛin lee le jowaa wɔɔ. 28E kanran, kɔɔ gin’ wɔi. Bain go yɛnaa ye, ei inɛw giru nɛ inɛw teitaibei. Kaa kinɛ ebe nɛ, e sɔɔ lɛi lɛi sɔi lee, mɔɲu lee le jowaa wɔi.» 29«Aŋa lɛilɛigunw, Ama tɔɔru deerenw gɔbe lee, Parisiɛn gɔbe lee, bɔnrɔn e le yɔɔ. E pɔɔlɔ inɛw Ama titiyaanw ɔnsain gɔbe ujɔuwɔi. Iyaa, inɛw teitai ɔnsain gɔbe saŋaraunwɔi. 30Kɔɔ gin’ kanraantiyaa ye, e ɔn gin’ sɔɔjɛi: ‘Emɛ, emɛ tirɛ anranw waaru le yabɛin ye, emɛ be le mɔrin ye, inɛw Ama titiyaanw gɔbe daabenɛ.’ 31Kɔɔ gin’ e kuu ebe le ei inɛw Ama titiyaanw daanw gɔbe tirɛ unrunwin ga e jugaa wɔi. 32Kɔɔi ye, nɛɛ, e tirɛ anranw birɛ tɔlu gɔ kibemɔi. 33Nɛɛ, kɔɔ gin’ wɔɔ ye, yaun asuu yinwɛɛnlɛ gɔ nɛ yani yoolu kanrandei? Ei yugurubei. Ei yuguru kɔkɔju tɔgui. 34Kɔɔ sabu dɛi, mu, inɛw Ama titiyaanw lee, hakilɛgunw lee, jaŋudeerenw lee, e bɛrɛ titiidɔn. Kaa, e gamuui dadaadei. Gamuui baga nɛ pɛpɛgɛdei. Gamuui, Ama gɛɛn ginrun ebe nɛ bɔɔniyɛn le lalagadei. Iyaa ana ana nɛ e bei digi ye ɔhɔɲɔmɔdei. 35Kɔɔ gin’, Abɛlu inɛ teitai gɔ nɛ gowaa, Baraki ii, Jakari nɛ wɛɛ dɔɔ, inɛw teitai ili togi gɔ puu kuu ebe nɛ sugodo. Jakari kɔɔ, Ama Ginrun Diyɛ kɔlɔ gɔ nɛ, sadagadumu gɔ le bɛrii woi daabei. 36Mu naran go e bɛrɛ tagauwɔn, inɛw teitai aa daain gɔbe puu ili gɔ e, iye inɛw ɔnbe kuu nɛ sugodo.» 37«Nɛɛ, u Jerusalɛmu, u, ana inɛw Ama titiyaanw daanɛ gɔ, Ama u bɛrɛ inɛw tii gɔbe, u ana bei tibu le kamu kamu daajɛ gɔ, waaru joo nɛ mu unrunw uwɔ gɔbei mɔɔnɔ ga dɛnaabɔn. Ɛɲɛ na, unrunw womɔ gamuju doɲu nɛ wo kunɔjɛ gin’, mu ei mɔɔnɔ ga dɛnaabɔn. Kaa, e wogɔ yabali. 38Aiwa, kɔɔi biyaa ye, ginrun ebe e bɛrɛ kooloi pajadɛin. 39Naran go, e waja “Inɛw Baŋa Ama boi le inɛ wɛɛjɛ gɔ duba wo le biyɛmɔ” e gɛɛido bai yai dɔɔ baa, e mui iyeidelei.»

will be added

X\