MATIU 22

1Yesu iyaa, inɛw woi keŋiyɛnw gɔbe bɛrɛ taanrinyɛn le sɔɔ sɔwaabe: 2«Alagala diinɛ gɔ kijɛ le murin wɔɔ gɔ unwɔ: Ɔgɔnɛ turu, ii womɔ purupagu dɛi jaa yegeraabe. 3Kɔɔ onu nɛ, wo birɛbirɛnw womɔ tiyaa, inɛw purupagu gɔ nɛ wɛɛun jaan gɔbei boonɔmaabe. Kaa, inɛw gɔbe wɛɛ ga yabanɛ. 4Ainɛ kɔɔ, inɛwin boonɔ ga birɛbirɛnw waja tiyaabe. Bemaa yaa ye ɔn gin’ gɛɛ gi: ‘Nɛɛ, e wɛɛi, purupagu jaa gɔ siraa kilaai. Mu, naa siigu mabe lee, arusɛgɛ siigu mabe lee sɛnwaantun. Kijɛ puu yegeraa kilaai. E wɛɛ ye, jaa kayai.’ 5Kaa inɛw gɔbe ɔgɔnɛ gɔ boonu mai siyɛnɛ. Inɛw gamuu, sɔɔ gɔ pajaatiyaa olu unrunbemɛ nɛ yain. Gamuu, tɔŋu bemɛ tɔŋɔi yain. 6Wajunw gɔbe ɔgɔnɛ titiyaanw gɔbei aa, ɔɲɔmaa, daabɛin. 7Ɔgɔnɛ gɔ, kinɛ banraain. Wo sɔludasu unrunmɔbe tiyaa, inɛw birɛbirɛnw womɔ daanw gɔbei aa, bei daatiyaa, ana bemɛ yaun le tɛgɛraabe. 8Kɔɔ onu nɛ, wo birɛbirɛnw womɔ le kijɛ gi: ‘Purupagu jaa gɔ siraa kilaai. Kaa, inɛw dɛi sirin gɔbe le jaanla. 9Kɔɔ dɛi, e yaa ye, ana pɔŋɔrɔn nɛ inɛ e tɛmɛido gɔ puu purupagu jaa gɔ nɛ boonu jɛɛlɛi.’ 10Birɛbirɛnw gɔbe yaa, inɛw be tɛmu puu, inɛw ɛju lee, inɛw mɔɲu lee puu boonaabɛin. Kunrin purupagu ginrun nɛ jaa kayanw joo bee. 11«Inɛw purupagu dɛi booni gɔbe jaa kayau be wɔu, ɔgɔnɛ gɔ ginrun gɔ nɛ wiyaa waaru wo yoi le, wo ainɛ turu purupagu arugoi kunɔlu wo wɔu iyaabe. 12Ɔgɔnɛ gɔ, ainɛ gɔ le ɔn gin’ sɔi: ‘Hei, mu anrunge, u yani kanraan purupagu sɔi kunɔlu go ɔn nɛ yoiu?’ Kaa, ainɛ kɔɔ sɔɔ saaun bɛɛlu. 13Kɔɔ waaru le, ɔgɔnɛ gɔ birɛbirɛnw womɔ boonaa ɔn gin’ be le gi: ‘E kubɔ womɔ lee, numɔ womɔ lee pagai. Bain go ɔlɔ nɛ woi kamu tii. Wogɔ nɛ, sɔmiyɛn lee, tɔnrɔn tɛnwun lee bibiyɛdo.’ » 14Kɔɔ onu nɛ, Yesu sɔɔ waja baraa gi: «Kunrin inɛw boonaaɲu gɔbe jooi wɔin, kaa yɛmaaɲu gɔbe gailain.» 15Parisiɛnbe tunmɔ le yaa badaa, bana Yesui sɔɔ le ai be bɛɛido dɛnaabɛin. 16Kunrin be jaŋu unrunw bemɛ lee, Ɔgɔnɛ Herɔde mɔɔnu nɛ inɛw tobɛin gɔ lee, Yesu bɛrɛ be tiyaa, inɛw tiin gɔ, Yesu le ɔn gin’ sɔin: «Jaŋudeerenɛ, emɛ igii wɔin, u inɛ naran sɔɔnɛi. Deeru uwɔ puu nɛ, u Ama oju bana dimiyɛun jaan gɔ daii deerejɛu. Inɛw puu u bɛrɛ kɛukɛu digɛu, u inɛ turu kanran giri liyaa wɔlɔu. 17Kɔɔ sabu dɛi u emɛ bɛrɛ taga, Rɔmɛ ɔgɔnɛ diyɛ gɔ bɛrɛ sɛgu emɛ tujɔun jaain wɔɔ ma jaanla?» 18Kaa Yesu, ajubu mɔɲu bemɛ jugaabe gɔ digɛu, be le kijɛ wo gi: «E inɛw aŋa lɛilɛigunw gɔbe, inge dɛi e aŋa ma dɛnɛuwɔi? 19Kɛɛlɛ le sɛgu e tujɔjɛ gɔ, mu bɛrɛ tagarai.» Be sarudu buudu turu wo bɛrɛ tagaraabɛin. 20Yesu be bɛrɛ ɔn gin’ selumu: «Buudu gɔ nɛ kuu yegeraa too gɔ lee, boi tɔŋaa wɔɔ gɔ lee, aa mɔi?» 21Inɛw gɔbe saa, Rɔmɛ ɔgɔnɛ diyɛ mɔi gin. Yesu be le kijɛ gi: «Kɔɔi biyaa ye, ɔgɔnɛ diyɛ mɔi kijɛ wɔɔ gɔ, wo bɛrɛ oboi. Kijɛ Ama mɔi wɔɔ gɔ, Ama bɛrɛ oboi.» 22Waaru sɔɔ gɔ be ɛgu le, be bɛrɛ saii maunɛ biyaabe. Be woi pajaatiyaa yain. 23Bai wogɔ tee, Saduseyɛn gamuu wiyaa Yesui tɛmi. Be yiun bubulojɛ ga gawabenɛ. Be wiyaa, Yesu bɛrɛ ɔn gin’ selumi: 24«Jaŋudeerenɛ, Mɔise kijɛ gi gɔ unwɔ: “Ainɛ turu ii bɛɛlu go yinwaain ye, wo bainɛ gɔ yapanunɛ gɔ jeɲɛ ye, ii naraan ye, inɛ yinwɛnnɛ gɔ bɛrɛ tɔgu wo tɔgɔun jaain wɔɔ.” 25Kɔɔ gin’, logoro emɛ nɛ anranw sɔi yabɛin. Nɛɛ, delenɛ gɔ yaanran jeɲaa, ii bɛɛlu wɔu yinwaan, yaanran gɔ wo suŋɔrɔn bɛrɛ pajaabe. 26Wo kanran ii bɛɛlu go yinwaain. Bainɛ taaniye baŋa mɔ yaa kunrin bii. Kɔɔ gin’, anranw sɔi gɔ puu, dinrɛn le, dinrɛn le, yapanunɛ gɔ jeɲaa, ii bɛɛlu wɔu, yinwaain. 27Be puu onu nɛ, yaanran gɔ kanran wiyaa yinwaain. 28Nɛɛ, anranw sɔi gɔ puu yaanran gɔi jeɲaabɛin gɔ digɛu, yiun bulogu bai gɔ le, woi aa yaanrain biyɛdo?» 29Kaa Yesu ɔn gin’ aŋa bemɛ sai: «E Ama Dɔn lee, Ama gɔnrɔn lee inin dɛi, ei lelu nɛ too. 30Yiun bulogu bai gɔ le, anranw lee, yaanw lee, tunmɔ jeɲɛidenɛ. Kaa, be mɛlɛnkɛ alagala nɛ wɔin gin’ biyɛdɛin. 31Nɛɛ, yiun bulogu sɔɔ gɔ dɛi, Ama, Dɔn womɔ nɛ sɔɔ e bɛrɛ wo tagu ɔn e jaŋali ma? 32“Mui Abarahamu Amai, Isaka Amai, iyaa Jakɔbu Amai.” Yesu iyaa baraa gi: «Ama, inɛw yiunbe Amai laa, kaa inɛw ɔnmɔi wɔin Amai.» 33Mɔɔnu Yesu sɔɔ ɛgɛnw gɔbe puu, deeru womɔ gɔ bei saii maunɛ biyaabe. 34Saduseyɛnbe Yesu aŋa saa bɛɛnɛ ga, Parisiɛnbe waaru be ɛgu le, be yalu turu nɛ mɔrinyaanbɛin. 35Kunrin, logoro bemɛ nɛ Ama tɔɔru deerenɛ turu Yesui subɔrɔ ga selumu ɔn wo bɛrɛ selumu: 36«Jaŋudeerenɛ, tɔɔru gɔbe logoro nɛ tɔɔru sigɛ le maa gɔ yagɔi?» 37Yesu wo le saa: ”U, Inɛw Baŋa Ama uwɔ gɔi, kinɛ uwɔ wooi le, kinrun uwɔ wooi le, hakilɛ uwɔ wooi le, ibɛi biyɛ.” 38Tɔɔru gɔbe logoro nɛ tɔɔru diyɛ gɔ lee, tɔɔru sigɛ le maa gɔ lee woi. 39Tɔɔru kɔɔ onu nɛ digɛ, wo le murin wɔɔ gɔ unwɔ: “Aŋai kuu uwɔ u ibɛ gin’, u bɔɔnɛi yaa kɔɔ gin’ ibɛi biyɛ.” 40Mɔise tɔɔru dɔn gɔ puu lee, inɛw Ama titiyaanw dɔn gɔbe lee, tɔɔru lɛi kɔɔbe le digɛin.» 41Kɔɔ onu nɛ, Yesu, Parisiɛnbe be mɔrɔun, be bɛrɛ selumu ɔn selumu: 42«E, Ama Yabanɛ Diyɛ tii gɔ dɛi yani ajubaa wɔi ma? E woi inɛ aa tiruwɛnɛi ga wɔi ma?» Parisiɛnbe saa, Ama Yabanɛ Diyɛ tii gɔ Dawide tiruwɛnɛi gin. 43Yesu pilemaa be le saa gi: «Kɔɔ narain biyaa ye, Dawide, Ama Kikinu woi damaa yani woi Inɛw Baŋa boonaa, ɔn gin’ sɔɔ sɔi: 44“Inɛw Baŋa Ama, Inɛw Baŋa ma le ɔn gin’ gi: ‘Jaŋuw uwɔ gɔbe gɔnrɔn ye, kubɔ uwɔ doɲu nɛ yai mu kunɔido baa, uwɔ numɔ iin ma sibɛ nɛ wɛɛ dɛinyɛn.’” 45Nɛɛ, Dawide woi Inɛw Baŋai gi biyaa ye, Ama Yabanɛ Diyɛ tii gɔ, Dawide tiruwɛnɛi yani bii bɛɛjɛ?» 46Inɛ turu kanran sɔɔ saa bɛɛlu. Bai kɔɔ galu nɛ, inɛ turu kanran Yesu bɛrɛ selumu wajabe selumɛ ga daariyɛlu.

will be added

X\