MATIU 21

1Yesu lee, jaŋu unrunw womɔ lee, inɛw onu bemɛ nɛ dimɛbɛin gɔbe lee, Jerusalɛmu ana le bɛrii, Bɛtupaje ana nɛ, Oliwe tetemɛ yalu gɔ nɛ waaru be dɔi le, Yesu, jaŋu unrunw womɔ lɛi giru bemɛ nɛ tiiu, 2be le ɔn gin’ sɔi: «Giru ebe nɛ ana kowɔɔ kɔɔ nɛ yaai. Kɔɔ nɛ dɔɔnu e digɛnu, jandulu yaa turu, ii womɔ le wo kɔmɔnu, e tɛtɛmɛdei. Bei kɔmɔlaajɛi ye, mu bɛrɛ jɛɛlɛi. 3Inɛ, e le kijɛ turu giyaajɛ ye, Inɛw Baŋa kai yasɛ gɛɛi. Kɔɔ giyaajɛi ye, gaanu kunɔlu go ebaa bei jɛyaa gɛgɛɛdo.» 4Sɔɔ kɔɔbe puu, inɛ Ama titiyainɛ turu sɔɔ tɔŋu ɔn kibe dɛi bii: 5“E, Siɔn ana bɛɛnw bɛrɛ tagai, bemaa, ɔgɔnɛ bemɛ bei sɛgɛrɛi yawɛɛjɛ wa. Wo, kuu unrunmɔ ɛjii sunugaa wɔɔ. Jandulu kuu nɛ ulaa, jandulu gulɔ kuu nɛ, jandulu ii kuu nɛ ulaa wɛɛuwɔ.” 6Jaŋu unrunw gɔbe gowaa, yaa, Yesu bana gi gin’ 7jandulu yaa gɔ lee, ii womɔ lee jɛɛlaabɛin. Be sɔi bemɛ jandulu gɔbe kuu nɛ jabaa, Yesu, sɔi gɔ kuu nɛ dɛinyaanbe. 8Inɛw kulɔ joo sɔi bemɛ, oju gɔ nɛ abaraubɛin. Gamuu tiun numɔ ii laraa ye, oju gɔ nɛ jabaubɛin. 9Inɛw kulɔ, Yesu giru nɛ lee, onu womɔ nɛ lee bɛin gɔbe kɔnwɔun, ɔn gin’ gɛɛubɛin: «Dawide tiruwɛnɛ gɔ, boi uwɔ sɔmi biyɛ. Inɛw Baŋa Ama boi le inɛ wɛɛjɛ gɔ, duba wo le biyɛmɔ. Daa go alagala nɛ Ama boi sɔmi biyɛmɔ.» 10Yesu waaru Jerusalɛmu nɛ wo yoi le, ana gɔ puu giru giru kanraanbe. Inɛw selumɛu, ainɛ kɔɔ aai ma gɛɛbɛin. 11Mɔɔnu gɔ saa, inɛ Ama titiyainɛ Yesui, Galile gana, Nasarɛtu ana bɛɛnnɛ gɔi gɛɛbe. 12Yesu, Ama Ginrun Diyɛ gɔ nɛ yowaa, kɔlɔ gɔ nɛ wo dɔnrun dɔnrɔnw gɔbe lee, ebu ɛbɛnw gɔbe lee, be puu nanaa goonaabe. Wo kɛɛlɛ wɛjɛnw tabalu gɔbe lee, pelegele dɔnrɔnw dɔindain gɔbe lee damaa sunugaatiyaa, 13ɔn gin’ be le sɔi: «Ama Dɔn nɛ tɔŋaaɲu: “Ginrun ma gɔ, amagɛɛn yalui biyɛdo.” Kaa, e kai, gugunyɔnw kɔmɔi bojouwɔi.» 14Kɔɔ onu nɛ, jiungunw lee, tegutegenw lee, Ama Ginrun Diyɛ kɔlɔ gɔ nɛ Yesu bɛrɛ be wiyaa, wo bei bajamaabe. 15Ama ginrun gɔ nɛ unrunw dagunw tobɛin gɔbe kɔnwɔun, Dawide tiruwɛnɛ gɔ, boi uwɔ sɔmi biyɛ gɛɛubɛin. Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee, waaru Yesu taanrinyɛn birɛ biru gɔbe be iye le, iyaa unrunw dagunw gɔbe kɔun be ɛgu le, kinɛ bemɛ saii banraain. 16Be Yesu le ɔn gin’ gɛɛubɛin: «Unrunw ɔnbe sɔɔ gɛɛɲu gɔ ɛgɛɛlɛu ma? Bemaa sɔɔnɔu ga, bei ganwan.» Yesu aŋa bemɛ saa: «Mu ɛgɛuwɔn. Ama Dɔn nɛ sɔɔ tɔŋaaɲu ɔn, e jaŋali ma? “Ama, u unrunw dagunw lee, unrunw iru digɛin lee aŋa nɛ sɔmu ɛgɛmaabeu.”» 17Yesu, inɛw gɔbe kɔɔ nɛ be iŋɛu pajaatiyaa, Jerusalɛmu gowaa, yaa Betani ana nɛ diinyaan baa yaabe. 18Aga baa yaa gɔ, Jerusalɛmu pilemaa wɛɛɲu ga, oju nɛ be tou, Yesui giyɛ aai. 19Wo gaa na turu, oju gɔ nɛ bɛrii iyaabe. Kaa tiun gɔ nɛ dɔwaa wo kanran, liyɛ laa ye, ii turu kanran bele. Kɔɔ waaru le wo gaa na gɔ le ɔn gin’ sɔɔ sɔi: «Kuu uwɔ nɛ asuu ii biyɛnɔu.» Ginsɛsai, gaa na gɔ maaŋiyaain. 20Yesu jaŋu unrunw gɔbe, waaru sɔɔ kɔɔ be iye le, be bɛrɛ saii maunɛ biyaabe. Be Yesu bɛrɛ selumaa yani kanraan gaa na ɔn kanɛ sɛsai maaŋiyaan wɔɔ ma gin. 21Yesu aŋa bemɛ saa gi: «Mu naran go e bɛrɛ tagauwɔn, e, gagawu yasin biyaa ye, kinɛ lɛilɛi sɛnɛ ye, gaa na ɔn dɛi kijɛ mu kanrun gɔ kanran bɛbɛɛdei. Halu, e kokoo ɔn womaa kɔɔ nɛ goi ye, nɛudii nɛ yai yoo giyaajɛi ye, kunrin tee biyɛdo. 22Gagawu le kijɛ e gɛɛindo puu bɛbɛɛdei.» 23Yesu, Ama Ginrun Diyɛ gɔ nɛ yowaa deeru deereu wo wɔu, Ama bɛrɛ sadagadɔɔnɔw kuu bɛɛnw gɔbe lee, Yahutunw inɛw naw gɔbe lee, genɛ womɔ nɛ dɔwaa, ɔn gin’ wo bɛrɛ selumi: «Kijɛ inge uwɔ dɛi u kijɛ ɔnbe kanraunwɔu? Inɛ aa u bɛrɛ gɔnrɔn obaa, uwaa kijɛ ɔnbe kanran gi?» 24Yesu aŋa bemɛ saa: «Mu kanran, selumu turu ɔn sai e bɛrɛ selumɛdɔn. E selumu ma gɔ saajɛi ye, mu kanran gɔnrɔn le kijɛ ɔnbe mu kanranjɛ gɔ e bɛrɛ tatagadɔn. 25Inɛ aa Jain tiyaa, womaa batise kanran gi? Ama woi tii ma, inɛw woi tii?» Be tunmɔ le sɔwaa ɔn gin’ gɛɛbɛin: «Emɛ Ama woi tii giyaaɲu ye, wo emaa inge dɛi sɔɔ womɔ le gawanɛ kanrin ma gɛɛdo. 26Kaa, iyaa emɛ inɛw woi tii gin ye, emɛ inɛwin liliyɛɲu. Sabu inɛw puu Jain inɛ Ama titiyainɛi ga lugaa sɛin.» 27Kɔɔ dɛi be saa, unrunbe inin gin. Yesu yaa aŋa bemɛ saa, unrun kanran gɔnrɔn le kijɛ ɔnbe unrun kanranjɛ gɔ sɔɔidolɔn gi. 28Yesu sɔwaa gi: «E bɛrɛ sɔɔ ɔn yani wɔɔ? Ainɛ turu unrunw lɛi yasɛbe. Wo aini pɔlɔ gɔ le ɔn gin’ sɔi: ‘Ii ma, u iye resɛn minɛ ma nɛ yaa ye, birɛ birɛ.’ 29Aini kɔɔ wo le saa, unrun yai ibɛlaun gi. Kaa siin wo kanraan, wo ajubuduli biyaa, minɛ gɔ nɛ yaabe. 30Kɔɔ onu nɛ banɛ gɔ aini lɛiye gɔi yaa tɛmaa, wo bɛrɛ sɔɔ tunmɔ gɔi sɔwaabe. Kɔɔbaŋa saa: ‘Ɔɔ, de, mu yayaadɔn.’ Kaa wo minɛ gɔ nɛ yaalu. 31Unrunw lɛi kɔɔbe logoro nɛ, inɛ wo ba diŋɛ kanrannɛ gɔ yagɔi?» Be saa, pɔlɔ baŋa gɔi gin. Kɔɔ dɛi Yesu be le sɔwaa: «Mu naran go e bɛrɛ tagauwɔn, sɛgu yabanw lee, yaanw dimu le kayanw lee, Ama diinɛ nɛ giru ebe nɛ yoodɛin. 32Sabu Jan wiyaa, oju teitai gɔ e bɛrɛ tagaraabe. E wo le gawali. Kaa sɛgu yabanw lee, yaanw dimu le kayanw lee, wo le gawaabɛin. E wogɔ iyaabei. Kaa kɔɔ wooi nɛ, bana mɔɲu ebe dulomɔ ye, wo le gawa ga e yabali.» 33Yesu be le kijɛ gi: «E taanrinyɛn waja turu keŋiyɛin. Ainɛ ginrun kuu baŋa turu resɛn sadiŋɛ yegeraa, resɛn yibaabe. Wo sadiŋɛ gɔ ɛjii gɔŋaa, resɛn ii yalu namu ye dii goonɔɲu tɔgɔraa, iyaa yalu domu dɔmi ujaa paju. Kɔɔ onu nɛ, wo resɛn birɛbirɛnw le aaraa, sadiŋɛ gɔ be bɛrɛ gawaraatiyaa, wo gowaa ana yai. 34Resɛn kɔɔɲu waaru wo dɔwaa, sadiŋɛ baŋa gɔ gamulu unrunmɔ bɛɛ ga birɛbirɛnw unrunmɔ resɛn birɛbirɛnw gɔbe bɛrɛ tiyaabe. 35Kaa resɛn birɛbirɛnw gɔbe, ainɛ kɔɔ inɛw tii gɔbei aa, turui lagaa, lɛiye gɔi daatiyaa, taaniye gɔi tibu le kamaa daain. 36Kɔɔ onu nɛ, ainɛ gɔ birɛbirɛnw waja, laa mɔ gɔ dɛi joo tiyaabe. Resɛn birɛbirɛnw gɔbe inɛw kɔɔbe bɛrɛ yaa laa bɛɛnw mɔ gin’ kanraanbɛin. 37Kubɔ taaniye gɔ sadiŋɛ baŋa gɔ ajubaa yɛnaa, bemaa ii unrunmɔ kai bababadɛin ga woi be bɛrɛ tii. 38Kaa resɛn birɛbirɛnw gɔbe aini gɔ wɛɛu wo wɔu iyaa, be tunmɔ le aaraa ɔn gin’ sɔin: ‘Ɔn aini kɛn balanɛ gɔi. Wɛɛ woi daamɔi. Kunrin sadiŋɛ gɔ emɛi biyɛdo.’ 39Be kɔɔ gin’ ii gɔi aa, sadiŋɛ gɔ nɛ biɲaa goonaa, daabɛin.» 40Yesu selumaa, sadiŋɛ baŋa gɔ wiyaai ye resɛn birɛbirɛnw kɔɔbɛɛnw bɛrɛ inge kanrando ma gi? 41Inɛw gɔbe saa: «Wo inɛw mɔɲu kɔɔbe amasɔgɔ jugɔlu go, bei daatiyaa ye, sadiŋɛ unrunmɔ, birɛbirɛnw waja kuru womɔ waaru jaan gɔ le wo bɛrɛ oboidɛin bɛrɛ gagawarado.» 42Yesu kɔɔ onu nɛ be le ɔn gin’ sɔi: «E sɔɔ ɔn Ama Dɔn gɔ nɛ jaŋatɛli ma? “Inɛw Baŋa Ama birɛ biru gɔ unwɔ: wogɔ emɛ bɛrɛ taanrinyɛn sɔɔi. Ginrun ujɔnw tibu kamaa pajin gɔ, tibu wogɔ, ginrun sibɛ tibu gɔ woi bii.” 43Kɔɔ dɛi, e Ama diinɛ nɛ yooidelei. Kaa, tɔgu waja inɛw, yerunw gɔbe, be inɛw Ama diŋɛ kanraindɛin gɔbe, bei Ama diinɛ nɛ yoodɛin. [ 44Tibu kɔɔ le, inɛ tomiyaan numaajɛ, dɔdɔrɔ womɔ jɔjɔgɔdo. Nɛɛ, tibu gɔi, kuu womɔ nɛ sugu ye, woi gɛjɛ ye punau tanugado.]» 45Ama bɛrɛ sadagadɔɔnɔw kuu bɛɛnw lee, Parisiɛn gɔbe lee, waaru Yesu sɔɔ sɔi gɔ be ɛgu le, womaa unrun be dɛi sɔɔjɛ ga jugaabɛin. 46Be woi aa ga bana dɛnɛubɛin. Kaa, be inɛw joo Yesui inɛ Ama titiyainɛ ga lugaa sɛbɛin gɔbei liyaain.

will be added

X\