MATIU 20

1«Kɔɔ gin’, alagala diinɛ bana le murin wɔɔ unwɔ: Ginrun kuu baŋa turu, resɛn minɛ womɔ nɛ, birɛbirɛnw tii ga aga, ɔgu gowaabe. 2Wo sarudu buudu turu, bai tuturu nɛ bei tujɔdo ga be wooi aaraa, minɛ gɔ nɛ bei tii. 3Kɔɔ onu nɛ, lɛɛrɛ tuwɔ waaru le, ibɛ nɛ yaa, inɛw birɛ sɛnɛ be wɔu tɛmaabe. 4Be le ɔn gin’ sɔi: ‘E kanran yaa ye minɛ ma nɛ birɛ birɛi. Bana jaan gin’ ei tutujɔdɔn.’ 5Inɛw kɔɔbe yaain. Iyaa, minɛ baŋa kɔɔ, naitege waaru lee, lɛɛrɛ taanu waaru lee yagowaa, inɛw dɛnaa, minɛ unrunmɔ nɛ tii. 6Dumɔrɔn gɔ, digɛnai lɛɛrɛ numɔrɔn waaru le gowaa, ibɛ nɛ inɛwin tɛmaa, bei selumu: ‘Hei, e inge dɛi dɛnrun gɔ wooi nɛ, ɔn nɛ bamai wɔi?’ 7Inɛw gɔbe saa, inɛ turu kanran birɛ birɛ ga unrunbe nɛ tɔɔrɔlu dɛi ije go wɔin gin. Minɛ baŋa gɔ saa bemaa yayaa ye resɛn minɛ unrunmɔ nɛ birɛ birɛ gi. 8«Digɛnai, birɛ waaru sugu le, minɛ baŋa gɔ birɛbirɛnw kajubanɛ gɔ le sɔwaa, womaa birɛbirɛnw gɔbei boonaa ye tujɔ gi. Inɛw dumɔrɔn birɛ gɔ nɛ wɛin gɔbe le tɔlaa ye, laa wɛɛnw gɔbei onu bemɛ nɛ tujɔ gi. 9Birɛbirɛnw kajubanɛ gɔ, inɛw dumɔrɔn birɛ gɔ nɛ wɛin gɔbei boonaa, sarudu buudu tuturu bei tuju. 10Inɛw laa wɛɛnw gɔbe wiyaa, ajubu bemɛ nɛ, kɔɔ dɛi gaa bei tujɔdɛin ga sɛbɛin. Kaa bei yaa sarudu buudu tuturu tujin. 11Waaru tujɔ bemɛ be bɛɛube le, be ginrun kuu baŋa dɛi guguun gunwaanbɛin. 12Kijɛ be gi: ‘Inɛw dumɔrɔn wɛɛnw ɔnbe, lɛɛrɛ turu sai kanrin. Be lee, emɛ inɛw aga gowaa digɛnai yaa dɔɔ, nai uju tariyɛnw gɔbe lee, emi kɛukɛu tujɔuwɔu.’ 13Minɛ baŋa gɔ turu baŋa aŋa saa gi: ‘Mu anrunge, mu kai, ui jamalun de! Mu bai turu nɛ sarudu buudu turu u bɛrɛ tujɔdɔn ga, emɛ lɛi kunrin aaranɛ ma? 14Nɛɛ tujɔ uwɔ yabaajɛu ye yaa. Ainɛ dumɔrɔn birɛ gɔ nɛ yoonɛ gɔ lee, u lee bɛrɛ kɛukɛu tujaajɔn kanran, 15mu kɛɛlɛ ma le diŋɛ ma kanrun bɛɛidolɔn yinwɔɔ? Maa nɛɛ mui inɛ ɛjui dɛi kinɛ uwɔ nɛ ele le wɔu ma?’ » 16Kɔɔ gin’, Yesu, sɔɔ waja kɔɔ kuu nɛ baraa gi: «Inɛw onu dimi gɔbe, be giru nɛ totoiyodɛin. Kaa, inɛw giru tonw gɔbe onu didimiyɛndɛin.» 17Yesu, Jerusalɛmu yaa ga oju gowaabe. Oju nɛ yaau, wo jaŋu unrunw pɛli lɛisigɛ gɔbe sai bɛrɛ ɔn gin’ sɔi: 18«Emɛ kanɛ Jerusalɛmu yaauwɔin. Kɔɔ nɛ, Inɛ Aini gɔi, Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw lee numɔ nɛ kukunɔdɛin. Woi daaun jaain wɔɔ giye, 19be woi inɛw Ama inin numɔ nɛ kukunɔdɛin. Wogɔ bɛɛnw woi yayamurinyɛnmɔdɛin. Bɔɔniyɛn le woi lalagadɛin. Kɔɔ onu nɛ, baga jai nɛ woi pɛgɛ ye, woi dadaadɛin. Woi be dai, bai taaniye gɔ, wo bubulodo.» 20Kɔɔ onu nɛ, Sebede unrunw na, unrunw womɔ le wiyaa, Yesu giru nɛ tuŋiyaan wo bɛrɛ kijɛ turu selumu. Wo Yesu le ɔn gin’ sɔi: «Mu, kijɛ turu u bɛrɛ selumu ibɛɛ wɔun.» 21Yesu aŋa womɔ saa, «U inge ibɛɛ wɔu ma» gi. Wo Yesu le saa: «Unrunw lɛi ma ɔnbe, diinɛ uwɔ gɔ nɛ, turui numɔ iin uwɔ sibɛ nɛ dɛinyɛnmɔ, lɛiye gɔ numɔ nana uwɔ sibɛ nɛ dɛinyɛnmɔ ga, pui wogɔ mu le kunɔ.» 22Yesu, be le sɔwaa gi: «E kijɛ e gɛɛnjɛ inin. E ɔɲɛ mu tariyɛido gɔ tari bɛbɛɛdei ma?» Be saa ee, unrunbe tari bɛbɛɛdɛin gin. 23Yesu pilemaa ɔn gin’ sɔi: «Ee, narain. E ɔɲɛ mu bɛrɛ dɔɔido gɔ tari bɛbɛɛdei. Kaa, numɔ iin ma sibɛ nɛ dɛinyɛn ma, numɔ nana ma sibɛ nɛ dɛinyɛn ma sɔɔ gɔ, sɔɔ mai laa. Wogɔ mu Ba inɛw dɛi yegeraa wo sɛɛ gɔbe mɔi.» 24Jaŋu unrunw pɛlu wajunw gɔbe, sɔɔ kɔɔ ɛgaa, Jake lee, wo bainɛ Jan lee le kinɛ banraain. 25Wogɔ digɛu, Yesu be wooi puu boonaa, be le ɔn gin’ sɔi: «Inɛw Ama inin gɔbe, kuu bɛɛnw bemɛ, bei gunɔ kunaa sɛin. Iyaa inɛw diyɛnw gɔbe paŋa le bei laamu kanranɲu ga e igii wɔi. 26Kaa, logoro ebe nɛ kunrin biyɛmɔnɔugi. Inɛ Aini gɔ kuu womɔ le, inɛw bemaa wo dɛi birɛ birɛ ga wɛɛlu. Kaa, inɛw dɛi birɛ birɛi wɛi. Iyaa, inɛw jooi hakɛ gunɔ nɛ dɔrugɔ ga, wo kinrun womɔ pajai wɛi. Kɔɔ dɛi, logoro ebe nɛ inɛ turu inɛ diyɛi bii ibɛɛ wɔɔ ye, wogɔ baŋa birɛbirɛnɛ ebei wo biyɛun jaan. Iyaa, inɛ turu kuui bii ibɛɛ wɔɔ ye, wogɔ baŋa gunɔnɛ ebei wo biyɛun jaan.» 29Waaru Jeriko be goi le, inɛw joo Yesu onu nɛ yadimɛbɛin. 30Girumuw lɛi oju diŋirun nɛ yadaanbɛin. Be Yesu galauwɔ ga ɛgaa, kɔnwɔun, wo le ɔn gin’ gin: «Dawide tiruwɛnɛ gɔ, amasɔgɔ emɛ jugɔ.» 31Mɔɔnu gɔ bei ganwaun, bemaa siɲɛ paja gɛɛube. Kaa, be mii bemɛ baraa ye, ɔn gin’ gɛɛbɛin: «Emɛ Baŋa, Dawide tiruwɛnɛ gɔ, amasɔgɔ emɛ jugɔ.» 32Kɔɔ gin’ gɛɛu be wɔu, Yesu iŋiyaan, bei boonaa, be bɛrɛ ɔn gin’ selumu: «Maa e dɛi kijɛ kanran ga e ibɛ gɔ ingei?» 33Girumuw gɔbe saa: «Emɛ Baŋa, emaa giri iye ga, emi bara.» 34Yesu, amasɔgɔ bemɛ jugaa, giri bemɛ tabaabe. Kɔɔ gin’ wo kanraan, anranw gɔbe giri ginsɛsai kumɔlaa, be sɛɛu giri iyeubɛin. Kɔɔ onu nɛ, be Yesui dimiyaanbɛin.

will be added

X\