MATIU 2

1Yesui Judea gana Bɛtɛlɛhɛmu nɛ waaru narin le, Ɔgɔnɛ Herɔde, gana gɔ kuu nɛ daanbe. Yesui be naraan, hakilɛgunw tolo jugɔnw duu sibɛ go gowaa, Jerusalɛmu dɔwaabɛin. 2Jerusalɛmu ana nɛ dɔwaa, selumaa kijɛ be gi: «Yahutunw ɔgɔnɛ kanɛ narin gɔ yago wɔɔ? Emɛ tolo womɔ duu sibɛ go iyaa, woi demɛniyɛnmɔi wɛin.» 3Ɔgɔnɛ Herɔde kɔɔ ɛgaa, wo lee, Jerusalɛmu bɛɛnw wooi lee kikinu manaai. 4Wo Ama bɛrɛ sadagadɔɔnɔw kuu bɛɛnw bemɛ lee, Ama tɔɔru deerenw bemɛ lee mɔɔnaa, Ama Yabanɛ Diyɛ tiido gɔ yago narandɛin ma selumaabe. 5Inɛw kɔɔbe ɔn gin’ sain: «Woi Judea gana, Bɛtɛlɛhɛmu ana nɛ narandɛin. Inɛ Ama titiyainɛ turu Bɛtɛlɛhɛmu dɛi Ama ɔn gin’ gi ga sɔɔ wo tɔŋu unwɔ: 6“Judea gana, Bɛtɛlɛhɛmu, tɔgu ma Isɛrɛlu gɔi inɛ teeremɔido gɔ u nɛ goodo. Wogɔ digɛu, Judea gana ana puu logoro nɛ ui ana gailiyɛmɔɲui laa.” 7Herɔde waaru kɔɔ wo ɛgu le, wo baŋiyaan, hakilɛgunw gɔbei boonɔmaa, bemaa waaru inge le tee tolo gɔ goi ma be nɛ selumu. 8Kɔɔ onu nɛ, Herɔde, bei Bɛtɛlɛhɛmu nɛ tiiu, be le ɔn gin’ sɔi: «E yaai, ibanrin gɔi ɛjii dɛnɛi. E woi iyaajɛi ye, maa kuu ma le woi yai demɛniyɛnmɔ bɛɛ ga, mu bɛrɛ wɛɛ tagai.» 9Kɔɔ gin’, ɔgɔnɛ sɔɔ sɔi gɔ ɛgaa, hakilɛgunw gɔbe Jerusalɛmu gowaa, Bɛtɛlɛhɛmu yaai tɔlin. Tolo duu sibɛ go be iyi gɔ giru bemɛ nɛ yaaube. Tolo gɔ ibanrin gɔ yalu tobe gɔ kuu nɛ dɔwaa, konɛ iŋiyaanbe. 10Hakilɛgunw gɔbe, Tolo gɔ, waaru be iye le, kinɛ bemɛ gaai ɛɛliyaabe. 11Be ibanrin yalu tobe gɔ nɛ yowaa, ibanrin gɔ lee, wo na Mari lee iyaabɛin. Be ibanrin gɔ giru nɛ tuŋiyaan woi demɛniyɛnmaabɛin. Be gelu bemɛ nɛ sin obu tɔgu dɛin dɛin goonaa, ibanrin gɔ bɛrɛ obaabɛin. Be kange lee, mɔi jiɲu ɛju lee, kijɛ jiɲu ɛju turu boi gɔ miire gɛɛu, wogɔ lee obin. 12Kɔɔ onu nɛ, Ama be bɛrɛ yaŋawelu le jugɔmaa, bemaa waja Herɔde sibɛ go yaanɔu gi. Kɔɔ dɛi, be gana bemɛ nɛ oju waja le yain. 13Hakilɛgunw gɔbe pilemaa ana bemɛ nɛ yaa be yaa, Inɛw Baŋa mɛlɛnkɛ turu, yaŋawelu nɛ unruin Josɛpu bɛrɛ tagaraa, wo le ɔn gin’ sɔi: «Josɛpu, ingele! Herɔde, ii gɔi daado giye dɛdɛnɛdo. Kɔɔ dɛi, ii gɔ lee wo na lee jeɲɛ ye, Ejipute gana nɛ jɔbɔ yaa. Uwaa pilemɛ ye wɛɛ mu gɛɛido baa, Ejipute nɛ yabiyɛ.» 14Josɛpu digɛ wogɔ tee ingelaa, ii gɔ lee, wo na lee dimɛraan Ejipute yai. 15Herɔde wo yinwɛindo baa, Josɛpu Ejipute nɛ yabii. Sɔɔ kɔɔ le digɛu, inɛ Ama titiyainɛ turu sɔɔ tɔŋu kibaai. Inɛ wogɔ pɔɔlɔ baa Inɛw Baŋa Ama ɔn gin’ gi tɔŋu: “Mu, ii ma Ejipute gana nɛ boonaa, goonaabɔn.” 16Herɔde, hakilɛgunw gɔbe woi jamaatin ga waaru wo jugu le, kinɛ womɔ ɛjii banraain. Wo Bɛtɛlɛhɛmu nɛ inɛw tiyaa bemaa Bɛtɛlɛhɛmu lee, wo le bɛrii ana wɔin lee nɛ, anranw unrunw gɔ puu daiti gi. Ɔnhɔn, hakilɛgunw gɔbe, tolo gɔ waaru iyaabɛin ga wo bɛrɛ be tagu le kɛukɛu, anranguju lɛi goi ye, doɲu go sugo, anran unrunw gɔ puu daiti gi. 17Kɔɔ gin’, inɛ Ama titiyainɛ Jeremi sɔɔ gɔ kibaai. Jeremi pɔɔlɔ baa sɔɔ tɔŋu unwɔ: 18“Rama nɛ tɔɔnrɔn ɛgɛmaabe. Sɔmiyɛn lee, bɔnrɔn pii diyɛ lee ɛgɛmaabe. Rasɛlui unrunw womɔ dɛi piiuwɔ. Unrunw gɔbe yinwaain dɛi, wo woi dɔbɔrɔmɔ ga yabalu.” 19Herɔde yinwaan wo yaa, Inɛw Baŋa mɛlɛnkɛ turu, Josɛpu Ejipute nɛ wo wɔu, yaŋawelu nɛ wo le ɔn gin’ sɔi: 20«Josɛpu, ingele! Inɛw ii gɔi daa ga dɛnɛubɛin gɔbe yinwaain. Nɛɛ, ii gɔ lee, wo na lee gɛli ye pilemɛ Isɛrɛlu gana nɛ yaa.» 21Josɛpu ingelaa, ii gɔ lee, wo na lee gɛliyaa Isɛrɛlu gana nɛ yaabe. 22Kaa, Herɔde aini Arukelausu, wo ba dilɛ nɛ Judea gana kuu nɛ daan ga ɛgaa, Josɛpu, wogɔ nɛ dɛinyɛn ga liyaai. Ama pilemaa yaŋawelu le womaa Galile gana nɛ dɛinyɛn ga wo bɛrɛ jugɔmaa wo kanran, wo kunrin Galile gana, 23Nasarɛtu nɛ wiyaa dɛinyin. Nasarɛtu ana nɛ be dɛinyin gɔ le digɛu, inɛw Ama titiyaanw dɔn nɛ, woi Nasarɛtu bɛɛnnɛi gɛɛdɛin ga, tɔŋi gɔ kibaai.

will be added

X\