MATIU 19

1Yesu, sɔɔ kɔɔbe sɔwaa kilaa, wo Galile gana nɛ gowaa, Judea gana nɛ, Jurudɛn dibe sibɛ waja nɛ yai. 2Inɛw joo woi yadimɛbɛin. Yesu logoro bemɛ nɛ jiungunw bajamaabe. 3Parisiɛnbe logoro nɛ gamuu Yesu aŋa bɛɛ ga, wo bɛrɛ wiyaa sɔɔ ɔn wo bɛrɛ selumi: «Sɔɔ inge dɛi kanran, ainɛ, yaanran womɔ paja bɛbɛɛdo ma? Wogɔ jaain wɔɔ ma, jaanla?» 4Yesu aŋa bemɛ saa, ɔn gin’ gi: «E Tɔɔru dɔn nɛ jaŋali ma? Waaru kijɛ puu wo maŋaube le, Ama, ainɛ lee, yaanran lee maŋaatiyaa kijɛ wo gi: 5“Kɔɔ sabu dɛi, ainɛ, wo ba lee, wo na lee, be le kabi ye, yaanran womɔ le biyɛjɛ. Kunrin be lɛi inɛ turu taŋaɲu.” 6Nɛɛ, bei waja inɛw lɛi laa, kaa turu. Ama, kuu womɔ le kijɛ mɔɔnaajɛ gɔ, inɛ turu kanran, wogɔ kabuganɔu.» 7Parisiɛnbe Yesu bɛrɛ ɔn gin’ selumi: «Kunrin biyaa ye, inge dɛi Mɔise, ainɛ gɔ womaa yaanran womɔ bɛrɛ yaajipolu dɔn tɔŋaa obaatiyaa ye, woi yinpaja ga tɔɔru?» 8Yesu saa: «Mɔise ebaa yaanran ebe paju bɛbɛɛ gi biyaa ye, wo kuu ɛɛn ebe dɛi kɔɔ gin’ sɔi. Kaa, waaru Ama aduna maŋu le, kɔɔ gin’ bele. 9Ainɛ, yaanran womɔ sala dɛi laa ye paju bɛɛidolo. Kɔɔi laa ye, ainɛ aai kanran, yaanran womɔ pajaatiyaa, yaanran waja jeɲaajɛ ye, ainɛ wogɔ yaanran lɛiye kɔɔ le dimu dimiyɛunwɔ.» 10Jaŋu unrunw gɔbe Yesu le ɔn gin’ gin: «Ainɛ, yaanran sibɛ nɛ kunrin biyɛun jaan ye, yaanran jeɲɛla ire.» 11Yesu aŋa bemɛ saa: «Ama, inɛw bɛrɛ gɔnrɔn wo obaajɛ gɔbei laa ye, inɛw puu sɔɔ kɔɔ le yaba bɛɛidenɛ. 12Kɔɔ bana wɔɔ gin’, inɛw gamuu yaanran jeɲɛlu bii bɛbɛɛɲu. Gamuu, Ama pɔrui. Gamuu, inɛw paŋa le pɔrin. Iyaa gamuu, alagala diinɛ birɛ bemɛ gaaniyɛnnɔu ga, yaanran jeɲɛɛnɛ. Inɛ deeru kɔɔ le yabu bɛɛido, baŋa wogɔ le yaba.» 13Kɔɔ waaru le, inɛw, Yesu bɛrɛ unrunw dimɛraan jɛɛlaa, womaa kuu bemɛ nɛ numɔ yaŋaraan ye, be dɛi Ama gɛɛn gin. Kaa, Yesu jaŋu unrunw gɔbe inɛw gɔi ganwaanbɛin. 14Kɔɔ dɛi, Yesu be le saa: «Unrunw gɔbei tɛŋɛnɔugi. Bei paja ye, mu bɛrɛ wɛɛmɔi. Sabu inɛw be gin’ wɔin gɔbe, alagala diinɛ gɔ bemɛi.» 15Wo unrunw gɔbe kuu nɛ numɔ yaŋaraan kilaa, kɔɔ onu nɛ, gowaa yai. 16Ainɛ turu Yesu bɛrɛ wiyaa, ɔn gin’ selumu: «Jaŋudeerenɛ, maa ɔnmɔsɔgɔ bɛɛ ga, ɛju kanraun mu jaan gɔ ingei?» 17Yesu aŋa womɔ saa gi: «U yani ɛju dɛi mui selumɛuwɔu ma? Amai laa ye, inɛ ɛju turu kanran wɔlɔ. Kaa, u ɔnmɔ gɔ bɛɛ ibɛɛ wɔu ye, Ama tɔɔru gɔbe gɛliyɛ.» 18Ainɛ gɔ tɔɔru yagɔbei ma, Yesu bɛrɛ selumu. Yesu ɔn gin’ sai: «Inɛ daanɔu, dimu dimiyɛnnɔu, gunyɔn gunyɔnnɔu, sɛɛrɛ kakalu goonɔu, 19u ba lee, u na leei baba, aŋai kuu uwɔ u ibɛ gin’, u bɔɔnɛi yaa kɔɔ gin’ ibɛi biyɛ.» 20Sagatara ii kɔɔ Yesu aŋa saa, unrun tɔɔru kɔɔbe puu yadigɛun gi. Kijɛ unrun kanraun jaan wajaai gɔ ingei ma gi. 21Yesu aŋa womɔ ɔn gin’ sai: «U kibaai bii ibɛɛ wɔu ye, yaa ye, kijɛ u sɛɛ dɔnraan ye buudu gɔ dɛgugunw bɛrɛ obo. Kɔɔ gin’ kanraanjɛu ye, u alagala nɛ kijɛ gaai bɛbɛɛdou. Kɔɔ onu nɛ wɛɛ mui dimiyɛn.» 22Ainɛ kɔɔ ɔgɔinɛ diyɛi bee dɛi, waaru sɔɔ kɔɔ wo ɛgu le, kinɛ jinwaan, gowaa yaai. 23Kɔɔ onu nɛ Yesu, jaŋu unrunw womɔ le ɔn gin’ sɔi: «Mu naran go e bɛrɛ tagauwɔn, ɔgɔinɛ, alagala diinɛ nɛ yoo ga nawin wɔɔ. 24Mu iyaa sɔɔ ɔn e bɛrɛ tagauwɔn, inɛw arusɛgɛ nɛ diyɛ bemɛ daanaa gɛlin, Ama diinɛ nɛ be yoomɔ nɛ ɔgɔyɔn laa kala bonɔ nɛ gala bɛru.» 25Sɔɔ kɔɔ waaru be ɛgu le, jaŋu unrunw gɔbe bɛrɛ saii maunɛ kanrun. Be Yesu womaa kunrin biyaa ye, inɛ yabu bɛɛmɔido gɔ aai ma gin. 26Yesu bei yɛnaa, saa: «Inɛw, wogɔ kanrun bɛɛnɛ, kaa Ama kijɛ puu kanrun bɛbɛɛjɛ.» 27Piɛru, Yesu bɛrɛ selumaa womaa kunrin biyaa ye, unrunbe inɛw kijɛ puu pajaatiyaa, woi dimiyaan wɔin gɔbe, unrunbe dɛi yani biyɛdo ma gi. 28Yesu, jaŋu unrunw gɔbe le kijɛ gi: «Mu naran go e bɛrɛ tagauwɔn, Inɛ Aini gɔ, aduna kana gɔ nɛ, ɔgɔdɔin doorojɛ womɔ nɛ waaru wo dɛinyɛindo, e, inɛw mui dimi gɔbe, e yaa, Yahutunw tɔgu pɛli lɛisigɛ gɔbe laama ga ɔgɔdɔin pɛli lɛisigɛ nɛ dɛdɛinyɛndei. 29Kunrin inɛw ginrun bemɛ ma, be ba unrunw ma, be saabe ma, be ba ma, be na ma, unrunw bemɛ ma, minɛ bemɛ ma, boi ma dɛi pajaaɲu ye, be kijɛ be paju kubɔ suŋu baa bɛbɛɛdɛin. Inɛw wogɔbe ɔnmɔsɔgɔ yaa bɛbɛɛdɛin. 30Kaa, inɛw kanɛ giru toin gɔbe logoro nɛ, inɛw joo onu didimiyɛndɛin. Iyaa inɛw onu dimi gɔbe logoro nɛ, inɛw joo giru totoiyodɛin.»

will be added

X\