MATIU 18

1Waaru wogɔ le tee, Yesu jaŋu unrunw gɔbe, giru womɔ nɛ dɔwaa ɔn gin’ selumi: «Alagala diinɛ gɔ nɛ, inɛ aa diyɛi biyɛdo?» 2Yesu, ii dagi turu boonaa, logoro bemɛ nɛ iŋiyɛnmaa, 3ɔn gin’ sɔi: «Mu naran go e bɛrɛ tagauwɔn, ei dulomaa unrunw dagunw gin’ biyɛli ye, alagala diinɛ nɛ bɛɛ yooidelei. 4Wogɔ digɛu, alagala diinɛ nɛ inɛ kuu womɔ sunugaa, ii dagi ɔn gin’ biyaa wɔɔ gɔ, inɛ diyɛ gɔ woi. 5Iyaa, inɛ aai kanran, boi ma le ii dagi ɔn tunmɔi ɛjii sɛgɛraajɛ ye, kɔɔbaŋa mui sɛguru.» 6«Kaa, inɛ aai kanran, inɛ mu le gawaa wɔɔ turu, halu ii dagi ɔn tunmɔi kanran, kinɛ womɔ yanwanmaa, mu le gawaa wo bee gɔ wo kɔɔlɔmɔmɔjɛ dɛi, wogɔ baŋa, yuuna diyɛ nɛ suŋu kɔmaa ye kɔkɔlɔ womɔ nɛ yaa pagaa ye, nɛudii nɛ woi kamaa kuni wo bɛrɛ ire. 7Kijɛ inɛ kinɛ yanwanmu dɛi, aduna bɔnrɔn wo le yɔɔ. Waajibi, kinɛ yanwan sɔɔ bibiyɛdo. Kaa, kinɛ yanwan inɛ le digi wɛɛido gɔ, kɔɔbaŋa kai, bɔnrɔn wo le yɔɔ. 8Kɔɔ sabu dɛi, numɔ uwɔ dɛi ma, kubɔ uwɔ dɛi ui hakɛ nɛ yoodo ga wɔɔ ye, polo ye, u le wagee kamati. Kubɔ lɛi le ma, numɔ lɛi le ma wɔnu, yaun asuu yinwɛɛnlɛ gɔ nɛ yoo dɛi, numɔ turu le ma, kubɔ turu le ma wɔnu, ɔnmɔsɔgɔ nɛ u yoi ire. 9Iyaa, giri uwɔ dɛi ui hakɛ nɛ yoodo ga wɔɔ ye, wɔgɔrɔ ye, u le wagee kamati. Giri lɛi le wɔnu, yaun asuu yinwɛɛnlɛ gɔ nɛ yoo dɛi, giri turu le wɔnu, ɔnmɔsɔgɔ nɛ yoo ire.» 10«Unrunw dagunw ɔnbe tunmɔi gailiyɛmu sibɛ go kuu ebe kajubai. Mu e bɛrɛ tagauwɔn, mɛlɛnkɛ bemɛbe, alagala nɛ waaru puu mu Ba alagala nɛ daan gɔ giru nɛ iŋiyaan wɔin. [ 11Iyaa, Inɛ Aini gɔ, inɛw manaa wɔin gɔbei yabai wɛi.] 12«Ajubu yɛnɛi, inɛ turu peju suŋu wo sɛnu, turu manaai ye, pɛtuwɔ tuwɔsigɛ gɔbe kokoo nɛ pajaatiyaa ye, peju manu gɔ dɛnɛi yaaidolo ma? 13Iyaa, wo peju gɔ dɛnaa iyaajɛ ye, mu naran go e bɛrɛ tagauwɔn, peju kɔɔ dɛi kinɛ ɛɛli wo sɛɛ gɔ, peju wajunw pɛtuwɔ tuwɔsigɛ mananɛ gɔbe mɔ dɛi sigɛ. 14Kɔɔ bana wɔɔ gin’, e Ba alagala nɛ daan gɔ, ii dagi ɔn tunmɔ, halu koturu mana ga ibɛla.» 15«Nɛɛ, u bainɛ u bɛrɛ mɔɲu kanraanjɛ ye, u turu sai woi yai tɛmɛ ye, sɔɔ gɔ wo bɛrɛ taga. Wo ui keŋiyaanjɛ ye, u, bainɛ biyaajɛu. 16Kaa, wo ui keŋiyɛnlu ye, inɛ turu ma, lɛi ma, kuu uwɔ nɛ dɛnaa baraajɛu ye, sɔɔ gɔ puu sɛɛrɛ lɛi ma, taanu ma giru nɛ sɔin biyɛ ga, pilemɛ ye wo bɛrɛ yaa. 17Kaa, wo bei keŋiyɛnlu ye, sɔɔ gɔ Ama inɛw mɔɔnu nɛ taga. Iyaa, baŋa Ama inɛw mɔɔnu sɔɔ yaa keŋiyɛnlu ye, woi inɛ Ama inɛɛ ma, sɛgu yabanɛ ma gin’ lugoi.» 18«Mu naran go e bɛrɛ tagauwɔn, aduna ɔn nɛ, kijɛ le yabalu e wɔɔ gɔ alagala nɛ wogɔ le yabaidenɛ. Iyaa, aduna nɛ kijɛ le e yabaajɛ gɔ, alagala nɛ yaa kunrin biyɛdo. 19«Iyaa mu e bɛrɛ tagauwɔn, inɛw lɛi ma, taanu ma, boi ma sabu dɛi mɔrinyaan yɔɔin ye, mu logoro bemɛ nɛ yatoun. Kɔɔ sabu dɛi, aduna ɔn nɛ, logoro ebe nɛ, inɛw lɛi, mii bemɛ sɛgɛraa wɔnu, kijɛ turu gɛnyaanɲu biyaa ye, mu Ba, alagala nɛ daan gɔ, kijɛ wogɔ be bɛrɛ ohobodo.» 21Kɔɔ gin’ Piɛru, Yesu genɛ nɛ dɔwaa ɔn gin’ selumu: «Inɛw Baŋa, mu bainɛ mu bɛrɛ digu digu hakɛ kanraunwɔ ye, kubɔ aŋa baa yaabu kanrun womɔ yabadɔn. Kubɔ sɔi baa biyɛdo ma?» 22Yesu saa: «Ai, kubɔ sɔi gɛɛlun. Kaa, kubɔ sɔi sɔi, kubɔ pɛsɔi baa woi yaabu kanran. 23Alagala diinɛ gɔ sɔɔ ɔn le murin wɔɔ. Ɔgɔnɛ turu, bai turu, birɛbirɛnw womɔbei boonaa, bemaa inɛ tuturu yoru unrunmɔ aŋai wo sɛɛ marun yɛnɛmɔ gi. 24Kɔɔ gin’ maraan yɛnɛu, birɛbirɛnɛ turu, ɔgɔnɛ gɔ yoru buudu miliyɔn joo yasɛbe. 25Baŋa buudu gɔ, kijɛ le tujɔɲu sɛbele. Ɔgɔnɛ gɔ, ainɛ gɔ lee, yaanran womɔ lee, unrunw womɔ lee, kijɛ wo sɛɛ puu lee dɔnrɔn ye, buudu gɔ wogɔ le wo tujɔmɔ gi. 26Birɛbirɛnɛ gɔ giru womɔ nɛ tuŋiyaan, ɛjii wo bɛrɛ gɛnyaanbe: ‘Mui muyɔn. Mu buudu gɔ puu tutujɔdɔn.’ 27Ɔgɔnɛ gɔ amasɔgɔ womɔ jugaa, buudu gɔ puu wo bɛrɛ yaabaatiyaa, woi kɔɔ gin’ pajaa yaamu. 28«Birɛbirɛnɛ gɔ bain gowaa, wo bɔɔnɛ yoru womɔ sɛɛ turu sɛguru. Kɔɔbaŋa yoru womɔ, buudu suŋu gaila sɛbe. Wo, woi aa, kɔkɔlɔ gɔ pɔraa gɛliyaa, buudu unrunmɔ tujɔ gi. 29Wo bɔɔnɛ gɔ, giru womɔ nɛ tuŋiyaan, ɛjii gɛnyaanbe: ‘Mui muyɔn. Mu u bɛrɛ tutujɔdɔn.’ 30Kaa ainɛ gɔ yabalu. Yoru gɔ tujɔ ye, wo dogoido baa wo woi kaju nɛ kunaa sɛbe. 31Birɛbirɛnw wajunw gɔbe sɔɔ kɔɔ iyaa, kinɛ jinwaan, yaa, be baŋa bɛrɛ tagin. 32Be baŋa ainɛ gɔi boonaa ɔn gin’ sɔi: ‘Birɛbirɛnɛ mɔɲu, mu bɛrɛ ɛjii u gɛnyaan, mu, buudu ma u bɛrɛ yaabaabɔn. 33Amasɔgɔ uwɔ bana mu jugu gin’, u yaa, u bɔɔnɛ amasɔgɔ jugɔun jaanla bee ma?’ 34Ɔgɔnɛ gɔ ɛjii kinɛ banraan, ainɛ gɔ, buudu gɔ puu tujɔ wo dogoido baa, woi kaju nɛ kunaa, ɛjii ɔɲɔmaabe.» 35Sɔɔ kɔɔ kuu nɛ gimaa, Yesu ɔn gin’ sɔi: «E kinɛpilu le tunmɔ yaabu kanraanlɛi ye, mu Ba alagala nɛ daan gɔ, e bɛrɛ kɔɔ gin’ yinkanrando.»

will be added

X\