MATIU 16

1Parisiɛnbe lee, Saduseyɛnbe lee, Yesu pinɛ yɛnɛdɛin ga, genɛ womɔ nɛ dɔwaa, womaa Ama woi tii ye unrunbe bɛrɛ wogɔ sɛɛrɛ, taanrinyɛn Ama bɛrɛ goi ye wɛɛjɛ turu le jugɔmɔ gin. 2Kaa, Yesu aŋa bemɛ ɔn gin’ sai: «Digɛnai, nai numɔgu waaru le, alagala banrin wɔɔ ye, e yalu ɛjii bibiyɛdo gɛɛjɛi. 3Iyaa, agapaali anran iminiyaan, gɛunniyaan wɔɔ ye, e anran ooɲɔ ihingeledo gɛɛjɛi. Alagala yɛnɛ ye, tiyɛ womɔ jugu bɛbɛɛjɛi. Kaa, emɛ kanɛ waaru inge tɔgu nɛ toin ma e wogɔ tiyɛ gɔ jugɔɔlɛi. 4Kanɛ inɛw gɔbe, inɛw mɔɲu, Ama sibɛ go sɔɔ turu nɛ iŋɛlain gɔbe, taanrinyɛn iye ibɛɛ wɔin. Kaa, inɛ Ama titiyainɛ Jonasu taanrinyɛn gɔi laa ye, taanrinyɛn waja be bɛrɛ kanrun ye tagaraidenɛ.» Kɔɔ gin’, Yesu bei pajaa yinyai. 5Yesu jaŋu unrunw gɔbe waaru dibe diŋirun waja go be galabe le, buru jeɲɛ ga naŋaai. 6Yesu gowaa, ɔn gin’ be le sɔi: «Parisiɛnbe lee, Saduseyɛnbe lee kijɛ buru pidemu bemɛ gɔ dɛi kuu ebe kajubai.» 7Jaŋu unrunw gɔbe tunmɔ le jiiraa ɔn gin’ gin: «Emɛ buru jeɲɛnɛ dɛi, wo sɔɔ kɔɔ sɔɔuwɔ.» 8Yesu, sɔɔ be sɔɔbe soo biyaa ɔn gin’ gi: «E inge dɛi ajubau, maa buru sɛlɛ e wɔɔ gɔ dɛi sɔɔjɛ gɛɛuwɔi? Gagawu ebe gaila de! 9E nimɛ kanran paamu kanranli ma? Buru numɔrɔn, inɛw muɲu numɔrɔn bɛrɛ mu gamulu gɔ, e sɔɔ wogɔ naŋaai ma? Buru waju taju aŋa jɛɛli ma naŋaai ma? 10Iyaa, buru sɔi, inɛw muɲu nai bɛrɛ mu gamulu gɔ, e sɔɔ wogɔ naŋaai ma? Buru waju taju aŋa jɛɛli ma naŋaai ma? 11Nɛɛ, sɔɔ mu sɔi gɔ, buru dɛi sɔɔlun ga paamaalɛi e wɔɔ gɔ inge dɛi? Kaa Parisiɛnbe lee, Saduseyɛnbe lee kijɛ buru pidemu gɔ dɛi kuu ebe kajubai.» 12Kɔɔ waaru le, jaŋu unrunw gɔbe, Yesu bemaa kijɛ buru pidemu tɔitɔi dɛi kuu bemɛ kajuba gɛɛlu, kaa, Parisiɛnbe lee, Saduseyɛnbe lee deeru dɛi gi ga jugaabɛin. 13Kɔɔ onu nɛ, Yesu, Sesare Pilipe ana le gana diŋɛ gɔ nɛ yaabe. Wo jaŋu unrunw womɔ bɛrɛ ɔn gin’ selumu: «Inɛw, Inɛ Aini gɔi aai gɛɛɲu?» 14Be saa: «Inɛw gamuu ui Jan Batisei bulaa wɛi gɛɛɲu. Gamuu inɛ Ama titiyainɛ Elii gɛɛɲu. Gamuu iyaa Jeremii ma, inɛ Ama titiyainɛ wajai ma gɛɛɲu.» 15Yesu be bɛrɛ selumaa: «Nɛɛ, e mui aai ga sɛi.» 16Simɔ Piɛru aŋa womɔ saa: «Ama Yabanɛ Diyɛ tii, Ama ɔnmɔ Ii gɔ, ui.» 17Kɔɔ gin’ wo saa, Yesu wo le ɔn gin’ sɔi: «Jan ii Simɔ, Ama u yabu. Naran u sɔi kɔɔ, Adama ii turu kanran u bɛrɛ jugɔmɔlu. Kaa, mu Ba alagala nɛ daan gɔ, u bɛrɛ wo jugɔmu. 18Iyaa, mu kanran sɔɔ ɔn u bɛrɛ tagauwɔn, Piɛru, ui tibu tabai. Iyaa, tibu taba wogɔ kuu nɛ mu Ama inɛw mɔɔnu ma dadaanadɔn. Yinwunrun paŋa gɔ Ama inɛw mɔɔnu kɔɔ bɛrɛ kijɛ kanma gɔnrɔindolo. 19Mu alagala diinɛ taan ii gɔbe numɔ uwɔ nɛ kukunɔdɔn. Aduna nɛ kijɛ le yabalu u wɔɔ gɔ, alagala nɛ wogɔ le yabaidenɛ. Iyaa, aduna nɛ kijɛ le u yabaajɛ gɔ, alagala nɛ yaa wogɔ le yayabadɛin.» 20Kɔɔ onu nɛ, Yesu, jaŋu unrunw womɔ bɛrɛ ɛjii sɔwaa bemaa inɛ turu bɛrɛ kanran unruin Ama Yabanɛ Diyɛ tii gɔi ga taganɔu gi. 21Sɔɔ kɔɔ wo galu nɛ, Yesu, jaŋu unrunw womɔ bɛrɛ sɔɔ wo bɛrɛ dɔɔido daii tagai tɔlaabe: «Waajibi Jerusalɛmu yayaadɔn. Yahutunw inɛw naw gɔbe lee, Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee, mui ɛjii ɔhɔɲɔmɔdɛin. Waajibi mui dadaadɛin. Kaa bai taaniye gɔ mu bubulodɔn.» 22Yesu kɔɔ gin’ wo sɔwaa, Piɛru woi dɛiin dimɛraan goonaa, woi sɔɔi tɔlu: «Inɛw Baŋa, kɔɔ gin’ gɛɛnɔu. Ama, wogɔ nɛ ui yaba. Sɔɔ u gɛɛjɛ kɔɔ, u bɛrɛ biyɛidolo.» 23Kaa Yesu, Piɛru sibɛ go kigelemaa ɔn gin’ sɔi: «Setanu, genɛ ma nɛ dɔrɔ goo! U sɔɔ uwɔ le kinɛ ma yamalauwɔu. Ajubu uwɔ kɔɔ Ama bɛrɛ goolu. Kɔɔ Adama ii ajubui.» 24Kɔɔ onu nɛ, Yesu, jaŋu unrunw womɔ gɔbe le ɔn gin’ sɔi: «Inɛ aai kanran jaŋu ii mai bii ibɛɛ wɔɔ ye, wogɔ baŋa kuu womɔ naŋa ye, baga jai womɔ duiyi ye, mui wo dimiyɛnmɔ. 25Aduna ɔn dɛi inɛ kinrun unrunmɔ yabado ga wɔɔ gɔ, kɔɔbaŋa, aduna wɛɛido gɔ nɛ kinrun womɔ susuyodo. Kaa inɛ kinrun unrunmɔ mu dɛi pajaajɛ, wogɔ baŋa kinrun womɔ yayabado. 26Aduna ɔn puu uwɔi kanran, kinrun uwɔ suiyaai ye, niwɛn yasɛ ma? U waja kijɛ inge le kinrun uwɔ gɔ dɔrugu bɛɛdou? 27Inɛ Aini gɔ, bai turu, wo Ba dooro nɛ mɛlɛnkɛ womɔ gɔbe le wɛwɛɛdo. Wo inɛ tuturu puu bɛrɛ, kanran womɔ le kɛukɛu tutujɔdo. 28Mu naran go e bɛrɛ tagauwɔn, inɛw ɔn nɛ unwɔin gɔbe logoro nɛ, gamuu, Inɛ Aini gɔ, diinɛ womɔ le wo wɛɛnu iyelu go, yinwɛindenɛ.»

will be added

X\