MATIU 15

1Waaru kɔɔ le, Parisiɛnbe lee, Ama tɔɔru deerenw lee, Jerusalɛmu gowaa wiyaa, Yesui tɛmaa, wo bɛrɛ ɔn gin’ selumi: 2«Jaŋu unrunw uwɔ gɔbe, emɛ tirɛ anranw atɛmu gɔ inge dɛi yamalaɲu? Be jaa kayanu numɔ bemɛ aŋai jaan gin’ mɔŋɔɔnɛ.» 3Yesu aŋa bemɛ saa: «E kanran, inge dɛi Ama tɔɔru gɔ pajaatiyaa, atɛmu ebe giru kunaa yaauwɔi? 4Sabu Ama gi: “U ba lee, u na lee baba.” Iyaa, inɛ wo ba ma, wo na ma duyaajɛ, daiti gi. 5Kaa, e ɔn gin’ gɛɛjɛi: ‘U ba ma, u na ma bara ga, be bɛrɛ kijɛ u oboun jaan gɔ, u kijɛ wogɔ, Ama dɛi sin obu dɛiin wɔɔi gu ye, 6waja bei baralu kanran gaju wɔlɔ.’ Ama sɔɔ pajaatiyaa ye, dilɛ womɔ nɛ, atɛmu ebe bana e kunɔjɛ gɔ, kɔɔ woi. 7Ei inɛw aŋa lɛilɛigunwin. Inɛ Ama titiyainɛ Esayi e dɛi Ama bɛrɛ sɔɔ goi wo tɔŋu ɔn, bana ebe le sɛgɛraa wɔɔ: 8“Tɔgu ɔn aŋa le sai mui babajɛ. Kaa kinɛ womɔ mu le wagee wɔɔ. 9Be inɛw tɔɔru gɔ, tɔɔru ma gɔ woi giye, inɛw bɛrɛ wogɔi deereɲu. Wogɔ digɛu, mui babaɲu giye, kanran be kanranjɛ gɔbe puu, kanran niwɛn sɛlɛi.” 10Sɔɔ kɔɔ onu nɛ, Yesu mɔɔnu gɔi boonaa ɔn gin’ sɔi: «Sɔɔ ɔn ɛjii keŋi ye, paamu kanrain: 11Aŋa nɛ kijɛ yoojɛ, Ama sibɛ go inɛi lɔgɔjiyɛmu bɛɛlɛ. Kaa, aŋa nɛ sɔɔ goojɛ gɔ, Ama sibɛ go inɛi wo lɔgɔjiyɛmɔjɛ.» 12Yesu sɔɔ kɔɔ wo sɔwaa, jaŋu unrunw womɔ gɔbe wo bɛrɛ wiyaa ɔn gin’ sɔin: «Sɔɔ uwɔ kɔɔ, Parisiɛnbe kinɛ jinwɛnmaabe ga jugaabeu ma?» 13Yesu aŋa bemɛ saa: «Mu Ba alagala nɛ wɔɔ gɔ, tiun wo yibelu gɔbe puu mɔmu goonɔtiidɛin. 14Wogɔ digɛu bei yapajai. Be girumuwin. Kaa inɛw teeremɔuwɔin. Giruminɛ, giruminɛ waja teeremɔuwɔ ye, be lɛi kɛu bonɔ nɛ numɔ yoyoodɛin.» 15Piɛru, sɔɔ jeɲaa Yesu womaa taanrinyɛn kɔɔ tiyɛ unrunbe bɛrɛ taga gi. 16Yesu saa gi: «E yaa nimɛ kanran sɔɔ paamu kanraanlɛi ma? 17Inɛ, kijɛ wo kayajɛ puu, bɛrɛ nɛ yoojɛ. Bɛrɛ gɔ le digɛnu waja bain go yaajɛ ga paamaalɛi ma? 18Kaa, aŋa nɛ sɔɔ goojɛ gɔ, kinɛ nɛ goi ye wɛɛjɛ. Iyaa, wogɔ inɛwin Ama sibɛ go wo lɔgɔjiyɛmɔjɛ. 19Ajubu mɔɲu kinɛ nɛ too gɔ, inɛi suuraa ye inɛ wo daamɔjɛ. Inɛ bɛrɛ dimu wo dimiyɛnmɔjɛ, inɛi sala nɛ wo kunɔjɛ, inɛi gunyɔn wo gunyɔnmɔjɛ, inɛ bɛrɛ sɛɛrɛ kakalu wo goomɔjɛ, inɛ waja dɛi sɔɔ mɔɲu wo sɔɔmɔjɛ. 20Ama sibɛ go, inɛi kijɛ lɔgɔjiyɛmɔjɛ gɔ, kɔɔ woi. Kaa jaa kayanu, atɛmu ebe nɛ aŋai wɔɔ gin’ tee numɔ mɔŋɔnɛ giye, Ama sibɛ go inɛi lɔgɔjiyɛɛlɛ.» 21Kɔɔ onu nɛ, Yesu yalu kɔɔ nɛ gowaa, Tire ana lee, Sidɔn ana lee gana sibɛ go yai. 22Kaana gana yaanran turu, yalu kɔɔ nɛ yadaanbe. Wo Yesui wiyaa tɛmaa, mii ɛɛn le ɔn gin’ sɔi: «Mu Baŋa, Dawide tiruwɛnɛ gɔ, amasɔgɔ ma jugɔ. Jinrun, iyaa ma kuu nɛ dɛinyaan, ɛjii woi ɔɲɔmɔuwɔ. Wo bɛrɛ ɛjii nawin wɔɔ.» 23Kaa Yesu, sɔɔ turu kanran wo le saalu. Nɛɛ, jaŋu unrunw womɔ gɔbe genɛ womɔ nɛ dɔwaa, wo bɛrɛ ɔn gin’ gɛɛin: «Yaanran ɔn, onu emɛ nɛ siɲɛ gabaai. Woi baraa ye, wo yaamɔ.» 24Yesu saa: «Mui, Isɛrɛlu tɔgu nɛ peju manaa wɔin gɔbe sai dɛi tiin.» 25Kaa, yaanran gɔ iyaa Yesu giru nɛ wiyaa tuŋiyaan ɔn gin’ sɔi: «Mu Baŋa, mui bara.» 26Yesu saa, unrunw pana gɔ, jeɲɛ ye, iju unrunw bɛrɛ kamu tiiun jaanla gi. 27Yaanran gɔ saa: «Mu Baŋa, sɔɔ uwɔ gɔ narain. Kaa halu iju unrunw, be baŋa, jaa kayanu wo daannu, jaa kɛbɛlɛ bagajɛ gɔ turo ye, kakayaɲu.» 28Kɔɔ waaru le, Yesu aŋa womɔ saa gi: «U yaanran gagawu gaai sɛɛi de! Bana u dɛnɛjɛ gin’, Ama kunrin u bɛrɛ biyɛmɔ.» Waaru kɔɔ le tee, iyaa womɔ gɔ bajaai. 29Yesu iyaa yalu kɔɔ nɛ gowaa, Galile dibe diŋirun nɛ yai. Wo tetemɛ turu kuu nɛ ulaa dɛinyaanbe. 30Inɛw joo kɔɔ nɛ wɛi ye, woi tɛmɛubɛin. Be tegutegenw lee, girimuw lee, suguruduŋube lee, numɔ ma kubɔ ma sɛɛulain lee, iyaa jiungunw wajabe joo, wo bɛrɛ jɛɛlaabɛin. Be jiungunw gɔbe jɛɛlaa, Yesu kubɔsɔrɔ nɛ duunaabɛin. Yesu bei bajugaabe. 31Suguruduŋube, sɛɛu sɔɔ sɔɔubɛin. Inɛw numɔ ma kubɔ ma sɛɛula bɛin, sɛɛu biyaain. Tegutegenw, yoi sɛɛu yaaubɛin. Iyaa, girumuw, giri iyeubɛin. Inɛw, wogɔ iyaa, be bɛrɛ ɛjii maunɛ kanraanbe. Be, Isɛrɛlu tɔgu bɛɛnw Ama gɔi sɔmɔubɛin. 32Yesu, jaŋu unrunw womɔbei boonaa, ɔn gin’ sɔi: «Inɛw ɔnbe mu le be digi, bai taanu dɔwaai. Nɛɛ, pana bemɛ dogaai. Amasɔgɔ bemɛ mui yasɛ. Mu giyɛ le bei ginrun tii ibɛlaun. Koi laa ye oju nɛ bei giyɛ jajarado bibiyɛ.» 33Jaŋu unrunw gɔbe saa: «Yalu pana wɔlɔ ɔn nɛ, inɛw ɔnbe puu kijɛ kayaido emɛ yago bɛɛdɛin.» 34Kɔɔ gin’ be saa, Yesu bemaa buru aŋa sɛin ma gi. Be saa, buru sɔi lee, iiju uji gaila lee sɛin gin. 35Yesu, mɔɔnu gɔ womaa minɛ gɔ nɛ dɛinyɛn gi. 36Kɔɔ onu nɛ, wo buru sɔi gɔbe lee, iiju gɔbe lee jeɲaa, Amai birɛpoo tagaatiyaa, kabalaa, jaŋu unrunw womɔbei obu. Be mɔɔnu gɔ bɛrɛ gamalaabɛin. 37Be puu wogɔ kayaa, bei baabe. Kɛbɛlɛ waju gɔ be turaa, taju sɔi joo bee. 38Yaanw lee, unrunw lee tolo go, yalu kɔɔ nɛ anranw muɲu nai bee. 39Kɔɔ onu nɛ, Yesu, mɔɔnu gɔi tiyaatiyaa, diikoro gɔ nɛ yowaa, Magadan gana nɛ yai.

will be added

X\