MATIU 14

1Waaru wogɔ le, Herɔde, Galile gana sɛmɛginɛ gɔ, Yesu sɔɔ be sɔɔu ɛgaabe. Kɔɔ gin’ wo birɛbirɛnw womɔ bɛrɛ ɔn gin’ gi: 2«Kɔɔ tee, Jan Batisei! Woi bulaa wɛi. Wo kɔɔ dɛi birɛ taanrinyɛn birɛ bɛɛjɛ.» 3Herɔde, Jain aamaa, pagaa, kaju nɛ kunaabe. Jan womaa, wo suŋɔrɔn Pilipe yaanran Herɔdiadei wo jɛi gɔ jaanla gɛɛube dɛi wo woi kaju nɛ kunu. 5Herɔde Jain dai ibɛɛ bee. Kaa wo Yahutunw inɛwin liyɛube. Be Jain inɛ Ama titiyainɛi ga lugaa sɛbɛin. 6Nɛɛ, kɔɔ gin’ Herɔde narin bai gɔ, Herɔdiade iyaa jaa kayanw gɔbe giru nɛ gɔɔ gɔwaabe. Herɔde, iyaa gɔ le kinɛ womɔ aa gabaa, 7wo saba sabaa, iyaa gɔ womaa kijɛ wo selumɛido puu unrun wo bɛrɛ ohobodɔn gi. 8Iyaa gɔ, wo na tinwinrun keŋiyaan wiyaa, Jan Batise kuu gɔ polo ye, baɲa nɛ kunu ye, ɔn nɛ unrun bɛrɛ obo gi. 9Sɔɔ kɔɔ, ɔgɔnɛ kinɛ ɛjii jinwɛnmaabe. Kaa, inɛw wo boonu gɔbe puu giru nɛ wo iyaa gɔ le pui kunaa, saba sabaabe dɛi, kijɛ wo selumu gɔ obo ga tɔɔraabe. 10Wo inɛ tiyaa, kajuginrun nɛ yaa Jan kuu polomaabe. 11Kuu gɔ, baɲa nɛ kunaa jɛɛlaa, iyaa gɔ bɛrɛ be obaa, wo yaa wo na bɛrɛ jɛyaabe. 12Jan jaŋu unrunw wiyaa, yiun gɔ jeɲaa, yaa bojaabɛin. Kɔɔ onu nɛ, be sɔɔ bii gɔ puu Yesu bɛrɛ yaa tagaabɛin. 13Yesu sɔɔ kɔɔ ɛgaa, yalu wo bee gɔ nɛ gowaa, diikoro nɛ yowaa, yalu inɛ wɔlɔ nɛ yaai tɔlu. Kaa, inɛw wogɔ kibɛru ɛgaa, ana dɛin dɛin nɛ gowaa, dii diŋirun gɔ le digɛu, kubɔ le woi dimiyaanbɛin. 14Yesu, waaru diikoro gɔ nɛ wo goi le, mɔɔnu diyɛ iyaabe. Inɛw gɔ amasɔgɔ ɛjii woi aabe. Kɔɔ dɛi, wo jiungunw logoro bemɛ nɛ tobɛin gɔbe puu bajamaabe. 15Digɛnai wo sugaa, jaŋu unrunw gɔbe Yesu genɛ nɛ dɔwaa, ɔn gin’ sɔin: «Digɛ digiyɛuwɔ. Iyaa, yalu ɔn nɛ kijɛ kanma wɔlɔ. Wogɔ digɛu, mɔɔnu gɔi pajaa ye ana gɔbe nɛ yai ye, pana bemɛ be ɛbɛmɔ.» 16Yesu aŋa bemɛ saa gi: «Ana gɔbe nɛ be yaaun baalu. E kuu ebe le pana bei oboi.» 17Kaa, jaŋu unrunw gɔbe saa, buru numɔrɔn lee, iiju lɛi lee laa ye, unrunbe ɔn nɛ kijɛ kanma sɛnɛ gin. 18Yesu bemaa wogɔ unrun bɛrɛ jɛɛlɛ gi. 19Kɔɔ onu nɛ, wo bemaa inɛw gɔbei belu gɔ nɛ dɛinyɛnmɔ ga tɔɔraabe. Yesu, buru numɔrɔn gɔ lee, iiju lɛi gɔ lee jeɲaa, giri daa go dɛɛraa gɛlɛu, Amai birɛpoo tagaabe. Kɔɔ onu nɛ, wo buru gɔ kabalaa, jaŋu unrunw womɔ bɛrɛ obaabe. Be mɔɔnu gɔ bɛrɛ gamalaabɛin. 20Inɛw puu pana kayaa, bei baabe. Jaŋu unrunw gɔbe kɛbɛlɛ waju gɔ turaa be kanran, taju pɛli lɛisigɛ le joo bee. 21Kaa, inɛw buru kayin, yaanw lee, unrunw lee tolo go, anranw sai, inɛw muɲu numɔrɔn gin’ bee. 22Sɔɔ kɔɔ galau wo digɛu, Yesu, jaŋu unrunw womɔbei diikoro gɔ nɛ yoomaa, bemaa giru unrunmɔ nɛ dibe diŋirun waja go be galanu, unrun, mɔɔnu gɔi ginrun tiiti ye wɛɛdɔn gi. 23Kɔɔ gin’ mɔɔnu gɔ yaamaatiyaa, wo tetemɛ kuu nɛ dɛiin Ama gɛɛin ulu. Digɛ yai digiyɛ baa, wo, wo turu kɔɔ nɛ yabe. 24Waaru kɔɔ le, diikoro gɔ dibe logoro nɛ dɔwaayaabe. Kaa, ooɲɔ gɔ be le daii, ɛjii paŋa yasɛbe gɔ digɛu, diigunu diikoro gɔi ɛjii lagaube. 25Baayaara bɛruniyaan wo kanran, Yesu dii gɔ kuu nɛ yoi yaau, be sibɛ go wɛɛube. 26Jaŋu unrunw gɔbe dii nɛ yoi yaau wo wɔu iyaa, liyaa kinɛ manaa bɛin. Be, Yesui, inɛ kikinui ga ɛjii piiubɛin. 27Kaa, Yesu ɔgu kɛu be nɛ mii tiyaa gi: «Anrangaju kunɔi, mu Yesui, liyɛnɔugi.» 28Kɔɔ waaru le, Piɛru aŋa womɔ saa gi: «Inɛw Baŋa, naran go kɔɔ ui ye, maa dii gɔ kuu nɛ u bɛrɛ wɛɛ giye tɔɔrɔ.» 29Yesu saa womaa wɛɛ gi. Kɔɔ gin’ Piɛru diikoro gɔ nɛ gowaa, dii gɔ kuu nɛ Yesu bɛrɛ yaaube. 30Kaa, ooɲɔ gɔ waaru wo iye le, wo liyaai. Dii gɔ nɛ woi piriyeube gɔ digɛu, wo mii ɛɛn le Yesu bɛrɛ ɔn gin’ gɛin: «Inɛw Baŋa, mui yaba.» 31Ɔgu kɛu Yesu, numɔ unrunmɔ wajaraa, woi aa, ɔn gin’ wo le sɔi: «U inge dɛi liyiu? Gagawu uwɔ gaila.» 32Kɔɔ onu nɛ, be lɛi diikoro gɔ nɛ yowaabɛin. Yoou be digɛu, ooɲɔ gɔ dɛɛnrinyaain. 33Kɔɔ gin’ wo biyaa, inɛw wajunw diikoro gɔ nɛ tobɛin gɔbe, Yesu giru nɛ wiyaa tuŋiyaan ɔn gin’ sɔin: «Naran go, ui Ama Ainii.» 34Nɛɛ, be dibe gɔ kɛjaa taŋaa, Jenɛsarɛtu gana nɛ yaa iŋi. 35Gana gɔ bɛɛnw Yesui jugaa, yalu puu nɛ womaa wiyaai ga ginɛmaabɛin. Kɔɔ dɛi, inɛw jiungunw bemɛ puu wo bɛrɛ jɛɛlaabɛin. 36Be, wo bɛrɛ gɛnyaan, womaa, jiungunw gɔbei pajaa ye arugoi kinrun womɔ sai be tabamɔ gɛɛbɛin. Kɔɔ gin’ inɛw woi tabin gɔbe puu bajaain.

will be added

X\