MARUKA 9

1Kɔɔ gin’ giyaatiyaa, Yesu gimaa gi: «Mu naran go e bɛrɛ tagauwɔn, inɛw ɔn nɛ unwɔin gɔbe logoro nɛ, gamuu, Ama diinɛ gɔ, gɔnrɔn le wiyaa wo wɔnu iyelu go yinwɛindenɛ.» 2Sɔɔ kɔɔbe galu, bai kuloi dɔwaa wo kanran, Yesu, Piɛru lee, Jake lee, Jan lee dimɛraan, kokoo gabu turu kuu nɛ unu. Kokoo gɔ nɛ, bei laa ye, inɛ waja bele. Yesui kubɔ turu giru bemɛ nɛ duliyaai. 3Sɔi womɔ piluniyaan, ɛjii dooroube. Aduna nɛ kijɛ turu kanran sɔi kɔɔbe gin’ pilini bɛɛlɛ. 4Kɔɔ onu nɛ, jaŋu unrunw gɔbe be yɛnaa, inɛ Ama titiyainɛ Eli lee, Mɔise lee, Yesu le sɔɔ sɔɔu kohiŋi. 5Jaŋu unrunw gɔbe wogɔ iyaa, ɛjii liyaabɛin. Piɛru liyaa, sɔɔ waja sɔɔɲu bɛɛlu kanraan, Yesu le gi: «Jaŋudeerenɛ, yalu ɔn nɛ biyɛ ga ɛjii wɔɔ. Kuru taanu kuraa ye, turu uwɔi, turu Mɔise mɔi, turu Eli mɔi bojomɔi.» 7Kɔɔ gin’ kulumɔ turu wiyaa, bei dɛbaajɛ. Kulumɔ gɔ nɛ, mii ɛgɛmaabe: «Ɔn Aini ibɛ ma gɔ woi. Sɔɔ womɔ ɛjii keŋiyɛin.» 8Mii kɔɔ goou wo digɛu, jaŋu unrunw gɔbe benɛ benɛ yɛnaa, Yesui laa ye, inɛ kanma iyenɛ. 9Kokoo gɔ nɛ gowaa sugou, Yesu be le ɔn gin’ sɔi: «Inɛ Aini gɔ yinwɛn ye, wo buloido baa, inɛ turu bɛrɛ kanran, kijɛ e iye gɔ sɔɔ sɔɔnɔugi.» 10Jaŋu unrunw gɔbe sɔɔ womɔ yabaabɛin. Kaa be tunmɔi selumɛu kijɛ be gɛɛbe: «Yinwɛn ye bubulodɔn wo gɛɛjɛ gɔ, tiyɛ gɔ ingei?» 11Sɔɔ kɔɔ sugaa wo yaa, jaŋu unrunw taanu gɔbe selumu ɔn gin’ Yesu bɛrɛ selumi: «Inge dɛi Ama tɔɔru deerenw gɔbe, Ama Yabanɛ Diyɛ tii gɔ wɛɛmɔ nɛ, Eli laa pilemɛ ye wɛɛdo gɛɛɲu?» 12Yesu aŋa bemɛ saa gi: «Narain, Eli wɛi ye kijɛ puu wo yegereun jaain wɔɔ. Nɛɛ, kɔɔi ye, inge dɛi Inɛ Aini gɔ ɛjii ɔhɔɲɔdo, woi ihibiliyɛdɛin ga Ama Dɔn nɛ tɔŋaaɲu? 13Kaa mu e bɛrɛ tagauwɔn, Eli wiyaa galaai. Ama Dɔn nɛ wo dɛi bana tɔŋaaɲu gin’, inɛw kijɛ be nawan wo bɛrɛ kanraanbɛin.» 14Yesu lee, jaŋu unrunw taanu gɔbe lee, jaŋu unrunw wajunw genɛ nɛ waaru be dɔi le, inɛw joo bei gɔŋaa yagɛlɛin ga iyaabɛin. Ama tɔɔru deerenw, jaŋu unrunw gɔbe le jiiru jiireubɛin. 15Inɛw, Yesui iyeu digɛu be bɛrɛ maunɛ kanraanbe. Be jɔbaa wiyaa woi poonaabɛin. 16Yesu, jaŋu unrunw womɔ gɔbe bɛrɛ selumaa gi: «E wooi, jiiru gɔ, inge kuu nɛ goi?» 17Mɔɔnu gɔ logoro nɛ ainɛ turu saa gi: «Jaŋudeerenɛ, mu ii mai u bɛrɛ jɛɛlun. Jinrun wo bɛrɛ sɔɔ sɔɔmɔɔlɛ kuu womɔ nɛ yadaan. 18Yalu inge nɛi kanran, jinrun gɔ, kuu womɔ nɛ yanwunrinyaan ye, woi minɛ nɛ jara duunɔjɛ. Ii gɔ aŋa nɛ, yugɔrɔ gogoojɛ. Wo tɔnrɔn womɔ tɛtɛnwɛnjɛ. Iyaa goju womɔ puu sanaai ye biyɛjɛ. Mu jaŋu unrunw uwɔbe bɛrɛ jinrun gɔ ii ma kuu nɛ nanu goonɔ ga gɛnyaanbɔn. Kaa be kanraan bɛɛnɛ.» 19Yesu be le sɔwaa gi: «Aa! E inɛw gagawu sɛnɛ gɔbe, waaru yagɔ baa e le mu biyɛun jaan? Waaru yagɔ baa ei muyɔndɔn! Ii gɔ mu bɛrɛ jɛɛlɛi.» 20Be ii gɔ wo bɛrɛ jɛɛlaabɛin. Jinrun gɔ Yesui iyeu digɛu, ii gɔi ɛjii jigemaa wo kanran, ii gɔ minɛ nɛ numaa sugaa binirinyɛunbe. Aŋa womɔ nɛ yugɔrɔ pudɔ pudɔ bee. 21Yesu, ii gɔ ba bɛrɛ selumaa, womaa jiun gɔ waaru yagɔ le baa ii gɔ bɛrɛ tɔlu ma gi. Ii ba gɔ saa: «Jiun gɔ dagi womɔ le baa wo bɛrɛ tɔlu. 22Kubɔ joo, jinrun gɔ ii gɔi daado giye, yaun nɛ ma, dii nɛ ma woi kunɔjɛ. Nɛɛ u gɔgɔnrɔngɔu ye, amasɔgɔ emɛ jugɔ ye, emi bara.» 23Yesu ɔn gin’ sai: «Gɔgɔnrɔngɔn ye gu ma! Inɛ mu le gawaajɛ bɛrɛ, kijɛ puu kanrun bɛbɛɛmɔdo.» 24Ainɛ gɔ ɔgu kɛu saa gi: «Mu gawaa wɔun. Kaa nimɛ kanran, gagawu ma gɔ baalu gɔ dɛi, mui bara.» 25Inɛw jɔbɔ wɛi wɛi, woi gɔŋɔubɛin ga Yesu iyaabe. Wo jinrun gɔi ɔn gin’ ɛjii ganwun: «Ii ɔn bɛrɛ jinrun sɔɔ sɔɔmɔɔlɛ, suguru ɛgɛmɔɔlɛ wɔɔ gɔ, mu u bɛrɛ tɔɔrɔuwɔn: Ii gɔ kuu nɛ goo. Asuu, waja kuu womɔ nɛ dɛinyɛnnɔu.» 26Jinrun gɔ mii ɛɛn le pii piyaa, ii gɔi ɛjii jigemaatiyaa kuu womɔ nɛ yingoi. Ii gɔ yinwaan gin’ bee. Kɔɔ dɛi, inɛw joo womaa naran go yinwaain gɛɛubɛin. 27Kaa Yesu, numɔ womɔ aa, woi jeɲaa wo ingelemaa, wo sɛɛu ingelaa iŋiyaanbe. 28Yesu pilemaa ginrun wiyaa, jaŋu unrunw womɔ be wooi sai wɔu, be wo bɛrɛ ɔn gin’ selumi: «Emɛ inge dɛi jinrun gɔ nanaa bɛɛnɛ kanrin?» 29Yesu aŋa bemɛ saa: «Jinrun kɔɔ tunmɔ gɔ, amagɛɛn le sai nana goonɔ bɛɛmɔjɛ.» 30Yesu lee, jaŋu unrunw womɔ lee, be yalu kɔɔ nɛ gowaa, Galile gana gɔ kɛjaa taŋaabɛin. Wo dɛiin jaŋu unrunw womɔi deeru ibɛi bee dɛi, oju nɛ unruin tagara ga yababele. Jaŋu unrunw womɔ le ɔn gin’ gɛɛbe: «Inɛ Aini gɔi inɛw numɔ nɛ kukunɔdɛin. Be woi dadaadɛin. Kaa woi daaidɛin bai taaniye gɔ, wo bulo ye gogoodo.» 32Kaa jaŋu unrunw gɔbe sɔɔ kɔɔ paamu kanranbenɛ. Iyaa tiyɛ gɔ Yesu bɛrɛ selumɛ ga liyɛubɛin. 33Be kɔɔ gin’ Kapɛrunaumu ana nɛ dɔin. Waaru ginrun be yoi le, Yesu, jaŋu unrunw womɔ bɛrɛ selumaa bemaa oju nɛ wɛɛu, sɔɔ inge kuu nɛ jiiru jiireubɛin ma gi. 34Kaa jaŋu unrunw gɔbe oju nɛ, logoro bemɛ nɛ inɛ diyɛ gɔ aai ma, jiireubɛin. Wogɔ digɛu, be aŋa womɔ saanɛ. 35Yesu yaa dɛinyaan bei boonaabe. Genɛ womɔ nɛ be wiyaa, wo be le sɔwaa gi: «Inɛ aai kanran, inɛ diyɛi bii ibɛɛ wɔɔ ye, wogɔ baŋa, wo dagi gin’ bii ye, inɛw puu birɛbirɛnɛi biyɛ.» 36Kɔɔ gin’ sɔwaatiyaa, Yesu, ii dagi turu logoro bemɛ nɛ jɛɛlaa iŋiyɛnmaa, ii gɔi amugiyaa wɔu, be le ɔn gin’ sɔi: 37«Inɛ aai kanran boi ma le ii dagi ɔn tunmɔi ɛjii sɛgɛraajɛ ye, kɔɔbaŋa mui sɛguru. Iyaa, inɛ mui sɛgɛraajɛ, mui sai sɛgɛrɛlu. Kaa mui tiinɛ gɔi yaa sɛgɛraajɛ.» 38Yesu kɔɔ gin’ wo giyaa, Jan gowaa womaa, ainɛ turu boi womɔ le jinrun inɛw kuu nɛ nanau wo wɔu, unrunbe iyaabɛin wa. Kaa inɛ gɔ unrunbe le digɛla gɔ dɛi, unrunbe woi tɛŋaabɛin wa. 39Yesu saa gi: «Inɛ aai kanran, boi ma le taanrinyɛn birɛ birɛnu digɛnu, boi mɔɲu ma yalu wogɔ nɛ sɔi bɛɛlɛ. Wogɔ digɛu woi tɛŋɛnɔugi. 40Inɛ emɛ le jaŋui laa gɔ, emɛ bɔɔi. 41Iyaa inɛ aai kanran, Kirisitoi e dimɛ gɔ dɛi, e bɛrɛ dii diikɔrɔi turu kɔbaa obaajɛ ye, mu naran go e bɛrɛ tagauwɔn, inɛ kɔɔbaŋa tujɔ womɔ bɛbɛɛdo.» 42Yesu gimaa gi: «Inɛ aai kanran, inɛ mu le gawaa wɔɔ turu, halu ii dagi ɔn tunmɔi kanran, kinɛ womɔ yanwanmaa, mu le gawaa wo bee gɔ wo kɔɔlɔmɔmɔjɛ dɛi, wogɔ baŋa, yuu na diyɛ nɛ suŋu kɔmaa ye kɔkɔlɔ womɔ nɛ yaa pagaa ye, nɛudii nɛ woi kamaa kuni wo bɛrɛ ire. 43Numɔ uwɔ dɛi, ui hakɛ nɛ yoodo ga wɔɔ ye, numɔ gɔ poloti. Numɔ lɛi le yaun asuu yinwɛɛnlɛ gɔ nɛ yoo dɛi, numɔ turu le wɔnu, ɔnmɔsɔgɔ nɛ u yoi ire. [ 44Sabu, “Yalu wogɔ susuu gɔbe asuu yinwɛɛnnɛ, yaun konɛ wɔɔ gɔ asuu daiyɛɛlɛ.”] 45Kubɔ uwɔ dɛi, ui hakɛ nɛ yoodo ga wɔɔ ye, kubɔ gɔ poloti. Kubɔ lɛi le yaun asuu yinwɛɛnlɛ gɔ nɛ yoo dɛi, kubɔ turu le wɔnu, ɔnmɔsɔgɔ nɛ u yoi ire. [ 46Sabu, “Yalu wogɔ susuu gɔbe asuu yinwɛɛnnɛ, yaun konɛ wɔɔ gɔ asuu daiyɛɛlɛ.”] 47Iyaa, giri uwɔ dɛi, ui hakɛ nɛ yoodo ga wɔɔ ye, giri gɔ wɔgɔrɔti. Giri lɛi le wɔnu, yaun asuu yinwɛɛnlɛ gɔ nɛ yoo dɛi, giri turu le wɔnu, Ama diinɛ nɛ yoo ire. 48Sabu “Yalu wogɔ susuu gɔbe asuu yinwɛɛnnɛ, yaun konɛ wɔɔ gɔ asuu daiyɛɛlɛ.” 49Sabu inɛw wooi bɛrɛ yaun gɔ nɛu gin’ bibiyɛdo. 50«Nɛu kijɛ ɛjui ga emɛ puu igii wɔin. Kaa ɛɛlu womɔ manaai ye, niwɛn tolo. Ɛɛlu womɔ pilemu ye wo bɛrɛ obo bɛɛmɔidolo. Kodigɛu nɛu, e nɛ wo toiyomɔi. Iyaa tunmɔ le jamu le biyɛi.»

will be added

X\