MARUKA 8

1Waaru kɔɔbe le inɛw joo iyaa Yesu genɛ nɛ mɔrinyaanbɛin. Inɛw kɔɔbe pana sɛbenɛ gɔ digɛu, wo jaŋu unrunw womɔi giru womɔ nɛ boonaa jɛɛlaa, be le ɔn gin’ sɔi: 2«Inɛw ɔnbe mu le be digi, bai taanu dɔwaai. Nɛɛ pana bemɛ dogaai. Amasɔgɔ bemɛ mui yasɛ. 3Be logoro nɛ joo yalu wage nɛ gowaa wɛin. Wogɔ digɛu, giyɛ le bei ginrun tiyaajɔn ye, oju nɛ giyɛ bei jajarado.» 4Jaŋu unrunw gɔbe aŋa womɔ saa gin: «Olusolo ɔn nɛ, inɛw ɔn puu kijɛ kayaido, emɛ yago bɛɛdɛin?» 5Yesu bemaa buru aŋa sɛin ma gi. Be saa, unrunbe buru sɔi sɛin gin. 6Yesu, mɔɔnu gɔbe womaa minɛ nɛ dɛinyɛn gi. Kɔɔ onu nɛ, wo buru sɔi gɔbe jeɲaa, Amai birɛpoo tagaatiyaa, buru gɔbe kabalaa, jaŋu unrunw womɔ bɛrɛ obaa, bemaa inɛw bɛrɛ gamala gi. Be buru gɔ inɛw bɛrɛ obaabɛin. 7Be iiju uji uji gaila kanran yasɛbɛin. Yesu, iiju gɔbe dɛi Amai birɛpoo tagaa, bemaa wogɔ kanran inɛw bɛrɛ gamala gi. 8Inɛw, wogɔ kayaa, bei baabe. Jaŋu unrunw gɔbe kɛbɛlɛ waju gɔ turaa be jɛɛlaa, taju sɔi le jowaabe. 9Kaa, inɛw kɔɔ nɛ bɛin, anranw sai inɛ muɲu nai gin’ bee. Kɔɔ onu nɛ, Yesu, inɛw gɔbei ginrun tiiu digɛu, 10jaŋu unrunw womɔ be wooi diikoro nɛ yowaa, Dalumanuta gana go yain. 11Dalumanuta gana nɛ be dɔwaa, Parisiɛnbe wiyaa, Yesu le jiiru jiirei tɔlin. Be Yesui suburu ibɛɛ bɛin. Wogɔ digɛu, be womaa Ama woi tii ye, unrunbe bɛrɛ wogɔ sɛɛrɛ, taanrinyɛn Ama bɛrɛ goi ye wɛɛjɛ le tagara gin. 12Yesu ninu anran ɛjii ninaatiyaa, ɔn gin’ aŋa bemɛ sai: «E, kanɛ inɛw ɔnbe, inge dɛi taanrinyɛn waja iye nawain. Mu naran go e bɛrɛ tagauwɔn, taanrinyɛn turu kanran kanrun ye, ei tagaraidenɛ.» 13Kɔɔ gin’ giyaatiyaa, Yesu bei pajaa, diikoro gɔ nɛ yowaa dibe diŋirun waja go galu. 14Dalumanuta gana nɛ waaru be goobe le, jaŋu unrunw gɔbe buru jeɲɛ ga naŋaai. Diikoro gɔ nɛ buru be le waju, buru koturu sai bee. 15Yesu ɔn gin’ bei tinwinrun: «Parisiɛnbe lee, Ɔgɔnɛ Herɔde lee, kijɛ buru pidemu bemɛ gɔ dɛi kuu ebe kajubai.» 16Be tunmɔ le jiiraa, buru sɛlɛ unrunbe wɔɔ gɔ dɛi, womaa sɔɔ kɔɔ sɔɔjɛ gin. 17Tunmɔ le jiiru jiireu be wɔu, Yesu soo biyaa, ɔn gin’ be le gi: «E inge dɛi ajubau, maa buru sɛlɛ e wɔɔ gɔ dɛi sɔɔjɛ gɛɛuwɔi? Kɔɔi ye e nimɛ kanran paamu kanranli ma? Hakilɛ sɛlɛi ma? Kinɛ ebe ɛɛin wɔɔ! 18E giri yasɛi, giri iyeelɛi yinwɔi ma? Suguru yatoi, suguru ɛgɛɛlɛi yinwɔi ma? Kɔɔi ye, e sɔɔ mu kanrun gɔbe naŋaai ma? 19Waaru buru numɔrɔn inɛw muɲu numɔrɔn bɛrɛ mu gamulu le, e buru waju taju aŋa jɛɛli?» Be saa, buru waju taju pɛli lɛisigɛ jɛɛlin gin. 20«Iyaa waaru buru sɔi inɛw muɲu nai bɛrɛ mu gamulu le, e buru waju taju diyɛ aŋa jɛɛli?» Be saa taju sɔi jɛɛlin gin. 21Yesu gimaa be le ɔn gin’ gi: «Nimɛ kanran e paamu kanranli ma?» 22Yesu lee, jaŋu unrunw womɔ lee, dibe gɔ kɛjaa taŋaa, Bɛtusayida ana nɛ dɔin. Inɛw, ainɛ giruminɛ turu Yesu bɛrɛ jɛɛlaa, wo bɛrɛ gɛnyaan, womaa woi tabu ye bajamɔ gin. 23Yesu, giruminɛ gɔ numɔ aa, woi dimɛraan, ginrun onu go yai. Wo ainɛ gɔ giri nɛ yuguja paraatiyaa, kuu womɔ nɛ numɔ yaŋaraan, wo bɛrɛ ɔn gin’ selumu: «Kijɛ u iyejɛ yɔɔ ma?» 24Giruminɛ gɔ giri womɔ gɔmaa gɛlɛu, saa: «Ɔnhɔn! Mu inɛw iyeuwɔn. Inɛw gɔ tiun gin’ wɔin. Kaa yoi yaauwɔin.» 25Kɔɔ gin’ wo saa, Yesu pilemaa ainɛ gɔ giri wo tabaa, giri womɔ sɛɛu bajaai. Wo giri weje weje iyeube. 26Ainɛ gɔi bajugaatiyaa, Yesu woi ginrun tiiu womaa ana kɔlɔ gɔ le galanɔu gi. 27Kɔɔ onu nɛ, Yesu lee, jaŋu unrunw womɔ lee, Sɛmɛginɛ Pilipe ana daanu, Sesare Pilipe gɛɛɲu sibɛ go ana wɔin gɔbe nɛ yain. Oju nɛ yaau wɔu, Yesu, jaŋu unrunw womɔ bɛrɛ selumaa gi: «Inɛw mui inɛ aai gɛɛɲu?» 28Be saa: «Inɛw gamuu ui Jan Batisei bulaa wɛi gɛɛɲu. Gamuu, uwaa inɛ Ama titiyainɛ Elii gɛɛɲu. Gamuu iyaa, uwaa inɛw Ama titiyaanw logoro nɛ, koturui gɛɛɲu.» 29Yesu gimaa be bɛrɛ ɔn gin’ selumu: «Nɛɛ, e mui aai ga sɛi?» Piɛru saa: «Ama Yabanɛ Diyɛ tii gɔ ui.» 30Piɛru kɔɔ gin’ wo saa, Yesu, jaŋu unrunw womɔ bemaa sɔɔ kɔɔ inɛ turu bɛrɛ kanran jugɔmɔnɔu gi. 31Kɔɔ onu nɛ, Yesu, jaŋu unrunw womɔ bɛrɛ ɔn gin’ sɔɔi tɔlu: «Inɛ Aini gɔ waajibi ɔɲɔmu joo bɛbɛɛdo. Yahutunw inɛw naw gɔbe lee, Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee wo le yabaidenɛ. Waajibi woi dadaadɛin. Kaa bai taaniye gɔ wo bubulodo.» 32Yesu, jaŋu unrunw gɔbe bɛrɛ sɔɔ kɔɔ daii sɔɔube dɛi, Piɛru woi dɛiin dimɛraan goonaa, woi sɔɔi tɔlu. 33Yesu, jaŋu unrunw womɔ sibɛ go kigelemaa, bei yɛnɛu, Piɛru le ɔn gin’ ɛjii sɔi: «Setanu, genɛ ma nɛ dɔrɔ goo! Ajubu uwɔ kɔɔ Ama bɛrɛ goolu. Kɔɔ Adama ii ajubui.» 34Kɔɔ gin’ wo le sɔwaatiyaa, Yesu, jaŋu unrunw womɔ lee, inɛw joo kɔɔ nɛ bɛin gɔbe lee boonaa, be le sɔwaa gi: «Inɛ aai kanran, jaŋu ii mai bii ibɛɛ wɔɔ ye, wogɔ baŋa kuu womɔ naŋa ye, baga jai womɔ duiyi ye, mui wo dimiyɛnmɔ. 35Aduna ɔn dɛi inɛ kinrun unrunmɔ yabado ga wɔɔ gɔ, kɔɔbaŋa, aduna wɛɛido gɔ nɛ kinrun womɔ susuyodo. Kaa inɛ kinrun unrunmɔ mu lee, Kibɛru Ɛju mu jɛɛlu gɔ lee dɛi pajaajɛ, wogɔ baŋa kinrun womɔ yayabado. 36Aduna ɔn puu uwɔi kanran, kinrun uwɔ suiyaai ye, niwɛn yasɛ ma? 37U waja kijɛ inge le kinrun uwɔ gɔ dɔrugu bɛɛdou? 38Mu lee, sɔɔ mabe lee dɛi, inɛ aai kanran, kanɛ inɛw Ama sibɛ go sɔɔ turu nɛ iŋɛlain, inɛw hakɛ kanranw ɔnbe giru nɛ dɔgɔ woi ahaajɛ ye, Inɛ Aini gɔ, wo Ba dooro nɛ mɛlɛnkɛ ɛjaa wɔin gɔbe le waaru wo wiyaajɛ, inɛ wogɔ dɛi dɔgɔ woi ahaado.»

will be added

X\