MARUKA 7

1Parisiɛnbe lee, Ama tɔɔru deerenw gamuu lee, Jerusalɛmu ana nɛ gowaa, Yesu genɛ nɛ wiyaa mɔrinyaanbɛin. 2Yesu jaŋu unrunw gamuu numɔ lɔgɔgu le jaa kayau be wɔu, Parisiɛn gɔbe iyaabɛin. Tiyɛ gɔ Yahutunw oju atɛmu le kɛukɛu mɔŋɔnɛ. 3Parisiɛn gɔbe lee, Yahutunw wajunw gɔbe lee be tirɛ anranw atɛmu gɔ ɛjii digiyɛubɛin. Be numɔ aŋai jaan gin’ ɛjii mɔŋɔnɛ ye, jaa kayaanɛ. 4Iyaa, ibɛ gowaa wiyaain ye, be dii iniyɛnlu go pana kayaanɛ. Yahutunw, atɛmu kɔɔ tunmɔ joo yagɛlɛbɛin. Be diikɔrɔi dii nɔi lee, dii toroi bemɛ lee, iyaa inrun toroi bemɛ lee aŋai mɔŋɔɲu atɛmu yasɛbɛin. 5Kɔɔ dɛi Parisiɛn gɔbe lee, Ama tɔɔru deerenw gɔbe lee, Yesu jaŋu unrunw, atɛmu le kɛukɛu numɔ mɔŋɔlu go jaa kayau be wɔu iyaa, Yesu bɛrɛ wiyaa ɔn gin’ selumi: «Jaŋu unrunw uwɔ gɔbe, inge dɛi emɛ tirɛ anranw atɛmu gɔ gɛliyɛlu kanraan, numɔ lɔgɔgu le jaa kayaɲu?» 6Yesu aŋa bemɛ saa gi: «Inɛ Ama titiyainɛ Esayi Ama bɛrɛ sɔɔ goi wo tɔŋu gɔ lee, kanran ebe lee, ɛjii sɛgɛraa wɔɔ. E inɛw aŋa lɛilɛigunwin. Kɔɔ dɛi e dɛi Esayi, Ama ɔn gin’ gi ga tɔŋu: “Tɔgu ɔn aŋa le sai mui babajɛ. Kaa kinɛ womɔ mu le wagee wɔɔ. 7Be inɛw tɔɔru gɔ, tɔɔru ma gɔ woi giye, inɛw bɛrɛ wogɔi deereɲu. Wogɔ digɛu, mui babaɲu giye, kanran be kanranjɛ gɔbe puu, kanran niwɛn sɛlɛi.” 8Yesu gimaa bemaa Esayi aŋai tɔŋu gin’ tee, Ama tɔɔru gɔbe pajaatiyaa, inɛw bɛrɛ tɔɔru be bɛi gɔ, wogɔi gɛlɛin gi. 9Yesu iyaa ɔn gin’ sɔi: «Ama tɔɔru gɔbe dulomɔti ye, wogɔ dilɛ nɛ, tɔɔru ebe kunɔ ga, e wogɔ birɛ gɔ ɛjii birɛ bɛbɛɛjɛi. 10Yɛnɛi! Ama, tɔɔru womɔ Mɔisei obaa, ii womaa, wo ba lee, wo na lee baba gi. Iyaa, inɛ wo ba ma, wo na ma duyaajɛ, daiti gi. 11Kaa e, inɛ womaa wo ba ma, wo na ma bara giye, kijɛ bei oboun jaan gɔ, kijɛ wogɔ, Kɔrubain gi ye, tiyɛ gɔ Ama dɛi sin obu dɛiin wɔɔi, 12e inɛ wogɔ, waja wo ba ma, wo na ma baru bɛɛlɛ gɛɛjɛi. Iyaa, e inɛw bɛrɛ kɔɔ gin’ yinkanranmɔjɛi. 13Ama sɔɔ pajaatiyaa ye, atɛmu ebe, wogɔ dilɛ nɛ bana e kunɔjɛ gɔ kɔɔ woi. Sɔɔ joo nɛ e kunrin kanranjɛi.» 14Kɔɔ onu nɛ, Yesu pilemaa mɔɔnu gɔi boonaa, ɔn gin’ sɔi: «E wooi puu mui ɛjii keŋiyɛin. Sɔɔ ɔn paamu kanrain. 15Bain goi ye inɛ kɔlɔ nɛ kijɛ yoojɛ, Ama sibɛ go woi lɔgɔjiyɛmu bɛɛlɛ. Kaa, kinɛ womɔ nɛ kijɛ goojɛ gɔ, Ama sibɛ go woi lɔgɔjiyɛmɔjɛ. [ 16Inɛ suguru ɛhɛgu sɛɛ, wo sɔɔ gɔ keŋiyɛn.]» 17Nɛɛ, waaru mɔɔnu gɔ le kabiyaa, ginrun be yai le, jaŋu unrunw gɔbe Yesu womaa sɔɔ wo sɔi gɔ, tiyɛ womɔ ingei ma gin. 18Yesu aŋa bemɛ saa gi: «E kanran sɔɔ paamu kanraanlɛi ma? Kayɛrɛ emɛ kayajɛ dɛi, Ama sibɛ go emi lɔgɔjiyaai gɛɛ bɛɛmɔɔlɛ. 19Kayɛrɛ kinɛ nɛ yoolɛ kaa bɛrɛ nɛ yaajɛ. Bɛrɛ gɔ le digɛnu waja bain go yaajɛ.» Kayɛrɛ puu kaya bɛbɛɛmɔjɛ tagara ga, Yesu sɔɔ kɔɔ wogɔ dɛi gi. 20Yesu iyaa gimaa gi: «Kinɛ nɛ kijɛ goojɛ, Ama sibɛ go inɛi wo lɔgɔjiyɛmɔjɛ. 21Ajubu mɔɲu kinɛ nɛ too gɔ, inɛi suuraa ye sala nɛ wo kunɔjɛ, inɛi gunyɔn wo gunyɔnmɔjɛ, inɛ bɛrɛ inɛi wo daamɔjɛ, 22inɛ bɛrɛ dimu wo dimiyɛnmɔjɛ, inɛ waja kijɛ wo daariyɛmɔjɛ, inɛi kanran mɔɲu wo kanranmɔjɛ, inɛ bɛrɛ inɛ wajai wo lelemɔjɛ, inɛi kuu sɛlɛ nɛ wo kunɔjɛ, inɛi ele nɛ wo kunɔjɛ, inɛ waja dɛi sɔɔ mɔɲu wo sɔɔmɔjɛ, inɛi kuu ulo nɛ wo kunɔjɛ, iyaa inɛ bɛrɛ bomɔ kanran wo kanranmɔjɛ. 23Sɔɔ mɔɲu kɔɔbe puu kinɛ nɛ goi ye, inɛi Ama sibɛ go be lɔgɔjiyɛmɔjɛ.» 24Yesu yalu kɔɔ nɛ gowaa, Tire ana sibɛ go yai. Wo inɛw bɛrɛ, wo wiyaai ga jugɔmu ibɛla bee gɔ digɛu, ginrun turu nɛ yowaa baŋabe. Kaa, wo inɛw le baŋiyaan bɛɛlu. 25Yaanran Yahutunw tɔgui laa turu kɔɔ nɛ yabe. Wo Penisi gana bɛɛnnɛi. Penisi wogɔ, Siri laamu nɛ too. Yaanran kɔɔ, iyaa womɔ kuu nɛ jinrun yadaanbe. Kɔɔ dɛi Yesu wiyaai ga ɛgɛu digɛu, wo wiyaa, giru womɔ nɛ tuŋiyaan, wo bɛrɛ gɛnyaan, womaa iyaa unrunmɔ kuu nɛ jinrun gɔ nana goonɔ gi. 27Yesu ɔn gin’ aŋa womɔ sai: «Unrunw pana gɔ, jeɲɛ ye, iju unrunw bɛrɛ kamu tiiun jaanla. Unrunw gɔbei laa pana wo baamɔ.» 28Yaanran gɔ saa gi: «Mu Baŋa, sɔɔ uwɔ gɔ narain. Kaa halu, iju unrunw, unrunw jaa kayanu be wɔnu, jaa kɛbɛlɛ bagajɛ gɔbe, wogɔ turo ye, koi kayaɲu.» 29Yesu saa gi: «Aŋasaara uwɔ ɛjii wɔɔ. Jinrun gɔ, iyaa uwɔ kuu nɛ gowaai. Koi, ginrun yaa.» 30Yaanran gɔ gowaa, ginrun yaabe. Wo, iyaa womɔ teenu nɛ wo diiun tɛmu. Jinrun gɔ kuu womɔ nɛ gowaayaabe. 31Yesu, Tire ana sibɛ nɛ gowaa, Sidɔn ana le digɛu, Ana Pɛlu gana gɔ kɛjaa taŋaa, Galile dibe sibɛ go yai. 32Kɔɔ nɛ wo dɔwaa, inɛw, ainɛ suguruduŋu, sɔɔ gaai sɔɔ bɛɛlɛ turu wo bɛrɛ jɛɛlaa womaa numɔ kuu womɔ nɛ yaŋaran ye woi bajamɔ ga wo bɛrɛ gɛnyin. 33Yesu, ainɛ gɔi dimɛraan, be lɛi sai inɛw le wagee yain. Wo, numɔ ii unrunmɔ ainɛ gɔ suguru nɛ kunaa goonaa, numɔ unrunmɔ nɛ yuguja tɔwaa, ainɛ gɔ ninɛ kole tabu. 34Kɔɔ onu nɛ, wo daa go dogiyaa wɔu, ninu anran ninaatiyaa ɔn gin’ sɔi: «Epata!» Tiyɛ gɔ, ui duŋɔrɔn. 35Kɔɔ gin’ gɛɛu wo digɛu, ainɛ gɔ suguru duŋɔraain. Ninɛ womɔ kanran pagalaai. Wo sɔɔ sɛɛu sɔɔi tɔlu. 36Yesu, inɛw puu bemaa sɔɔ gɔ inɛ kanma bɛrɛ taganɔu gi. Kaa, sɔɔ gɔ ginɛmɔnɔu giyaa wo jɛ ye, bemɛ, ginɛmu gɔ bariyɛ le bariyɛjɛ. 37Sɔɔ gɔ halu bei maunɛ kanrun. Be Yesu dɛi sɔɔu: «Aa! Yesu ɔn, inɛ suguruduŋu suguru kanran koi duŋɔrɔnjɛ. Iyaa, inɛ sɔɔ sɔɔ bɛɛlɛ bɛrɛ kanran sɔɔ koi sɔɔmɔjɛ. Sɔɔ wo kanranjɛ puu ɛjii wɔɔ.»

will be added

X\